Te “Tohi-Tapu ʼo Te Kauʼi Tuhi e Tahi”
NEʼE palalisia ia Joseph Schereschewsky ʼi tana ʼosi mahaki, pea neʼe feala pe ke tā masini, ʼaki te kauʼi tuhi e tahi. Kae neʼe ina fakahoko tana fakatuʼutuʼu—ke ina fakaliliu te Tohi-Tapu ki te lea faka Siaina, ʼaē ʼe kau ʼi te ʼu lea ʼaē ʼe faigataʼa tona ako e te kau matāpule.
Neʼe Sutea ia Schereschewsky, kae ʼi tana lahi ake neʼe ina vakaʼi fakalelei pea mo ina tali te Lotu Faka Kilisitiano. Neʼe liliu ki muli age ko te misionea ʼi Siaina. ʼI te fenua ʼaia, neʼe kau ai ki te ʼu fakatuʼutuʼu kehekehe ʼo te fai fakaliliu, ʼo kamata mai te taʼu 1866, pea neʼe hoko atu tana gāue ʼaia ʼo aʼu ki te ʼu ʼuluaki taʼu ʼo te 20 sēkulō. Mai tona ʼaluʼaga ʼaē neʼe ko te tagata Sutea, neʼe poto age ia Schereschewsky ʼi te lea faka Hepeleo ʼi tona ʼu kaugā gāue. Koia, neʼe tuku age kia ia ke ina fakaliliu fuli te Tauhi ʼĀfea. ʼI te lagi fakaʼosi ʼo tana gāue fakaliliu ʼaia, ʼaē neʼe fualoa tana fai, neʼe ina toe fakaliliu foki ki te lea faka Siaina te Tohi-Tapu katoa ʼaki te ʼu kiʼi nota.
ʼI tona ʼuhiga tagata fakaliliu ʼo te Tohi-Tapu, neʼe lagolago mālohi ia Joseph Schereschewsky ki te fakaliliu ʼo te ʼu Tohi-Tapu ʼaē neʼe fai ʼi te ʼu lea ʼo te hahaʼi fuli. Kae neʼe mole ko he meʼa faigafua. Ko tana kau ʼaē ki te fakaliliu ʼo te Tohi-Tapu ʼi te lea faka Siaina ʼe ko he meʼa fakatalakitupua, ko te ʼui ʼaia ʼo te tohi The Book of a Thousand Tongues, “he neʼe faigafua ki te hahaʼi tanatou mahino kiai pea neʼe fakahoko te fakaliliu ʼaia logope la te ʼu faigataʼaʼia kehekehe ʼaē neʼe malaga ai.”
ʼI te ʼosi palalisia ʼo te ʼu nima ʼo Schereschewsky, neʼe toe haʼele aipe ki muʼa tana gāue. Neʼe ko he meʼa kinakina kia ia te tā masini, he neʼe mole kei feala ke ina fakaʼaogaʼi fakalelei tona ʼu nima. Neʼe ina fakahigoaʼi ai tana fakaliliu ʼaia ko tana Tohi-Tapu ʼo te kauʼi tuhi e tahi. Moʼo fakahoko te fakaliliu ʼaia logope la tona māʼimoa, neʼe faʼa kātaki ia Schereschewsky lolotoga taʼu e 25. Neʼe mole lotovaivai, kae neʼe kau ia ki te fakaliliu ʼo te Folafola ʼa te ʼAtua ke mahino lelei kiai ʼi te lea faka Siaina—te lea ʼa te hahaʼi ʼe tokolahi age ʼi te hahaʼi fuli.
[Haʼuʼaga ʼo te paki pasina 11]
Both images: Courtesy of American Bible Society Archives