Te ʼu Fehuʼi ʼa Te Kau Lautohi

Neʼe fakahoko feafeaʼi e te gata ʼaē ʼi Eteni kia Eva, te manatu ʼaē ke ina maumauʼi te lao ʼa te ʼAtua ʼo ʼuhiga mo te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi?

ʼE ʼui fēnei ia Senesi 3:1: “Ko te gata neʼe ko te manu ʼe fakaʼeteʼete age ʼi te ʼu manu vao fuli ʼo te ʼu gāueʼaga ʼaē neʼe fakatupu e Sehova ʼAtua. Pea neʼe ʼui maʼana ki te fafine: ‘ ʼE moʼoni koa la neʼe ʼui atu e te ʼAtua ke ʼaua naʼa koulua kai ki te ʼakau fuli pe ʼaē ʼi te ʼōloto?’ ” Neʼe lahi te ʼu manatu ki te faʼahiga felogoi ʼaia ʼa te gata pea mo Eva. Neʼe ʼui, lagi neʼe fakaʼaogaʼi e te gata he faʼahiga felogoi ʼaki te gaūgaūe ʼo tona sino. Ohage la, neʼe ʼui fēnei e te tagata takitaki lotu Pilitania ko Joseph Benson: “ ʼE hage neʼe ina fai te faʼahi ʼaia ʼaki he gaūgaūe ʼo tona sino. ʼIo, ʼe ʼui anai e ʼihi, ko te ʼu gata ʼe nātou popoto pea ʼe nātou palalau, . . . kae mole maʼu he fakamoʼoni ki te manatu ʼaia.”

Kae ʼi tana fakagaūgaūe ʼo tona sino, neʼe lava felogoi ai koa te gata mo Eva ke kai ki te fuaʼi ʼakau tapu, pea mo liliu ai ohage ko te ʼAtua, heʼe ina ʼiloʼi anai te meʼa ʼaē ʼe lelei pea mo te meʼa ʼaē ʼe kovi? Tahi ʼaē meʼa, neʼe kau ia Eva ki te fai palalau, he neʼe tali ki te ʼu fehuʼi ʼaē neʼe fai age e te gata. (Senesi 3:2-5) Kapau neʼe felogoi te gata ʼaki pe te gaūgaūe ʼo tona sino, ʼe tou lava manatu ai ko Eva neʼe ina tali ki ai ʼaki pe te gaūgaūe ʼo tona ʼu nima, kae ʼe ʼui e te Tohi-Tapu neʼe palalau ia Eva.

ʼI tana manatuʼi te meʼa ʼaia, neʼe fakatokagaʼi fēnei e te ʼapositolo ko Paulo tona ʼu tēhina: “E au mataku, naʼa hagepe ko te fakahalaʼi o Eva e te gata aki tana kaka, e higa autou fakakaukau.” Ko te tuʼutāmaki ʼaē neʼe talanoa kiai Paulo neʼe tupu mai “te u apositolo lohi, ko te hahai gaue kaka.” Ko te tuʼutāmaki ʼaē neʼe lava hoko mai te ʼu ‘ ʼapositolo lalahi’ ʼaia, neʼe mole ko he gaūgaūe pe ʼo tonatou ʼu nima. Neʼe kau kiai mo tanatou ʼu palalau—tanatou poto kākā moʼo fakahalaʼi te hahaʼi.—2 Kolonito 11:3-5, 13.

Logola ko te leʼo ʼaē neʼe fakaʼaogaʼi moʼo fakahalaʼi ia Eva ʼi te ʼōloto ʼo Eteni, kae ko te gata ʼaia neʼe mole ʼi ai hona moga. Neʼe mole ʼaoga kia ia te faʼahi ʼaia. ʼI te temi ʼaē neʼe palalau ai te ʼaselo ʼa te ʼAtua kia Palaame ʼaki te asino fafine, neʼe mole ʼaoga ki te manu ʼaia hona moga ke palalau ohage ko he tagata. (Faka au 22:26-31) ʼE ʼiloga mai, ʼi te temi ʼaē ‘neʼe lea ai te asino fakalogologo ʼaia ʼaki he leʼo tagata,’ ko te mālohi ʼo te laumālie maʼoniʼoni ʼaē neʼe ina faka fealagia te faʼahi ʼaia, neʼe haʼu mai te mālama ʼo te kau laumālie fakapulipuli.—2 Petelo 2:16.

Ko te laumālie fakapulipuli ʼaē neʼe ina faka palalauʼi te gata kia Eva, ʼe fakahā mai e te Tohi-tapu “ko te gata olisinale, ia ia ʼaē ʼe fakahigoaʼi ko te Tevolo mo Satana.” (Apokalipesi 12:9, MN ) Ko te leʼo ʼaē neʼe logo kiai ia Eva pea mo tali mai kia ia, neʼe haʼu ia mai ia Satana, ʼaē “ ʼe ina fakaliliu tuʼumaʼu pe ia ia ko he ʼaselo ʼo te mālama.”—2 Kolonito 11:14, MN.

[Paki ʼo te pasina 27]

“ ʼE koulua hage anai ko te ʼAtua, ʼo ʼiloʼi te lelei pea mo te kovi”