Ko Tatou Ko Te Hahaʼi Tui
Ko Te Fagonogono ʼo Te Logo Lelei ʼi Te ʼu Toʼaga Laisi ʼo Taïwan
ʼI TE agamāhani, ʼe tau ʼua lalahi te fenua ʼo Taïwan, ʼo feala ai ʼi te taʼu fuli hanatou utu he ʼu taʼukai lelei e lua ʼo te laisi. Kae ʼi ihi temi, ʼe mate te laisi he neʼe mole ʼua ʼi te temi ʼaē neʼe tonu ke ʼua ai. Ka hoko te meʼa ʼaia, pea ʼe lotovaivai ai koa te tagata gāue kele? Kailoa. ʼE ina ʼiloʼi ʼe ʼaoga ke loto faʼa kātaki, pea ʼe ina toe to he laisi foʼou. Pea mo kapau ʼe lelei te temi, pea ʼe lelei anai te taʼukai ʼo te tagata gāue kele. ʼI ʼihi temi, ʼe feiā ʼi te faʼahi fakalaumālie, mokā kita to pea mo utu.
Tou Kātaki ʼi Te Taʼukai Fakalaumālie
Lolotoga he ʼu taʼu, neʼe gāue mālohi te kau Fakamoʼoni ʼa Sehova ʼo Taïwan ki te to pea mo te utu ʼo te ʼu pulapula fakalaumālie ʼo te moʼoni ʼi te ʼu koga meʼa ʼaē neʼe mole faʼa maʼuli lelei ai. Ohage la ko te potu fenua ʼaenī ko Miao-li. Neʼe mole lahi he ʼu fua ʼo te ʼu faiga mālohi ʼa te kau Fakamoʼoni ʼa Sehova ʼi te koga meʼa ʼaia. Pea ʼi te taʼu 1973, neʼe hinoʼi ki ai te taumatuʼa pionie makehe. ʼI te kamata, neʼe fia fakalogo ʼihi ki te logo lelei. Kae mole tuai pea neʼe mole kei ʼi ai he tahi neʼe kei fia fakalogo age. Pea neʼe toe hinoʼi te ʼu pionie ʼaia ki te tahi telituale.
ʼI te taʼu 1991, neʼe toe hinoʼi kiai te ʼu tuagaʼane pionie makehe e lua. Kae neʼe mole hona fua, ʼo hā mai ai ʼe mole heʼeki hoko tona temi tuputupu. Hili kiai ni ʼu taʼu, pea neʼe hinoʼi te ʼu pionie makehe ʼaia ki te tahi fenua ʼe fua lelei age. Pea lolotoga he temi neʼe mole gāueʼi te kele ʼaia.
Neʼe Tapuakinaʼi Te Toe Fai ʼo Te Gāue
ʼI Sepetepeli 1998, neʼe fakatuʼutuʼu ai ke nātou fai he ʼu faiga mālohi moʼo kumi te ʼu koga meʼa ʼaē ʼe feala ke fua lelei ai te gāue ʼi te fenua lahi ʼaia ʼo Taïwan. Neʼe fakahoko feafeaʼi te faʼahi ʼaia? Neʼe hinoʼi te ʼu pionie makehe faka temi e 40 ke nātou fai faka mafola ki te hahaʼi kaugamālie ʼaia lolotoga māhina e tolu.
Neʼe ko kolo e lua ʼo Miao-li ʼaē neʼe fakatuʼutuʼu ke fai kiai te gāue. Pea lolotoga ia māhina e tolu, neʼe ʼahiʼahiʼi e te ʼu pionie ʼe toko fā peʼe feafeaʼi te gāue ʼi te telituale ʼaia. Mole fualoa ʼi tanatou tau atu kiai, pea neʼe nātou faitohi ʼo fakahā te tali lelei ʼo te moʼoni e te ʼu kolo ʼaia. ʼI te hili ʼo te ʼu māhina e tolu ʼaē neʼe nātou pionie ai ʼi te ʼu kolo ʼaia, neʼe nātou takitaki te ʼu tuʼuga ako Tohi-Tapu. Tahi ʼaē meʼa, ʼaki te tokoni ʼa te tagata ʼāfea mai te kokelekasio ʼe feōvi mo te ʼu kolo ʼaia, neʼe nātou fakatuʼutuʼu te ako tohi.
ʼI te ʼu pionie ʼaia, ko te ʼu tuagaʼane e toko tolu neʼe nātou fia hoko atu te taupau ʼo te ʼu “huli” ʼaē neʼe kua tuputupu lelei. Pea ko te toko lua neʼe nā liliu ko te ʼu pionie makehe ʼe gāue temi katoa, pea ki te tolu leva neʼe pionie katoa. Pea ko te tagata ʼāfea ʼo te kokelekasio ʼe ōvi mai, neʼe hiki mai ki te koga meʼa ʼaia moʼo tokoni kia nātou. Pea ko te toko 60 tupu hahaʼi neʼe nātou kau ki te ʼuluaki akonaki ʼaē neʼe fai ʼi te kolo ʼaia. ʼI te temi nei ko te kokelekasio ʼaē ʼe tuʼu ōvi mai, ʼe tokoni ki te kiʼi kūtuga foʼou ʼaia moʼo fai tuʼumaʼu he ʼu fono ʼi te ʼu ʼAhotapu fuli pea mo te ʼatu ako Tohi-Tapu ʼaē ʼe fai ai. Pea kua vave fakatuʼu ai he kokelekasio foʼou ʼi te koga meʼa ʼaia.
ʼAki Te Faʼa Kātaki ʼe Tapuakinaʼi Te Tahi ʼu Potu ʼo Taïwan
ʼI te tahi ʼu kolo neʼe tali lelei ai te gāue. Neʼe fakatuʼu te kokelekasio foʼou ʼi I-lan, ʼi te potu noleto esite ʼo te motu ʼaē neʼe gāue ai te ʼu pionie makehe faka temi.
ʼI te tahi po, neʼe fai faka mafola ai ʼi te ʼu ʼapi, pea neʼe felāveʼi te pionie makehe faka temi mo te tagata, pea ina fakahā age te polokalama ʼo te ʼu fono ʼo tana kokelekasio. Pea neʼe ʼui atu aipe e te tagata ʼaia: “ ʼE feala haku ʼalu atu ki te fono ʼo te ʼapogipogi afiafi? Koteā te ʼu mutuʼi meʼa ʼaē ʼe tonu ke ʼau ʼai?” ʼI te vāhaʼa fuli, ʼe fai e te tuagaʼane pionie ʼaia te ʼu ako Tohi-Tapu e valu. Tokolahi ʼo te kau ako Tohi-Tapu neʼe nātou fakatuʼutuʼu ke nātou liliu ko he ʼu kaugā fai faka mafola ʼo te logo lelei, pea mo nātou papitema.
ʼI te kolo pe ʼaia, neʼe ʼi ai te fafine neʼe mālohi tana tauhi lotu lolotoga ni ʼu taʼu, kae neʼe mole ʼi ai he tahi moʼo akoʼi age kia ia te Tohi-Tapu. ʼI tana logo ʼaē ki te fakatuʼutuʼu ke fai he ako Tohi-Tapu ʼi tona kolo, neʼe ina fakaʼaogaʼi te faigamālie ʼaia. Neʼe fakaloto mālohiʼi ia ia ke ina teuteuʼi fakatomuʼa tana ako. Pea ʼi te temi ʼaē neʼe haʼu ai te pionie moʼo fai ʼo tana ako, neʼe ina fakatokagaʼi ko te fafine ʼaia neʼe kua ina toʼo tana kaupepa ʼo tohi kiai te ʼu fehuʼi ʼaē ʼe tuʼu ʼi tana tohi ako. Pea neʼe ina toe tohi kiai te ʼu tali ki te ʼu fehuʼi ʼaia. Tahi ʼaē meʼa neʼe ina tohi mo te ʼu vaega fuli ʼo tana ako. ʼI te temi ʼaē neʼe haʼu ai te tuagaʼane moʼo fai te ʼuluaki ako, neʼe kua teuteuʼi e te fafine ʼaia tana ʼu kapite e tolu!
Neʼe toe maʼu te ʼu tapuakina feiā ʼi te loto Taïwan, ʼi te kolo ko Dongshih. Lolotoga te ʼu māhina e tolu ʼaē neʼe nātou gāue ai, neʼe tufa e te ʼu pionie makehe faka temi te ʼu kaupepa lalahi e 2 000 tupu. ʼI te tolu māhina, neʼe nātou takitaki te ʼu ako Tohi-Tapu e 16. ʼI te ʼaho 21 ʼo Sepetepeli 1999, neʼe maumau te loto kolo ʼo Taïwan he neʼe hoko ai te mafuike, kae ko nātou ko te kau ako Tohi-Tapu, neʼe nātou haga tuputupu aipe ʼi te faʼahi fakalaumālie, tatau aipe pe neʼe tonu ke nātou fagona ʼi te hola katoa ke feala hanatou kau ki te ʼu fono ʼaē ʼe fai ʼi te fale fono ʼaē ʼe ōvi age kiō nātou. Ei, peʼe ko te faʼahi faka ekonomika peʼe ko te faʼahi fakalaumālie, kae ʼe ʼaoga te loto faʼa kātaki moʼo utu he taʼukai lelei.
[Mape ʼo te pasina 8]
(Vakaʼi te nusipepa)
CHINE
Détroit de Formose
TAÏWAN
[Haʼuʼaga ʼo te paki]
Mountain High Maps® Copyright © 1997 Digital Wisdom, Inc.