ʼE Kofesioʼi e Te ʼu Lotu

“ ʼE Fakamāuʼi e Te Tuʼi Tapu Te ’Ēkelesia.” “Ko Te Inikisisio Pea Mo Te Fehiʼa Ki Te Hahaʼi Sutea​—ʼE Teuteuʼi e Te ’Ēkelesia Tana ‘Mea Culpa.’ ”a “ ʼE Nātou Fakamoʼoni Neʼe Nātou Kau Ki Te Matematehi ʼo Te Hahaʼi Sutea.” “ ʼE Faifakalelei Te Kau ‘Méthodistes’ Ki Te Kau Initia ʼo Te Potu Hihifo ʼo Amelika.”

KUA koutou lau koa te ʼu kupu ʼaia ʼi te sulunale? ʼE hage ʼe lahi tuʼumaʼu pe te ʼu lakaga ʼaē ʼe fakamoʼoni ai e te ʼu ʼēkelesia ki tonatou ʼu hala pea ʼe nātou faifakalelei ʼo ʼuhiga mo te ʼu meʼa ʼaē neʼe nātou fai talu mai ni ʼu sēkulō. ʼE fakahā tuʼumaʼu e te hahaʼi tala logo te ʼu faifakalelei ʼa te tuʼi tapu.

Ka Faifakalelei Te Tuʼi Tapu

ʼE ʼui fēnei e te tagata sivi lotu ʼo te Vatikano ko Luigi Accattoli ʼi tana tohi Quando il papa chiede perdono (Ka Faifakalelei Te Tuʼi Tapu), ʼi te vaha ʼo te taʼu 1980 pea mo te taʼu 1996, ko Soane Paulo 2 neʼe ‘fakamoʼoni ki te ʼu hala ʼaē neʼe fai e te ’Ēkelesia lolotoga te hisitolia pea neʼe faifakalelei’ tuʼa 94. ʼE ʼui e Accattoli, “ ʼi te ’Ēkelesia Katolika, ʼe gata pe mo te tuʼi tapu te fealagia ʼaē ke faifakalelei.” Pea neʼe fai e te tuʼi tapu ia te faʼahi ʼaia, ʼo talanoa ki te ʼu temi neʼe lahi ai te ʼu maveuveu ʼaē neʼe hoko ʼi te hisitolia ʼo te Lotu Katolika​—te ʼu Tau Taputapu, te ʼu tau kehekehe, te lagolago ʼa te ʼēkelesia ki te ʼu puleʼaga aga fefeka, te ʼu maveuveu ʼi te ʼu ʼēkelesia, te fehiʼa ki te hahaʼi Sutea, te ʼu Inikisisio, te Mafia, pea mo te fakapalatahi. ʼI te taʼu 1994, neʼe momoli e Soane Paulo 2 ki te ʼu kaletinale he pepa (ʼaē ʼe ʼui e ʼihi ʼe ko te pepa ʼaia ʼaē ʼe maʼuhiga tokotahi ʼi te ʼu pepa ʼaē neʼe ina fai) ʼe ina ʼui ai, ʼe tonu ke fai e te ʼēkelesia “he kofesio katoa ʼo tana ʼu agahala ʼo te ʼu taʼu e afe kua hili.”

Ko ʼihi takitaki lotu, neʼe nātou mulimuli ki te faʼifaʼitaki ʼo te tuʼi tapu. ʼI te māhina ʼo Tesepeli 1994, neʼe ʼui fēnei e te sulunale Italia ko te Il Giornale: “Tokolahi te kau ʼēpikopō ʼo Amelika neʼe nātou hā ʼi te televisio pea nātou kole ʼi muʼa ʼo te hahaʼi ke fakamolemole age kia nātou.” Ke fakamolemole age kiteā? Ki tanatou mole tokagaʼi te fihifihia ʼaē ko te fakaʼalikiʼi ʼo ʼihi tamaliki e te ʼu patele, ʼo fakatupu kovi ai ki te ʼu tamaliki tokolahi. ʼI te māhina ʼo Sanualio 1995, neʼe talanoa te nusipepa La Repubblica ki “te meʼa ʼaē neʼe fai e te ’Ēkelesia ʼe mole hona fakatatau ʼi te hisitolia ʼo te Lotu Katolika ʼo totatou temi”​—neʼe ina fakahā te nofo fakalogologo ʼa te Tuʼi Tapu ko Pio 12 ʼo ʼuhiga mo te Matematehi ʼo te hahaʼi Sutea. ʼI te māhina ʼo Sanualio 1995, ko te sulunale ʼaia neʼe ina fakahā, ko te ʼēkelesia ʼo Siamani neʼe ina kole ke fakamolemole age ki te ʼu “hala lahi” ʼaē neʼe fai e te kau Katolika Loma ʼi tanatou lagolago ki te fakapō lahi ʼa te kau Nasi. Ko te ʼu ʼēkelesia Polotesita kehekehe neʼe nātou fakamoʼoni ʼe tonu ke nātou sivisivi mo nātou totonu.

Koteā Tona Tupuʼaga?

ʼE fakaloto mālohiʼi tatou e te Tohi-Tapu ke tou kole ke fakamolemole mai kia tatou mokā tou agahala, pea tokolahi te hahaʼi ʼe nātou fakavikiviki ki te ʼu ʼēkelesia ʼi tanatou sivisivi tanatou ʼu aga. (Sake 5:​16) Kae he koʼe koa ʼe fai e te ʼu ʼēkelesia ia te faʼahi ʼaia? ʼE tonu ke lave feafeaʼi te faʼahi ʼaia ki tatatou manatu ʼo ʼuhiga mo te ʼu lotu ʼaia?

[Nota ʼi te lalo pasina]