Ko Te Kau Fakamoʼoni ʼa Sehova ʼi Te Malamanei Katoa—Polonia

ʼI TE Potu Tokelau ʼo te kele, ʼi te fasiga taʼu fakatōlau ʼo te taʼu 1989, ko te ʼu puleʼaga Komunisi mai te Baltique ki te Tai ʼUli neʼe nātou kamata maveuveu. ʼI te fakaʼauʼau ʼaē ke tō te Rideau de Fer, ko te ʼu puleʼaga ʼo te Potu Hahake ʼo Eulopa neʼe nātou kamata faigaʼi tanatou pule faʼifaʼitaliha. ʼI te ʼu puleʼaga ʼaia neʼe kau ai mo Polonia, ko he fenua ʼe lahi ai te ʼu sia ʼe mahake mo mahifo, te ʼu potu kele tokalelei, pea mo te ʼu moʼuga ʼe kua motumotu.a

Ko te kau Polonia ʼe ko he hahaʼi ʼe gāue kinakina ʼi te ʼu masini, pea neʼe lahi te ʼu tagata faiva pea mo te kau popoto ʼo te malamanei neʼe ʼōmai mai Polonia. Kae, ʼo hilifaki kiai, ʼe ʼi ai ʼi te temi nei te foʼi solia ʼe tuputupu aipe ko te kau fai faka mafola ʼo te logo lelei ʼo te Puleʼaga ʼo te ʼAtua.

Lototoʼa ʼi Te Fakahā ʼo Te Loi

ʼI Polonia tokolahi te hahaʼi ʼe nātou fia ako te ʼu moʼoni ʼaē haʼu mai te Tohi-Tapu. Kae ko ʼihi ʼe nātou tuʼania ʼuhi ko tonatou ʼu kāiga peʼe ko tonatou ʼu vāhaʼa fale. Ohage la, ʼi te koga meʼa ʼo Wrocław, ko te fafine neʼe fia logo neʼe ina fakagata leva tana ako te Tohi-Tapu mo te kau Fakamoʼoni ʼa Sehova ʼi te temi ʼaē neʼe fakafeagai ai tona famili pea mo tona ʼu kaumeʼa ki ai. Kae, ko tana kiʼi taʼahine neʼe ina lau te ʼu tuʼuga nusipepa ʼo Te Tule Leʼo ʼe talanoa ki te lotu loi. Ko te ʼu meʼa ʼaia neʼe nātou uga tana fia ʼiloʼi te moʼoni.

Hili ʼaia māhina e ono ki tana ako te Tohi-Tapu, ko te finemui ʼaia neʼe ina fakatotonu leva ke ina maumauʼi te ʼatu pikipikiga mo te lotu loi. Neʼe ʼalu ki te tagata takitaki lotu ʼo tana ʼēkelesia moʼo fakahā ki ai tana fakatuʼutuʼu. Neʼe ina ʼui age ki ai ke ina tohi te ʼu kupuʼi palalau ʼaenī: “Ko ʼau, ia K—— P——, ʼe ʼau lītuʼa ki te tui faka Katolika.”

ʼI te ʼAhotapu pe ʼaē neʼe hoa age kiai, ko te pepa ʼaia neʼe lau ʼi te ʼēkelesia. Neʼe pogia ai tana kui tagata ʼi te faʼahi ʼo tana faʼe, pea neʼe tagi tana kui fafine ʼi te faʼahi pe ʼo tana faʼe. Kae, ko nātou ia ʼaē neʼe kau ki te misa, neʼe nātou punamaʼuli ʼo nātou talanoa fēnei: “Kae meʼa lelei foki, ʼe ʼi ai pe te tahi ʼe feʼauga tana loto māfana ke ina ʼui, ʼe lahi te ʼu loi ʼi tatatou ʼēkelesia.” Ko te finemui lototoʼa ʼaia ʼi te temi ʼaenī, kua liliu ko he tuagaʼane ʼi te faʼahi fakalaumālie kua papitema, pea kua ina kamata te ʼu ako faka Tohi-Tapu e fitu ʼi tona kiʼi kolo.

‘ ʼI Tonatou ʼu Fua’

Neʼe talanoa fēnei te nusipepa (Kujawy i Pomorze) ʼaē ʼe tā ʼi te vāhaʼa fuli pe ʼaki te kupu ʼaenī “ ʼE koutou ʼiloʼi anai ia nātou ʼaia ʼi tonatou ʼu fua.” ʼI tona tahi age faʼahi, neʼe ʼui e te alatike ko te kau atolasio ʼo te Keletiate “ ʼi tona fakahagatonu ʼe mole nātou fakaʼaogaʼi fakamalotoloto te ʼu pelesepeto ʼaē kua nātou tali. ʼE nātou kehekehe ʼaupito mo te kau Fakamoʼoni ʼa Sehova ʼaē ʼe nātou maʼuliʼi te ʼu meʼa ʼaē ʼe nātou faka mafola pea mo nātou fakahā te ʼu fakatotonu ʼa te Tohi-Tapu.”

ʼI te hili ʼaē ʼo tana fakahā te ʼu kehekeheʼaga ʼe ʼiloga mai ʼi te kau Fakamoʼoni pea mo nātou ʼaē ko te kau Kilisitiano ʼi te higoa, ʼe hoko atu fēnei te fakamatala: “Ko te kau Kilisitiano ʼi te higoa ʼe mahalo ia ʼe mole nātou ʼiloʼi, pea ʼe mole nātou maʼuliʼi tuʼumaʼu, te ʼu moʼoni tāfito pea mo te ʼu pelesepeto ʼo tanatou tui. . . . ʼAki tanatou faʼahiga aga, ko te kau Fakamoʼoni ʼa Sehova ʼe nātou fakahā ʼe ʼalutahi tanatou ʼu palalau pea mo ʼanatou ʼu gāue, ʼo nātou fakamoʼoni ʼaki te faʼahi ʼaia ʼe mole ko nātou te kau ‘polofeta loi,’ kae, ʼe feala ke ʼiloʼi nātou ʼi tonatou ʼu fua. ‘ ʼE toli koa la he ʼu fuaʼi vite ʼi he ʼakau talatala pe ko he ʼu fuaʼi fiku ʼi he vao lau talatala?’ (Mateo 7:15-20).”

Neʼe fai te tohi e te fafine ki te nusipepa (Przyjaciółka) ʼaē ʼe tā ʼi te vāhaʼa fuli pe, ʼo lāuga ko tana tama neʼe mavae ʼi te ’Ēkelesia Katolika pea neʼe liliu ko he Fakamoʼoni ʼa Sehova. Neʼe koteā te tokoni neʼe fai age e te nusipepa? “Kapau ko tau tama neʼe liliu ʼo fakatahi ki te kau Fakamoʼoni ʼa Sehova, ʼo ina akoʼi pea mo ina tali tanatou tui, ʼe ko tana fakatuʼutuʼu pe ia ʼa ia totonu, ʼaia ʼe tonu ke tou fakamoʼoni kiai pea mo fakaʼapaʼapa kiai. . . . Ko te kūtuga faka lotu ʼaia ʼe ʼiloga makehe ia ʼuhi ko tona ʼu agaaga ʼi te faʼahi faka sosiale, ʼaia ʼe lelei pea mo matalelei, ohage la ko tanatou fetokoniʼaki ʼaē ʼe ko he aga kua tahitahiga pea mo tanatou ʼu fakahā ʼofa, ʼe nātou agatonu ʼaupito pea mo fakalogo katoa ki te ʼu lekula ʼa te sosiete, pea ʼi tona fakaʼosi leva, ko tanatou faiva ʼaē ʼi te faka ʼalutahi ʼo tonatou ʼu maʼuli pea mo tanatou ʼu moʼoni, ʼo nātou maʼuliʼi moʼoni te ʼu vilitute ʼe nātou faka mafola. Koʼena te ʼu vilitute maʼuhiga.”

[Nota ʼo te lalo pasina]

[Te talanoa ʼo te pasina 9]

TE FAKAʼALUʼALU ʼO TE FENUA

ʼI Te Taʼu Gāue 1993

TE LAHI ʼO TE KAU FAI FAKA MAFOLA: 113 551

KO TE FAKAFUAFUA: Ko te Fakamoʼoni e 1 maʼa te toko: 339

TE HAHAʼI ʼI TE ʼAHO ʼO TE FAKAMANATU: 235 642

TE LAHI ʼO TE KAU PIONIE: 7 961

TE ʼU AKO FAKA TOHI-TAPU: 79 131

TE LAHI ʼO TE KAU PAPITEMA: 8 164

TE LAHI ʼO TE U KOKELEKASIO: 1 397

TE TUʼUʼAGA ʼO TE FILIALE: Nadarzyn

[Paki ʼo te ʼu pasina 9]

Ko te filiale ʼo Polonia ʼi Lodz ʼi te 1948

[Paki ʼo te ʼu pasina 9]

Ko te gāue fakapipiki pepa, Sūnio 1948, ʼi te Potu Hahake ʼo te Prussie ʼāfea

[Paki ʼo te ʼu pasina 9]

Ko te ʼu fitugofulu-ma-lua tēhina mo tuagaʼane kaugāue ʼo te Petele ʼo Polonia, Sanualio 1993

[Paki ʼo te ʼu pasina 9]

Ko te filiale foʼou ʼi Nadarzyn