Tou Tokoni Ki ʼOtatou ʼu Kāiga ʼi Te Tui ʼAē ʼi Bosnie

ʼE MOLE kau te kau Fakamoʼoni ʼa Sehova ki te ʼu tau faka politike. (Soane 17:16) Kae, ʼi tanatou muliʼi te tokoni ʼa Paulo ʼaē ko te fai ʼo te meʼa ʼaē ʼe lelei “tāfito foki kia nātou ʼaē ko ʼotatou ʼu kāiga ʼi te tui,” ʼe nātou teu ke nātou tokoni ki ʼonatou ʼu kaugā fagona Kilisitiano ʼaē ʼe nonofo ʼi te koga meʼa ʼaē ʼe hoko ai te tau. (Kalate 6:10, Beck) ʼI te fakaōviōvi mai ʼo te temi nive ʼo te ʼu taʼu 1993 pea mo te 1994, ko te ʼu tēhina mai Otilisia pea mo Croatie neʼe nātou fai te ʼu fakatuʼutuʼu ʼe fakatupu tuʼutāmaki ki tonatou maʼuli, ko te ʼave tokoni ki ʼonatou ʼu kāiga ʼi te tui ʼaē ʼi Bosnie. Ko te meʼa ʼaenī ka hoa mai, ʼe ko te meʼa neʼe fakamatala e nātou.

Mai Malesio ki ʼOketopeli 1993, neʼe mole ʼi ai he faigamālie ke ʼave he tokoni ki Bosnie. Kae, ʼi te kamata ʼo ʼOketopeli, neʼe fakahā e te puleʼaga te kua lava fetuku ake ʼo he ʼu meʼa ʼe ʼaoga ki te maʼuli. Neʼe kei fakatupu tuʼutāmaki ʼaupito he fai ʼo he fakatuʼutuʼu feiā, koteʼuhi neʼe kei hoholo aipe te ʼu fetauʼaki lalahi ʼi te ʼu koga meʼa tau.

Kae, ʼi te Feliatolu, ʼaho 26 ʼo ʼOketopeli 1993, neʼe mavae tomatou ʼu fua kamio mo te ʼu tane e 16, ko te meʼa kai pea mo te fafie ki te ʼu kaugā fagona faka Kilisitiano ʼaē ʼi Bosnie. Neʼe mātou tau ki ʼamatou ʼu kofu ʼomātou ʼu kate ʼo te ʼu fakatahi faka tisitilike, ko he pepa fakamoʼoni ʼaia ʼo mātou.

ʼI tamatou tau ʼaē ki te tuʼakoi ʼo Croatie pea mo Bosnie, neʼe ʼave faka apuipui mātou ki te fale solia, ʼaia neʼe huke katoa ai ʼomātou ʼu fua kamio. Neʼe mole tali tamatou kole ʼaē ke mātou fakalaka ʼi te telituale Serbe. Neʼe ko te ala pe e tahi neʼe fakagafua mai ke mātou ʼolo ai, ko te ʼalu ki te lotomalie ʼo Bosnie—ko te koga meʼa tonu ʼaia neʼe lolotoga hoko ai te tau!

Ko He ʼu Faiga Noa Koa?

Neʼe ʼave faka apuipui mātou mai te tahi potu ʼe hoko ai he sivi ki te tahi potu, neʼe mātou logo ki te ʼu pa fana pea mo te mapā mai ʼo te ʼu tānike. Lolotoga te pōʼuli, neʼe mātou fagona ʼi te vao matuʼa kae kaugā ʼōmai mo mātou te ʼu tānike e lua pea mo te ʼu motokā solia (jeep). Kua ʼolo māmālie ʼomātou ʼu fua kamio ʼi te koga meʼa tonu ʼaē ʼe hoko ai te tau! Neʼe maui mālie meʼa fuli ʼo aʼu ki te uhu, pea mo te hoko ai te fai fana ʼi ʼomātou ʼu fuga ʼulu pea neʼe tonu ai ke mātou fenonoʼi ʼi te muliʼi sia. Hili ʼaia te kiʼi temi neʼe gona te fai fana, pea neʼe hoko atu tamatou fagona.

ʼI tamatou tau ki te nofoʼaga, neʼe fehuʼi mai e te ofisie ʼaē ʼe pule ki te koga meʼa, peʼe ko ai ia mātou pea mo te meʼa ʼaē neʼe mātou loto kiai. “Ko takotou fakatuʼutuʼu ʼe ʼalunoa anai ia,” ko tana tali mai ʼaia ʼi tamatou ʼosi fakahā age te fakatuʼutuʼu ʼa mātou. “ ʼE mole feala hakotou hū haohaoa ki te tuʼa nofoʼaga, tatau aipe la mo he fagona ʼi he ʼu kiʼi meta. ʼI te ʼaluʼaga ʼo te lahi ʼaupito ʼo te hoge ʼi te fenua, ʼe ʼohofi anai koutou pea mo kaihaʼa anai ʼakotou ʼu koloā.” Neʼe ina fakatotonu mai ke mātou ʼolo foli pe, pea mātou toe liliu.

Neʼe kua “ ʼalunoa” koa ʼamatou ʼu faiga? Neʼe kua pulinoa koa te ʼamanaki ʼaē ʼe feala ke mātou fakalaka maʼuli mo ʼamatou ʼu koloā ʼi te ʼu koga meʼa ʼaē ʼe hoko ai te tau? Ko he tonu maʼuhiga neʼe maʼua ke fai. Kua mātou logo ki te ʼu fai fana pea mo te paʼulu ʼo te ʼu foʼi pulu. ʼI tamatou nonofo ʼi te pōʼuli mo te kau solia, neʼe feala ai hamatou sisio ki te teuteu ʼa nātou ki te ʼu faigataʼaʼia ʼo te tau. Neʼe lahi te ʼu mahafu tau neʼe nātou teuteuʼi pea neʼe nātou kofuʼi te ʼu teu tali mahafu. Māʼia mo te tagata kuka neʼe ina ʼamo tana mitalausi ʼi tona tuʼa. Pea koʼeni ko mātou neʼe mātou teu ki te ʼu kofu liliki, mo te ʼu hēkesi pea mo te ʼu kate fakamoʼoni! Neʼe ko he agapoto koa te hoko atu ʼo tamatou ʼu faiga?

Ko Te Tau ʼAē Ki Travnik

Neʼe hage ia ko tamatou ʼamanaki pe e tahi, ko te maʼua ʼaē ke mātou felogoi mo te kūtuga ʼaē ʼe kau ki te tau ʼaia. ʼI te ʼala uhu ake, neʼe mātou fehuʼi ki te fafine peʼe ina ʼiloʼi te tuʼuʼaga ʼo te pilō ʼo te kūtuga tau. Neʼe ina ʼui fēnei mai: “ ʼE mole mamaʼo ia. ʼI te vao matuʼa, ʼe koutou maʼu anai he fale fata, neʼe ko te lopitali ʼi te temi ʼaē.” Neʼe mātou tuʼania te ʼolo kiai. Neʼe ōfo te kau tagata solia ʼi tamatou mavae ʼi te nofoʼaga kae mole ʼi ai hamatou ʼu mahafu tau.

Neʼe kua maumau te lopitali ʼāfea, kae neʼe ʼi ai te ofisie. Neʼe lotolelei ke tokoni mai kia mātou, ʼo ina ʼui mai e lagi lelei ke palalau muʼa ki tana pule. Neʼe ina ʼave mātou ʼi tona motokā maumau pea neʼe ina fakalele tona motokā ʼi te koga meʼa ʼaē ʼe hoko ai te tau. Neʼe mātou tuʼu ʼi te fale, ʼaia neʼe tali ai mātou e te ofisie ʼaē ʼe pule ʼi te koga fale fakapōʼuli.

“ ʼI te po ʼaē atu, neʼe mātou fia fana koutou,” ko tana ʼui mai ʼaia. “Koteā te meʼa ʼaē ʼe koutou loto kiai?”

“Ko mātou ko te kau Fakamoʼoni ʼa Sehova, pea ʼe mātou fia ʼave he ʼu tokoni ki ʼomātou ʼu tēhina.”

Neʼe punamaʼuli ʼaupito—pea mo ōfo—koteʼuhi kua lauʼi vāhaʼa ʼe mole heʼeki ʼi ai he fua kamio ʼe nātou fetuku tokoni mai, kua toe hā ʼi Bosnie. ʼI te ʼosi huke katoa ʼo mātou, neʼe fakatoʼo mai te pepa fakamoʼoni. ʼI te po ʼaē atu, neʼe mātou manatu ʼe mole he faigamālie ia ke hoko atu tamatou fagona, pea ʼi te temi nei kua mātou hoko ka mole ʼi ai he solia ʼe kaugā fagona mo mātou!

Neʼe mātou fakalaka ʼi te lotolotoiga ʼo te ʼu vao matuʼa, ʼo mātou fakalaka mai he koga meʼa ʼe sivi ai te feʼaluʼaki ki te tahi age, pea ʼi ʼihi temi neʼe mātou fakalaka ʼi te ʼu koga meʼa ʼaē ʼe hoko ai te ʼu fetauʼaki. Logope te tuʼutāmaki, neʼe mātou kaku haohaoa ki Travnik. Ko te tagata solia, ʼi tana logo ʼaē ki tamatou kaku age, neʼe lele ki te ʼapi neʼe fakatahitahi ai te ʼu tēhina. Neʼe ina kalaga fēnei: “Koʼeni ʼakotou ʼu hahaʼi ʼe ʼi henī ʼaki te ʼu fua kamio.” ʼE feala ke koutou fakakaukauʼi age tonatou fiafia. Neʼe mātou fetuku te meʼa kai ki te ʼapi, pea neʼe mātou palalau fakanounou, kae kua tonu ke mātou hoko atu tomatou fagona. Kua hoko mai te pōʼuli, pea ko he fagona fakamataku ia kilometa e 32 ʼe kei fakatalitali mai.

Ko Te Fakakaku Ki Zenica

Ko te kiʼi motokā taki fagona neʼe ina takitaki mātou ʼi te vao matuʼa, pea neʼe faka gaholo tamatou ʼolo. Neʼe ʼui e ʼihi ʼe mole lava anai hamatou kaku ki Zenica, kae neʼe mātou aʼu ki te kolo. ʼE hage ia kua liliu te kolo ko he koga meʼa fakapōʼuli. Neʼe mole ʼi ai he mālama ʼi he faʼahi pea mole he motokā ʼi te ala. Ko Zenica neʼe ʼā takai ʼi te potu fuli, ʼo tupu ai te hoge lahi pea mo he puli ʼo te ʼamanaki.

ʼI tamatou ʼolo ʼi te ala, neʼe mātou sisio ai ki te meʼa faikehe—ko te ʼu tuagaʼane e lua ʼe nā fagonogono! ʼI te ʼaho ʼaē atu, neʼe fakatotonu ko te ʼu tēhina ʼe ʼolo anai ki te ʼu vao matuʼa ʼo kumi mai he meʼa kai, koteʼuhi kua nātou hoge meʼa kai. Neʼe mātou tō tonu mai! Neʼe fakahifo ai te ʼuta ʼo te kamio e tahi ʼo te fua kamio ʼi te hola fā māfoatā, ʼi te temi ʼaē neʼe mole ʼi ai he tahi ʼi te ala.

Ko te ʼaho ake neʼe mātou felāveʼi mo te senelale, ʼaē neʼe punamaʼuli ʼi te meʼa ʼaē neʼe mātou fai ʼi Zenica. ʼI te temi leva ʼaia, neʼe mātou fai fehuʼi ʼo ʼuhiga mo te fagona ʼaē ki tamatou tahi kakuʼaga, ko Sarajevo.

Neʼe ʼui fēnei e te senelale: “Kua lauʼi māhina te mole heʼeki ʼi ai he tahi kua toe kaku kiai.” Ki muli age, neʼe ina fakagafua mai te fakalaka ʼi te ʼu moʼuga. Neʼe ina fakatokaga fēnei mai: “Kae ʼe ʼau ʼui atu kia koutou, ʼe faigataʼa. ʼE mole ʼau ʼiloʼi peʼe feʼauga te mālohi ʼo takotou ʼu kamio ke koutou kaku lelei ki takotou tauʼaga.”

Neʼe tonu te palalau ʼa te senelale. Logope neʼe mātou ia kilometa e 40 ʼi Sarajevo, kae neʼe tonu ke mātou foli age ʼi te vao matuʼa ia kilometa e 140! ʼE mole galo anai ia mātou te ʼalu ʼaia mai Zenica ʼo fakalaka ʼi Sarajevo ʼo ʼalu ʼaia ki Jablanica ʼaē neʼe ʼaho e tolu pea mo po e lua, ko te meʼa neʼe tau hoko ko te vave ʼo te ʼalu ko te kilometa nima ʼi te hola. Ko te “ala” neʼe ko he ala neʼe fai e te ʼu feʼaluʼaki tuʼa lahi ʼo te ʼu tānike. Neʼe mātou fagona ʼi te ʼu maka fakamataku pea mo te ʼu pu. Neʼe mātou tau uli te ʼu kamio kae mate te ʼu hila, pea tuʼa lua neʼe meʼa siʼipe pea heke ʼamatou ʼu kamio ʼi te sia fakamataku. Ko te kamio solia neʼe muli mai ʼi tamatou fagona, neʼe ina mūhi ʼona ʼu hila ʼo tuʼa tahi pea neʼe fanahi atu aipe. ʼI ʼihi temi neʼe tonu ke mātou gaohi te ʼu ponts ʼo te motokā pea mo fetogi te ʼu teka.

ʼI tamatou kaku leva ki te ʼu tuʼa kolo ʼo Sarajevo, neʼe mātou fakaʼui ke mātou palalau mo te senelale ʼaē ʼe pule. Lolotoga tamatou fakatalitali, neʼe mātou sisio ki te kamio ʼi te ala ʼe ina ʼave te toko hogofulu hahaʼi mamate pea mo te kato neʼe tuku ʼi loto te ʼu foʼi ʼulu; neʼe faiga e te kau solia ke nātou felogoi mo ia ʼaē ʼe pule ki te ʼu sino mate—ko he meʼa fakalialia moʼoni, ʼe ina fakatupu ai ia mātou he holi ʼaē ki te ʼaho ʼaē ka gata ai anai te tau.—Isaia 2:4.

ʼI te hola 10 uhu, neʼe ʼi ai leva te tokotahi ia mātou neʼe fealagia tana palalau mo te senelale pea mo ʼona ʼu ofisie lalahi ʼi te koga fale fakapōʼuli, ʼe fakamālamaʼi e te foʼi sela.

“Ko ai ia koutou?” ko te fehuʼi ʼaia ʼa te senelale.

“Ko mātou ko te kau Fakamoʼoni ʼa Sehova. ʼE mātou fia ʼave he meʼa kai ki ʼomātou ʼu kaugā Fakamoʼoni ʼaē ʼi Sarajevo.”

“ ʼE koutou ʼiloʼi ʼe hahaʼi te kau Fakamoʼoni ʼa Sehova ʼaē ʼe nonofo ʼi Sarajevo?”

“Ei, ko te tupuʼaga la ʼaia ʼo tamatou ʼi henī.”

Pea neʼe fakahā e te senelale te higoa ʼo te Fakamoʼoni. “ ʼE koutou ʼiloʼi ia ia?”

“Ei, ko tamatou kaumeʼa.”

“ ʼE ʼau kaumeʼa foki la mo ia,” ko te ʼui mai ʼaia ʼo te senelale. “Neʼe ma ako fakatahi. Talu pe ʼaē tana liliu ko te Fakamoʼoni, kua ʼāsili age taku leleiʼia ia ia. Neʼe lahi te ʼu potu neʼe ina fai maʼa koutou. Koutou fakamatala mai muʼa ʼo ʼuhiga mo te kau Fakamoʼoni ʼa Sehova.”

Neʼe hoko ai te fai palalau ʼe hola katoa, pea neʼe tuku ai te nusipepa e hogofulu tupu pea mo te ʼu kaupepa lalahi. Hili te lua fono, neʼe ʼio te senelale ke fai he ʼu fakatuʼutuʼu makehe ke feala he ʼave ʼo te ʼu meʼa ʼaē ʼe ʼaoga ki te ʼu tēhina ʼi Sarajevo.

Neʼe mole ko he kiʼi fakatuʼutuʼu. Lagi ko te toko 30, ʼo kau ai mo ʼihi mole ko he kau Fakamoʼoni, neʼe nātou fetuku te ʼu pake e taki kilo 27. Neʼe nātou gāue mai te hola 8 afiafi ki te hola 5 uhu ʼi te ʼu po e lua—ʼo fakatahi ʼaia ko hola e 18. Neʼe fakamatala e te tagata ʼāfea ko te ʼu hahaʼi ʼo tona vaʼe fale ʼi tanatou ōfo ki te ʼu faiga ʼaē ko te fetuku ʼo te tokoni, neʼe nātou tuʼutuli mo te ʼu tēhina pea mo nātou fakafetaʼi kia Sehova! Ko nātou foki ʼaia, neʼe nātou maʼu mo nātou tanatou ʼu meʼa kai.

Koutou fakakaukauʼi age te fiafia ʼo te ʼu tēhina ʼi tanatou maʼu te ʼu meʼa ʼe ʼaoga ki tonatou maʼuli, ko tane e 11! Neʼe fakaʼofaʼofa te ʼaluʼaga. ʼI te koga meʼa, ko te kilo falaoa ko tona totogi ʼe ʼi te vaha ʼo te falā 30 000 ki te 66 000 CFP. Ko he kato fafie ko tona totogi ʼe lau ko te falā 26 000 CFP, pea ko te lite lolo ko tona totogi ko te falā 30 000 CFP.

Logo aipe te ʼu faigataʼaʼia neʼe tau mo mātou ʼi te ala, kua mātou fakapale leva ʼi te temi ʼaē. Kua mātou fiafia ʼaupito ʼi te mamata ki te fiafia ʼo ʼomātou ʼu tēhina ʼi tanatou maʼu te meʼa ʼofa ʼaia mai te fagona. Neʼe ko he meʼa ia ʼe mole galo anai ʼi he temi kia nātou—ʼo feiā mo mātou. Kae kua mātou kamata fakakaukauʼi leva te potu faigataʼa ʼaē ko te toe liliu.

Ko Te Toe Liliu

Neʼe mātou fehuʼi age ki te senelale, “ ʼE mātou liliu feafeaʼi?”

“Mai te ala ʼaē neʼe koutou ʼōmai ai,” ko tana tali ʼaia.

Kua mātou gaʼegagaʼe, pea kua huʼa veliveli te lolo ʼo te ʼu kamio, pea mole kei ʼi ai homatou ʼu foʼi teka fetogi. Neʼe kamata tō te ʼua, pea neʼe mole feala ai hamatou fagona ʼi te pela. Neʼe mātou fakaʼui ai ki te senelale peʼe mole feala hamatou fagona ki te potu toga.

Neʼe ina ʼui fēnei mai, “ ʼe ʼi ai te ʼu tau lalahi ʼi ai. Māʼiape la mo he kumā ʼe mole feala hana fagona haohaoa ʼi ai.” Kae hili ʼaia te kiʼi temi, pea neʼe fetogi ai tana tonu. Neʼe ʼui ai, “koutou faigaʼi pe. Koʼe pe la, neʼe koutou lava lelei mai ki henī.”

Neʼe tonu ke mātou tuku te kamio e tahi ʼi Sarajevo, pea mo vaevae tona lolo ʼi te ʼu kamio ʼaē e tolu. Neʼe mātou mavae ʼi te māʼupō ʼo toe fakalaka ʼi te ʼu vao matuʼa.

Neʼe ʼi ai mo te ʼu fihifihia ʼi tamatou liliu. Neʼe mātou felāveʼi mo te kamio solia kua takoto fakafaʼahi, pea ʼe gaohaʼa tona koga ki te ʼalesō ʼaē neʼe tonu ke mātou fakalaka ai. Neʼe mātou sio atu kapau ʼe feala he toʼo ʼo he foʼi teka e tahi, ʼe lagi feʼauga anai he fakalaka.

Neʼe mātou pāui ki te tagata solia ʼe nofo mo tana fana. “ ʼE feala hamatou toʼo kehe te foʼi teka pea mātou toe ʼai ʼi tamatou hoki fakalaka te ʼalesō?”

“Kapau ʼe koutou ala ki te foʼi teka, ʼe ʼau fanahi anai koutou,” neʼe ko te tali mai ʼaia ʼa te tagata solia pea mo fakahaga mai tana fana.

Neʼe mātou manatu ai e lagi lelei age ke mātou fai age he kafe pea mo fakatoʼo age he ipu kafe ki te tagata solia. Lolotoga te ʼu hola, neʼe mātou palalau age ki ai ʼo ʼuhiga mo te ʼu fakatahi faka malamanei ʼo te taʼu 1991, ohage ko ʼaē neʼe hoko ʼi Zagreb. Hili ʼaia, pea neʼe mālū ifo tana aga, pea neʼe ina fakagafua mai kia mātou ke mātou toʼo te foʼi teka.

ʼI Jablanica, ko te tahi ia mātou neʼe palalau mo te pule ʼo ʼuhiga mo te ala ʼaē neʼe mātou fia fagona ai. Neʼe mole feala hana tui ki te meʼa ʼaē neʼe mātou fia fai. “ ʼE koutou fia fakalaka ʼi te Liuʼa ʼo Neretva?”

Neʼe hoha ia, pea neʼe mātou mahino ki te faʼahi ʼaia. Ko te ʼu tafaʼaki ʼo te Liuʼa ʼo Neretva neʼe puleʼi e te ʼu kautau kehekehe. ʼE nātou fetau fanaʼaki. Lagi ia kilometa e 16, ko te ala ʼe kākāʼi. Neʼe ʼui e te senelale, “Ko te ʼaluʼaga ʼo te ala ʼaē ʼe koutou ʼolo ai, pea ʼe kei koutou loto ke koutou fakalaka ai?”

ʼI tana fakafuafua te ʼaluʼaga, neʼe ʼui e te senelale kua feala hamatou ʼolo—kae mo kapau ʼe mātou kaugā ʼolo mo he ʼu ofisie. Kae, neʼe mole fia kaugā ʼolo te ʼu ofisie ʼaia mo mātou! Ki muli age, neʼe mātou kole age ke nātou fakahā ki te tahi faʼahi tamatou fakalaka ʼi ai. ʼE mole anai he tahi ʼe kaugā haʼu mo mātou ʼi te uhu ake.

ʼAki te ʼu mataʼi tohi lalahi, neʼe mātou tohi ki ʼomātou kamio ʼe fetuku he ʼu meʼa ʼofa. ʼI te ʼosi ʼo tamatou faikole, neʼe mātou ʼolo ʼi te liuʼa. Neʼe mātou ʼio kapau ʼe fai fana mai, ʼe mole faka gaholo anai te ʼu kamio mo fakatupu ai he mahalohalo.

Neʼe mātou fakalaka ʼi te ʼalesō ki te tahi kauvai pea mo mātou hoko atu ki te tahi liuʼa, ʼo mātou fakalaka ʼi te ʼu sino mate ʼo te ʼu manu pea mo te ʼu kamio pea mo te ʼu tānike kua maumau. Fokifā pe kua mātou fakatokagaʼi te foʼi pulu ʼe tanu ʼi te kele, ʼe ina tāʼofi tamatou fagona. Neʼe mātou kī siti ʼo aʼu ki te kila mai ʼo te tagata solia e lua mai te tuʼa maka. “Ko ai ia koutou? Koteā ʼaē ʼe koutou loto kiai?” ko te fehuʼi mai ʼaia ʼa nāua.

ʼI te ʼosi fakaʼilo ʼo mātou, neʼe mātou fakaʼui age peʼe mole feala la he fakamaʼa ʼo te ala, pea neʼe nā tali. Neʼe mātou kaku ai leva ki te tahi faʼahi.

Neʼe punamaʼuli te kau tagata solia ʼaē ʼi ai ʼi tanatou sisio mai kia mātou. Neʼe fehūfi māmālie mai tonatou nonoʼaga, ʼo nātou fakaōviōvi mai ki te ʼu kamio ʼaki ʼanatou ʼu fana ʼaē ʼe fakahaga mai kia mātou. Neʼe mātou fakahā age ʼamatou ʼu pepa fakagafua ʼaki te ʼu numelo ʼo te ʼu kamio, ʼaē neʼe tohoʼi ʼi te temi fakatupu tuʼutāmaki ʼaē neʼe mātou fakalaka ʼi te ʼu koga meʼa tau.

Neʼe ʼui fēnei mai e te tagata solia, “neʼe mole he tahi neʼe fakatalitali ki he ʼōmai ʼa koutou. Neʼe feafeaʼi hakotou lava fakalaka?”

Neʼe mole fai te meʼa ʼaē neʼe mātou kole, neʼe mole pe la he nofoʼaga solia e tahi neʼe fakahā age kiai ʼo ʼuhiga mo tamatou ʼōmai! Neʼe toe ʼui e te ofisie: “Neʼe kua teuteuʼi ʼamatou ʼu fana, pea neʼe meʼa ke mātou fana mai.”

Neʼe mātou fehuʼi age te tupuʼaga ʼo tanatou mole fakahoko ʼo te potu ʼaia.

Neʼe tali e te ofisie, “ ʼe mole ʼau ʼiloʼi. E lagi ko te finegalo. Kae ʼi te temi ʼaē neʼe mātou sioʼi ai koutou ʼaki te meʼa fakaʼaʼata, neʼe fakatokagaʼi te tohi ‘fetuku meʼa ʼofa,’ pea neʼe mole mātou ʼiloʼi peʼe koteā he meʼa ke fai ʼo ʼuhiga mo koutou. Koia ʼaē neʼe koutou ʼōmai haohaoa ai.” Ki muli age, neʼe mātou fai te kole fakamalotoloto, ko he kole fakafetaʼi kia Sehova ʼo ʼuhiga mo tana puipui.

Logope ko te ʼu ʼaluʼaga ʼe faigataʼa, ʼe fakamanavahe te maʼuli ʼo totatou ʼu tēhina pea mo tuagaʼane ʼaē ʼe nonofo ʼi Bosnie. ʼE nātou vaevae te ʼu koloā ʼaē ʼe nātou maʼu ʼo feiā aipe mo he ʼu tuʼuga palalau ʼo ʼuhiga mo te tui ʼo feiā mo he fakaloto mālohi. ʼI Zenica, ʼe ʼi ai te toko 40 kau Fakamoʼoni ʼe nātou gāue mālohi, ʼo kau ai te ʼu pionie makehe e 2, mo te ʼu pionie vaeluaʼi temi e 11, pea mo te toko 14 neʼe hoki papitema pe. Ko te kau Fakamoʼoni e toko 65 ʼo fakatahi mo te ʼu pionie vaeluaʼi temi e 4 ʼaē ʼe kei nonofo ʼi Sarajevo ʼe nātou lolotoga takitaki te ʼu ako faka Tohi-Tapu e 134. Ko hola e 20 ʼe gāueʼi e te kau Fakamoʼoni ʼi te māhina fuli, ko te tala ʼo te logo lelei ʼo ʼuhiga mo te Puleʼaga ʼa te ʼAtua ki niʼihi.

ʼIo, ko te kau Fakamoʼoni ʼa Sehova ʼe ko he foʼi famili faka malamanei ʼi te tui. Kua nātou tali lelei, tatau aipe peʼe fakatupu tuʼutāmaki ki tonatou maʼuli, ke nātou fai te meʼa ʼaē ʼe lelei kia nātou ʼaē ko te ʼu kāiga ʼi te tui—māʼiape la mo nātou ʼaē neʼe mole heʼeki nātou felāveʼi ʼi muʼa atu. Koteā tona tupuʼaga? Koteʼuhi ʼe nātou ʼoʼofa kia nātou. Neʼe ʼui fēnei e Sesu Kilisito: “ ʼAki te meʼa ʼaenī ʼe ʼiloʼi fuli ai e te hahaʼi ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:35) ʼE mahino papau ia neʼe hoko te potu ʼaia ki totatou ʼu kāiga ʼi te tui ʼaē ʼi Bosnie.

[Mape/Paki ʼo te pasina 24]

(Vakaʼi te nusipepa)

Tai ʼo Adriatique

OTILISIA

SLOVENIE

UKALIA

CROATIE

BOSNIE

Travnik

Zenica

Sarajevo

SERBIE

[Paki]

Ko te ʼave ʼo te tokoni ki Bosnie pea mo Herzegovine

[Paki ʼo te pasina 26]

Ko te fakalaka ʼi te kamio kua mafuli