‘Ke Mole Koutou Lotomamahi Ohage Ko Nātou ʼAē’
NEʼE mole heʼeki koutou fakatokagaʼi koa la te mapelu ifo ki lalo ʼo he fisiʼi teu ʼi te hili ʼo he afā? ʼI hona tahi ʼaluʼaga ʼe ko he paki ʼe malave ki te loto. Tahi ʼaē, ʼi te temi ʼaē ʼe tō ifo ai te tuʼuga vai ʼe mole ina tokagaʼi te ʼu manu pe ko te hahaʼi—pe ko te ʼu fakatupu ʼaē ʼe fefeka age ʼi te fisiʼi teu—ʼaē ʼe nātou feholaki ʼo kumi honatou fakamaluʼaga. Kae, ko te fisiʼi teu neʼe tuʼu ai, neʼe ʼi ai tona ʼu aka ia, ʼo ina tali te kovi ʼaupito ʼo te temi. ʼI te temi nei, ʼe kei maʼuli pe ia, kua mapelu kae ʼe mole heʼeki fasi ia, ʼo ina fakaʼasi mai he mālohi ʼe mole ʼalutahi pea mo tona paki fakaisiisi ʼaē ʼe hā mai ki tuʼa. ʼE feala ke koutou feʼekeʼaki, ʼi takotou mamata fakafiafia kiai, peʼe ina toe maʼu anai tona mālohi pea mo tona tumutumu matalelei ʼaē ʼe haga ki te lagi.
ʼI hona ʼaluʼaga e lahi age ʼe toe feiā pe foki ʼo ʼuhiga mo te hahaʼi. ʼI te ʼu temi tokakovi ʼaenī, ʼe tou tau mo te ʼu faʼahiga afā kehekehe. Ko te ʼu faigataʼaʼia ʼi te faʼahi faka ekonomike, mo te ʼu lotovaivai, mo te mahaki, pea mo te mate ʼa he tahi neʼe kita ʼofa mamahi ki ai—ʼe ʼi ai pe te moʼi temi ʼe ʼohofi ai tatou fuli e te ʼu tuʼani matagi feiā, pea ʼi ʼihi temi ʼe molemo feala ke tou tekeʼi ohage ko te mole feala ki te fisiʼi teu ke ina taʼaki tona ʼu aka pea mo hola ki he fakamaluʼaga. ʼE ko he meʼa ia ʼe malave ki te loto te sio ʼaē ki ni ʼu hahaʼi ʼe hage ʼe nātou vaivai ʼaupito ʼe nātou fakahā mai he mālohi ʼe fakapuna’maʼuli pea mo nātou ʼutaki he ʼu faigataʼaʼia feiā. ʼE lava feafeaʼi ke nātou fai te meʼa ʼaia? Ko te tupuʼaga ʼo te tautau hoko ʼo te faʼahi ʼaia ko te tui. Neʼe tohi fēnei e Sake, te tēhina ʼo Sesu Kilisito: “ ʼE koutou ʼiloʼi ʼi te temi ʼaē ʼe mālo ai takotou tui ʼi te tauʼi ʼo te ʼu ʼahiʼahi ʼaia, ko tona fua ʼe ko te faiva ʼi te faʼa kātaki.”—Sake 1:3, Today’s English Version.
ʼE ko he tahi tupuʼaga ʼo te fealagia ʼaia, ko te ʼamanaki. Ohage la mokā toʼo e te mate he tahi neʼe kita ʼofa mamahi ki ai, ko te ʼamanaki ʼe feala ke ina fakakeheʼi ʼaupito te hahaʼi ʼaē ʼe maʼuʼuli. Neʼe tohi fēnei e te ʼapositolo ko Paulo ki te kau Kilisitiano ʼo Tesalonika: “ ʼE mole mātou loto ke mole koutou ʼiloʼi te meʼa ʼaē ʼo ʼuhiga mo nātou kua momoe ʼi te mate, koteʼuhi ke mole koutou lotomamahi ohage ko nātou ʼaē ʼe mole ʼi ai hanatou ʼamanaki.” (1 Tesalonika 4:13) Logope la ko te kau Kilisitiano ʼe nātou mamahi ʼuhi ko te mate, ʼe ʼi ai pe te kehekehega. ʼE nātou maʼu te mālama totonu ʼo ʼuhiga mo te ʼaluʼaga ʼo te kau mate pea mo te ʼamanaki ki te toe fakatuʼuake.—Soane 5:28, 29; Gāue 24:15.
Ko te mālama ʼaia ʼe ina foaki age kia nātou te ʼamanaki. Pea ʼe ko te ʼamanaki ʼaia ʼi tona tahi age faʼahi, ʼe ina fakaoloolo māmālie pe tonatou mamahi. ʼE tokoni kia nātou ke nātou faʼa kātaki, ʼo lahi age ʼi te meʼa ʼaia. ʼAki te temi, ohage ko te fisiʼi teu ʼi te hili ʼo te afā, ʼe toe feala ke nātou toe lagaʼi age tonatou ʼu foʼi ʼulu mai te mamahi ʼo nātou toe maʼu te fiafia pea mo te fīmālie ʼi tonatou maʼuli.