ʼE Fakafiafia Te Motu ʼUhi Ko He ʼAʼahi Makehe
Ko Cuba ʼe ko he motu matalelei ʼi te ʼu Caraïbes, pea mole heʼeki faʼa fualoa neʼe maʼu ai e te hahaʼi he toe fakaloto fīmālie ʼi te faʼahi fakalaumālie. ʼI te fakaʼosi ʼo te taʼu 1998, ko te kau Fakamoʼoni ʼa Sehova ʼaē ʼe maʼuʼuli ʼi te fenua ʼo te ʼu Grandes Antilles, neʼe nātou maʼu te tapuakina lahi ʼaē neʼe nātou fakaʼamu kiai talu mai fualoa. ʼI te hili ʼo taʼu e 30, neʼe ʼuluaki ʼaʼahi nātou e te ʼu tēhina ʼo te Kolesi Pule ʼa te kau Fakamoʼoni ʼa Sehova, pea neʼe kaugā ʼolo mo nātou te toko 15 telekē. Neʼe nātou ʼōmai mai Italia, mo Niusila, mo Ositalalia, mo Otilisia, mo Pilitania pea mo Porto Rico.
NEʼE ko he temi maʼuhiga ʼaupito ki te toko 82 258 kau fai faka mafola ʼo te Puleʼaga, pea mo te toko 87 890 ʼaē neʼe fakatahi mo nātou moʼo fakamanatu te Taumafa ʼo te ʼAliki ʼi te fasiga taʼu mātala ʼo te taʼu 1998.
Mai te ʼaho 1 ʼo aʼu ki te ʼaho 7 ʼo Tesepeli 1998, ko Lloyd Barry, mo John Barr, pea mo Gerrit Lösch neʼe nātou ʼaʼahi te Petele ʼi La Havane pea neʼe nātou kau ki te ʼu fakatahi “Te Faʼahiga Maʼuli ʼAē ʼe Fakamaʼua Mai e Te ʼAtua” ʼaē neʼe fai ʼi Cuba. Neʼe nātou fiafia ʼi tanatou felāveʼi mo te ʼu tagata taupau feʼoloʼaki, pea neʼe nātou feʼiloʼiʼaki ai mo te kau fakafofoga ʼo te puleʼaga ʼo Cuba.
Neʼe ʼui e John Barr: “Kia ʼau pea mo toku ʼohoana neʼe ko he lakaga faka teokalatike maʼuhiga tāfito ʼi tomā maʼuli.” Mo toe ʼui fēnei: “Ko totatou ʼu tēhina mo tuagaʼane ʼo Cuba ʼe nātou gāue fakamalotoloto ki te moʼoni. ʼI taku liliu mai ai neʼe ʼau logoʼi ʼi toku loto ʼe lelei ʼaupito totatou ʼofa fakatautehina! Ko te vāhaʼa makehe ʼaupito ʼaia neʼe tokoni mai kia ʼau ke ʼau mahino lelei ki te ʼu ʼaluʼaga ʼo totatou ʼu tēhina ʼi te fenua ʼaia.”
ʼI te ʼu taʼu ʼaenī e nima kua hili, neʼe lahi age te ʼāteaina ʼaē neʼe tuku ki te kau Fakamoʼoni ʼa Sehova ke nātou maʼuliʼi tanatou lotu ʼi Cuba, pea ʼe mahino ia mai te ʼu palalau ʼaē neʼe fai e te puleʼaga ʼo Cuba, ʼe nātou fakaʼamu ke hoko atu te faʼahi ʼaia.
ʼI Sepetepeli ʼo te taʼu 1994, neʼe fakatuʼutuʼu te tā tohi ʼi te Petele ʼaē neʼe tuʼu ʼi La Havane. Neʼe toe fakagafua ai ki te kau Fakamoʼoni ʼa Sehova ke nātou fai tanatou ʼu fono pea ke nātou ʼolo ʼo fai faka mafola ʼi te ʼu ʼapi. Pea ʼi te taʼu 1998, neʼe faka fealagia ai e te puleʼaga ke hoko te ʼaʼahi ʼaia ʼo te toko 18 kau Fakamoʼoni ʼa Sehova ʼaē neʼe ʼōmai mai te ʼu fenua kehekehe, ʼo kau ki ai te toko tolu ʼaē ʼo te Kolesi Pule.
Ko He Fakatahi Fakafiafia
ʼI tanatou tau ki te malaʼe vakalele ʼo José Martí, ko te kau telekē neʼe tali faka kāiga nātou e he ʼu hahaʼi ʼo te puleʼaga pea mo he ʼu tēhina ʼo te Petele, pea neʼe kau kia nātou ʼaia te tēhina neʼe kei ina manatuʼi te ʼaʼahi fakamuli ki Cuba ʼaē neʼe fai ʼi te taʼu 1961 e te tēhina ko Milton Henschel, ʼaē ʼe kau ki te Kolesi Pule. ʼI te temi ʼaia neʼe taʼu 12 te tēhina, kae ʼi te temi nei kua liliu ia ko he taupau feʼaluʼaki.
ʼI tanatou tau ki te Petele, neʼe tali te telekasio ʼaia ʼaki te ʼu fisiʼi teu ʼaē neʼe to e te tēhina ki te lakaga pe ʼaia, neʼe ko te ʼu glaïeuls, mo te ʼu losa, mo te ʼu sasima pea mo te ʼu marguerites legalega mo kula. Ko te tokolahi neʼe nātou fetāgihi. ʼOsi ʼaia, pea neʼe nātou fakaʼaogaʼi te meʼa kai ʼaē neʼe teuteuʼi maʼa nātou, ko te puaka neʼe taʼo, mo te laisi, mo te ʼu salata, mo te yucca neʼe ʼai kiai te mojo (ko te huhuʼa ʼe fai ʼaki te lai pea mo te lolo oliveto), pea mo he ʼu fuaʼi ʼakau. ʼI te hili ʼo te fai kakai, ko te ʼu tēhina e toko tolu ʼo te Kolesi Pule neʼe nātou fai he akonaki fakaloto mālohi ʼo ʼuhiga mo te pilivilesio taulekaleka ʼo te selevisi ʼi te Petele. Neʼe malave ʼaupito ki te loto ʼo te ʼu tēhina te ʼu palalau faka Sepania ʼaē neʼe fai kia nātou e te Tēhina ko Lösch. Ko te famili ʼo te Petele ʼe faʼufaʼu e te toko 48 ʼe nātou gāue ai temi katoa pea mo te toko 18 ʼaē ʼe gāue faka temi pe.
Ko te ʼu tohi pea mo te ʼu Tohi-Tapu maʼa te ʼu tēhina ʼo Cuba ʼe tā ʼi Italia, kae ko te tā ʼo Te Tule Leʼo pea mo te Réveillez-vous! ʼi te lanu ʼuli mo hina, ʼe fai ʼi Cuba ʼaki te ʼu masini e lua. ʼE tonu ke fai he gāue loaloaga pea mo fai liuliuga moʼo tā te ʼu nusipepa ʼaē ʼe ʼaoga ki te fenua. Ko te ʼu tēhina pea mo te ʼu tuagaʼane ʼaē ʼe nātou gāue ai, ʼe nātou faka maʼuhigaʼi tanatou selevisi ʼaia kia Sehova.—2 Kolonito 4:7.
Te ʼu Puani Maʼuhiga ʼo Te Fakatahi
Neʼe vahe leva te toko 18 kau telekē ia kūtuga e tolu, he neʼe nātou kau ki te ʼu fakatahi kehekehe neʼe fai ʼi te ʼu potu e tolu: ʼi La Havane, ʼi Camagüey, mo Holguín. ʼI te ʼu ʼaho takitahi ʼaia e tolu, ko te tokolahi ʼo te ʼu tēhina mo tuagaʼane, ʼo kau ki ai te ʼu tagata ʼāfea pea mo te ʼu pionie tokolahi, neʼe fakaafe nātou ke nātou kau ki te ʼu fakatahi ʼaia. Neʼe tala ki te kau Fakamoʼoni ʼo te ʼu kolo ʼaia, ʼe fai anai he fakatahi makehe kae neʼe mole nātou ʼiloʼi ʼe kau anai kiai te ʼu tēhina ʼo te Kolesi Pule. Pea neʼe nātou punamaʼuli ʼaupito ʼi tanatou sio ki te ʼu tēhina mo tonatou ʼu ʼohoana neʼe nātou hifo ifo mai te ʼu kā neʼe lue ʼi te Feliaono uhu ʼaia!
Neʼe fai te ʼu fakatahi ʼi te ʼu fale ʼaē neʼe laga e te ʼu tēhina ʼaki te fakagafua ʼo te puleʼaga. ʼI te hūʼaga ʼo te fale fakatahi ʼi La Havane, neʼe togi ʼi te maka te vaega Tohi-Tapu ʼo “Pesalemo 133:1.” Neʼe manatuʼi ai e te ʼu tēhina te ʼu kupu ʼo te vaega ʼaenī: “Koutou sisio! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!” ʼE mahino papau ia, ʼi te lolotoga ʼo te fakatahi ʼaia, neʼe tokalelei te ʼu tēhina pea mo nātou felogoi fakafiafia.
Ko nātou ʼaē neʼe ʼōmai ʼo ʼaʼahi te fakatahi ʼaia, neʼe nātou vikiʼi te lelei ʼo te ʼu akonaki pea mo te ʼu fai palalau, pea neʼe nātou ōfo ʼi te kiʼi gaoʼi ʼaē neʼe fakatafito ki te hisitolia faka Tohi-Tapu ʼo Taniela kapite 3, ʼaē neʼe hoko ʼi Papiloni. Neʼe ʼui fēnei e te tuagaʼane: “Neʼe lelei ʼaupito te ʼu hahaʼi ʼaē neʼe nātou fai te kiʼi gaoʼi, he neʼe mole feala hakita ʼiloʼi neʼe mole nātou palalau moʼoni kae neʼe kua puke tonatou ʼu leʼo ʼi te foʼi fime. . . . Ko te tagata Papiloni agakovi neʼe hā lelei tana agakovi, pea neʼe hā lelei te lotomālohi ʼa te kau Hepeleo e toko tolu.”
Ko te kau fakafofoga ʼo te Pilō ʼo te ʼu Meʼa Faka Lotu pea mo he tahi ʼu hahaʼi ʼo te puleʼaga, neʼe nātou kau ki te ʼu fakatahi ʼaia pea mo nātou vikiʼi te ʼu tēhina ʼo ʼuhiga mo te lelei ʼo te fakatuʼutuʼu ʼo te fakatahi pea mo tanatou aga fakaʼapaʼapa. Neʼe fakahā e te Tēhina ko Barry tana loto fakafetaʼi fakamalotoloto ki te agalelei ʼaē neʼe fai e te puleʼaga ki te kau telekē matāpule. Neʼe tutuʼu te ʼu tēhina ʼo pasipasi he neʼe nātou loto fakafetaʼi ki te ʼu akonaki pea mo te puleʼaga ʼaē neʼe ina fakagafua ke fai te ʼu fakatahi ʼaia. Neʼe ʼui e te famili Kilisitiano: “ ʼE lelei age ʼi te ʼu meʼa ʼaē neʼe mātou fakaʼamu kiai, he neʼe hage ko he kiʼi fakatahi faka malamanei! Neʼe ko te meʼa taulekaleka he neʼe ko he fakamoʼoni ʼaia ki te mālohi ʼaupito ʼo Sehova moʼo fakahoko tana ʼu fakapapau.”
Tahi ʼaē meʼa, ʼaki te ʼu fakatahi ʼaia neʼe feala ai ke lelei age te mahino ʼa te hahaʼi ki te kau Fakamoʼoni ʼa Sehova. Ko he tagata taki kā neʼe kau ki te fakatahi ʼaē neʼe fai ʼi te Moeaki pea mo te ʼAhotapu, neʼe ina ʼui neʼe logo ki te ʼu tuʼuga meʼa neʼe lau ʼo ʼuhiga mo te kau Fakamoʼoni ʼa Sehova, kae ʼi te temi nei kua ina ʼiloʼi ʼe ko he ʼu hahaʼi agalelei pea mo tokalelei.
“ ʼE Mole Galo Anai Kia Mātou Te ʼu Meʼa ʼAia”
Ko te kau telekē neʼe nātou punamaʼuli ʼi te loto māfana pea mo te agalelei ʼa te hahaʼi ʼo Cuba. ʼE nātou faʼa gāue pea mo agalelei pea ʼe lelei tanatou ʼu pelesepeto. Neʼe ʼui e he telekē: “Neʼe tuʼa lahi te tokoni mai ʼa te hahaʼi neʼe mole mātou feʼiloʼiʼaki, ʼi tanatou sio ʼaē neʼe mole mātou ʼiloʼi te ala, pe ko he tahi age meʼa.”
Ko te kau telekē neʼe nātou ōfo ʼi te tui, mo te fiafia pea mo te ʼofa ʼaē neʼe fakahā e te kau Fakamoʼoni ʼi Cuba. Logope la neʼe hoko kia nātou te ʼu ʼahiʼahi lahi, kae neʼe nātou tui papau ko Sehova tonatou tule mālohi. (Pesalemo 91:2) Neʼe ʼui fēnei e John Barr: “ ʼE lahi te ʼu meʼa ʼaē neʼe ʼau punamaʼuli ai ʼi taku ʼuluaki ʼaʼahi ʼaia—te matalelei ʼo te fenua, mo te agalelei ʼo te hahaʼi pea tāfito te fiafia ʼo te ʼu tēhina ʼo Cuba. Ko taku hoki logo ʼaē ki te hivaʼi lelei feiā ʼo te ʼu katiko pea mo te pasipasi loaloaga feiā, he neʼe nātou leleiʼia te ʼu manatu faka Tohi-Tapu. ʼE mole galo anai kia mātou te ʼu meʼa ʼaia. ʼE mātou leleiʼia anai te ʼu suvenia ʼaia ʼo talu ai.”
ʼE ʼui fēnei ia Pesalemo 97:1: “Ke fakafiafia te ʼatu motu.” ʼE mahino ia, ko te kau Fakamoʼoni ʼa Sehova ʼo te motu ʼo Cuba ʼe nātou fakafiafia heʼe lahi age tanatou ʼāteaina ʼaē ke nātou tauhi ki tonatou ʼAtua, pea kua nātou fiafia ʼi te ʼaʼahi ʼo nātou e te telekasio faka malamanei.
[Paki ʼo te pasina 8]
Ko te ʼu tēhina ʼo te Kolesi Pule ʼe nātou sinie he ʼu Tohi-Tapu maʼa te ʼu hahaʼi ʼo te puleʼaga
[Paki ʼo te pasina 8]
Ko te ʼu famili tokolahi neʼe nātou kau ki te fakatahi faka tisitilike “Ko Te Faʼahiga Maʼuli ʼAē ʼe Fakamaʼua Mai e Te ʼAtua,” ʼi Cuba
[Paki ʼo te pasina 8]
Neʼe toe avahi ʼi te taʼu 1994 te Petele ʼi La Havane