Ko Te Faiga ʼAē Ke Tauhi Kia Sehova!

“ ʼE MOLE tonu ke ke ʼalu ʼo fai faka mafola!” “ ʼAua naʼa ʼōmai ʼau ʼu hahaʼi ʼo ʼaʼahi ʼi henī!” Tokolahi te ʼu fafine Kilisitiano ʼe nātou logo ki te ʼu taʼi palalau ʼaia mai ʼonatou ʼu ʼohoana ʼaē ʼe fakafeagai. Kae ʼi te temi ʼaē ʼe gāue ai te ʼu tagata ʼaia ʼi te solia, ko ʼonatou ʼu ʼohoana fafine ʼe nātou tau mo te ʼu faigataʼaʼia makehe ʼo ʼuhiga mo tanatou tui. (Isaia 2:4; Soane 17:16) Koia, ʼe fakatuʼutuʼu feafeaʼi e te ʼu fafine Kilisitiano ʼaia ke nātou nonofo mālohi ʼi te faʼahi fakalaumālie pea mo gāue ʼi te selevisi ʼo te Puleʼaga?

Ko te agatonu ʼaē kia Sehova ʼAtua fakatahiʼi mo te faiga takitokotahi, ʼe tokoni kia nātou ke nātou kātaki. ʼE fakamahino fēnei e Yvonne, te ʼohoana ʼo te tagata solia, “ ʼe ʼau mahalo ko taku faiga mālohi ʼo ʼoku totonu. Neʼe ʼau ʼiloʼi neʼe ʼi ai te faʼahiga fai moʼo fakamalū te fakafeagai ʼo toku ʼohoana.” ʼE moʼoni, neʼe ʼi ai te ʼu puleʼaki.

ʼE fakamatala e te tahi fafine Kilisitiano, ʼe ʼohoana ki te tagata maʼu tuʼulaga ʼi te solia, te ʼaluʼaga ʼo te fakaliliu e tana faiga ke faigafua age ki tona ʼohoana. ʼE ina ʼui fēnei, “ ʼe ina ʼiloʼi taku polokalama ʼo feiā mo ʼa ia, pea ko te hahaʼi ʼo te solia ʼe nātou leleiʼia te faʼahi ʼaia.” Kae, ko tana gāue hoholo ʼaē kia Sehova ʼe mole ko he meʼa faigafua.

Ko Te Tauʼi ʼo Te Tō ʼĀteaina

Ko te ʼu fafine ʼohoana ʼo te ʼu tagata ʼaē ʼe feʼaluʼaki ʼe nātou tau felāveʼi mo te faigataʼaʼia ʼaē ko te mavae ʼi tonatou ʼu ʼapi ʼo nātou mulimuli ʼi ʼonatou ʼu ʼohoana ki he koga meʼa mamaʼo neʼe hinoʼi nātou kiai. Koia, ʼi tanatou nonofo ʼaē ʼi he koga meʼa ʼe mole māhani kiai, ʼe faigafua te logoʼi ʼaē ʼo te tō ʼāteaina. Kae ʼe mole tonu ke feiā ia. ʼE ʼi ai te faigamālie ʼe maʼu e nātou ʼaē ʼe nātou tauhi kia Sehova. Koteā te faigamālie ʼaia? ʼE ʼui e te ʼapositolo Kilisitiano ko Petelo, ʼe ʼi ai “te famili katoa ʼo te ʼu tēhina.” ʼI te temi nei, ʼe nātou lauʼi miliona, ko te kau Fakamoʼoni ʼa Sehova ʼi te ʼu fenua e 231 ʼe nātou gāue ohage ko he foʼi famili faka Kilisitiano, ko he “faga tautēhina.” Teitei pe ke koutou maʼu ia nātou ʼi te potu fuli pe.—1 Petelo 2:17, Traduction du monde nouveau, tā fakapilitānia ʼi te ʼu kumiʼaga, nota ʼi te lalo pasina.

Ko Susan neʼe hiki fakapuna’maʼuli mai tona nofoʼaga, ʼo mavae ʼo nofo ʼi te fale solia ʼo te solia ʼi te ʼu vakalele tau ʼaē neʼe hinoʼi kiai tona ʼohoana. Neʼe kei foʼofoʼou ʼi te tui pea neʼe faigaʼi tuʼumaʼu tona ʼohoana ʼaē ʼe mole tui tahi mo ia ke gata tana kau ʼaē ki te minisitelio faka Kilisitiano. ʼE ina fakamatala fēnei: “Neʼe ʼau foimo ʼalu ki te ʼu fono ʼo te koga meʼa, pea ʼi ai neʼe feala ai ʼo haku heka pea mo fai palalau mo ʼihi ʼu tēhina. ʼE feala haku ʼui moʼoni ko te fakatahi ʼaia neʼe ina uga ʼau ke ʼau haga fai.”

ʼI ʼihi temi, ko te tō ʼāteaina ʼe fakatupu ai he lotomamahi. Kae, ko te ʼu logo lelei ʼe nātou fetogi te ʼu ʼaluʼaga mamahi. ʼE fakamatala fēnei e Glenys, te tuagaʼane Pilitania neʼe mulimuli ʼi tona ʼohoana ʼaē neʼe hinoʼi ki te fenua tai: “ ʼI te temi ʼaē neʼe ʼau lotomamahi ʼaupito ai, fokifā pe, neʼe faitohi mai te tahi neʼe ʼau ʼiloʼi ʼi te ʼu taʼu kua hili ʼi taku ʼi te solia ʼo ina fakahā mai neʼe hoki papitema ia ia ko he Fakamoʼoni ʼa Sehova. Ko te meʼa ʼaia neʼe ina fakatupu ia ʼau he fakaloto mālohi ʼi tona temi tonu.”

Ko Jane, ʼaē neʼe folau mo tona ʼohoana ki Kenya, neʼe ina tokagaʼi ko te ʼu fono faka Kilisitiano ko he hāofakiʼaga, logo aipe te fai ʼo te ʼu fono ʼi te lea neʼe mole mahino kiai. ʼE fēnei tana fakamatala, “ ʼe ʼau ʼiloʼi neʼe ko te faʼahi ʼaia neʼe loto e Sehova ke ʼau ʼi ai. Neʼe ʼau nofo mo ʼoku ʼu tēhina, pea neʼe nātou fakaloto mālohiʼi ʼau ʼi te faʼahi fakalaumālie. Neʼe nātou tali leleiʼi ia ʼau, pea neʼe ʼau logoʼi ia nātou ohage ko he famili.”

ʼE kau ia Jane ʼi te tokolahi ʼaē ʼi te ʼu taʼi ʼaluʼaga ʼaia neʼe nātou maʼu te ʼu kāiga fakalaumālie neʼe mole pe la nātou ʼiloʼi ʼe ʼi ai honatou ʼu hahaʼi feiā!—Maleko 10:29, 30.

Ko Te Nofo Mālohi ʼi Te Felāveʼi ʼAē Mo Te Fakafeagai

Neʼe fakatokagaʼi fēnei e Sesu, “ ʼAua naʼa koutou mahalo neʼe ʼau haʼu ʼo ʼaumai te tokalelei ki te kele; neʼe mole ʼau haʼu ʼo ʼaumai te tokalelei, kaʼe ko te heletā.” (Mateo 10:34) Koteā te faka ʼuhiga ʼo tana ʼu palalau? ʼE fakamatalatala e A. T. Roberston ʼi te tohi (Word Pictures in the New Testament), ʼe māʼia mo te loto fale, ʼaē ʼe feala ke tou ʼamanaki ʼe tou maʼu ai te tokalelei, ʼe feala pe ke ʼi ai “he feliʼaki ʼo te heletā.” Neʼe fakatokagaʼi fēnei e Sesu, “ ʼio, ko te ʼu fili anai ʼo te tagata ʼe ko nātou totonu pe ʼaē ʼo tona loto fale.” (Mateo 10:36) Ko te ʼu palalau ʼaia ʼe moʼoni mokā fakafeagai he tahi ʼi he taumatuʼa ki te moʼoni!

ʼI te temi ʼaē neʼe kamata ako ai e Diane te Tohi-Tapu mo te kau Fakamoʼoni ʼa Sehova, ko tona ʼohoana, ko he tagata maʼu tuʼulaga ʼi te solia ʼi te ʼu vakalele tau, neʼe ʼitaʼita kovi. Neʼe lave feafeaʼi te meʼa ʼaia ki tonā maʼuli faka taumatuʼa? ʼE fakamatalatala fēnei e Diane, “neʼe mole kei ma felogoi. Neʼe ma fiafia ʼi tomā maʼuli faka taumatuʼa. Fokifā pe kua hage ia neʼe ma maʼuʼuli feiā pe ʼi he ʼapi e tahi.” Kae, neʼe ina tali feafeaʼi te faʼahi ʼaia? “Ko te ʼu meʼa neʼe maʼuhiga kia ʼau, neʼe ko te meʼa neʼe kua ʼau tui papau kiai pea mo taku faiga, ʼo fakatahi kiai mo te tokoni mai ʼa Sehova pea mo tona laumālie.” Neʼe tokagaʼi e Diane te faʼifaʼitaki faka Tohi-Tapu ʼo te polofeta ko Taniela.

ʼI te temi ʼaē neʼe ʼaunofo ʼi Papiloni pea neʼe foaki age te meʼa kai ʼe mole feala ke tali e he kaugana ʼa te ʼAtua, ko Taniela “neʼe ina fakapapau ʼi tona loto ʼe mole ina ʼulihi anai ia ia ʼaki te ʼu meʼa kai lelei ʼo te hau.” ʼIo, neʼe fai e Taniela te tonu maʼuhiga. Neʼe ina fakapapau ʼi tona loto ke ʼaua naʼa ina ʼulihi ia ia ʼi hana kai te taʼi meʼa kai ʼaia. Neʼe ina fakahā he toe mālohi ʼi tana “haga kole ki te tagata faifekau e tuʼulaga māʼoluga ke [ina fakagafua age] ki ai ke ʼaua naʼa ina ʼulihi ia ia.” Koteā te meʼa ʼaē neʼe hoko ai? Neʼe tapuakina e Sehova ia ia ʼi tana nofo agatonu ʼaē ki tana fakapapau.—Taniela 1:8, 9, 17.

ʼO toe feiā aipe ʼi te temi nei ʼe feala ke fakatotonu e te tagata ʼohoana ʼaē ʼe fakafeagai ke gata la te kau ʼaē ʼo tona ʼohoana ʼi te fono ʼo te kokelekasio. ʼE tonu ke tali feafeaʼi e te fafine? Neʼe tau ia Jane mo te faʼahi ʼaia. ʼE ina fakamahino fēnei mai: “ ʼE mole ʼau holomuli anai ʼi te ʼu faigataʼaʼia. Neʼe ʼau ʼiloʼi ʼe feala ke mole ʼi ai he fakatō laloʼi ʼo te tui. Neʼe tonu ke ʼau fakahā te maʼuhiga ʼaē ʼo te ʼu fono kia ʼau.” Neʼe tapuakina e Sehova tana faiga ʼi tana haga kau ki te ʼu fono.

ʼE fakamatala e Glenys, “neʼe faigaʼi e toku ʼohoana ke ina tāʼofi taku ʼalu ʼaē ki te ʼu fono, kae neʼe mole fualoa tana faiga. Neʼe ʼau haga ʼalu pe ʼau. ʼI te temi ʼaē neʼe ʼau liliu ai ki fale, ʼi ʼihi temi neʼe ina tā ʼau, pea ʼi ʼihi temi, neʼe mole kei gū mai ia.” Kae, neʼe ina kātakiʼi aipe, ʼo haga faikole tuʼumaʼu aipe. ʼI te tahi faʼahi, ko tagata ʼāfea e lua neʼe nā faikole tuʼumaʼu mo ia, pea ko he faʼahi neʼe lahi ai te fakaloto mālohiʼi ʼo ia ke haga kau aipe ki te ʼu fono.—Sake 5:13-15; 1 Petelo 2:23.

ʼI ʼihi lakaga, ʼe feala ke fakaneke e te ʼu pule ʼo te ʼohoana [tagata] ke ina faka lotovaivaiʼi tona ʼohoana [fafine] ke tuku tana faka mafola ʼo te logo lelei. Neʼe fakatuʼutuʼu e Diane ʼe tonu ke ina fakamahinohino ki tona ʼohoana te ʼu meʼa ʼaē neʼe maʼuhiga kia ia. Neʼe ʼui fēnei, “neʼe kua ʼau nofo teuteu ke ʼau tali te ʼu ikuʼaga ʼo te hoko atu ʼo taku fai faka mafola.” Ko tana fakatotonu ʼaia neʼe hage ia ko te fakatotonu ʼa te kau ʼapositolo! (Gāue 4:29, 31) Kae, neʼe nofo tokaga ʼi tana gāue faka mafola. ʼE ina fakamatala: “Neʼe ko haku agamāhani ko te fai ʼo te ʼu fakaafe ki he kafe pea mo ʼau fakahā age kia nātou fuli te tohi Vérité.”—Mateo 10:16; 24:14.

Ko Te Fakalogo Kae Mole Fakatō Laloʼi Te Tui

Logope te mamahi ʼuhi ko te ʼu fihifihia faka taumatuʼa, ʼe haga te ʼu fafine Kilisitiano ki te ka haʼu pea mo nātou falala kia Sehova. Ko te meʼa ʼaia ʼe tokoni kia nātou ke nātou maʼu he fakakaukau fakapotopoto. ʼE nātou lagolago ki ʼonatou ʼu ʼohoana ʼi he ʼu faʼahiga ʼaluʼaga e fealagia kae mole nātou fakatō laloʼi tanatou tui. ʼAki tanatou fai feiā, ʼe nātou mulimuli ki te tokoni ʼa Petelo ʼe haʼu mai te ʼAtua: “Koutou fafine, ke koutou fakalogo ki ʼokotou ʼohoana totonu.” (1 Petelo 3:1) ʼI te tohi (The Amplified New Testament), ʼe tou lau fēnei te akonaki faka apositolika ʼaia: “Koutou fakakau ia koutou ohage ko koutou ko he hoa kia nātou pea mo fakalogo kia nātou, pea mo koutou faigaʼi ke koutou felogoi mo nātou.” Koutou fakatokagaʼi te mulimuli ʼa Jane ki te tokoni ʼaia. ʼE ina fakahāhā fēnei mai, “neʼe ʼui mai e toku ʼohoana ko te meʼa ʼaē neʼe ʼau loto ke ʼau fai ʼe mole tonu ia ke fakapipiki mo tana gāue. Koia neʼe ʼau faigaʼi ke ʼau kumi he ʼu ʼaluʼaga neʼe feala ai ke ʼau tokoni ki ai.”

Ko ʼihi fafine Kilisitiano ʼe nātou tali ke nātou ʼolo ki te ʼu fakatahitahi fakafiafia ʼe fakaafe ki ai ʼonatou ʼu ʼohoana. Kae ʼe nātou fakatuʼutuʼu aipe ke ʼaua naʼa nātou fakatō laloʼi tanatou tui. Neʼe fakaʼaogaʼi e Jane te temi moʼo palalau mo tona ʼohoana ki te faʼahi ʼaia. Neʼe ina fakamatalatala mamalie ʼe lotolelei ke kau ki te fakatahi kae ʼe mole ʼamanaki ke ina fakalainoaʼi tona ʼohoana. “ ʼE ʼau ʼiloʼi ʼi ʼihi lakaga ko nātou fuli ʼaē ʼe kau ai ʼe nātou ʼamanaki ke tuʼu ʼo kau ki te hiki ʼaē ʼo te ʼu ipu. Neʼe ʼau ako ʼe gata pe ko Sehova ʼe tau mo ia te taʼi fakaʼapaʼapa ʼaia, pea ko te hiki ʼaē ʼo te ʼu ipu ʼe ko te fakahā ʼaia ʼo he fakaʼapaʼapa. Neʼe mahino ai toku ʼohoana ki te ʼaluʼaga fakalainoa ʼe feala ke hoko, ʼo ina ʼui mai ai: ‘Nofo pe la koe!’ Pea neʼe ʼau fakalogo ki ai.”

ʼI te tahi ʼaluʼaga, ko Glenys neʼe kaugā ʼalu mo tona ʼohoana ki te fakatahi feiā, kae neʼe ina lama te ʼu hahaʼi maʼu tuʼulaga ʼi te ʼu muliʼi laupapa. ʼI tana sio ʼaē neʼe nātou teuteu ke nātou hiki ʼonatou ʼu ipu, neʼe mavae fakafūfū ai ki te koga fale mālōlō! ʼIo, ko te ʼu fafine ʼaenī neʼe nā fakahā te aga ʼaē ʼe tau kae neʼe mole nā fakatō laloʼi tanā tui.

“Ko Te Tafoki Mai Kae Mole Heʼeki Fai He Palalau”

Neʼe manatu fēnei ia Yvonne, “kapau ʼe ʼau hikihiki toku ʼu fealagia ʼo ʼoku ʼi toku ʼuhiga fafine, ʼe sio anai toku ʼohoana ko te moʼoni ʼe ina fetogi toku maʼuli.” Koia neʼe ina lau ai pea mo ina toe lau ai te kapite ʼi te tohi Vie de famille ko te kupu tāfito ʼo te kapite “Ko He Fafine ʼOhoana ʼOfaina.”a “Neʼe tokaga tāfito ki te ʼu palalau ʼaē ʼe hoa mai ki te kupu tāfito ʼaenī ‘Ko Te ʼu Fafine Tagi Hoʼikele Pea Mo Munamuna’! Kae neʼe ʼau fakatokagaʼi neʼe ʼāʼāsili age te ʼu fihifihia ʼi taku faiga lahi ʼaē ke ʼau palalau ki toku ʼohoana.” Kae, neʼe fakaʼosiʼosi lelei foki, neʼe ina lavaʼi te tokoni ki tona ʼohoana ke tauhi kia Sehova. ʼO feafeaʼi? ʼAki tana muliʼi te fakatuʼutuʼu ʼaē ʼe tuʼu ia 1 Petelo 3:1, ʼe feala ki te ʼu tagata ʼohoana “ke nātou tafoki mai, ka heʼeki fai he palalau.”

Ko te faʼahiga tokaga ʼaē ʼa te ʼu fafine Kilisitiano ki ʼonatou ʼu famili ʼe lahi tana fakatupu te fakavikiviki ki ʼihi. ʼE fakamatala e Diane, “neʼe ʼau faigaʼi ke ʼau fakaliliu te moʼoni ko he meʼa ʼe leleiʼia. Ka ʼau ʼalu ki te ʼu fono, ʼe hage ʼe logoʼi toku ʼohoana tana nofo tokotahi, koia neʼe ʼau fai ai te fakatuʼutuʼu ke ʼau akoʼi taku fānau ke nātou fakapotopoto tāfito ʼi te temi ʼaē ʼe mātou tau ai ki fale. Neʼe ʼau toe faigaʼi foki ke lahi age taku tokaga ki ai ka mātou liliu ki fale.” ʼAki te temi neʼe fetogi te aga ʼo tona ʼohoana ʼi tana tali ʼaē te tokaga ʼofa ʼo tona famili.

Ko te ʼu kaugana ʼaē ʼa Sehova ʼe feala ke kau mo nātou ki te tokoni. ʼE fakamatala e Jane neʼe fakafiafia tona ʼohoana ki te kau misionea ʼo Kenya ʼaē ko te kau Fakamoʼoni. “Neʼe nātou fakakaumeʼa mo ia pea neʼe nātou fai palalau ki te aka fitipolo, pea neʼe lahi tonatou ʼofa kāiga. Neʼe tuʼa lahi te fakaafe ʼo māua ki te ʼu ʼapi ʼo te kau misionea ki he kakai.” Ki muli mai neʼe fakamatalatala fēnei e tona ʼohoana: “Neʼe ʼau kamata fetogi katoa taku manatu ʼo ʼuhiga mo te tui ʼa Jane. Ko ʼona ʼu kaumeʼa ʼe nātou ʼatamai pea neʼe feala hanatou palalau ki te tuʼuga meʼa.” ʼO toe feiā aipe, ko te ʼohoana ʼo Diane neʼe fetogi tana faʼahiga manatu ʼo ʼuhiga mo te moʼoni. ʼI te temi ʼaē neʼe mate ai te motokā ʼaē neʼe ina taki, neʼe haʼu ai te Fakamoʼoni kei tūpulaga ʼo tokoni ki ai. ʼE ina ʼui, “ko te meʼa ʼaia neʼe lave moʼoni ia kia ʼau.”

ʼE moʼoni, ʼe mole tafoki fuli mai te ʼu ʼohoana ki te moʼoni. Kae koteā te meʼa ʼe hoko? ʼE foaki e Sehova te tokoni ʼe ina faka fealagia ki te kau agatonu ke nātou faʼa kātaki. (1 Kolonito 10:13) Koutou fakatokagaʼi te fakaloto mālohi ʼaē ʼe tuku e Glenys kia nātou ʼaē ʼe tau mo te ʼu taʼi faigataʼaʼia ʼaia: “ ʼAua naʼa koutou lotolotolua ʼi he temi neʼe ko Sehova ʼaē neʼe ina fakatuʼutuʼu te ʼohoana pea ʼe ina loto ke nonofo fakatahi te taumatuʼa. Koia logo aipe he faʼahiga meʼa ʼe feala ke fai e te ʼohoana peʼe ko he faʼahiga fakafeagai ʼe feala ke tau mo koutou mai ia nātou ʼaē ʼi ʼokotou tafa, ʼe mole tali anai e Sehova ʼi he lakaga ke koutou tūkia.” Logope ko tona ʼohoana ʼe mole heʼeki tauhi kia Sehova, kae ko tana aga ʼaē ki ai ʼo feiā mo te moʼoni kua malū mai.

‘Koutou To ʼAki Te ʼu Loʼimata; Koutou Utu ʼAki Te Fiafia’

ʼIo, ko te ʼu fafine Kilisitiano ʼaenī ʼe nātou faiga ke nātou tauhi kia Sehova. Kapau ʼe koutou nofo ʼi he ʼu ʼaluʼaga feiā, koutou fakaliliu te meʼa ʼaenī ko he fakatuʼutuʼu ʼa koutou. Koutou manatuʼi te fakaloto mālohi ʼaenī: “Ko Sehova, tou ʼAtua, ʼaē ʼe tonu ke ke manavasiʼi ki ai. Ko ia ʼaē ʼe tonu ke ke tauhi ki ai, pea ʼe ko ia ʼaē ʼe tonu ke ke pipiki ki ai.”—Teutalonome 10:20.

“Ko ia ʼaē ʼe hū moʼoni ki tuʼa, tatau aipe peʼe tagi, pea ʼe ina ʼamo te taga ʼe fonu ko te pulapula, ʼe liliu moʼoni anai ʼaki he kalaga fakafiafia, ʼo ina ʼamo he taga fulumeto,” ko te ʼui ʼaia ʼa te tagata fai pesalemo. (Pesalemo 126:6) ʼE fakamoʼoni e te fafine Fakamoʼoni, “ ʼe lahi takotou tagi ʼi takotou faiga ʼaē ke koutou fakahā te moʼoni ki tokotou hoa, peʼe koutou fai fakalogologo peʼe koutou palalau age ki ai. Kae ʼi tona fakaʼosi age ʼe koutou tagi fiafia, tatau aipe peʼe mole ina tali te moʼoni, kae ʼe tapuakina e Sehova takotou faiga.”

Ko nātou fuli ʼaē ʼe nātou tauhi agatonu kia Sehova logo aipe te fakafeagai ʼaē ʼe felāveʼi mo nātou ʼi tonatou loto fale ʼe tau moʼoni mo nātou te fakavikiviki. ʼE ʼaoga kia nātou he lagolago pea mo he ʼofa. ʼOfa pe ke nātou taupau maʼu te mole fakatō laloʼi tanatou tui, pea mo nātou faiga ʼo tauhi kia Sehova!

[Nota ʼi te lalo pasina]

[Paki ʼo te pasina 22]

Ko te ako ʼaē ʼi te faikole ʼe ina fakamālohiʼi te faiga faka Kilisitiano