Neʼe Fakapale Tana Faʼa Kātaki

Tokolahi te hahaʼi faitotonu ʼe nātou fakaʼamu ʼo ʼuhiga mo te ʼu hahaʼi ʼaē ʼe nātou ʼoʼofa ki ai, ke nātou ako te ʼu fakatuʼutuʼu ʼa te ʼAtua pea ke nātou maʼu he maʼuli fiafia. Ka foaki e he tahi tona maʼuli ki te ʼAtua, neʼe lagi tupu tana fai te tonu fakapotopoto ʼaia, ʼuhi ko te faʼifaʼitaki lelei neʼe tuku age e ʼihi, ohage ko he tūpulaga peʼe ko he matuʼa. Ko te faʼahi ʼaia neʼe hoko kia Jearim, ko he finemui neʼe ina fakatoʼo te pepa ʼaenī ki te ʼu tēhina ʼi te fakatahi makehe ʼaho tahi ʼa te kau Fakamoʼoni ʼa Sehova:

“ ʼE ʼau fia vaevae mo koutou toku fiafia. ʼE ʼau fia fakamatala atu muʼa te faʼahi ʼaenī. ʼI te ʼu taʼu e hogofulu-ma-valu kua hili kae neʼe mole heʼeki ʼau tupu, neʼe akoʼi e taku ʼu mātuʼa ia te moʼoni. Neʼe tuputupu ki muʼa ia taku faʼe, pea ki muli age neʼe ko toku tuagaʼane pea mo ʼau. Neʼe mātou faikole fakatahi kia Sehova ke feala kia Papa ke haʼele mo ia ʼi te ala ʼo te maʼuli. Hili kiai te ʼu taʼu e hogofulu ma valu, pea neʼe ko he ʼaho makehe kia mātou. Neʼe papitema ia Papa. ʼE ʼau fakamālo kia Sehova ʼi tana mole heʼeki fakahoko mai te fakaʼosi, ʼi muʼa ʼo te kaku mai ʼo te ʼaho ʼaia neʼe fualoa tamatou talitali kiai. Mālo Sehova!”

ʼAki te ʼu taʼu, neʼe lagi manatuʼi e te famili ʼo te finemui ʼaia ia te ʼu pelesepeto ʼaē ʼe tuʼu ʼi te tokoni faka Tohi-Tapu ʼo 1 Petelo 3:1, 2 (MN ) ʼaē ʼe ʼui fēnei ai: “Koutou fafine ʼohoana, koutou fakalogo ki ʼokotou ʼohoana totonu, koteʼuhi, kapau ʼe ʼi ai niʼihi ʼe mole fakalogo ki te folafola, ke nātou tafoki mai ʼuhi ko te aga ʼo tonatou ʼu ʼohoana, kae heʼeki fai he palalau, he neʼe nātou sio mata ki takotou aga ʼaē ʼe maʼa ʼo fakatahi mo te fakaʼapaʼapa ʼe lahi ʼaupito.” Pea ko te finemui ko Jearim neʼe ina maʼuliʼi te ʼu palalau ʼaē ia Teutalonome 5:16: “Fakaʼapaʼapa ki tau tāmai pea mo tau faʼe, ohage ko tona fakatotonu atu e Sehova, tou ʼAtua.” Neʼe tapuakina ia Jearim pea mo tona famili, he neʼe nātou maʼuliʼi te ʼu pelesepeto ʼaia pea mo nātou falala kia Sehova.