Neʼe Kua Hāofaki Koa Koutou?
ʼI TE taʼu hogofulu ʼo Johnny neʼe tāʼofi ia e te tagata ʼi te kelemesi, pea ina fehuʼi age ki ai: “Tūpulaga, ʼe ke tali koa ia Sesu Kilisito, ko tou ʼAliki pea mo tou Fakamaʼuli?” ʼE hage neʼe mata faikehe te fehuʼi ʼaia kia Johnny, koteʼuhi neʼe tui tuʼumaʼu ia kia Sesu. Koia neʼe ina tali fēnei age, “Ei ʼe ʼau fai te faʼahi ʼaia.” Neʼe kalaga te tagata ke logo kiai te hahaʼi fuli ʼo ʼui maʼana: “Fakavikiviki ki te ʼAliki! Kua ʼosi hāofaki te tahi nefesi maʼa Kilisito!”
ʼE faigafua koa te hāofaki? Neʼe “hāofaki” koa ia Johnny ʼi te temi pe ʼaē neʼe ina ʼui ai te ʼu palalau ʼaia, māʼiape la te ʼu meʼa ʼaē ka ina fai anai lolotoga tona maʼuli? Tokolahi te hahaʼi fakamalotoloto ʼe nātou ʼio anai ki te faʼahi ʼaia. Neʼe ʼui fēnei e ʼihi ʼu kiʼi pepa lotu ʼe tonu ke tohi te ʼaho ʼaē neʼe koutou “hāofaki” ai, ke feala ai hakotou manatuʼi.
Neʼe tohi e te tagata takitaki lotu ʼo fēnei “ko te temi pe ʼaē ʼe tui ai he tahi kia Kilisito . . . kua fakatuʼutuʼu fakatomuʼa tona hāofaki ʼo talu ai.” Neʼe ina tala ʼe ʼui e te Tohi-Tapu ko te fakamaʼuli ʼe fakalogo ki he meʼa, neʼe fai tuʼa tahi, ʼi te lakaga pe e tahi, “ ʼo fakamoʼoni ʼaki te tui, kae mole ko te fakahā hoholo ʼo te tui.” Neʼe tohi fēnei e te tahi tagata faitohi lotu: “Ko te meʼa ʼaia ʼe ko he gāue ia kua ʼosi. Ko te faʼahi ʼaia kua ʼosi fakahoko ia maʼa koutou. ‘Kua ʼosi takotou tau.’ Kua ‘molehi takotou agahala.’ ” Kae tatau aipe mo te hahaʼi ʼaē ʼe nātou tui mālohi ʼe ko te faʼahi ʼaia ʼe moʼoni, ʼe feala pe ke nātou tokagaʼi ai he fihifihia. ʼE hā lelei mai ko te hahaʼi kaugamālie ʼaē neʼe ʼui age kia nātou kua nātou “hāofaki” ʼe mole nātou maʼuliʼi te meʼa ʼaē ʼe ʼui e te Tohi-Tapu ke nātou fai. ʼE fakamahino fēnei ʼi te agamāhani e lagi mole heʼeki nātou “tali” moʼoni ia Kilisito.
Kae, koteā koa te faka ʼuhiga moʼoni ʼo te “tali” ʼo Sesu? Ko te tali ʼo Sesu ʼe ko he fakamoʼoni koa ʼo te tui ʼi he lakaga pe e tahi, peʼe ko he faʼahi ʼe tonu ke fakahā hoholo ʼi totatou maʼuli? ʼE tonu koa ke mālohi tatatou tui ke feala ai hana uga tatou ke tou fai he gāue? ʼE feala koa ke tou tali moʼoni te ʼu tapuakina ʼo te sakilifisio ʼa Sesu ka mole tou tali te maʼua ʼaē ke tou mulimuli ia te ia?
Tokolahi te hahaʼi ʼe nātou fia maʼu te ʼu tapuakina, kae ʼe mole nātou loto ki te maʼua ʼaē ko te muliʼi pea mo fakalogo kia Sesu. ʼI tona fakahagatonu, ko te kupu ʼaē “fakalogo” ʼe fakahohaʼa kia nātou. Koia neʼe ʼui fēnei e Sesu: “Haʼu ʼo muli mai ia te ʼau.” (Luka 18:18-23) Pea ʼe tala fēnei e te Tohi-Tapu: “Ko nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu . . . ʼe nātou tali anai te tautea fakamāu ʼo te fakaʼauha heʼegata.”—2 Tesalonika 1:8, 9; Mateo 10:38; 16:24.
ʼE lahi te ʼu meʼa ʼe ʼui e te Tohi-Tapu ʼe feala ke lagaʼi ai te ʼu fehuʼi fakamalotoloto ʼo ʼuhiga mo te ʼu meʼa ʼaē neʼe akonakiʼi ʼo ʼuhiga mo te fakamaʼuli. Kapau ʼe koutou fia vakaʼi te meʼa ʼaē ʼe ʼui e te Tohi-Tapu ʼo ʼuhiga mo te faʼahi ʼaia, ʼe koutou leleiʼia tāfito anai te ʼu pasina ʼaē ʼe hoa mai. Koutou avahi takotou Tohi-Tapu, pea koutou lau te ʼu vaega ʼaē ʼe tuʼu ʼi te alatike, ke koutou ʼiloʼi ai te meʼa ʼaē neʼe akonakiʼi e Sesu pea mo tana kau ʼapositolo ʼo ʼuhiga mo te faʼahi maʼuhiga ʼaia.