Ko Te ʼu Mamahi ʼa Te Tagata—ʼE Gata Anai Koa ʼi He Temi?
KO TE ʼu meʼa fakalialia ʼe hā ʼi te ʼosi paʼulu ʼo he foʼi pulu ʼi he fakatauʼaga meʼa ʼe kaugamālie ai te hahaʼi ʼi Sarajevo; ko te ʼu fakapō pea mo te tuʼutuʼu ʼo te hahaʼi ʼi Rwanda; ko te tamaliki pakupapaku ʼe nātou fakaʼui he meʼa kai ʼi Somalia; koutou fakatokagaʼi te mamahi ʼe tau mo te ʼu famili ʼuhi ko te mate ʼo he tahi neʼe nātou ʼoʼofa ai ʼi te mafuike ʼi Los Angeles; te ʼu vikitima ʼo te lōmaki ʼi Bangladesh ʼaē ʼe mole nātou maʼu tokoni. Ko te ʼu taʼi mamahi ʼaē ʼe tau mo te tagata, ʼe tou sisio kiai ʼi te ʼaho fuli ʼi te televisio peʼe ʼi te ʼu nusipepa.
Ko te ikuʼaga kovi ʼo te mamahi ʼa te tagata ko tana ʼaumai ʼaē te hahaʼi ke mole kei nātou tui ki te ʼAtua. ʼE ʼui fēnei e te fakamatala neʼe tā e te kautahi faka Sutea ʼi te ʼAtu ʼu Fenua ʼo Amelika, “ko te ʼi ai ʼo te kovi, neʼe ina fakatupu tuʼumaʼu he tāʼofi ki te tui.” ʼE talanoa ia nātou ʼaē neʼe nātou fai te fakamatala ʼaia ki te kau mamate ʼo te ʼu lotoʼā fakamamahi nasi ohage ko Auschwitz pea mo nātou ʼaē neʼe mamate ʼi te ʼu foʼi pulu ohage ko ʼaē neʼe paʼulu ʼi Hiroshima. ʼE toe ʼui e te ʼu tagata faitohi ʼaia: “Ko te fehuʼi ʼaē, peʼe lava feafeaʼi ki he ʼAtua faitotonu pea mo māfimāfi hana fakagafua ke matehi te ʼu hahaʼi tokolahi ʼe mole honatou lākahala, ʼe ina fakatupu hoha ki te leʼo ʼo loto ʼo he tahi ʼe tui pea mo fakatupu maveuveu ki tona fakakaukau.”
Ko he meʼa fakaʼofaʼofa foki, ko te ʼu fakamatala hoholo ʼo te ʼu malaʼia ʼe feala pe ke ina fakafefeka te loto ʼo te tagata. Kapau ʼe mole kau ai he tahi ʼo te ʼu kāiga peʼe ko he ʼu kaumeʼa, tokolahi ʼe mole lave kia nātou te mamahi ʼa ʼihi.
Kae, ko te ʼaluʼaga ʼo tatatou logoʼi he agaʼofa, ki he tahi ʼi te ʼu hahaʼi ʼe tou ʼoʼofa ai, ʼe ina fakahā mai te meʼa ʼo ʼuhiga mo tatatou Tupuʼaga. ʼE ʼui e te Tohi-Tapu, ko te tagata neʼe fakatupu “ki te paki ʼo te ʼAtua” pea “ ʼo mulimuli ki [tona] ʼata.” (Senesi 1:26, 27) Ko te faʼahi ʼaia ʼe mole faka ʼuhiga ko te ʼata ʼa te tagata ʼe hage ko ʼaē ʼo te ʼAtua. Kailoa, koteʼuhi neʼe fakamahino e Sesu “ko te ʼAtua ʼe laumālie,” pea “ko he laumālie ʼe mole hona kakano pea ʼe mole hona hui.” (Soane 4:24; Luka 24:39) Ko te fakatupu ʼo tatou ki te ʼata ʼo te ʼAtua ʼe faka ʼuhiga ki tatatou lava fakahā te ʼu kalitate fakaʼatua. Koia, mai tona ʼaluʼaga ʼaē ko te hahaʼi ʼe nātou logoʼi he agaʼofa kia nātou ʼaē ʼe mamahi, ʼe tonu ai ke tou ʼui ko te Tupuʼaga ʼo te tagata, ia Sehova ʼAtua, ʼe manavaʼofa pea ʼe lahi tana agaʼofa ki te tagata ʼaē ʼe mamahi.—Vakaʼi ia Luka 11:13.
Ko te faʼahi ʼaē neʼe fakahā ai e te ʼAtua tona manavaʼofa, ko tana foaki ki te tagata he fakamahinohino neʼe tohi ʼo ʼuhiga mo te tupuʼaga ʼo te mamahi. Ko te potu ʼaia neʼe ina fai ʼi tana Folafola, te Tohi-Tapu. ʼE fakahā lelei mai e te Tohi-Tapu, neʼe haga te ʼAtua ʼo fakatupu te tagata ke fakafiafia ki te maʼuli, kae neʼe mole ina fakatupu ia ke mamahi. (Senesi 2:7-9) ʼE ina toe fakahā foki ko te ʼuluaki tagata pea mo te ʼuluaki fafine ʼaē neʼe nā ʼaumai te mamahi kia nāua totonu, ʼaki tana līaki te pule faitotonu ʼa te ʼAtua.—Teutalonome 32:4, 5; Loma 5:12.
Logope te potu ʼaia neʼe hoko, ʼe kei agaʼofa aipe te ʼAtua ki te malamanei ʼaē ʼe mamahi. Ko te faʼahi ʼaia ʼe fakahāhā lelei ʼi tana fakapapau ʼaē ke ina fakagata te mamahi ʼa te tagata. “Koʼeni, ko te fale lā ʼo te ʼAtua ʼe nofo mo te tagata, pea ʼe nofo anai mo nātou, pea ʼe nātou liliu anai ko hana hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.”—Fakahā 21:3, 4; vakaʼi pea mo Isaia 25:8; 65:17-25; Loma 8:19-21.
ʼE fakamoʼoni e te ʼu taʼi fakapapau ʼaia ʼe mahino lelei te ʼAtua ki te ʼu mamahi ʼa te tagata pea ʼe ina fakatuʼutuʼu ke ina fakagata te mamahi ʼaia. Kae koteā moʼoni koa ʼaē neʼe ina ʼuluaki fakatupu te mamahi, pea koteā te tupuʼaga ʼo te fakagafua e te ʼAtua ke hoko atu ʼo aʼu ki totatou temi?