Ko Te Tui Mālohi ʼo Totatou ʼu Tēhina ʼi Rwanda
ʼI TE kamataʼaga ʼo te taʼu 1994, neʼe punamaʼuli te malamanei ki te ʼu logo ʼo te ʼatu fakapō ʼaē neʼe hoko ʼi te fenua Afelika ʼo Rwanda. Neʼe malaga te tau faka sivile fakamataku—ko te ikuʼaga ʼo te fehiʼa kua lauʼi sēkulō.
ʼI tanatou tau ʼaē mo te puli katoa ʼo te lao pea mo te tokalelei, neʼe maʼua ke feholaki te toko 2 000 tupu kau Fakamoʼoni ʼa Sehova ʼi Rwanda. Teitei ko te toko 1 300 neʼe nātou maʼu tonatou holaʼaga ʼi te ʼu nofoʼaga ʼe ōvi ki Zaïre pea mo Tanzanie, kae ko ʼihi neʼe mole nātou maʼu tautonu honatou holaʼaga. ʼE tou lotomamahi ʼi te maʼu ʼi te fakamatala, ʼe teitei pe ko te toko 400 ʼi ʼotatou ʼu tēhina pea mo tuagaʼane—ʼe kau ai te hahaʼi lalahi pea mo te tamaliki, pea ʼe ko te hahaʼi sivile fuli—neʼe nātou mamate ʼi te agamālohi fakamataku ʼaia. ʼE tagiʼi e te kau Kilisitiano ʼo te malamanei katoa te mamate ʼo te ʼu taupau faʼafai ʼaia ʼo te agatonu pea mo nātou lotomālohi ʼi te fakapapau ʼa te Tohi-Tapu ʼo ʼuhiga mo te fakatuʼuake.—Soane 11:25.
Kua feafeaʼi te ʼaluʼaga ʼo te ʼu tēhina pea mo te ʼu tuagaʼane ʼaē ʼe kei maʼuʼuli? Neʼe vaevae te ʼu tagata ʼāfea mai te ʼu tuʼuga fenua moʼo fakaʼaluʼalu ʼo te ʼu meʼa ʼaē ʼe maʼuhiga tāfito ki te ʼu tēhina. Neʼe ʼui e te fakamatala ʼo ʼuhiga mo te tali mamahi ʼo te ʼu tēhina, neʼe nātou tali “ ʼaki he aga ʼe tonu ke fai pea mo te faʼa kātaki.” Ohage la, ʼi te ʼu meʼa ʼaē neʼe ʼuluaki fakaʼui e te ʼu tēhina, neʼe ko te maʼu ʼo he ʼu tohi faka Tohi-Tapu. ʼE fakaʼosi fēnei te fakamatala: ‘ ʼE hage ia ʼe lahi age tanatou tokakaga ki te meʼa kai fakalaumālie, ʼi hanatou tokakaga ki te tokoni fakasino, logope la te maʼuhiga ʼaupito kia nātou he tuʼuga meʼa.’ Pea logope ko te ʼu ʼaluʼaga ʼi te ʼu nofoʼaga ʼe mole faʼa lelei, ‘ko te faʼahi ʼaē ʼe nonofo ai ʼotatou ʼu tēhina, ko te potu ʼaia ʼe maʼa ʼaupito.’
Neʼe tānaki e te Sosiete Watch Tower te falā feʼauga moʼo fakatau ʼaki he meʼa kai, mo he meʼa kafu, mo he ʼu mutuʼi meʼa, mo he ʼu sūlie, pea mo he ʼu faitoʼo. Neʼe lahi ʼaupito te foaki fakaʼofa ʼo ʼotatou ʼu tēhina ʼo Falani, pea ʼi te kamataʼaga ʼo te māhina ʼo Sūnio, teitei pe ko te tane e lua ʼo te ʼu meʼa ʼaē ʼe maʼuhiga ki te maʼuli neʼe ʼave ki ʼotatou ʼu tēhina ʼi Rwanda ʼaē ʼe faigataʼaʼia.
Ko te meʼa neʼe hoko papau ai, ko te ʼu ʼaluʼaga ʼaia neʼe nātou fakatupu ai he fakamoʼoni ʼe lelei ʼaupito. Ko te hahaʼi mamata neʼe lave kia nātou te faʼahi ʼaē ko ʼotatou ʼu tēhina ʼi Rwanda neʼe nātou maʼu te faʼahiga tokoni ʼaia pea mo he lagolago mai ʼonatou ʼu kaugā Fakamoʼoni, pea neʼe feala he vaevae te tokoni ʼaia mo nātou ʼaē. Ko ʼihi neʼe nātou ʼui, ʼe gata pe ki te kau Fakamoʼoni ʼi te ʼu nofoʼaga ʼe ʼaʼahi nātou e he ʼu hahaʼi ʼo tonatou lotu!
Ko te ʼaluʼaga ʼo totatou ʼu tēhina ʼi Rwanda ʼe ina fakamanatuʼi mai ʼi te ʼu “ ʼaho fakamuli,” ko te tagata ʼe aga “fekai” anai pea mo “agamālohi” anai. (2 Timoteo 3:1-5; Today’s English Version) Pea logope ʼe mole fakapapau e Sehova he hāofaki faka milakulo ʼo tana hahaʼi mai te ʼu tuʼutāmaki fakasino, kae ʼe ina fakapapau he hāofaki ʼo tonatou maʼuli fakalaumālie pea mo tanatou felogoi ʼaē mo ia, pea lolotoga te ʼafio ʼa Kilisito ʼi te ʼu Taʼu e afe, ʼe ina fakatuʼuake anai ia nātou ʼaē ʼe mamate ʼi te temi nei. (Pesalemo 91:1-10) ʼOfa pe ki ʼotatou ʼu faikole ʼaē ke lagolago e Sehova pea mo tokoni ki ʼotatou ʼu tēhina ʼo Rwanda ʼaē ʼe kei maʼuʼuli lolotoga te temi faigataʼa ʼaenī, ke hoko atu tana tapuakina ʼo nātou.—Pesalemo 46:1.