Ko Te Mālohi ʼa Te Palalau
“Ko he loto ʼe mamahi ʼuhi ko te tuʼania, ʼe ko he palalau ʼe lelei ʼe feala ke ina fakamokomoko!”—Tāʼaga Lea 12:25, Knox.
KO TE kau Kilisitiano ʼe mole nātou hāo mai te fakataga. ʼI ʼihi temi ʼe nātou felāveʼi mo te loto tuʼania ʼuhi ko tanatou maʼuʼuli ʼi te ʼu “temi maʼuhiga ʼaupito mo faigataʼa.”—2 Timoteo 3:1.
ʼI te ʼu temi ʼaē ʼe tou felāveʼi mo te ʼu faigataʼaʼia ʼaia, ʼe ko he meʼa lelei hakita fagono ki ni ʼu palalau lelei mai he kaumeʼa agatonu! “Ko he kaumeʼa moʼoni ʼe ʼofa ia ʼi te temi fuli pe, pea ʼe ko he tēhina neʼe fānauʼi ki te temi ʼaē ʼe hoko ai te mamahi,” ko te ʼui ʼaia ʼa te Tohi-Tapu. (Tāʼaga Lea 17:17) Ko te tagata agatonu ko Sopo neʼe ʼiloa ohage ko te taʼi kaumeʼa ʼaia. Ohage la ko Elifase neʼe ina ʼui fēnei ʼo ʼuhiga mo ia: “ ʼI te temi ʼaē neʼe tūkia ai he tahi, neʼe vaivai pea mo gaʼegaʼe, ko tau ʼu palalau neʼe tokoni kia ia ke tuʼu.”—Sopo 4:4, Today’s English Version.
Kae ʼi te temi ʼaē neʼe ʼaoga ai kia Sopo he fakaloto mālohi, ko Elifase pea mo tona ʼu kaumeʼa neʼe mole nātou foaki age kia ia ni ʼu palalau ʼe lelei. Neʼe nātou tukugakoviʼi ia Sopo ʼo ʼuhiga mo tona ʼu malaʼia, ohage ʼe nātou ʼui age ki ai, lagi neʼe ina fai ni ʼu hala fakafūfū. (Sopo 4:8) ʼE ʼui fēnei e te tohi (The Interpreter’s Bible): “Ko te meʼa ʼaē neʼe ʼaoga kia Sopo ko he loto manavaʼofa mai he tagata. Kae neʼe ko te ʼu meʼa ʼaē neʼe fagono kiai, neʼe ko he ʼu tuʼuga akonaki faka lotu pea mo he ʼu tokoni agakovi.” ʼI te lahi ʼo te lotomamahi ʼo Sopo ʼi tana fagono ʼaē ki te ʼu palalau ʼa Elifase pea mo tona ʼu kaumeʼa, neʼe fēnei leva tana tagi: “Ko temi koa e fia ʼe koutou fakaloto mamahiʼi anai toku nefesi pea mo molomoloki ʼau ʼaki ni ʼu palalau?”—Sopo 19:2.
ʼE mole tonu anai ʼi he temi ke tou fakaloto mamahiʼi hotatou kaugā fagona ʼuhi ko ni ʼatatou ʼu palalau agakovi pea mo vale. (Vakaʼi ia Teutalonome 24:15.) ʼE fakatokaga fēnei e te tāʼaga lea ʼi te Tohi-Tapu: “Ko te meʼa ʼaē e ke ʼui ʼe feala ke ina taupau he maʼuli peʼe ke ina fakaʼauha; koia ʼe tonu ke ke tali te ʼu ikuʼaga ʼo tau ʼu palalau.”—Tāʼaga Lea 18:21, Today’s English Version.
ʼAki hatatou fakamoʼoni ki te mālohi ʼo te ʼu palalau, tou muliʼi te faʼifaʼitaki ʼa te ʼapositolo ko Paulo. ʼI tana ʼi Masetonia, neʼe ina “fakaloto mālohiʼi ʼaki he ʼu tuʼuga palalau ia nātou ʼaē neʼe ʼi ai.”—Gāue 20:2.