Ko Te Maʼuli ʼo Te Kau Faka Mafola ʼo Te Puleʼaga
Fakafimālieʼi Te Hālofia Fakalaumālie: ʼI Te Fale Ako
“MANUʼIA ia nātou ʼe nātou ʼiloʼi te maʼuhiga ʼo te ʼu meʼa fakalaumālie kia nātou”, ko te ʼui ʼaia ʼa Sesu ʼi tana Akonaki ʼi te moʼuga (Mateo 5:3). Tokolahi te kau ako ʼe nātou fia ʼiʼinu ki te fia mahino ki te ʼAtua mo tana ʼu fakatuʼutuʼu fakatalakitupua. ʼE nātou fia maʼu he ʼu tali ki te ʼu fehuʼi ʼo ʼuhiga mo te maʼuli, pea ʼe nātou fia ʼiloʼi peʼe feafeaʼi hanatou faʼahiga maʼuli ke nātou maʼu ai te fīmālie pea mo te ʼofa ʼo te ʼAtua. Ko te meʼa ʼaia neʼe ʼiloga ʼi te fale ako ʼi te ʼu îles Vierges ʼo Pilitania. Ko te Fakamoʼoni ʼa Sehova ʼi te koga meʼa ʼe ina fakamatala:
◻ “Neʼe ʼau kau ki te fono ʼa te ʼu mātuʼa mo te kau faiako ʼi te fale ako ʼo te koga meʼa, pea neʼe lahi te palalau ki te toloke, ki te ʼinu kava, ki te faiʼakau, ki te sio televisio, ki te ʼu nota ʼo te kau ako, pea mo ʼihi meʼa, koia neʼe ʼau fakatotonu ai ke ʼau fakahā te tohi Les jeunes sʼinterrogent — Réponses pratiques ki te pule ʼo te fale ako. ʼI tana ʼosi vakaʼi te tohi, neʼe ina ʼui ko te meʼa tonu ʼaē ʼe ʼaoga ki te kau ako pea neʼe ina faka ʼui peʼe mole feala la ke maʼu e te fale ako he ʼu tohi ki te toko 120 kau ako. Ko te meʼa ʼaia neʼe talagaʼi mo te kau tagata ʼāfea ʼo te kokelekasio, pea neʼe nātou fakatotonu ke foaki te ʼu tohi ki te fale ako. ʼI tamatou fakahā te meʼa ʼaia, ko te kau faiako neʼe nātou faka ʼui mai ke mātou fakahā te ʼu tohi ki te kau ako. Ko te ʼu Fakamoʼoni e lua neʼe ʼi ai, pea ko te fale neʼe fonu ʼi te kau ako, neʼe nātou fakatalitali kia nāua. Ko te ʼu tēhina neʼe nā palalau lolotoga te vaeluaʼi hola, pea ko te ʼu fakamatalatala neʼe fakahā pe neʼe feafeaʼi te tokoni ʼa te tohi ki te kau tūpulaga feiā mo te ʼu mātuʼa, neʼe lau ʼi te ʼu nusipepa ʼo te Sosiete Watch Tower. Pea fakahā leva te ʼu tohi ki te kau ako ʼaē neʼe nātou fakatalitali ki ai.”
Ko he meʼa fakafiafia te ʼiloʼi ko te tohi ʼe fakaʼaogaʼi ʼi te ako ʼo te ʼu kalasi liliki. ʼE ina tali moʼoni anai ki te tuʼuga fehuʼi ʼo te kau ako ʼaia ʼo ʼuhiga mo te maʼuli feiā mo te ka haʼu.
Fakafimālieʼi te hālofia fakalaumālie — ʼI Papua Niu Kini
Ko te fakamatala ʼaē ʼe hoa mai neʼe fai e te taupau feʼaluʼaki. ʼE ina fakahāhā te hālofia fakalaumālie ʼo te hahaʼi ʼi te fenua ʼaia pea mo te lelei ʼo totatou ʼu tohi faka tohi-tapu moʼo fakafimālieʼi ʼo tonatou hālofia.
◻ ʼE ʼui e te taupau: “ ʼUhi ko taku mole fealagia te ʼaʼahi ʼo te kolo ʼo Kamberatoro, neʼe ʼau fakaʼaogaʼi toku temi ki te gāue mo te kiʼi kokelekasio ʼo Vanimo. Neʼe lahi te fia fagono ʼi ai. Tokolahi te hahaʼi mai Bewani neʼe nātou tali te ʼu tohi. Ko te tagata neʼe ina kole mai ke ʼau ʼalu ʼo ʼaʼahi te kolo ʼaia, pea ko ia ʼe tokaga anai ki toku maʼuli. Tokolahi te hahaʼi ʼe nātou ʼiloʼi totatou ʼu tohi. ʼI te temi fuli pe ʼe mātou ʼolo ai ki te kolo ʼo Vanimo, ʼe mātou liliu ʼātea mai ai logope ko kalato tohi e tolu ʼaē neʼe mātou ʼolo mo ia. Ko te tohi Recueil d’histoires bibliques ʼe faka maʼuhigaʼi ohage ko he aulo. Ko te hahaʼi ʼe nātou kumi te tohi. Ko te ʼu tohi ʼaē neʼe ʼau toʼo, neʼe vave aipe tanatou tufa. Ka mātou fakahā ki te hahaʼi tamatou ʼu tohi, ko ʼihi ʼe nātou fehuʼi mai: ‘ ʼE ʼifea te tohi legalega?’ Neʼe faka ʼui e te tagata tana ʼu tohi e ono. Neʼe ina fakahā tona higoa pea mo tona tuʼasila pea neʼe ina faka ʼui mai ke ʼau fakahā ʼi te lātio te temi ʼaē ʼe ʼau maʼu ai te ʼu tohi. Hoki haʼu anai mai tona kolo ʼo kumi.” Neʼe toe ʼui e te taupau feʼaluʼaki: “Neʼe ʼau fakatokagaʼi ʼe tokolahi te hahaʼi ʼe nātou tali te tohi L’humanité à la recherche de Dieu pea mo te tohi Les jeunes sʼinterrogent — Réponses pratiques.”
Ko te meʼa ʼaia ʼe ina fakahā te ʼaluʼaga ʼo te hālofia ʼo te hahaʼi agatonu ki te meʼa kai fakalaumālie ʼe maʼu ʼi te Tohi-Tapu pea mo te ʼu tohi ʼe foaki e Sehova ʼaki te “tagata kaugana agatonu mo poto”. (Mateo 24:45-47.) Ko te kau Fakamoʼoni ʼa Sehova ʼe nātou fiafia ʼi te fealagia ʼaē ko te tokoni ki te hahaʼi ʼaia ʼe nātou hālofia ki te moʼoni!
[Paki ʼo te pasina 27]
Ko te faka mafola ʼi Papua Niu Kini.