Koteā Te Meʼa ʼe Tonu Ke Tou Fai Ke Feala Ai Hotatou Hāofaki?

ʼI HE tahi temi neʼe fehuʼi age e te tagata kia Sesu ʼo fēnei: “ ʼAliki, ko nātou ʼaē kua hāofaki ʼe tokosiʼi pe koa la ia nātou ia?” Neʼe koteā te tali age ʼa Sesu? Neʼe ina ʼui age koa: ‘Ke ke tali pe ia ʼau ohage ko tou ʼAliki pea mo tou Fakamaʼuli, pea ʼe ke hāo ai anai’? Kailoa! neʼe ʼui age e Sesu: “Koutou fetolo mālohi ke koutou hū ʼi te matapā fāveliveli, heʼe, tokolahi, ʼe ʼau tala atu, ʼe nātou faiga anai ke nātou hū kaʼe ʼe mole nātou lavaʼi anai.”​—⁠Luka 13:​23, 24.

Neʼe meʼa noaʼi koa e Sesu te fehuʼi ʼa te tagata? Kailoa, neʼe mole fehuʼi age ia e te tagata peʼe faigataʼa anai te hāofaki; neʼe ina fehuʼi age peʼe nātou tokosiʼi anai. Koia neʼe fakahā age pe ia e Sesu ko te hahaʼi tokosiʼi pe ʼaē ʼe fetolo mālohi, ʼe nātou maʼu anai te tapuakina taulekaleka ʼaia, kae ʼe mole tokolahi anai nātou ohage ko tatatou manatu.

‘ ʼE mole ko te faʼahi ʼaia neʼe ʼui mai kia ʼau,’ ko te fakafifihi ʼaia ʼa ʼihi ʼu tagata lautohi. E lagi ʼe ina fakamatatau te meʼa ʼe tuʼu ia Soane 3:​16, ʼaē ʼe ina ʼui fēnei: “Heʼe ko te ʼAtua ʼi tona ʼofa lahi ʼaē ki te malamanei, neʼe ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa fakaʼauha, kae ke ina maʼu te maʼuli heʼegata.” (King James Version) Kae, ʼe tou tali fēnei: ‘Koteā koa te meʼa ʼe tonu ke tou fai ke feala ai hotatou hāofaki? Neʼe maʼuli moʼoni koa Sesu? ʼE mahino ia. Ko ia koa ʼe ko te ʼAlo ʼo te ʼAtua? ʼE mahino ia! Pea, ʼuhi ko te fakahigoaʼi e te Tohi-Tapu ia Sesu ko te “Faiako” pea mo “ ʼAliki,” ʼe mole tonu koa la ke tou tui ki te meʼa ʼaē ʼe ina ako, ʼo fakalogo ki ai, pea mo mulimuli ki ai?’​—⁠Soane 13:⁠13; Mateo 16:16.

Tou Mulimuli Kia Sesu

ʼE malaga te fihifihia ʼi henī! Tokolahi te hahaʼi ʼaē neʼe nātou ʼui kua nātou “hāofaki” ʼe hage ia neʼe mole faʼa lahi tanatou fia mulimuli peʼe fia fakalogo ʼaē kia Sesu. Koia, neʼe tohi fēnei e te tagata takitaki lotu ʼo te lotu Polotesita: “ ʼE mahino ia, ko tamatou tui kia Kilisito ʼe tonu ke hoholo atu. Kae ko te ʼui ʼaē ko tamatou tui ʼe maʼua ke hoholo atu, peʼe ʼaoga ke hoholo atu, neʼe mole fakatafito ʼosi ia ki te Tohi-Tapu.”

ʼO mole tatau ia mo te Tohi-Tapu, ʼaē ʼe tuʼu ai te lisi ʼo te ʼu aga heʼeʼaoga ʼaē ʼe māhani kiai te hahaʼi ʼaē ʼe nātou ʼui kua nātou “hāofaki.” ʼO ʼuhiga mo ia ʼaē ʼe hoko atu pe tana fai te ʼu aga heʼeʼaoga ʼaia, neʼe fakatotonu fēnei ki te kau Kilisitiano: “Koutou toʼo te tagata agakovi ʼi te lotolotoiga ʼo koutou.” ʼE mahino ia ʼe mole loto te ʼAtua ke ʼulihi e te hahaʼi agakovi tana kokelekasio faka Kilisitiano!​—⁠1 Kolonito 5:​11-13.

Koteā koa te faka ʼuhiga ʼo te mulimuli ʼaē kia Sesu, pea ʼe lava feafeaʼi hatatou fai te faʼahi ʼaia? Koteā koa te meʼa ʼaē neʼe fai e Sesu? Neʼe ina fai koa he aga heʼeʼaoga? he folonikasio? pe neʼe ʼinu kava fakavalevale? pe neʼe gutuloi? Neʼe heʼe faitotonu koa ia ʼi tana gāue? Kailoa ia! ‘Kae,’ ʼe lagi koutou fehuʼi anai, ‘kua ʼosi ʼau fakamaʼa toku maʼuli mai te ʼu meʼa fuli ʼaia?’ Moʼo tali ki te fehuʼi ʼaia, tou vakaʼi ia Efesi 4:17 ʼo aʼu ki te kapite 5:5. ʼE mole ʼui mai ai ʼe tali anai tatou e te ʼAtua logope la he faʼahiga meʼa ʼe tou fai. Kae, ʼe ina ʼui mai ke tou kehekehe mo te ʼu puleʼaga ʼo te mālama ʼaē “kua puli ia [nātou] te mahino ki te aga ʼaē ʼe tonu ke fai, . . . kae neʼe mole feiā [tatatou] ʼiloʼi ia Kilisito . . . Ke [tou] līaki [totatou] ʼulugaaga ʼāfea ʼaē ko te ʼata ʼo [tatatou] aga ʼāfea . . . Ke ʼaua naʼa toe kaihaʼa te tagata kaihaʼa . . . Ko te folonikasio pea mo te aga heʼemaʼa ʼi tona ʼu agaaga fuli, pea mo te holi fakavale, ke ʼaua naʼa talanoa kiai ʼi te lotolotoiga ʼo [tatou], ohage ʼe tāu mo he kau maʼoniʼoni . . . Heʼe [tou] ʼiloʼi lelei, pea mo mahino kia [tatou], ʼe mole he folonikasio, peʼe ko he tahi ʼe heʼemaʼa, peʼe holi fakavale​—⁠ko tona faka ʼuhiga ko he tahi ʼe tauhi tamapua⁠—​ʼe ina maʼu te puleʼaga ʼo Kilisito pea mo te ʼAtua.”

ʼE tou mulimuli koa kia Sesu mo kapau ʼe mole tou faiga pe la ke ʼalutahi totatou maʼuli mo tana faʼifaʼitaki? ʼE mole ʼi ai koa la he ʼu meʼa ke tou fai ke tatau ʼosi totatou maʼuli mo Kilisito? Ko te fehuʼi maʼuhiga ʼaia ʼe tahitahiga ʼaupito tona tokagaʼi e te hahaʼi ʼaē ʼe nātou ʼui fēnei ohage ko tona tuʼu ʼi te kiʼi pepa lotu ʼaenī: “ ’Ōmai kia Kilisito ʼi te temi nei​—⁠ʼaki tokotou ʼuhigaʼi tagata ʼi te temi ʼaenī.”

Neʼe fakatokaga tatou e te tisipulo ʼa Sesu ʼo ʼuhiga mo te ʼu tagata heletiko ʼaē neʼe nātou “fetogi te ʼofa makehe ʼo totatou ʼAtua moʼo takuʼaki te ʼu aga heʼeʼaoga pea mo nātou lavakiʼi totatou Pule e tahi pea mo ʼAliki, ko Sesu Kilisito.” (Suta 4) Kae, e feafeaʼi koa hatatou fetogi te manavaʼofa “moʼo takuʼaki te ʼu aga heʼeʼaoga”? ʼE feala ke tou fai te faʼahi ʼaia ʼaki tatatou manatu ʼe ʼuʼufi e te sakilifisio ʼa Kilisito te ʼu agahala ʼaē ʼe tou loto ke tou fai hoholo, kae mole ko te ʼu agahala ʼaē ʼe tou fai ʼuhi ko te heʼe haohaoa ʼo te kakano ʼaē ʼe tou faiga ke tou tauʼi. ʼE mahino ia ʼe mole tou lototahi anai mo te tagata ʼave evaselio ʼiloa ʼi Amelika, ʼaē neʼe ina ʼui ʼe mole tonu ke koutou “fai he ʼu fetogi ʼi tokotou maʼuli, ke koutou līaki te ʼu agamāhani ʼaē ʼe kovi, ke fetogi tokotou maʼuli ke ʼalutahi mo te ʼu lekula ʼo te Tohi-Tapu.”​—⁠Fakatatau mo te manatu ʼaē ia Gāue 17:30; Loma 3:25; Sake 5:​19, 20.

Ko Te Tui ʼe Ina Uga Tatou Ke Tou Fai He Gāue

Neʼe ʼui ki te tokolahi “ko te tui kia Sesu” ʼe ko he fai pe ʼo he meʼa e tahi, pea ko tatatou tui ʼe mole feʼauga tona mālohi ke feala ai hana uga tatou ke tou fakalogo. Kae ʼe mole ʼalutahi ia mo te manatu ʼa te Tohi-Tapu. Neʼe mole ʼui e Sesu ko te hahaʼi ʼaē ʼe kamata tanatou lele faka Kilisitiano ʼaē kua hāofaki. Kae, neʼe ina ʼui fēnei: “Ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.” (Mateo 10:22) ʼE fakatatau e te Tohi-Tapu tatatou lele faka Kilisitiano ki he lele ʼaē ʼe tou maʼu ai te fakapale ʼi te fakaʼosi, ko te fakamaʼuli. Pea ʼe ina fakaloto mālohiʼi fēnei tatou: “Koutou lele ke koutou maʼu.”​—⁠1 Kolonito 9:⁠24.

Koia, “ko te tali ʼo Kilisito” ʼe mole gata pe ʼi tatatou tali te ʼu tapuakina ʼaē ʼe foaki mai e te sakilifisio māʼoluga ʼo Sesu. Kae ʼe fakamaʼua kiai te fakalogo. ʼE ʼui fēnei e te ʼapositolo ko Petelo ʼe kamata te fakamāu ʼi “te ʼapi ʼo te ʼAtua,” pea neʼe ina toe hilifaki atu kiai: “Kapau ʼe kamata ia tatou, pea ʼe koteā anai te fakaʼosi ʼo nātou ʼaē ʼe mole nātou fakalogo ki te logo lelei ʼa te ʼAtua?” (1 Petelo 4:17) Koia ʼe tonu ke lahi age te meʼa ʼaē ʼe tou fai, ka mole gata pe ʼi tatatou fagono pea mo tatatou tui. ʼE ʼui e te Tohi-Tapu ʼe tonu ke tou “liliu ko he ʼu hahaʼi ʼe nātou maʼuliʼi te folafola, ka mole ko he ʼu hahaʼi ʼe nātou fagono pe kiai, ʼo [tou] kākāʼi pe ia [tatou] totonu ʼaki he ʼu fakakaukau hala.”​—⁠Sake 1:⁠22.

Te ʼu Logo Neʼe Fakahā Totonu e Sesu

Ko te tohi Fakahā ʼo te Tohi-Tapu ʼe tuʼu ai te ʼu logo ʼe haʼu mai ia Sesu, neʼe fakahā e Soane ki te ʼu ʼuluaki kokelekasio faka Kilisitiano ʼaē e fitu. (Fakahā 1:​1, 4) Neʼe ʼui koa e Sesu kua feʼauga pe ʼi te “tali” e te hahaʼi ʼo te ʼu kokelekasio ʼaia ia ia? Kailoa. Neʼe ina vikiʼi tanatou ʼu gāue, te ʼu meʼa neʼe nātou fai, pea mo tanatou faʼa kātaki pea neʼe talanoa ia ki tonatou ʼofa, tanatou tui, pea mo tonatou minisitelio. Kae neʼe ina ʼui age kia nātou ʼe fakahoko anai e te Tevolo he ʼu ʼahiʼahi kia nātou, pea ʼe fakapale anai ia nātou “takitokotahi ʼo mulimuli pe ki [tanatou] ʼu gāue.”​—⁠Fakahā 2:​2, 10, 19, 23.

Koia neʼe talanoa ia Sesu ki te maʼua ʼe lahi ʼaupito age ʼi te manatu ʼa te hahaʼi kaugamālie ʼi te ʼui age kia nātou ko tonatou fakamaʼuli “ko he gāue ia kua ʼosi” ʼi te temi pe ʼaē ʼe nātou “tali” ai ia ia ʼi tanatou ʼu fono faka lotu. Neʼe ʼui e Sesu: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau. He ko ʼaē ʼe ina fia hāofaki tona nefesi ʼe ina pulihi anai ia; kaʼe ko ʼaē ʼe ina pulihi tona nefesi, ʼuhi ko ʼau ʼe ina maʼu anai ia.”​—⁠Mateo 16:​24, 25.

Ko te fakafisi kia tatou totonu! Ko te mulimuli tuʼumaʼu kia Sesu! Ko te faʼahi ʼaia ʼe fakamaʼua kiai he faiga. ʼE fetogi anai totatou maʼuli. Kae, neʼe ʼui moʼoni koa e Sesu ko ʼihi ia tatou ʼe lagi feala anai ke ‘pulihi ʼotatou ʼu nefesi’​—⁠ʼo mamate maʼa ia? Ei, ko te faʼahiga tui ʼaia ʼe haʼu pe mai te ʼatamai mālama ʼo te ʼu meʼa taulekaleka ʼaē ʼe feala ke ako ʼi te Folafola ʼa te ʼAtua. Neʼe hā te faʼahi ʼaia ʼi te ʼaho ʼaē neʼe taumakaʼi ai ia Etieni e te kau takitaki lotu aga fakavale ʼaē neʼe “mole feala ke nātou lava tali ki te poto pea mo te laumālie ʼaē neʼe palalau ia te ia.” (Gāue 6:​8-12; 7:​57-60) Pea ko te taʼi tui ʼaia neʼe fakahā ʼi totatou temi e te lauʼi afe kau Fakamoʼoni ʼa Sehova ʼaē neʼe mamate ʼi te ʼu nofoʼaga fakamamahi Nasi, koteʼuhi neʼe mole nātou maumauʼi tonatou ʼu leʼo ʼo loto ʼaē neʼe akoʼi e te Tohi-Tapu.a

Te Faiva Faka Kilisitiano

ʼE tonu ke tou taupau mālohi tatatou tui faka Kilisitiano, koteʼuhi ʼe ʼui mai e te Tohi-Tapu ʼe feala ke tou higa, ʼo mole tatau ia mo te meʼa neʼe lagi koutou logo kiai ʼi ʼihi ʼu ʼēkelesia peʼe ko te ʼu polokalama televisio faka lotu. ʼE talanoa ia ʼo ʼuhiga mo te kau Kilisitiano ʼaē kua nātou līaki “te ala ʼaē ʼe totonu.” (2 Petelo 2:​1, 15) Koia ʼe ʼaoga kia tatou ‘ke tou haga gāue ki totatou maʼuli ʼaki te manavasiʼi pea mo tekelili.’​—⁠Filipe 2:12; 2 Petelo 2:⁠20.

Neʼe feiā koa te mahino ʼa te kau Kilisitiano ʼo te ʼuluaki sēkulō, neʼe fagono moʼoni koa te hahaʼi kia Sesu pea mo te akonaki ʼa tana kau ʼapositolo? ʼIo. Neʼe nātou ʼiloʼi ʼe ʼaoga ke nātou fai he meʼa. Neʼe ʼui fēnei e Sesu: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, . . . ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”​—⁠Mateo 28:​19, 20.

ʼI te ʼosi pe ʼo te ʼu kiʼi vāhaʼa ki te temi ʼaē neʼe fai ai e Sesu te ʼu palalau ʼaia, neʼe papitema ai te toko 3 000 ʼi te ʼaho pe e tahi. Ko te hahaʼi ʼaē ʼe tui neʼe tuputupu fakavilivili ʼo aʼu ki te toko 5 000. Ko nātou ʼaia neʼe nātou akoʼi niʼihi. ʼI tanatou mavetevete ʼaē ʼuhi ko tonatou fakatagaʼi, neʼe faka fealagia ai te faka mafola ʼo te logo lelei. ʼE ʼui e te Tohi-Tapu ʼe mole ko he tokosiʼi pe ʼi te kau takitaki kae “ko nātou ʼaē neʼe mavetevete neʼe nātou ʼolo ʼi te fenua ʼo fakahā te logo lelei ʼo te folafola.” ʼI he ʼu taʼu e 30 ki muli mai, neʼe feala ke tohi e te ʼapositolo ko Paulo, ko te logo lelei “neʼe faka mafola ʼi te ʼu meʼa katoa ʼaē neʼe fakatupu ʼi te lalo lagi.”​—⁠Gāue 2:41; 4:4; 8:4; Kolose 1:⁠23.

Neʼe mole fakaliliu e Paulo ni hahaʼi, ohage ko te fai ʼa ʼihi tagata ʼave evaselio ʼi tanatou ʼui fēnei ʼi te televisio: ‘Koutou tali ia Sesu ʼi te temi nei, pea ʼe hāofaki anai koutou ʼo talu ai.’ Neʼe mole ina maʼu te manatu ʼa te tagata takitaki lotu Amelika ʼaē neʼe ina tohi fēnei: “Neʼe hāofaki moʼoni ʼau, . . . ʼi toku kei veliveli.” Hili kiai taʼu e 20 neʼe fili totonu e Sesu te ʼapositolo ko Paulo ke ina ʼave te logo faka Kilisitiano ki te hahaʼi ʼo te ʼu puleʼaga, ko te ʼapositolo faʼa gāue ʼaia neʼe ina tohi fēnei: “Ko toku sino, ʼe ʼau tukipalaʼi pea ʼe ʼau taki ia ohage he tahi ʼe popūla, heʼe ʼau manavasiʼi naʼa hili anai taku faka mafola ki niʼihi hahaʼi, ʼe ʼau liliu ʼau, ʼi he faʼahiga meʼa pe, ko he tagata ʼe faka lākahalaʼi.”​—⁠1 Kolonito 9:⁠27; Gāue 9:​5, 6, 15.

Ko te fakamaʼuli ʼe ko he meʼa ʼofa ʼe foaki noa mai e te ʼAtua. ʼE mole ko he meʼa ʼe tou maʼu ʼuhi ko tatatou fai he gāue. Kae ko te meʼa ʼaia ʼe fakamaʼuaʼi kia tatou he faiga. Kapau neʼe foaki atu e he tahi he meʼa ʼofa maʼuhiga ʼaupito pea neʼe mole koutou fakahā ʼe koutou faʼa leleiʼia te meʼa ʼofa ʼaia, ʼo koutou toʼo pea koutou ʼave, ko takotou mole leleiʼia te meʼa ʼofa ʼaia ʼe ina uga anai ia ia ke ina foaki ki he tahi kehe. Koia, e feafeaʼi koa te maʼuhiga ʼo te maʼuli ʼo Sesu Kilisito? ʼE ko he meʼa ʼofa ʼe foaki noa mai, kae ʼe tonu ke tou fakahā totatou loto fakafetaʼi ʼo ʼuhiga mo te meʼa ʼofa ʼaia.

ʼE ʼui kua hāofaki te kau Kilisitiano moʼoni ʼuhi heʼe nātou maʼu te tuʼulaga ʼe leleiʼia ai nātou ia muʼa ʼo te ʼAtua. ʼI tonatou ʼuhiga kūtuga, ʼe hoko moʼoni tonatou fakamaʼuli. ʼI tonatou ʼuhiga takitokotahi, ʼe tonu ke nātou mulimuli ki te ʼu fakatotonu ʼa te ʼAtua. Kae, ʼe feala ke galo ia tatou te meʼa ʼaē neʼe ʼui e Sesu: “Kapau ʼe mole nofo he tahi ʼo tahi mo ʼau, ʼe lī anai ia ki tuʼa ohage ko he vaʼa kua mate pea kua moamoa.”​—⁠Soane 15:⁠6.

‘Ko Te Folafola ʼa Te ʼAtua ʼe Maʼuli’

Ko te talanoa ʼaē neʼe tuʼu ʼi te kamataʼaga ʼo te ʼuluaki alatike neʼe hoko kua hili nei kiai taʼu e 60. ʼE kei tui pe ia Johnny ko te fakamaʼuli ʼe haʼu pe ʼaki ia Sesu Kilisito, kae ʼe mahino ki ai ʼe tonu ke tou fai he meʼa ke feala ai hatatou maʼu. ʼE tui papau ia ʼe talanoa te Tohi-Tapu ki te matapuna moʼoni pe e tahi ʼo te ʼamanaki maʼa te malamanei, pea ʼe tonu ke tou ako te tohi taulekaleka ʼaia, ke gāue ia tatou, pea ke ina uga tatou ke tou maʼuliʼi te ʼofa, te tui, te finegaloʼofa, te fakalogo, pea mo te faʼa kātaki. Neʼe ina akoʼi tana ʼu tamaliki ke nātou tui ki te ʼu meʼa pe ʼaia, pea ʼi te temi nei ʼe fiafia ia ʼi tana sio kia nātou ʼe nātou toe akoʼi tanatou ʼu tamaliki ʼi te ala pe ʼaia. ʼE loto ia ke maʼu e te hahaʼi fuli te faʼahiga tui ʼaia, pea ʼe ina fai ia meʼa fuli ʼe feala moʼo fakahū ʼo te tui ki te ʼu loto pea mo te ʼu ʼatamai ʼo ʼihi.

ʼAki te laumālie ʼo te ʼAtua neʼe ina uga te ʼapositolo ko Paulo ke ina tohi ko “te folafola ʼa te ʼAtua ʼe maʼuli pea ʼe ina fakalogoʼi tana gāue.” (Hepeleo 4:12) ʼE feala ke ina fetogi totatou maʼuli. ʼE feala ke ina uga koutou ke koutou maʼuliʼi te ʼofa, te tui, pea mo te fakalogo ʼaē ʼe haʼu mai te loto. Kae ʼe tonu ke lahi age te meʼa ʼaē ʼe koutou fai, ʼo mole gata pe ʼi takotou “tali” ʼi tokotou ʼatamai te meʼa ʼaē ʼe ʼui mai e te Tohi-Tapu. Ke koutou ako te Tohi-Tapu pea ke koutou tuku ke ina uga tokotou loto. Koutou tuku te poto ʼo te Tohi-Tapu ke ina takitaki koutou. Ko te toko 5 000 000 Fakamoʼoni ʼa Sehova ʼe nātou lotolelei ke nātou fai he ʼu ako Tohi-Tapu ʼi te ʼu ʼapi ʼi he ʼu fenua e 230 tupu. Moʼo vakaʼi peʼe koteā te meʼa ʼe feala ke koutou maʼu ʼi te taʼi ako ʼaia, koutou faitohi ki te kau faʼu tohi ʼo te nusipepa ʼaenī. ʼE koutou fiafia anai ʼi takotou maʼu he tui pea mo he mālohi fakalaumālie!

[Nota ʼi te lalo pasina]

[Talanoa ʼo te pasina 7]

He Koʼe ʼe Tonu “Ke Tau Mālohi ʼo ʼUhiga Mo Te Tui”?

Ko te tohi ʼo Suta ʼi te Tohi-Tapu neʼe fai ki te “ ʼu hahaʼi ʼaē neʼe pāui . . . , neʼe taupau maʼa Sesu Kilisito.” ʼE ʼui koa e te vaega ʼaia ʼe nātou maʼu moʼoni tonatou fakamaʼuli, koteʼuhi neʼe nātou ‘tali ia Sesu’? Kailoa, neʼe ʼui e Suta ki te kau Kilisitiano ʼaia ke nātou “tau mālohi ʼo ʼuhiga mo te tui.” ʼE ina fakahā age kia nātou te ʼu tupuʼaga e tolu ʼaē ke nātou fai feiā. ʼUluaki, ko te ʼAtua neʼe ina “hāofaki te hahaʼi mai te fenua ʼo Esipito,” kae ki muli age neʼe hēʼia te tokolahi ia nātou. Lua, tatau aipe la mo te kau ʼaselo neʼe nātou agatuʼu pea neʼe nātou liliu ko te kau temonio. Tolu, neʼe fakaʼauha e te ʼAtua ia Sotoma pea mo Komola ʼuhi ko te fai ʼo te ʼu aga heʼeʼaoga fakavale ʼi te ʼu kolo ʼaia. ʼE fakahā e Suta te ʼu fakamatala faka Tohi-Tapu ʼaia “ohage he faʼifaʼitakiʼaga moʼo fakatokaga” kia tatou. ʼIo, ʼo feiā aipe mo te hahaʼi tui ʼaē neʼe “taupau maʼa Sesu Kilisito” ʼe tonu ke nātou tokakaga ke ʼaua naʼa nātou hēʼia mai te tui moʼoni.​—⁠Suta 1-7.

[Talanoa ʼo te pasina 8]

Ko Te Manatu Fea Koa ʼAē ʼe Totonu?

ʼE ʼui e te Tohi-Tapu: “ ʼE ʼui ko he tagata ʼe faitotonu ʼaki te tui, ʼo kehe ia mo te ʼu gāue ʼaē ʼo te lao.” ʼE ina toe ʼui foki: “ ʼE ʼui ko he tagata ʼe faitotonu ʼaki te ʼu gāue, kae mole gata ʼaki pe te tui.” Ko te manatu fea koa ʼaē ʼe totonu? ʼE ʼui koa ʼe tou faitotonu ʼaki te tui peʼe ʼaki te ʼu gāue?​—⁠Loma 3:28; Sake 2:⁠24.

ʼE ʼui mai e te Tohi-Tapu ko te ʼu manatu ʼaia e lua ʼe totonu.

ʼI te lolotoga ʼo te ʼu sēkulō neʼe foaki e te ʼAtua te Lao ʼaki ia Moisese ʼo ina ʼui ki te kau atolasio Sutea ke nātou fai he ʼu sakilifisio pea mo he ʼu mōlaga ohage ko tona fakatotonu age kia nātou, ke nātou tokagaʼi te ʼu ʼaho lafeti, pea ke nātou mulimuli ki te ʼu fakatotonu ʼo ʼuhiga mo te meʼa kai pea mo ʼihi age ʼu meʼa. Ko te “ ʼu gāue ʼo te lao,” peʼe ko te “ ʼu gāue,” neʼe mole kei ʼaoga ia ʼi te ʼosi foaki e Sesu tona sakilifisio haohaoa.​—⁠Loma 10:⁠4.

Kae ʼuhi ko te ʼu gāue ʼaia neʼe fakahoko ʼi te Lao Faka Moisese neʼe fetogi leva ia e te sakilifisio māʼoluga ʼo Sesu, ʼe mole faka ʼuhiga ia ʼe feala ke tou meʼa noaʼi te ʼu fakatotonu ʼa te Tohi-Tapu. ʼE ina ʼui fēnei: “ ʼE lahi ʼaupito feafeaʼi age te taʼataʼa ʼo Kilisito . . . ʼe ina fakamaʼa totatou ʼu leʼo ʼo loto mai te ʼu gāue mate [te ʼu gāue ʼāfea] ke feala ai hatatou gāue ki te ʼAtua maʼuli ʼaki he gāue fakataputapu?”​—⁠Hepeleo 9:⁠14.

E feafeaʼi koa hatatou “gāue ki te ʼAtua maʼuli ʼaki he gāue fakataputapu”? Pea tahi ʼaē, ʼe ʼui mai e te Tohi-Tapu ke tou tauʼi te ʼu gāue ʼo te kakano, ke tou tauʼi te aga heʼeʼaoga ʼo te mālama, pea ke tou tekeʼi tana ʼu hele. ʼE ʼui e te Tohi-Tapu: “Tauʼi, te tau matalelei ʼo te tui moʼoni,” ke tou līaki “te agahala ʼaē ʼe ina fakahēʼi gafua tatou,” pea ke “faʼa kātaki ʼo feleleʼi ʼi te lele ʼaē neʼe fakaʼui mai kia tatou, tou haga tuʼumaʼu kia Sesu, ko te Meʼa Gāue tāfito ʼo tatatou tui, ia ia ʼaē ʼe ina taki ki te haohaoa.” Pea ʼe fakaloto mālohiʼi tatou e te Tohi-Tapu ke ʼaua naʼa ‘tou fiu pea mo lotovaivai ʼi totatou ʼu nefesi.’​—⁠1 Timoteo 6:12; Hepeleo 12:​1-3; Kalate 5:​19-21.

ʼE mole tou maʼu te fakamaʼuli ʼi tatatou fai te ʼu meʼa ʼaia, koteʼuhi ʼe mole he tagata ʼe tau mo feʼauga ke ina maʼu te tapuakina fakatalakitupua ʼaia. ʼE mole tāu mo tatou te meʼa ʼofa taulekaleka ʼaia, kae, kapau ʼe mole tou fakahā totatou ʼofa pea mo tatatou fakalogo, ʼo fai te ʼu meʼa ʼaē ʼe ʼui mai e te ʼAtua pea mo Kilisito ʼi te Tohi-Tapu ke tou fai. Ka ʼe mole tou gāue moʼo fakahā tatatou tui, ʼe mole he ʼuhiga ʼo tatatou ʼui ʼaē ʼe tou mulimuli kia Sesu, koteʼuhi ʼe tala lelei mai e te Tohi-Tapu: “Ko te tui, kapau ʼe mole fai ʼaki he ʼu gāue, ʼe mate ia.”​—⁠Sake 2:⁠17.

[Paki ʼo te pasina 7]

Koutou ako te Tohi-Tapu pea ke ina uga koutou ke koutou fai he gāue