Te ʼu Fehuʼi ʼa Te Kau Lautohi

ʼE feala anai koa ke tali he faitoʼo peʼe ko he foʼi huki ʼe maʼu ai te ‘albumine’ ʼe haʼu mai te toto ʼo he tahi age tagata peʼe ko he tahi age fafine?

ʼI tona fakahagatonu ko te faʼahi ʼaia ʼe fakalogo pe anai ki te Kilisitiano takitokotahi.

Ko te ʼu kaugana ʼa te ʼAtua ʼe nātou fia fakalogo lelei ki te fakatotonu ʼaē ʼe maʼu ʼi te tohi ʼo Gāue 15:28, 29, ke ʼaua naʼa nātou fakaʼaogaʼi te toto. Koia ʼo mulimuli ki te faʼahi ʼaia, ko te kau Kilisitiano ʼe mole nātou kai anai ki te ʼu kanoʼi manu ʼaē neʼe mole hukiʼi ʼo fakaʼalu tona toto pe ko ni ʼu meʼa kai ohage ko te sosiso ʼaē neʼe fai ʼaki te toto. Kae ko te lao ʼa te ʼAtua ʼe toe fakaʼaogaʼi pe foki ʼi te faʼahi ʼo te ʼu faitoʼo. Ko te kau Fakamoʼoni ʼa Sehova ʼe nātou taupau mo nātou te pepa ʼaē ʼe ina fakahā tanatou fakafisi ki te ʼu ‘foʼi huki toto, ki te toto katoa, ki te ʼu globules rouges, ki te ʼu globules blancs, ki te ʼu plaquettes sanguines, peʼe ko te plasma sanguin.’ Kae, e feafeaʼi ʼo ʼuhiga mo te ʼu foʼi huki ʼaē ʼe fai ʼaki te sérum ʼe maʼu veliveli ai te ʼu protéines ʼo he toto?

Neʼe kua fualoa pe te kua mahino ki te kau Fakamoʼoni, ko te faʼahi ʼaia ʼe fakalogo pe ia ki te tonu ʼa te takitokotahi, ʼo mulimuli pe ki te leʼo ʼo loto, ʼo te takitokotahi, ʼaē neʼe akoʼi e te Tohi-Tapu. Ko te meʼa ʼaia neʼe talanoa kia Te Tule Leʼo (fakafalani) ʼo te ʼaho 1 ʼo Sūnio 1990 ʼi te alatike “Te ʼu Fehuʼi ʼa Te Kau Lautohi,” ʼaē neʼe talanoa ai ki te ʼu foʼi huki ʼaki te sérum ʼaē ʼe feala ke tohi e he tōketā, kapau ʼe tau he tahi mo ni ʼu faʼahiga mahaki. Ko te ʼu meʼa tāfito ʼaē ʼe ʼai ki te faʼahiga foʼi huki ʼaia ʼe mole ko te plasma sanguin totonu ia ʼo te toto, kae ʼe ko he ʼu anticorps mai te plasma sanguin ʼa te hahaʼi pe ko ni ʼu manu neʼe kua nātou tauʼi te mahaki. Ko te kau Kilisitiano ʼaē ʼe nātou logoʼi ʼe feala hanatou tali te ʼu faʼahiga foʼi huki ʼaia, ʼaki he leʼo ʼo loto ʼe lelei, neʼe nātou fakatokagaʼi ko te ʼu anticorps ʼaē ʼe maʼu ʼi te toto ʼo he fafine ʼe faitama, ʼe fakalaka ʼo hū ki te toto ʼo te tamasiʼi ʼaē ʼe nofo ʼi tona fatu. Neʼe talanoa kiai te alatike “Te ʼu Fehuʼi ʼa Te Kau Lautohi,” ʼe toe tatau mo te fakalaka ʼo te albumine mai te fafine ʼaē ʼe faitama ki te tamasiʼi ʼaē ʼe ina fuafatuʼi.

Ki te tokolahi ko te meʼa ʼaia ʼe fakaofoofo ia, koteʼuhi ko ʼihi foʼi huki neʼe mole teuteuʼi ʼaki te toto, ʼe feala pe ke maʼu ai he koga veliveli ʼo te albumine plasmatique, neʼe fakaʼaogaʼi pe neʼe ʼai kiai moʼo tāʼofi maʼu te ʼu meʼa ʼaē neʼe ʼai ki te foʼi huki lolotoga tona teuteuʼi. ʼI te agamāhani, ʼe toe fakaʼaogaʼi he kihiʼi koga ʼo te albumine ʼi te fai ʼaē ʼo te foʼi huki ʼaki te hormone synthétique EPO (érythropoïétine). Ko ʼihi kau Fakamoʼoni ʼa Sehova neʼe nātou tali te ʼu foʼi huki EPO koteʼuhi ʼe feala ke ina hikihiki te vave ʼaē ʼo te faʼu ʼo te ʼu globules rouges ʼo feala ai ke ina fakamamaʼo ʼi he tōketā te manatu ʼaē, ʼe maʼua anai ke fai he foʼi huki toto.

Ko ʼihi faitoʼo ʼe feala pe ʼi te temi ka haʼu ke feiā, ʼo tonu ai leva ke nātou fakaʼaogaʼi tatau he koga veliveli ʼo te albumine, koteʼuhi ko te ʼu sosiete ʼaē ʼe nātou faʼu te ʼu meʼa faitoʼo ki te ʼu falemasi ʼe ʼāsili age pe tanatou maʼu te ʼu meʼa faitoʼo foʼou peʼe ko tanatou fetogi te ʼu meʼa ʼaē ʼe ʼai ki te ʼu faitoʼo kua maʼu. Koia ʼe feala anai ke holi te kau Kilisitiano ke nātou vakaʼi fakalelei peʼe ko te albumine ʼe ko he koga ʼo he foʼi huki ʼe fakatotonu age e te tōketā. Kapau ʼe nātou lotolotolua peʼe ʼi ai he ʼu tupuʼaga ke nātou ʼui ko te albumine ʼe ko he koga ia ʼo te foʼi huki, ʼe feala ke nātou fakalavelave ki tanatou tōketā.

Ohage pe ko te meʼa ʼaē neʼe ʼui, tokolahi te kau Fakamoʼoni neʼe mole nātou fakafisi ki te ʼu foʼi huki ʼaē neʼe maʼu ai he kiʼi koga veliveli ʼo te albumine. Kae, ko he tahi ʼe ina fia ako te faʼahi ʼaia ke mālama lelei ki ai ia muʼa ʼo hana fai hana fakatuʼutuʼu, ʼe tonu anai ke ina toe vakaʼi te fakamahino ʼaē ʼe tuʼu ʼi te alatike ʼo Te Tule Leʼo (fakafalani) ʼo te ʼaho 1 ʼo Sūnio 1990 “Te ʼu Fehuʼi ʼa Te Kau Lautohi,” ʼi muʼa ʼo tana fai hana fakatuʼutuʼu.