Ko Te Kau Faka Mafola ʼo Te Puleʼaga ʼe Nātou Fakamatala
ʼE Nātou Tauʼi Te ʼu Fihifihia ʼi “Te Fenua Fakapunamaʼuli”
NEʼE kole fēnei e te ʼapositolo ko Paulo ki te kau Kilisitiano ʼo te ʼuluaki sēkulō ʼo Kolonito: “Kapau ʼe mole logo te tagi ʼa te fakatagi, ʼe ko ai anai ʼe teuteu ki te tau? Pea ʼe feiā mo koutou, kapau ʼe koutou lea faka misitelio kae mole mātala he lea, ʼe feafeaʼi anai te ʼiloʼi ʼo te meʼa ʼaē ʼe koutou lau?”—1 Kolonito 14:8, 9.
ʼI Papuasia Niu-Kinea, ʼaē ʼe fakahigoa e ʼihi ko te Fenua Fakapunamaʼuli, ʼe lahi ʼaupito te ʼu fihifihia ʼaē ʼe tau mo te kau Fakamoʼoni ʼa Sehova ʼi tanatou fai faka mafola. ʼE nātou faka mafola ki he ʼu hahaʼi ko tanatou ʼu lea kehekehe e 700 tupu, pea ʼe lahi te kehekehe ʼo tonatou ʼu agaʼi fenua. Tahi ʼaē meʼa, ko te kau Fakamoʼoni, ʼe tonu ke nātou faka mafola ʼi te ʼu potu ʼe moʼugaʼia, pea ʼe mole ʼi ai he ʼu ala, pea ʼe tuputupu ai te fai fakapō. ʼO hilifaki ki te ʼu fihifihia ʼaia, ʼe fakafeagai kia nātou te hahaʼi ʼo te ʼu lotu, pea ʼi ʼihi temi ʼe ko te ʼu hahaʼi faiako.
Kae ko te ako fakalelei ʼo te Tohi-Tapu pea mo te ʼu tohi kehekehe ʼa te sosiete ʼi te ʼu lea ʼa te hahaʼi ʼo te potu ʼaia, ʼe ko he ʼu tokoni lelei ki te kau Fakamoʼoni ke nātou faka mafola ia te logo lelei, ke logo lelei ohage ko te tatagi ʼo te pupuhi fakatagi. Pea ʼe lahi te hahaʼi ʼe nātou tali lelei te logo ʼaia, ohage ko tona fakahā ʼi te ʼu fakamatala ʼaenī:
• ʼI te tahi faleako, ʼi te kamata ʼo te taʼu, neʼe fia ʼiloʼi e te polofesea pe koʼe ʼe mole fia tauhi te ʼu fānau ʼa te kau Fakamoʼoni ʼa Sehova ki te fuka ʼo te fenua, peʼe mole nātou fia hiva te hiva faka puleʼaga. Neʼe ina fai te fehuʼi ʼaia kia Maiola, ko te taʼahine e taʼu 13 pea kua papitema. Neʼe fakamahino lelei age e Maiola te faʼahi ʼaia, ʼo ina fakatafito tana ʼu palalau ki te Tohi-Tapu. Neʼe tali e te polofesea tana manatu, he neʼe ina toʼo mai te Tohi-Tapu. Neʼe toe fakamahino foki e Maiola te faʼahi ʼaia ki te tahi ʼu hahaʼi ʼaē neʼe gāue ʼi te faleako.
Ki muli age, neʼe kole age ki te tamaliki ako ke nātou tohi he ʼu fakamatala, pea neʼe fili e Maiola ke talanoa ki te Tahitolu. Neʼe ko ia ʼaē neʼe muʼa ʼi te sivi ʼaia, pea neʼe kole age e te polofesea kia ia pe neʼe maʼu ʼifea te ʼu meʼa ʼaē neʼe ina fakamatala. Neʼe ina fakahā age kia ia te tohi E Feala Keke Mauli O Heegata Ite Palatiso Ite Kele ʼi te lea Fakapilitānia. Pea neʼe fakahā e te polofesea te tohi ʼaia ki te kalasi katoa, pea ko te tokolahi ia nātou neʼe nātou loto ki te tohi ʼaia. ʼI te ʼapogipogi ake, neʼe tufa e Maiola te ʼu tohi e 14 pea mo te ʼu nusipepa e 7 ki tana kalasi, pea neʼe ina kamata te ʼu ako Tohi-Tapu e tolu. Ko Maiola, ʼe ina fakatuʼutuʼu ke liliu ko he pionie katoa.
• Ko te kiʼi kūtuga kau Fakamoʼoni ʼa Sehova ʼe nātou nonofo mamaʼo ʼi te kiʼi kolo, ʼe tuʼu ia tafa ʼo te tai ʼaē ʼe ōvi ki Port Moresby, pea neʼe hoko kia nātou te ʼu fakafeagai talu mai te taʼu 1970. Kae mole heʼeki faʼa fualoa, neʼe tokoni kia nātou te tagata neʼe mole nātou ʼamanaki ʼe ina fai anai te faʼahi ʼaia. Ko te ʼēpikopō ʼo te ’Ēkelesia Fakatahi, ʼaē neʼe tupu ʼi te fenua kae neʼe ʼalu ia ʼo ako ʼi te tahi fenua, neʼe ina fakaafe te hahaʼi ʼi te tahi ʼaho ke nātou fai hanatou ʼu fehuʼi ʼi te ʼosi fai ʼo te misa. Neʼe fehuʼi age e te tahi tagata: “ ʼE ʼi ai te ʼu lotu e lua ʼi totatou kolo—ko te ’Ēkelesia Fakatahi pea mo te kau Fakamoʼoni ʼa Sehova. Koteā te meʼa ʼaē ʼe tonu ke mātou fai mokā ʼōmai te kau Fakamoʼoni ʼa Sehova ki tomatou ʼu ʼapi?” ʼI tana ʼosi fakakaukauʼi fualoa te faʼahi ʼaia, neʼe tali fēnei e te ʼēpikopō: “Sio koe, ʼe mole ʼau ʼiloʼi pe koteā te meʼa ʼaē ʼe tonu ke ʼau ʼui atu. Mole heʼeki faʼa fualoa, neʼe ʼaʼahi ʼau e te ʼu talavou Fakamoʼoni e toko lua. Neʼe nā fai mai tanā fehuʼi, pea logope la te ʼu meʼa fuli ʼaē neʼe ʼau ako ʼi te univelesitē, neʼe mole feala haku tali kiai. Kae neʼe faigafua tanā fakahā mai te tali ʼi te Tohi-Tapu. Koia, ʼe mole ʼau tala atu anai pe koteā te meʼa ʼaē ʼe tonu ke koutou fai—ʼe ʼa koutou pe te vakaʼi ʼo te faʼahi ʼaia. Kapau ʼe mole koutou fia fakalogo kia nātou, pea ʼaua naʼa koutou fakalogo, kae ʼaua naʼa koutou gaohi koviʼi nātou.”
Ki muli age, ko te tagata taupau feʼaluʼaki ʼo te Sosiete Watch Tower ʼaē neʼe ina ʼaʼahi te kau Fakamoʼoni ʼa Sehova ʼo te motu ʼaia, neʼe ina fakamatala fēnei: “Ko te tokolahi ʼo te hahaʼi neʼe nātou fakalogo ki te kau Fakamoʼoni ʼi tanatou fai faka mafola. Ko ʼihi neʼe nātou fakaafe nātou ki tonatou ʼapi. ʼI te temi nei, kua lelei ʼaupito te fai faka mafola ʼi te potu ʼaia.”