Te Kumi ʼo He Tuʼuga Koloā

“Kapau ʼe tou holi ki te tahi ʼu meʼa, pea ʼe mole tou feʼaugaʼia anai ʼi he temi.”​—Ko te alatike ʼo te Worldwatch Institute.

“KOTEĀ ʼaē ʼe koutou loto kiai? ʼE mātou loto kia meʼa fuli. ʼE koutou loto kiai ʼāfea? Neinei.” Neʼe ko he ʼu palalau ʼiloa neʼe fai e ʼihi kau ako lolotoga te ʼu taʼu 1960. Ia ʼaho nei, ʼe mole tou logo ki te ʼu palalau ʼaia, kae kei maʼu pe te manatu ʼaia. Ko te faiga ʼaē ke maʼu he tahi ʼu koloā ʼe ko te agaaga ʼa te hahaʼi ʼi totatou temi.

Maʼa te tokolahi, ko te maʼu koloā pea mo te maʼu paʼaga, ʼe ko te meʼa tāfito pe ʼaia ʼe nātou fai ʼi tonatou maʼuli. Neʼe ʼui fēnei e Jimmy Carter, neʼe Pelesita ʼi te temi muʼa ʼi Amelika: “Mole kei ʼiloa he tahi ʼuhi ko te ʼu gāue ʼaē ʼe ina fai, kae ʼe ʼiloa ʼuhi ko te ʼu koloā ʼaē ʼe ina maʼu.” ʼE ʼi ai koa he tahi age ʼu meʼa ʼe maʼuhiga age ʼi te ʼu koloā? Kapau ʼe ʼi ai, pea koteā te ʼu meʼa ʼaia pea koteā te ʼu lelei ʼe tou maʼu mai ai?