ʼE Feala Koa Hakotou Tui Ki He ʼAtua ʼe Maʼuli Moʼoni?

“ ʼE MOLE ʼaoga ke koutou tui ki te ʼAtua ke koutou liliu ai ko he ʼu Kilisitiano . . . ʼE tou sio ki he ʼu fetogi maʼuhiga ʼi te ʼu lotu, pea ʼi te 21 sēkulō, ʼe mole kei ʼi ai anai he ʼAtua ʼi te ʼu ʼēkelesia.” Ko te ʼu palalau ʼaia neʼe fai e te tagata takitaki lotu ʼe faiako ʼi te univelesitē ʼi Pilitania, pea neʼe talanoa ki te magaʼi lotu ko te Sea of Faith, ʼaē ʼe kau kiai te toko teau patele Pilitania. Ko nātou ʼaia, ʼaē “ko he kau Kilisitiano ʼe mole tui ki te ʼAtua,” ʼe nātou tala ko te tagata neʼe ina faʼu te ʼu lotu, pea ohage ko te ʼui ʼa he tahi ia nātou, ko te ʼAtua ʼe ko “he meʼa pe ia neʼe fakakaukauʼi” e te tagata. ʼI tanatou manatu, ʼe mole maʼuli moʼoni te ʼAtua.

ʼI te ʼu taʼu 1960, neʼe mafola te manatu ʼaē “Kua mate te ʼAtua.” Neʼe tatau mo te ʼu manatu ʼa te tagata fai filosofia Siamani ʼo te 19 sēkulō ko Friedrich Nietzsche, pea neʼe ko he takuʼaki ʼaia ki te kau tūpulaga ke nātou fai te ʼu meʼa ʼaē neʼe nātou loto kiai, ohage la ko te ʼu felāveʼi fakasino ka mole nātou ʼohoana, pea mo te fakaʼaogaʼi lahi ʼo te toloke. Kae ko te ʼāteaina ʼaia, neʼe ina takitaki koa te kau tūpulaga ʼaia, ki he faʼahiga maʼuli ʼe fīmālie age?

ʼI te ʼu taʼu pe ʼaia, neʼe tā e te ’Ēpikopō Anglican ko John A. T. Robinson tana tohi fakatupu maveuveu ʼaē ko te Dieu sans Dieu. Ko te tokolahi ʼo tana ʼu kaugā takitaki lotu neʼe nātou fatufatuʼi ia ia koteʼuhi neʼe manatu ia “neʼe mole faʼa lahi te tokaga ʼa te tagata ki te ʼAtua ʼi te lolotoga ʼo te hisitolia.” Neʼe fehuʼi fēnei e te polofesea fai teolosia ko Keith: “Ko te tui ki te ʼAtua, kua liliu koa ko he meʼa faka misitelio, pea ʼe mole kei tokaga kiai te ʼu tagata popoto?” Neʼe ina tali ki tana fehuʼi, ʼo ina ʼui fēnei: “ ʼE ʼaoga ʼaupito ki te ʼu lotu ia ʼaho nei, ke nātou toe maʼu ia te ʼatamai mālama ʼaē neʼe nātou maʼu ki muʼa atu, ʼo ʼuhiga mo te ʼAtua.”

Ko Te ʼu Mamahi Pea Mo Te ʼAtua

Ko te tokolahi ʼo nātou ʼaē ʼe nātou tui ki te ʼAtua, ʼe faigataʼa tanatou taupau tanatou tui ʼuhi ko te ʼu meʼa fakaʼofaʼofa pea mo te ʼu mamahi ʼaē ʼe nātou sio kiai. Ohage la, ʼi te māhina ʼo Malesio 1996, neʼe fana te toko 16 tamaliki pea mo tonatou fafine faiako ʼi Dunblane, ʼi Ekose. Neʼe ʼui fēnei e te fafine neʼe lotomamahi ʼaupito, “ ʼe mole feala haku mahino ki te finegalo ʼo te ʼAtua.” Neʼe hā lelei te tuʼania ʼa te hahaʼi ʼi te sila neʼe tuku mo he ʼu fisiʼi teu ʼi te hūʼaga ʼo te faleako ʼo te ʼu tamaliki ʼaia. Neʼe tohi ai, “Koteā tona tupuʼaga?” Neʼe tali fēnei e te minisi ʼo te Katetalale ʼo Dunblane: “ ʼE mole hona fakamahino. ʼE mole feala ke tou maʼu he tali, pe koʼe neʼe hoko te meʼa ʼaia.”

Ki muli age ʼi te taʼu pe ʼaia, neʼe fakapogi te tagata takitaki lotu ʼiloa pea mo kei tūpulaga ʼo te ’Ēkelesia ʼo Pilitania. Neʼe tohi ʼi te nusipepa Church Times, neʼe punamaʼuli te kokelekasio ʼo te tagata takitaki lotu ʼo Liverpool ʼi tana ʼui ʼaē ʼe tonu ke “tukituki mālohi te matapā ʼo te ʼAtua pea mo kole age kia ia, koteā tona tupuʼaga? koteā tona tupuʼaga?” Ko te tagata ʼaia, neʼe mole ina maʼu hona fakafimālie mai te ʼAtua moʼoni.

Koia, koteā te meʼa ʼaē ʼe tonu ke tou tui kiai? ʼE feala hatatou tui ki he ʼAtua ʼe maʼuli moʼoni. ʼE maʼuhiga te faʼahi ʼaia mo kapau ʼe tou fia tali ki te ʼu fehuʼi ʼaē neʼe lagaʼi ʼi ʼoluga. ʼE fakaafe koutou ke koutou vakaʼi te ʼu fakamoʼoni ʼaē ʼe talanoa kiai te alatike ʼaē ka hoa mai.

[Paki ʼo te pasina 3]

Neʼe tohi ʼi te sila, “Koteā tona tupuʼaga?”

[Haʼuʼaga ʼo te paki]

NEWSTEAM No. 278468/Sipa Press