Ko Te Kau Fakamoʼoni ʼa Sehova ʼi Te Malamanei Katoa—Initia
INITIA! ʼI te fenua lahi ʼaia ko te tahi ʼi te toko ono ʼi te malamanei ʼe maʼuli ʼi te fenua ʼaia. ʼO fakakatoa, ko te ʼu lea pea mo he ʼu faʼahiga palalau ʼe lauʼi 1 000 ʼe palalauʼi e te ʼu hahaʼi kehekehe ʼo te fenua. Tokolahi ʼi te hahaʼi ko te kau Inituisi, ko te toko 83 ki te teau, pea ko te toko 11 ki te teau ʼe nātou Mahometa, pea mo te kau Sikhs, mo te kau Putisi, mo te kau Jaïna, pea ko te toe ʼe faʼufaʼu e nātou ʼe fakahigoaʼi ko te kau Kilisitiano.
Neʼe fiafia te kau Fakamoʼoni ʼa Sehova ʼi te maui mālie makehe neʼe hoko ʼi Initia ʼi te ʼu taʼu pe ʼaenī kua hili. Neʼe nātou maʼu te ʼu hahaʼi ʼe nātou hage he ʼu ōvi ʼe nātou lotolelei ke nātou lagolago mālohi te Puleʼaga ʼo Sehova, tatau aipe peʼe nātou felāveʼi mo te ʼu faʼahiga fakahala pea mo te fakafeagai fuli.
Ohage la, ko te taʼahine ʼo te famili Inituisi neʼe māʼimoa ʼuhi ko te mahaki ʼo te polio talu mai tana kei veliveli. ʼUhi ko te mamahi ʼaē neʼe ina tauʼi, neʼe ina fakakaukauʼi ʼo ʼuhiga mo te ʼAtua pea mo te ʼuhiga ʼo te maʼuli. Neʼe ina vakavakaʼi te ʼu lotu fuli moʼo maʼu he tali kae neʼe mole ina maʼu he fakafimālie. Ko tona ikuʼaga, neʼe mole kei tui ki te lotu, kae neʼe ina haga taupau maʼu aipe tana manatu ki te ʼAtua.
ʼI te lakaga ʼaia ko te ʼu Fakamoʼoni e lua neʼe nā fetaulaki mo te taʼahine ʼaia ʼi tana minisitelio ʼi te ʼu ʼapi. ʼE ina manatuʼi: “Neʼe ʼau tagi ʼi te temi ʼaē neʼe nā lau mai ia Fakahā 21:4.” Neʼe ina tali te ʼu tuʼuga tohi ʼo te Sosiete Watch Tower pea neʼe lotolelei ki he ako faka Tohi-Tapu ʼi tona ʼapi logope la te fakafeagai ʼo tana faʼe. Neʼe fai e te taʼahine te ʼu fetogi lahi ʼi tona maʼuli, neʼe ina tauʼi te ʼu fakafeagai mai tona ʼu kāiga, pea neʼe liliu ko he Fakamoʼoni kua papitema. ʼE ina ʼui fēnei: “Neʼe lahi taku tuputupu, pea neʼe faigataʼa ʼaupito te fakahoko ʼo te faʼahi ʼaia. Kae neʼe nofo tuʼumaʼu ia Sehova ʼAtua mo ʼau pea mo ina foaki mai te tokalelei pea mo te fiafia lahi.”
ʼE Lotomālohi ʼi Te Tauhi Maʼa ʼi Te Faleako
Ko te tuagaʼane kei finemui neʼe kole age e tana fafine faiako ke ʼalu ki te ʼēkelesia Katolika mo te toe ʼo te kalasi. Neʼe fakafisi fakaʼapaʼapa age e te tuagaʼane, ʼo ina ʼui age ko ia ʼe ko te Fakamoʼoni ʼa Sehova pea ʼe mole loto ia ke atolasio ki he tahi peʼe ki he tahi age meʼa ia Sehova. Neʼe ʼui age e te fafine faiako ʼi te ʼosi ʼolo ʼo nātou fuli ʼaē ki te ʼēkelesia, ʼe tonu ke ʼalu mo ia. Kae neʼe lotomālohi te tuagaʼane pea neʼe ina ʼui age ʼi te ʼaluʼaga ʼaē ko nātou ʼaē ʼe ʼolo ki te ʼēkelesia ʼe mole nātou faikole kia Sehova, ʼe ina ʼiloʼi ʼe mole feala ke kau ki te faʼahi ʼaia.
ʼUhi ko te lotomālohi ʼa te taʼahine, neʼe loto e tana fafine faiako ke ina ʼiloʼi he tahi ʼu meʼa ʼo ʼuhiga mo tana tui. Koia ʼi te ʼaho ʼaē neʼe hoa mai, neʼe foaki age e te tuagaʼane te alatike ʼo te Tule Leʼo ʼo ʼuhiga mo te tauhi kia Sehova. Koia, ʼi tana punamaʼuli ʼi te meʼa ʼaē neʼe ina lau, neʼe faka fealagia e te fafine faiako ke mole kau ki te ʼu gāue faka lotu fuli ʼo te faleako. Neʼe feala ai ke tuku e te tuagaʼane he ʼu nusipepa e hogofulu kia ia pea mo ʼihi ʼatu ʼu hahaʼi faiako.
Ko Te Fakapale ʼe Maʼu ʼi Te Fakalogo Ki Te Lao ʼa Te ʼAtua ʼo ʼUhiga Mo Te Toto
Mole faʼa fualoa neʼe malaga te taʼi mahaki tupu mai te fiva ʼi ʼihi ʼu koga meʼa ʼo te koga fenua ʼo Kerala. ʼE fakatupu e te mahaki ʼaia te haʼele kovi ʼaupito ʼo te ʼu ifiifi pea ʼe ʼaoga ai ke fai he ʼu dialyses. ʼI te agamāhani ʼe fakaʼaogaʼi te ʼu foʼi huki toto. ʼI te kolo neʼe ko te toko 14 hahaʼi neʼe fakahū ki te lopitali ʼuhi ko te mahaki ʼaia. Ko te fakamoʼoni e tahi neʼe kau ʼi te kau mahaki ʼaia, ko te tagata ʼāfea ʼo te kokelekasio ʼo te kolo. Neʼe ʼui age kia ia ko te foʼi huki toto neʼe ko te faitoʼo pe e tahi neʼe feala ke fai. Neʼe fakamahino age e te tagata ʼāfea te ʼu meʼa faka Tohi-Tapu ʼe faka tui kiai pea neʼe fakafisi mālohi ki te toto. (Gāue 15:28, 29) Hili tanatou fakahā ni ʼu manatu fakafifihi, neʼe ʼui age e te kau tōketā ʼe mate anai ʼuhi ko tana fakafisi ki te foʼi huki toto.
Neʼe tali e te toko 13 kau mahaki te toto. Meʼa fakaʼofaʼofa foki, neʼe mole tuai ko nātou fuli ʼaia neʼe mamate. Neʼe ko te tēhina tokotahi pe ʼaē neʼe hāo! Neʼe punamaʼuli ʼaupito te ʼu pule ʼo te lopitali. Neʼe ʼofolele lahi ia nātou ʼaē ʼe gāue ʼi te lopitali ʼi te ʼu ʼaʼahi tuʼumaʼu ʼo nātou ʼaē ʼe kau ʼi te kokelekasio. Hili tana mavae mai te lopitali, neʼe ʼalu te tēhina ʼo fakamālo ki te ʼu tōketā, kae neʼe ʼui age maʼa nātou: “He koʼe ʼe ke fakamālo mai? Fakamālo koe ki tou ʼAtua, ia Sehova. Ko Ia ʼaē neʼe ina hāofaki koe, kae mole ko mātou. ʼOfa age ʼo hūfaki mai mo mātou ki tou ʼAtua, ʼaē ko Sehova.”
[Talanoa ʼo te pasina 24]
TE FAKAʼALUʼALU ʼO TE FENUA
ʼI Te Taʼu Gāue 1994
TE LAHI ʼO TE KAU FAI FAKA MAFOLA: 14 271
KO TE FAKAFUAFUA: Ko te Fakamoʼoni e tahi ki te toko 65 266
TE HAHAʼI ʼI TE ʼAHO ʼO TE FAKAMANATU: 38 192
TE LAHI ʼO TE KAU PIONIE: 1 780
TE ʼU AKO FAKA TOHI-TAPU: 12 453
TE LAHI ʼO TE KAU PAPITEMA: 1 312
TE LAHI ʼO TE ʼU KOKELEKASIO: 410
TE TUʼUʼAGA ʼO TE FILIALE: LONAVLA
[Paki ʼo te pasina 25]
Ko te tuʼuʼaga ʼo te filiale, ʼi Lonavla
[Paki ʼo te pasina 25]
Ko te fakamoʼoni ʼo ʼuhiga mo te fakatahi ʼo te taʼu 1963 ko tona kupu tāfito ko he “Logo Lelei Heʼegata”
[Paki ʼo te pasina 25]
Ko te fai faka mafola ki te tagata fakatau meʼa ʼi tuʼa ʼo te Fort Rouge ʼi Delhi