Ko Te Kau Faka Mafola ʼo Te Puleʼaga ʼe Nātou Fakamatala

“Neʼe Hoholo Te Mafola ʼo Te Folafola ʼa Te ʼAtua”

NEʼE mole fualoa ʼi te kamata faʼufaʼu ʼo te kokelekasio faka Kilisitiano, neʼe tuputupu te toko 120 kau faka mafola ʼo aʼu ki te 3 000 tupu. (Gāue 1:15; 2:41) ʼE fakamahino mai e te Tohi-Tapu neʼe “hoholo te mafola ʼo te folafola ʼa te ʼAtua, pea neʼe lahi ʼaupito te tuputupu ʼa te kau tisipulo ʼi Selusalemi.” (Gāue 6:⁠7) ʼI te hili pe ʼo he ʼu taʼu, neʼe liliu te kokelekasio foʼou ʼaia, ko he kautahi lahi ʼe fakatahitahi ai te kau Kilisitiano ʼo Afelika, Asia, pea mo te Eulopa.

ʼE toe feiā aipe te tuputupu fakavilivili ʼo te kokelekasio faka Kilisitiano ia ʼaho nei. Ohage la, ʼi Mekesike, ko te lahi ʼo te kau faka mafola ʼo te Puleʼaga, neʼe tuputupu ʼi te ʼu taʼu pe e nima ʼo liliu te toko 130 000 ko te toko 443 640! ʼI te taʼu 1995 ko te toko 1 ʼi te toko 59 hahaʼi ʼi Mekesike neʼe ʼolo ki te Fakamanatu ʼo te mate ʼo Kilisito ʼaē neʼe fai e te kau Fakamoʼoni ʼa Sehova. Kae, ko te taʼukai fakalaumālie ʼi te fenua ʼaia ʼe mole heʼeki katoa, ohage ko tona fakahā e te ʼu fakamatala ʼaē ʼe hoa mai.​—⁠Mateo 9:​37, 38.

ʼI te kolo ʼo Chiapas, neʼe mole tali e he tahi he ako Tohi-Tapu mo te kau Fakamoʼoni ʼa Sehova, māʼiape la tanatou kua faka mafola ʼi te kolo ʼaia lolotoga te ʼu taʼu e 20. ʼE mahino ia, ko te tokolahi ʼi te kolo ʼaia neʼe matataku ki te tagata neʼe logona tona ʼitaʼita. Neʼe nātou tuʼaniaʼi te meʼa ʼaē ka ina fai, mo kapau neʼe ina ʼiloʼi ʼe nātou ako te Tohi-Tapu mo te kau Fakamoʼoni.

Ko te ʼu kau Fakamoʼoni lototoʼa e toko lua ʼi te kolo ʼaia neʼe nā fakatuʼutuʼu ke nā tauʼi te fihifihia ʼaia, ʼo nā ʼolo ki te tagata ʼaia. ʼI tanā tau atu ki tona ʼapi, neʼe fakatalitali nāua e tona ʼohoana pea neʼe fakalogo lelei ia ki te logo ʼaē neʼe nā fakahā age. Neʼe fia logo tāfito ia ki te meʼa ʼaē ʼe talanoa kiai te Tohi-Tapu ʼo ʼuhiga mo te maʼuli ʼi te palatiso ʼi te kele. Kae neʼe ina ʼiloʼi ʼe fakatupu anai e tona ʼohoana he ʼu faigataʼaʼia mo kapau ʼe ina ako te Tohi-Tapu. Neʼe fakamahino age e te ʼu Fakamoʼoni ʼaia, kapau ʼe mole ina ako fakalelei te ʼu meʼa ʼaē ʼe ʼui e te Tohi-Tapu, pea ʼe mole feala anai ke ina ʼiloʼi peʼe feafeaʼi te faʼahiga tauhi ʼaē ʼe tonu ke fai ki te ʼAtua, pea mo tana maʼu ia te maʼuli heʼegata ʼi te kele. Neʼe ina tali ai te ako Tohi-Tapu.

Ohage pe ko te meʼa ʼaē neʼe manatu kiai, neʼe mole leleiʼia e tona ʼohoana tana ako. Neʼe ina tapuʼi age ki ai tana fakaʼaogaʼi ʼo te motokā ki te ʼu fono faka Kilisitiano, kae neʼe ina faka fealagia age ke ina fakaʼaogaʼi moʼo fai ʼo te tahi ʼu meʼa. Logope la tana fakafeagai, neʼe tatuʼu tuʼumaʼu te fafine ki te Fale ʼo te Puleʼaga ʼa te kau Fakamoʼoni ʼa Sehova ʼaē ʼe ōvi mai, ʼaē ʼe tuʼu ia kilometa e 10. Neʼe kua fakatokagaʼi e te hahaʼi ʼo te kolo tona lotomālohi pea mo tana faʼa kātaki. Neʼe kamata fakalogo te hahaʼi mokā ʼolo age te kau Fakamoʼoni ki tonatou ʼu ʼapi. Ko ʼihi neʼe nātou kaugā ʼolo mo te fafine ʼaia ki te ʼu fono. ʼI te hili pe ʼo he kiʼi temi nounou, neʼe fai e te kau Fakamoʼoni te ʼu ako Tohi-Tapu e 20 ʼi te kolo ʼaia!

Ko te kaumeʼa ʼo te fafine ʼaia neʼe ina fakatuʼutuʼu ke ina fai hana ako Tohi-Tapu, logope la te fakafeagai ʼo tona ʼohoana. Ko he meʼa fakapunamaʼuli, he neʼe ko te ʼohoana ʼo te ʼuluaki fafine ʼaē neʼe tou talanoa kiai, ʼaē neʼe ina fakaloto mālohiʼi ia ia ke ina ako te Tohi-Tapu. ʼI te ʼosi felogoi ʼo te ʼohoana ʼo te ʼuluaki fafine pea mo te ʼohoana ʼo te lua fafine, neʼe gata ai leva te fakafeagai. Koia neʼe hoki tuputupu ai leva te ʼu pulapula ʼo te moʼoni, ʼi te hili ʼo taʼu e 20 pea neʼe fakalaka ʼi te toko 15 hahaʼi ʼaē ʼe nātou ako te Tohi-Tapu pea mo ʼolo ki te ʼu fono faka Kilisitiano, ʼo kau ai mo te ʼu fafine ʼaia e toko lua, ʼaē kua nā faka mafola te logo lelei ʼi te temi nei.