ʼE Koutou Tui Koa Ki He Palatiso ʼi Te Kele?
KO ʼIHI ʼe mole nātou tui ko te kele ʼe liliu anai ko he palatiso. Tokolahi ʼe nātou ʼui ʼe mole toe ʼi ai anai he palatiso ʼi te kele. ʼI te tohi The Sacred Earth, ʼe ʼui e Brian Leigh Molyneaux, neʼe tupu te kele koteʼuhi ‘neʼe hoko te paʼulu lahi ʼi te ʼatulaulau’ kua hili nei kiai taʼu ʼe lauʼi miliona. Pea kapau ʼe mole ko te tagata ʼaē ʼe ina fakaʼauha te kele, kae tokolahi ʼe nātou tui ko te kele pea mo te ʼatulaulau katoa ʼe feala “ke puli ʼi he afi lahi.”
Ko John Milton te tagata fai tuketuke ʼo te 17 sēkulō neʼe mole ina maʼu te ʼu manatu fakalotolotolua ʼaia. ʼI tana palalau fakatuketuke ki te Le Paradis perdu (Te Palatiso ʼaē kua puli), neʼe ina ʼui ko te ʼAtua neʼe ina fakatupu te kele ke liliu ko he nofoʼaga faka palatiso ʼe maʼuʼuli ai te hahaʼi. Ko te ʼuluaki Palatiso ʼaia kua puli. Kae neʼe faka tui ia Milton ʼe toe fakatuʼu anai te palatiso ʼaia—ko Sesu Kilisito, ʼaē neʼe ina foaki tana sakilifisio, ʼe ina “fakapale anai ʼi he ʼaho tana kau agatonu, pea mo tali nātou ʼi tona fīmālie taulekaleka . . . ʼi te Lagi peʼe ʼi te Kele.” Neʼe loto falala ia Milton, ʼo ina ʼui fēnei: “Koteʼuhi ko te Kele ʼe liliu anai ko he Palatiso.”
Te Palatiso—ʼI Te Kele Peʼe ʼi Te Lagi?
Tokolahi te hahaʼi lotu ʼe nātou manatu ohage ko Milton, ʼe nātou maʼu anai he faʼahiga fakapale koteʼuhi neʼe nātou ʼutakiʼi te ʼu meʼa fakamataku pea mo fakamamahi ʼaē neʼe hoko ʼi te kele. Kae ʼe nātou maʼu anai ʼifea te fakapale ʼaia? ʼE nātou maʼu anai koa te fakapale ʼaia “ ʼi te Lagi Peʼe ʼi Te Kele”? Maʼa ʼihi, ko te fakapale ʼaia ʼe mole feala ke nātou maʼu ʼi te kele. ʼE nātou ʼui ko te hahaʼi ʼe hoki nātou maʼu pe anai te “fīmālie taulekaleka” mokā nātou ʼosi mavae anai ʼi te kele ʼo maʼuʼuli ʼi te lagi ʼaki he sino fakalaumālie.
ʼI te tohi Heaven—A History, ko te ʼu tagata faitohi ko C. McDannell pea mo B. Lang, ʼe nā ʼui ko te tagata fai teolosia ko Irénée ʼo te lua sēkulō, neʼe faka tui ko te maʼuli ʼi he palatiso foʼou, “ ʼe mole hoko anai ʼi he potu mamaʼo ohage ko te lagi, kae ʼe hoko anai ʼi te kele.” ʼE ʼui ʼi te tohi ʼaia, māʼiape la mo te ʼu tagata takitaki lotu ko Kalevino pea mo Lutelo neʼe nā falala ʼe nā ʼolo anai ki selo, kae neʼe nā toe faka tui pe foki ko te “ ʼAtua ʼe ina toe fakafoʼou anai te kele.” Ko te hahaʼi ʼo te tahi ʼu lotu ʼe nātou tui mo nātou ki te ʼu akonaki feiā. Ko McDannell pea mo Lang ʼe nā toe ʼui foki ko ʼihi kau Sutea neʼe nātou faka tui, ʼi te temi ʼaē kua fakakatofa e te ʼAtua, ko te ʼu mamahi fuli ʼo te tagata ʼe “pulihi anai pea ʼe nātou maʼuli fīmālie anai ʼi te kele.” ʼE ʼui e te The Encyclopaedia of Middle Eastern Mythology and Religion, neʼe tui ia te kau Pelesia ʼo te temi muʼa, ko “te ʼuluaki agaaga ʼo te kele, ʼe toe fakatuʼu anai pea ko te hahaʼi ʼe nātou toe maʼuʼuli anai ʼi te tokalelei.”
Koteā ʼaē neʼe hoko ki te ʼamanaki ki he palatiso ʼi te kele? ʼE tonu koa ke tou maʼuʼuli faka temi pe ʼi te kele? Ohage ko te ʼui ʼa te tagata fai filosofia Sutea ko Philon, ko te maʼuli ʼi te kele, ʼe ko he maʼuli “faka temi pe koa, pea mo fakaʼofaʼofa” ʼi he potu fakalaumālie? Neʼe mole ʼi ai koa he tahi age fakatuʼutuʼu ʼa te ʼAtua ʼi te temi ʼaē neʼe ina fakatupu ai te kele, pea mo tana foaki ki te tagata he maʼuli fīmālie ʼi te palatiso? ʼE feala koa ki te malamanei ke ina maʼu ʼi te kele, he fiafia fakalaumālie pea mo he fīmālie taulekaleka moʼoni? He koʼe ʼe mole koutou vakaʼi muʼa te manatu ʼa te Tohi-Tapu ʼo ʼuhiga mo te faʼahi ʼaia? ʼE feala pe ke koutou faka tui ohage ko te ʼu toko lauʼi miliona hahaʼi, ko te ʼamanaki ki he palatiso ʼi te kele ʼe ko he meʼa ʼe feala ke hoko.
[Paki ʼo te pasina 3]
Neʼe tui te tagata fai tuketuke ko John Milton ʼe toe fakatuʼu anai te Palatiso
[Haʼuʼaga ʼo te paki]
Earth: U.S. Fish & Wildlife Service, Washington, D.C./NASA; John Milton: Leslie’s