Kei Koutou Manatuʼi Koa?
Neʼe koutou fakatokagaʼi koa te ʼu Tule Leʼo fakamuli? E lagi koutou leleiʼia te ʼu fakamanatu ʼaē ʼe hoa mai:
◻ E feafeaʼi ki he tahi hana ‘haʼu kia Sesu,’ ʼo mulimuli ki tana fakaafe ʼaē ʼe tuʼu ia Mateo 11:28?
Neʼe ʼui fēnei e Sesu: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.” (Mateo 16:24) Koia, ko he tahi ʼe haʼu kia Sesu ʼe fakamaʼua ke fakalogo ki te finegalo ʼo te ʼAtua pea mo Kilisito, ʼo ina tali te ʼu maʼua ʼaē ʼe foaki age kia ia, pea mo ina fai tuʼumaʼu.—15/08, pasina 17.
◻ He koʼe ʼe “tokosiʼi” ia nātou ʼaē ʼe nātou maʼu te ‘ala lauveliveli ʼaē ʼe fakatau ki te maʼuli,’ ʼaē neʼe palalau kiai Sesu ia Mateo 7:13, 14?
Ko te ala fāveliveli ʼaia, ʼe faka tuʼakoi ʼaki te ʼu lao pea mo te ʼu pelesepeto ʼa te ʼAtua. Koia, ko nātou pe ʼaē ʼe nātou faiga fakamalotoloto ke nātou maʼuliʼi te ʼu lekula ʼa te ʼAtua, ko nātou ʼaia ʼaē ʼe haʼele ʼi te ala fāveliveli ʼaia. Logope pe ʼe hage ʼe faigataʼa fau, kae ko te ‘ala fāveliveli’ ʼaia ʼe ina faka ʼāteaina he tahi ki te ʼu faʼahi ʼaē ʼe maʼuhiga kiai. Ko tona ʼu tuʼakoi ʼe fai ʼaki pe “te lao haohaoa ʼaē ʼa te ʼāteaina.” (Sake 1:25)—01/09, pasina 5.
◻ ʼE lava maʼu feafeaʼi te fakasiosio tonu?
ʼE mole faigafua te maʼu ʼo te fakasiosio tonu, pea ʼe mole kita maʼu feiā pe. Kae ʼe feala ke tou maʼu te fakasiosio tonu ʼaki te faʼa kātaki, mo te faikole, mo he ʼu faiga fakamalotoloto, he fakakaugā poto, te ako pea mo te metitasioʼi ʼo te Tohi-Tapu, pea mo te falala ki te laumālie maʼoniʼoni ʼo Sehova.—01/09, pasina 21.
◻ ʼE lava feafeaʼi ke lagolago te maheka fakatagata ki he meʼa ʼe lelei?
ʼE feala pe ki he tahi ʼe maheka ke ina puipui he tahi ʼe ʼofa ai mai he ʼu fakahala. Pea tahi age meʼa, ko te hahaʼi ʼe feala pe ke nātou fakahā he loto maheka ʼe tau mo Sehova pea mo tana tauhi. (1 Hau 19:10)—15/09, ʼu pasina 8, 9.
◻ Koteā te faka ʼuhiga ʼo te kupusiga palalau ia Senesi 50:23 ʼo ʼuhiga mo te ʼu mokopuna ʼo Sosefo, ʼaē ʼe ʼui fēnei: “Neʼe nātou tutupu ʼi te ʼu tuli ʼo Sosefo”?
ʼE feala ke faka ʼuhiga te faʼahi ʼaia ki he fakamoʼoni ʼa Sosefo, ko te ʼu fānau ʼaia ʼe ko tona hākoga. ʼE toe feala pe foki ke faka ʼuhiga e te faʼahi ʼaia tana leleiʼia te gaoʼi mo tana ʼu fānau, ʼo ina fakahopohopo nātou ʼi ʼona ʼu tuli. ʼE tonu ki te ʼu tāmai ia ʼaho nei ke nātou fakahā he ʼofa feiā ki tanatou ʼu fānau.—15/09, ʼu pasina 20, 21.
◻ Koteā ʼaē ʼe maʼuhiga ʼaupito ki te maui mālie ʼo te nofo ʼohoana pea mo te maʼuli faka famili?
Ke maʼu te taʼi maʼuli manuʼia ʼaia, ʼe tonu ki te taumatuʼa ke nā fakamuʼamuʼa te finegalo ʼo te ʼAtua. Ko te taumatuʼa ʼaē ʼe nā fai te faʼahi ʼaia, ʼe nā faiga ke nā nonofo fakatahi pea ke nā fakatokatoka tonā ʼu fihifihia ʼo nā maʼuliʼi te ʼu tokoni ʼaē ʼe haʼu mai te Folafola ʼa te ʼAtua. ʼE nā tekeʼi ai te ʼu faʼahiga lotomamahi fuli ʼaē ʼe hoko ʼi te mole tokagaʼi ʼo te finegalo ʼo te ʼAtua. (Pesalemo 19:7-11)—01/10, pasina 11.
◻ ʼE maʼuhiga feafeaʼi te foimo fai ʼo te ʼu meʼa ʼa te ʼAtua ia ʼaho nei?
Ko te foimo fai ʼo te finegalo ʼo te ʼAtua, ʼe ko he faʼahi maʼuhiga ʼo tatatou tauhi ʼaē kia Sehova ʼaki totatou nefesi katoa. Ko te faʼahi ʼaia, ʼe ina tekeʼi pea mo fakafeagai ki te ʼu faiga ʼa te Tevolo moʼo ‘fakafiu pea mo fakaloto vaivaiʼi te ʼu nefesi’ ʼo te ʼu kaugana ʼa te ʼAtua.’ (Hepeleo 12:3) ʼE ina puipui nātou ke ʼaua naʼa nātou pipiki ki te malamanei pea mo tona ʼu koloā, ʼo ina puipui tonatou ʼatamai ke haga ki te ʼu meʼa ʼaē ʼi ʼoluga—“te maʼuli moʼoni.” (1 Timoteo 6:19)—01/10, pasina 28.
◻ ʼI te lea fakatātā ʼaē ʼo te ʼu ōvi pea mo te ʼu tao, ko te temi fea ʼaē ka heka ai Sesu ʼi tona hekaʼaga faka hau pea koteā tona tupuʼaga? (Mateo 25:31-33)
ʼE mole fakahā mai e te lea fakatātā ʼe heka Sesu ʼi tona ʼuhiga Hau, kae ʼe heka ʼi tona ʼuhiga Tuʼi Fakamāu. Ko te fakamāu ʼaia ʼe mole hoholo anai ia ʼi he ʼu taʼu e fualoa. Kae ʼe faka ʼuhiga te lea fakatātā ʼaia ki he temi ki ʼamuli, ʼi te temi ʼaē ka tala anai pea mo fakahoko anai e Sesu te fakamāu ki te ʼu puleʼaga lolotoga he temi kua faka tuʼakoi.—15/10, ʼu pasina 22, 23.
◻ Koteā te “taʼiake” ʼaē neʼe palalau tuʼumaʼu ki ai ia Sesu?
Neʼe faka ʼuhiga e Sesu te kupu “te taʼiake ʼaia” ki te hahaʼi kaugamālie ʼo tona temi pea mo tonatou kau “takitaki kivi” ʼaē neʼe nātou faʼufaʼu te puleʼaga faka Sutea. (Mateo 11:16; 15:14; 24:34)—01/11, pasina 14.
◻ ʼI te fakahoko fakaʼosi ʼo te lea faka polofeta ʼa Sesu ia Mateo 24:34-39, ʼe faka ʼuhiga kia ai te kupu “te taʼiake ʼaia”?
ʼE mahino ʼe faka ʼuhiga e Sesu te kupu ʼaia ki te hahaʼi ʼo te kele, ʼaē ʼe nātou sisio ki te fakaʼiloga ʼo te ʼi henī ʼa Kilisito ka mole nātou fakatonutonuʼi tonatou ʼu ala.—01/11, ʼu pasina 19, 31.
◻ Neʼe ʼaoga feafeaʼi ki te hahaʼi ʼo te Iselaele ʼāfea te fakatuʼutuʼu ʼo te ʼu kolo ʼo te hāofaki pea mo te ʼu meʼa ʼaē neʼe fakamaʼua ʼi te ʼu kolo ʼaia?
Neʼe fakamahino e te faʼahi ʼaia ki te kau Iselaelite, ke ʼaua naʼa nātou meʼa noaʼi te maʼuli ʼo he tagata. Neʼe ina toe fakatokagaʼi te ʼaoga ʼaē ke fakahā he loto manavaʼofa, mo kapau ʼe ʼaoga te faʼahi ʼaia. (Sake 2:13)—15/11, pasina 14.
◻ Koteā te kolo fakatātā ʼo te hāofaki?
ʼE ko te fakatuʼutuʼu ʼaia ʼa te ʼAtua moʼo hāofaki ʼo tatou mai te mate, ʼi tatatou maumauʼi tana fakatotonu ʼaia ʼo ʼuhiga mo te ʼuhiga taputapu ʼo te toto. (Senesi 9:6)—15/11, pasina 17.
◻ ʼE lava feafeaʼi ki te ʼofa fakatautehina ke tokoni kia tatou ke tou “toe lotomālohi”? (Isaia 40:31)
ʼI totatou ʼu tēhina mo tuagaʼane Kilisitiano, ʼe ʼi ai niʼihi ia nātou e lagi nātou tau mo te ʼu faigataʼaʼia pea mo te ʼu fihifihia, pea lagi nātou maʼu te ʼu faʼahiga manatu ʼaē ʼe tau mo tatou. (1 Petelo 5:9) ʼE ko he meʼa fakaloto fīmālie pea mo ina fakaloto mālohiʼi tatatou tui, te ʼiloʼi ʼaē ko te ʼu meʼa ʼaē ʼe tau mo tatou ʼe toe tau pe foki mo ʼihi, pea ʼe toe tatau pe foki te ʼu meʼa ʼaē ʼe nātou manatu kiai ohage ko tatatou manatu.—01/12, ʼu pasina 15, 16.