Te ʼu Fua Lelei ʼAē ʼe Tou Maʼu Mokā Tou Kumi Te ʼu Koloā Fakalaumālie

“Ko ʼaē ʼe manako ki te paʼaga ʼe mole mākona anai ʼi te paʼaga, ʼo feiā mo ʼaē ʼe ʼofa ki te ʼu koloā, pea mo te totogi.”​—Tagata Tānaki 5:10.

KA LAHI fau te gāue ʼa he tahi, pea ʼe feala ke liliu ʼo loto hoha, pea ko te loto hoha ʼe fakatupu mahaki, pea ʼi ʼihi temi ʼe iku ki te mate. ʼE lahi te ʼu fenua ʼe mavete ai te ʼu famili. ʼI te agamāhani, ʼe tupu te faʼahi fakaloto mamahi ʼaia ʼuhi ko te kumi ʼo te ʼu koloā. Ko ia ʼaē ʼe mole maʼuli faka feʼauga, kae ʼe ina fia maʼu pea mo ina loto ke toe lahi age tona ʼu koloā, ʼe mole ina lauʼia te ʼu fua kovi kia ia ʼi te faʼahi fakasino. ʼE ʼui ʼi te tohi fai tokoni, ko te fia faʼifaʼitakiʼi ki te ʼu vāhaʼa fale ʼe ko he meʼa ʼe fai māhani ʼi te fenua, tatau aipe peʼe feala kia ia ʼo te vāhaʼa fale ke mate ʼi te mahaki mafu ʼi tona taʼu fāgofulu-ma-tolu pe.

ʼE feala ke mole fīmālie ia ia ʼaē ʼe ina kumi he ʼu koloā, pea ʼe mole ina maʼu ai te fiafia ʼaē ʼe ina lava maʼu ʼi he tahi age faʼahi. ʼI te agamāhani, ʼe ko te ʼu publicités ʼaē ʼe nātou uga tatatou ʼu vaivaiʼaga ʼi te faʼahi ʼaia. ʼE uga tuʼumaʼu koutou e te ʼu polokalama televisio pea mo lātio ke koutou totogi he ʼu meʼa ʼe mole lagi ʼaoga kia koutou pea ʼe mole koutou lava totogi. Ko te ʼu meʼa fuli ʼaia ʼe feala ke fakaloto mamahi.

ʼE mole lagi tou ʼiloʼi ʼe tou holi ke tou maʼu te ʼu koloā fuli, kae ʼe ʼi ai tona ʼu fua kovi kia tatou, ʼi te faʼahi fakasino pea mo totatou ʼatamai. Ohage la, neʼe tohi fēnei e te Hau poto ko Salomone: “Ko he loto ʼe tokatoka ʼe ko te maʼuli ia ʼo te kakano.” (Tāʼaga Lea 14:30) Kae ko te lahi fau ʼo te gāue, mo te tuʼania, pea mo te loto hoha ʼa he tahi ke ina maʼu he tuʼuga koloā, ʼe feala ke mahaki ai pea mo puli ai tona fiafia. ʼE toe fua kovi ki tatatou ʼu felogoi mo te hahaʼi, mokā tou kumi pe tatou ʼi totatou maʼuli ke tou maʼu koloā. Pea ka maumau te maʼuli faka famili ʼo he tahi pea mo tana ʼu felogoi mo te hahaʼi, ʼe toe kovi ai mo tona maʼuli.

ʼE Maʼuhiga Age Te ʼu Koloā Fakalaumālie

Neʼe tokoni fēnei mai te ʼapositolo ko Paulo, kua hili nei kiai ni ʼu sēkulō: “Koutou fakagata takotou muliʼi te tuʼu ʼo te ʼu faʼahiga meʼa ʼaenī.” (Loma 12:2, MN ) ʼE ʼofa te malamanei kia nātou ʼaē ʼe manatu tahi mo ia ʼo ʼuhiga mo te ʼu meʼa ʼaē ʼe ina faka maʼuhigaʼi. (Soane 15:19) ʼE faiga e te malamanei ke tou mulimuli ki tona faʼahiga maʼuli, ʼo ina fakaʼaogaʼi tatatou sio, tatatou lava fāfā, mo te mamanu pea mo te logo, ke tou fia maʼu koloā. ʼE ina faka maʼuhigaʼi “te holi a te mata” ke tou fia maʼu koloā.​—1 Soane 2:15-17.

Kae ʼe ʼi ai te ʼu meʼa ʼe maʼuhiga age ia ʼi te falā, mo te ʼiloa, pea mo te maʼu koloā. Kua hili kiai ni ʼu sēkulō, neʼe maʼu e te Hau ko Salomone te ʼu koloā fuli ʼo te malamanei. Neʼe ina laga te ʼu ʼapi pea neʼe ʼi ai tona ʼu ʼōloto, mo te ʼu gāueʼaga, neʼe ʼi ai tona ʼu kaugana, tana ʼu faga manu, tana kau hiva tagata mo fafine, pea mo tana tuʼuga aulo pea mo tana toe paʼaga. Neʼe mole he tahi ki muʼa atu neʼe lahi age tona ʼu koloā ohage ko Salomone. Neʼe maʼu koloā ʼaupito. ʼE feala ke tou ʼui neʼe maʼu e Salomone te ʼu meʼa fuli ʼaē ʼe holi kiai he tahi. Kae ʼi tana ʼosi fai te ʼu meʼa fuli ʼaia, neʼe ina ʼui fēnei: “Ko meʼa fuli neʼe vaʼiganoa pea neʼe ko he faiga ia ki te matagi.”​—Tagata Tānaki 2:1-11.

ʼAki te poto lahi ʼaē neʼe ina maʼu, neʼe ʼiloʼi e Salomone ko te fiafia lahi ʼe haʼu mai te kumi ʼo te ʼu koloā fakalaumālie. Neʼe ina tohi fēnei: “Ko te manatu fakaʼosi ʼo ʼuhiga mo te faʼahi ʼaia, mai tona ʼaluʼaga ʼaē kua tou fagono kia meʼa fuli: Manavasiʼi ki te ʼAtua moʼoni pea mo taupau tana ʼu fakatotonu. He koʼena te maʼua katoa ʼo te tagata.”​—Tagata Tānaki 12:13.

ʼE maʼuhiga age te ʼu koloā ʼaē ʼe feala ke tou maʼu ʼi te Folafola ʼa te ʼAtua, ia te Tohi-Tapu, ʼi te aulo peʼe ko te paʼaga. (Tāʼaga Lea 16:16) Ohage ko he ʼu maka maʼuhiga, ʼe feala ke koutou maʼu ʼi loto te ʼu moʼoni loloto. ʼE koutou kumi anai koa pea mo keli ke feala hakotou maʼu? (Tāʼaga Lea 2:1-6) Ko totatou Tupuʼaga, te Matapuna ʼo te ʼu meʼa maʼuhiga moʼoni, ʼe ina fakaloto mālohi koutou ke koutou fai te faʼahi ʼaia, pea ʼe tokoni atu anai. ʼO feafeaʼi?

ʼE foaki e Sehova te ʼu moʼoni maʼuhiga ʼaki tana Folafola, mo tona laumālie, pea mo tana kautahi. (Pesalemo 1:1-3; Isaia 48:17, 18; Mateo 24:45-47; 1 Kolonito 2:10) Kapau ʼe koutou vakaʼi te ʼu moʼoni maʼuhiga ʼaupito ʼaia, pea ʼe feala ai ke koutou filifili fakapotopoto te faʼahiga maʼuli ʼaē ʼe lelei pea mo fakafiafia age. Pea ʼe mole faigataʼa anai takotou filifili, heʼe ko Sehova, totatou Tupuʼaga, ʼe ina ʼiloʼi te meʼa ʼaē ʼe ʼaoga kia tatou ke tou fiafia moʼoni ai.

ʼE Fakaloto Mālohi e Te Tohi-Tapu Te ʼu Meʼa ʼAē ʼe Maʼuhiga ʼAupito

Ko te ʼu tokoni ʼaē ʼe tou maʼu ʼi te Tohi-Tapu ʼe ko he ʼu tokoni ʼe ʼaoga pea ʼe mole hona tatau. Ko te ʼu lekula ʼaē ʼe ina akoʼi ʼo ʼuhiga mo te aga ʼaē ʼe tonu ke fai ʼe mole honatou tatau. ʼE fua lelei tana ʼu tokoni. ʼAki te temi, ʼe kei moʼoni pe pea mo ʼaoga. Ohage la ko te ʼu tokoni lelei ʼaenī ʼe fai e te Tohi-Tapu, ke gāue kinakina he tahi, ke mole aga fakakākā, ke ina fakaʼaogaʼi fakapotopoto te falā, pea ke mole piko.​—Tāʼaga Lea 6:6-8; 20:23; 31:16.

ʼO ʼuhiga mo te faʼahi ʼaia, neʼe ʼui fēnei e Sesu: “Tuku takotou tānaki maʼa koutou he ʼu koloā ʼi te kele, ʼaia ʼe kaina ai e te ane pea mo te ukaukamea, pea ʼe puhi ai e te kau kaihaʼa ʼo kaihaʼa. Kae ke koutou tānaki maʼa koutou he ʼu koloā ʼi selo, ʼaia ʼe mole kaina ai e te ane pea mo te ukaukamea, pea ʼe mole puhi ai pea mo kaihaʼa e te kau kaihaʼa.”​—Mateo 6:19, 20, MN.

Ko te fakatotonu lelei ʼaia neʼe fai kua hili kiai taʼu e 2 000, pea ʼe kei ʼaoga ia ʼaho nei. ʼI te temi nei, ʼe tou lava maʼu te faʼahiga maʼuli ʼe lelei age, ʼi hatatou faiga ke tou kumi koloā. Moʼo kaku ki te faʼahiga maʼuli ʼaia ʼe tonu ke tou tānaki te ʼu koloā fakalaumālie, ʼaē ʼe feala ai hatatou maʼu he maʼuli fakafiafia moʼoni. Koteā ʼaē ʼe tonu ke tou fai? ʼE tonu ke tou lau te Folafola ʼa te ʼAtua, ia te Tohi-Tapu, pea mo tou maʼuliʼi te ʼu meʼa ʼaē ʼe ina akoʼi mai.

ʼE Tou Maʼu He ʼu Tapuakina ʼAki Te ʼu Koloā Fakalaumālie

Kapau ʼe tou maʼuliʼi fakalelei, pea ʼe liliu anai te ʼu meʼa fakalaumālie ʼo fua lelei kia tatou ʼi te faʼahi fakasino, ʼi totatou loto pea mo te faʼahi fakalaumālie. Ohage pe ko te ozone, te kasa ʼaē ʼe ʼi te fuga kele ʼe ina puipui tatou mai te laʼā, ko te ʼu pelesepeto ʼe nātou puipui tatou ʼo nātou fakahā mai te ʼu fua kovi ʼo te fia maʼu koloā. Neʼe tohi fēnei e te ʼapositolo ko Paulo: “Ko nātou ʼaē kua nātou fakapapau ke nātou maʼu koloā ʼe nātou higa ki te fakahala, ki he hele pea mo te ʼu holi fakavale lahi pea mo fakatupu kovi, ʼe nātou fakauku te tagata ki te fakaʼauha pea mo te pulinoa. Heʼe ko te manako ki te paʼaga ʼe ko te aka ʼaia ʼo te ʼu meʼa kovi fuli, pea ko ʼihi, ʼi tanatou fakaʼamu ki te holi ʼaia, neʼe nātou hē ʼo mamaʼo ʼi te tui pea mo nātou fehukiʼaki ia nātou totonu ʼaki te ʼu mamahi lahi.”​—1 Timoteo 6:9, 10, MN.

Ko te manako ʼaē ki te ʼu koloā ʼe ina fakalotoʼi te hahaʼi ke nātou kumi he tahi atu ʼu koloā, he tuʼulaga pea mo he pule ʼe lahi age. Ko te meʼa ʼe tau hoko, ka fia maʼu e he tahi te ʼu meʼa ʼaia, pea ʼe ina fai te ʼu aga fakapikopiko pea mo aga fakakākā. Ko he tahi ʼe fia maʼu koloā, ʼe ina fakaʼaogaʼi tāfito anai tona temi, mo tona mālohi pea mo tona poto ki te ʼu meʼa ʼaia. ʼE toe feala ʼi te ʼu pōʼuli ke mole mamoe. (Tagata Tānaki 5:12) ʼE mahino ia, ko he tahi ʼe ina loto ke lahi tana ʼu koloā, ʼe ina tāʼofi tana tuputupu ʼi te faʼahi fakalaumālie. Ko te tagata ʼaē neʼe lahi tokotahi, ia Sesu Kilisito, neʼe ina fakahā lelei te maʼuli ʼaē ʼe lelei age: “Manuʼia ia nātou ʼaē ʼe nātou ʼiloʼi tonatou masiva fakalaumālie.” (Mateo 5:3, MN ) Neʼe ina ʼiloʼi ʼaki te ʼu koloā fakalaumālie ʼe tou maʼu anai he ʼu tapuakina ʼe heʼegata pea mo maʼuhiga age ʼi te ʼu koloā ʼaē ʼe faka temi.​—Luka 12:13-31.

ʼE Lelei Moʼoni Koa Te ʼu Koloā Fakalaumālie?

ʼE ʼui fēnei e Greg: “Neʼe faiga lahi e taku ʼu mātuʼa ke ʼau tui ʼe mole he ʼaoga ʼo te ʼu koloā fakalaumālie. Kae neʼe ʼau maʼu te tokalelei lahi ʼo te ʼatamai ʼi taku kumi te ʼu koloā fakalaumālie, koteʼuhi ʼe mole ʼau hoha ʼi te faiga ki he ʼu koloā.”

ʼAki te ʼu koloā fakalaumālie ʼe feala ke tou maʼu he ʼu felogoi lelei mo te hahaʼi. Ko te ʼu kaumeʼa moʼoni ʼe nātou fia kaumeʼa mo koutou heʼe nātou ʼoʼofa ia koutou, kae ʼe mole tupu ko takotou ʼu koloā. ʼE tokoni fēnei mai te Tohi-Tapu: “Koutou haga fakakaugā mo ia ʼaē ʼe poto pea ʼe koutou liliu anai ʼo poto.” (Tāʼaga Lea 13:20, Today’s English Version) Tahi ʼaē meʼa, ʼe maʼuli fiafia he famili ʼuhi ko te poto pea mo te ʼofa, kae ʼe mole tupu ko te ʼu koloā.​—Efeso 5:22-6:4.

ʼI tatatou tutupu ake, neʼe mole tou ʼiloʼi te ʼu meʼa ʼaē ʼe maʼuhiga moʼoni. Koia ʼe tonu ai ke tou ako te ʼu meʼa ʼaia mai totatou ʼu kaumeʼa peʼe mai te Tohi-Tapu. Koia ko he ako ʼe fakatafito ki te Tohi-Tapu ʼe feala ke ina fetogi tatatou manatu ʼo ʼuhiga mo te ʼu koloā. ʼE ʼui fēnei e Don, neʼe gāue ʼi te temi muʼa ʼi te fale paʼaga: “ ʼAki te ako ʼaia kua ʼau toe vakavakaʼi te ʼu meʼa ʼaē ʼe ʼau faka maʼuhigaʼi, pea neʼe ʼau ako te maʼuli faka feʼauga ʼaki te ʼu meʼa ʼaē kua ʼau maʼu.”

Tou Kumi Te ʼu Koloā Fakalaumālie ʼAē ʼe Tologa

ʼAki te ʼu koloā fakalaumālie ʼe tou maʼu ai te ʼu fakapale ʼe tologa, kae ʼe mole faka temi. Neʼe tohi fēnei e Paulo: “Ko te ʼu meʼa ʼaē ʼe hā mai [te ʼu koloā] ʼe faka temi, kae ko te ʼu meʼa ʼaē ʼe mole hā mai [te ʼu meʼa fakalaumālie] ʼe heʼegata.” (2 Kolonito 4:18, MN ) ʼE moʼoni ʼaki te ʼu koloā ʼe feala hatatou fakahoko he ʼu meʼa faka temi ʼe tou loto kiai, kae ko te loto mānumānu ʼe mole ina ʼaumai anai he ʼu lelei ʼe heʼegata. ʼE kehekehe ia mo te ʼu koloā fakalaumālie, heʼe nātou heʼegata.​—Tāʼaga Lea 11:4; 1 Kolonito 6:9, 10.

ʼE tauteaʼi e te Tohi-Tapu te manatu ʼaē ʼe mafola ʼi totatou temi: te fakamuʼamuʼa ʼo te ʼu koloā. ʼE ina akoʼi mai te lolomi ʼo tatatou holi ki te ʼu koloā fakasino, pea mo fakamuʼamuʼa ia te ʼu meʼa ʼaē ʼe maʼuhiga tāfito. ʼE ina fakahā lelei mai, ʼe maʼuhiga tāfito te ʼu koloā fakalaumālie. (Filipe 1:10) ʼE ina ʼui mai ko te loto mānumānu ʼe ko he holi mānumānu maʼa kita. Kapau ʼe tou maʼuliʼi te ʼu meʼa ʼaē ʼe tou ako mai te Folafola ʼa te ʼAtua, pea ʼe tou maʼu ai he fiafia lahi. ʼE mole tou toe manatu anai ke foaki mai kia tatou kae ʼe tou fia foaki anai ki te hahaʼi. ʼE uga ai tatou e te faʼahi ʼaia ke mole tou kumi tokita fiafia totonu kae ko te ʼu koloā fakalaumālie.

ʼE moʼoni ʼi hona faʼahiga ʼaluʼaga, ko te paʼaga ʼe feala ke ina puipui he tahi. (Tagata Tānaki 7:12) Kae ʼe ʼui fēnei e te Tohi-Tapu: “Koteʼuhi [ko te ʼu koloā] ʼe ina fai moʼoni tona ʼu kapakau ohage ko ʼaē ʼo te akuila pea ʼe lele ia ki te lagi.” (Tāʼaga Lea 23:5) ʼUhi ko te ʼu koloā, ʼe lahi te ʼu meʼa neʼe meʼa noaʼi e te hahaʼi ohage ko tonatou haohaoa mai te mahaki, tonatou famili, pea mo he leʼo ʼo loto ʼe tokalelei​—ʼo fua kovi ai kia nātou. ʼI te tahi faʼahi, ko te maʼuli fakalaumālie ʼe ina foaki mai te ʼu meʼa ʼaē ʼe ʼaoga tāfito kia tatou​—te ʼofa, he fakatuʼutuʼu ʼe ʼaoga ʼi totatou maʼuli, pea mo te tauhi ʼaē ki te ʼAtua ʼofa ko Sehova. Tahi ʼaē meʼa, ko te maʼuli fakalaumālie ʼe ina taki tatou ki te maʼuli heʼegata pea mo haohaoa ʼi te palatiso​—pea ko te ʼamanaki ʼaia ʼe foaki mai e te ʼAtua.

Kua ōvi mai te temi ʼaē ka tapuakina katoa anai e te ʼAtua ia te hahaʼi, ʼi te mālama foʼou. (Pesalemo 145:16) ʼI te temi ʼaia, ko te kele katoa ʼe “fonu . . . anai . . . ʼi te ʼatamai mālama.” (Isaia 11:9) ʼE mahu ai anai te ʼu koloā fakalaumālie. ʼE pulihi katoa anai te holi ʼaē ki te ʼu koloā pea mo tona ʼu fua kovi. (2 Petelo 3:13) Pea ʼe fiafia moʼoni anai te malamanei, heʼe kua nātou maʼu te ʼu meʼa ʼaē ʼe maʼuhiga tāfito​—te haohaoa mai te mahaki, he gāue fakafiafia, he ʼu fakafiafia lelei, he ʼu felogoi faka famili fakafiafia, pea mo he fakakaumeʼa heʼegata mo te ʼAtua.

[Talanoa/Paki ʼo te pasina 6]

Koutou Fakaʼaogaʼi Fakapotopoto Takotou Falā!

Koutou vakaʼi te ʼu meʼa ʼaē ʼe ʼaoga kia koutou. Neʼe akoʼi mai e Sesu ke tou faikole fēnei: “Foaki mai tamatou pane ki te ʼaho ʼaenī, ʼaē ʼe ʼaoga ki te ʼaho nei.” (Luka 11:3, MN ) ʼAua naʼa koutou tuku ki te ʼu meʼa ʼaē ʼe koutou fia fai kiai ʼi te temi nei ke liliu ko he ʼu meʼa ʼe koutou fia maʼu. Koutou manatuʼi ko tokotou maʼuli ʼe mole fakalogo ki te ʼu meʼa ʼaē ʼe koutou maʼu.​—Luka 12:16-21.

Koutou fakaʼaluʼalu lelei takotou falā. ʼAua naʼa koutou hoko toʼo meʼa. ʼE ʼui fēnei e te Tohi-Tapu: “Ko te ʼu fakatuʼutuʼu ʼa te tagata poto ʼe fua manuʼia moʼoni, kae ko te tagata fuape ʼaē ʼe hoko ʼoho, ʼe mahino papau ia ʼe hoge anai ia.” (Tāʼaga Lea 21:5) Neʼe tokoni e Sesu kia nātou neʼe fakalogo ke nātou fakafuafua te totogi ʼi muʼa ʼo hanatou fakahoko he fakatuʼutuʼu ʼe fakaʼaoga ai he paʼaga.​—Luka 14:28-30.

ʼAua naʼa koutou tuʼu maʼua kae mole hona ʼaoga. Kapau ʼe feala, koutou totogi te ʼu meʼa ʼaē ʼe koutou toʼo kae ʼaua naʼa koutou fai maʼua. ʼE ʼui fēnei e te tāʼaga lea: “Ko ia ʼaē ʼe toʼo maʼua ʼe liliu ia ko te tagata kaugana ʼo te tagata ʼaē ʼe ina foaki te maʼua.” (Tāʼaga Lea 22:7) Kapau ʼe koutou loto lolomi pea mo fakaʼaogaʼi pe te falā ʼaē ʼe koutou maʼu, pea ʼe feala anai ke koutou fai he fakatuʼutuʼu ke koutou totogi he meʼa ʼe maʼuhiga age.

ʼAua naʼa koutou maumauʼi takotou falā. Koutou gaohi fakalelei te ʼu meʼa ʼaē ʼe koutou maʼu, ke tologa ai, pea ʼe koutou fakasiʼisiʼi ai te ʼu meʼa ʼaē ʼe tonu ke totogi. Neʼe fakahā e Sesu te manatu lelei ʼi tana mole maumauʼi te ʼu meʼa ʼaē neʼe ina fakaʼaogaʼi.​—Soane 6:10-13.

Koutou taupau te ʼu meʼa ʼaē neʼe koutou fakamuʼamuʼa. Ko ia ʼaē ʼe poto ʼe ina ‘fakaʼaoga lelei te temi’ moʼo fai te ʼu meʼa ʼaē ʼe maʼuhiga tāfito.​—Efeso 5:15, 16.

[Talanoa/Paki ʼo te pasina 7]

He Ako ʼe Lelei Age Moʼo Faʼufaʼu Totatou Maʼuli

Ko te ʼu meʼa ʼaē ʼe hoko kia tatou​—te ʼu meʼa ʼaē ʼe lelei pea mo te ʼu meʼa ʼaē ʼe kovi​—ʼe feala ke nātou akoʼi mai he ʼu faʼahi maʼuhiga. Kae ʼe moʼoni koa te ʼui ʼaē ʼe tou popoto age anai ʼi te faʼufaʼu ʼo totatou maʼuli, mo kapau ʼe tou ako ʼi te ʼu meʼa ʼaē ʼe hoko kia tatou? Kailoa ia, ʼe ʼi ai te tahi matapuna lelei age moʼo takitaki ʼo tatou. Neʼe ʼui fēnei e te tagata fai pesalemo ʼi tana faikole: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.”​—Pesalemo. 119:105.

He koʼe ʼe lelei age ke akoʼi tatou e te ʼAtua ʼi hatatou ako mai te ʼu meʼa ʼaē ʼe hoko kia tatou takitokotahi? ʼUhi ʼaē heʼe ko tatatou ako pe mai te ʼu meʼa ʼaē ʼe hoko kia tatou ʼe feala ke fakaloto mamahi ʼaupito pea mo fakatupu tuʼutāmaki kia tatou. Tahi ʼaē, ʼe mole ko he puleʼaki lelei ʼaia. Neʼe ʼui fēnei e te ʼAtua ki Iselaele: “Kanapaula neʼe ke tokagaʼi moʼoni taku ʼu fakatotonu. Pea ko tou tokalelei ʼe hage anai ia ko te liuʼa, pea ko tau faitotonu ʼe hage anai ia ko te ʼu peau ʼo te tai.”​—Isaia 48:18.

Ko te Folafola ʼa te ʼAtua ʼe ko te matapuna lelei ʼo te ako, koteʼuhi ʼe maʼu ai te fakamatala ʼaē kua ʼāfea ʼaupito pea mo totonu ʼo te meʼa ʼaē neʼe hoko ki te tagata. ʼE mahino anai kia koutou, ʼe lelei age hakotou ako lelei ʼi te ʼu fua lelei pea mo te ʼu fua kovi ʼaē neʼe hoko ki ʼihi, ʼi hakotou toe fai tanatou ʼu hala. (1 Kolonito 10:6-11) Ko te meʼa ʼaē ʼe maʼuhiga tāfito, heʼe foaki mai e te ʼAtua ʼi te Tohi-Tapu he ʼu lao pea mo he ʼu pelesepeto ʼe lelei ʼaupito moʼo takitaki tatou pea ʼe tou lava falala katoa kiai. “Ko te lao ʼa Sehova ʼe haohaoa . . . Ko te fakamanatu ʼa Sehova ʼe feala takita falala kiai, heʼe ina fakaliliu ke poto ia ia ʼaē ʼe mole heʼeki fakapotopoto.” (Pesalemo 19:7) ʼE mahino ia, ko te ako mai te poto ʼo totatou Tupuʼaga ʼofa ʼe ko te ako pe ʼaē ʼe lelei age.

[Paki ʼo te pasina 4]

ʼE loto e te malamanei ke koutou fia maʼu koloā

[Paki ʼo te pasina 5]

Ko te ʼu koloā ʼaē ʼe tou maʼu ʼi te Tohi-Tapu ʼe maʼuhiga age ʼi te aulo pea mo te paʼaga