He Koʼe ʼe Kovi Te ʼu ʼAho ʼAenī?

KA KOUTOU lau te sulunale peʼe koutou sio ki te ʼu tala logo ʼi te televisio peʼe koutou fakalogo ki te lātio, ʼe koutou ʼamanaki ke koutou logo ki he ʼu logo ʼe kovi? ʼE lagi mole koutou punamaʼuli ʼi te ʼiloʼi ʼaē ʼe kei hoko atu pe te ʼu tau fakamataku, pea ʼe ʼāsili te fai fakapō, pea ko te hoge ʼe ina fakavaivaiʼi te ʼu fenua māsisiva.

Kapau ʼe koutou nonofo mamaʼo mai te ʼu meʼa ʼaia, ʼe mole lagi koutou faʼa tuʼania ʼi te ʼu logo ʼaia. Kae, ko ai ʼaē ʼe feala ke ʼofa ki te hahaʼi fuli ʼaia ʼaē ʼe nātou tau mo te ʼu mamahi? Kae ʼe ko he meʼa faigataʼa tatatou mole tokagaʼi te faʼahi ʼaia mokā tou sio tonu peʼe lave feafeaʼi te ʼu mamahi ki te hahaʼi. Ko tona faka ʼuhiga, ʼe faigafua tatatou lau ʼi te sulunale te tau pea mo vakaʼi te ʼu tānaki ʼo ʼuhiga mo te hahaʼi mamate, kae ʼe faigataʼa tatatou lau te hisitolia ʼo te kiʼi tama ko Adnan ʼi Bosnie, ʼe taʼu hiva, ko tana faʼe neʼe mate ʼi te temi ʼaē neʼe paʼulu ai tonatou ʼapi ʼi te foʼi pulu. Hili kiai ni ʼu māhina, ko te tagata ʼe nono ʼo fana te hahaʼi, neʼe ina fanahi te tāmai ʼa Adnan kae neʼe nā haʼele fakatahi ʼi te ala. Hili kiai ni ʼu vāhaʼa, neʼe sio mata ki tona tokolua ʼaē neʼe hali tona toto ʼo aʼu ki tona mate, koteʼuhi neʼe fanahi ia ia ʼi te malaʼe ʼo tona faleako. Ko te kau tōketā ʼaē neʼe nātou sivi ia Adnan ʼuhi ko te kovi ʼo tona ʼatamai, neʼe nātou fakatokagaʼi ko te kiʼi tama neʼe mole kei ina logoʼi he meʼa​—pea ʼe mole kei ina fia ʼiloʼi he meʼa. Ko te ʼu manatu fakamataku ʼe nātou fakatupu lotomamahi kia ia ʼi te ʼaho; pea ʼi te pōʼuli, ʼe mole mamoe ʼuhi ko tana ʼu moemisi fakamataku. Ko Adnan ʼe mole ko he kiʼi toe ʼe kau pe ki he tānaki, kae ʼe ko he tamasiʼi ʼe maʼuli mamahi; pea ʼe mole feala hatatou nonofo feiā ka mole tou ʼofa ki ai.

ʼE toe moʼoni foki te faʼahi ʼaia ʼo ʼuhiga mo te tahi ʼu mamahi ʼo te malamanei. ʼE faigafua te lau ʼo he tohi ʼe talanoa ki te hoge, kae ʼe fakatupu lotomamahi te sio ki te paki ʼo he kiʼi taʼahine ʼe taʼu nima ʼe fua lahi tona fatu pea ʼe pakoko tana ʼu vaʼe, pea ʼe mate anai ia ʼuhi ko tona pakupaku. ʼE faigafua te lau ʼo te ʼu tānaki ʼo ʼuhiga mo te fai fakapō, kae ʼe fakamataku te talanoa ki he fafine vitua kua finematuʼa neʼe gaohi koviʼi, pea neʼe kaihaʼa tana ʼu meʼa pea neʼe fakaʼalikiʼi. ʼE faigafua te lau ʼo te ʼu tohi ʼaē ʼe talanoa ki te ʼāsili kovi ʼo te ʼaluʼaga ʼo te famili, kae ʼe fakamataku te ʼiloʼi ʼaē ko ʼihi faʼe ʼe nātou fakaʼalikiʼi tanatou ʼu tamaliki.

ʼE ko he meʼa fakaloto mamahi te lau ʼo te ʼu meʼa ʼaia. Kae ʼe toe fakaloto mamahi foki mokā hoko te ʼu malaʼia ʼaia kia tatou totonu! Mokā koutou tau mo he mamahi, ko te ʼaluʼaga ʼo te malamanei ʼaē ʼe fakahā ʼi te ʼu tala logo ʼe feala ke liliu ko he meʼa fakatupu lotomamahi lahi kia koutou. ʼE fakamataku ʼaupito tatatou mahino ʼaē ʼe kua ʼāsili kovi te ʼu mamahi ʼuhi ko te fai fakapō, te tau, te hoge pea mo te ʼu mahaki, pea ʼe mafola ʼi he ʼaluʼaga ʼe mole hona fakatatau ki muʼa atu ʼi te hisitolia fakatagata. Ko te tau pea mo te ʼu meʼa ʼaē ʼe hoko moʼoni ʼi te 20 sēkulō ʼaenī, ʼe feala ke nātou fakatupu he ʼu fua kovi​—ʼe mole kei mahino te hahaʼi ki te ʼu meʼa ʼaē ʼe hoko, ʼe nātou matataku, pea mo nātou lotohoha.

Ko te hahaʼi ʼo te ʼu lotu kehekehe ʼe nātou kumi te ʼu tali ki te ʼu fehuʼi maʼuhiga ʼaenī, He koʼe kua kovi ʼaupito te ʼu meʼa ʼaē ʼe hoko ʼi te malamanei? Koteā ʼaē ka hoko ki te malamanei?

Meʼa fakaʼofaʼofa foki, ko te ʼu lotu ia ʼaho nei ʼe mole nātou foaki te ʼu tali ʼaē ʼe ʼaoga moʼo fakaloto fīmālie ia te hahaʼi. ʼI takoutou ʼuluaki sio ki te fehuʼi ʼaē ʼe tuʼu ʼi te takafi ʼo te nusipepa ʼaenī, neʼe lagi koutou lotolotolua ʼo ʼuhiga mo te faʼahi ʼaia​—pea ʼe ko he meʼa ʼe tou mahino kiai. Ko te meʼa ʼaē ʼe tau fai e te ʼu lotu Fondamentalistes, ʼe nātou faiga ke nātou fakamoʼoni ʼaki te Tohi-Tapu he meʼa ʼe mole tuʼu ai​—te ʼaho pea mo te temi totonu ʼo te fakaʼauha ʼo te mālama ʼaenī. (Vakaʼi ia Mateo 24:36.) Ko te hahaʼi ʼaē ʼe nātou tā te nusipepa ʼaenī ʼe nātou leleiʼia ke fakamahino tonu e te Tohi-Tapu ia te faʼahi ʼaia. ʼE lagi koutou punamaʼuli anai ʼi te ʼiloʼi ʼaē ko te talanoa faka Tohi-Tapu ʼo ʼuhiga mo te ʼu ʼaho fakamuli ʼe ko he meʼa ʼe totonu pea ʼe moʼoni. Tahi ʼaē meʼa, ʼe mole fakamahino pe e te Tohi-Tapu pe koʼe ʼe kovi te ʼu meʼa ʼaē ʼe hoko. ʼE ina toe fakahā foki he ʼamanaki ki te temi ka haʼu, ko he ʼamanaki ʼe fakaloto fīmālie moʼoni. ʼE mātou fakaafe koutou ke koutou vakaʼi te faʼahi ʼaia ʼi te ʼu alatike ʼaē ka hoa mai.

[Haʼuʼaga ʼo te paki pasina 3]

Jobard/Sipa Press