Te ʼu Kē He Koʼe ʼe Kovi?
“Pe tupu mai fea te u tau, pea e tupu mai fea te u fe’keʼaki iā koutou?”—Sakopo 4:1.
KO TE tagata faitohi ʼo te Tohi-Tapu ko Sakopo, neʼe mole ina fai te ʼu fehuʼi ʼaia ki te kau solia ʼo te ʼu kautau Loma, ʼaē neʼe lolotoga tau ʼi te temi ʼaia; neʼe mole ina lagaʼi te fehuʼi he neʼe ina fia ʼiloʼi te ʼu meʼa ʼaē neʼe tupu ai te laga tau ʼa te kau Sutea Sicaires, Te ʼu Tagata Tau Paione ʼo te ʼuluaki sēkulō. Neʼe ina lagaʼi tana fehuʼi ʼuhi ko te ʼu kē, ohage ko he kē ʼa he toko lua. Koteā tona tupuʼaga? Heʼe ohage ko te ʼu tau, ʼe lahi te maumau ʼe hoko mokā fai he kē. Koutou tokagaʼi te ʼu fakamatala faka Tohi-Tapu ʼaenī.
Ko te ʼu foha ʼo te pateliaka ko Sakopo neʼe nātou fehiʼa lahi ki tonatou tēhina ko Sosefo, ʼo nātou fakatau ia ia ke liliu ko he tagata kaugana. (Senesi 37:4-28) Ki muli age, ko te Hau ʼo Iselaele ko Saulo neʼe ina fia matehi ia Tavite. Koteā tona tupuʼaga? He neʼe fuaʼa kiā Tavite. (1 Samuele 18:7-11; 23:14, 15) ʼI te ʼuluaki sēkulō ʼo totatou temi, ko te ʼu fafine Kilisitiano e lua, ko Eutia pea mo Sunitika, neʼe nā fakamaveuveu ia te kokelekasio ʼuhi ko tanā ʼu fihi.—Filipe 4:2.
ʼI te temi muʼa, ka fihi he ʼu tagata e toko lua, neʼe nā toʼo hanā ʼu heletā ʼo nā tau heletā peʼe nā tau pikinini. ʼI te agamāhani, ko te tahi ia nāua ʼaia neʼe mate pe neʼe liliu ʼo māʼimoa. Ia ʼaho nei, ko nātou ʼaē ʼe fihi ʼi te agamāhani ʼe nātou fetauveleʼaki peʼe nātou fai he ʼu palalau kona. Logola ʼe mole mate ai he tahi, kae ko te ʼu palalau ʼaia ʼe lavea ai te loto pea mo maumau matagafua. ʼI te agamāhani, ko nātou ʼaē ʼe ogosia ʼi te ʼu fihi ʼaia, ʼe ko nātou ʼaē neʼe mole nātou fai hanatou age ʼe kovi.
Koutou tokagaʼi te meʼa ʼaē neʼe hoko kua hili kiai ni ʼu taʼu, ʼi te haga ʼa te pātele Anglican ʼo tukugakoviʼi te tahi pātele, ʼo ina lau neʼe ina kaihaʼa te falā ʼo te ʼēkelesia. Neʼe ʼiloʼi e te hahaʼi fuli tanā fihi, pea neʼe tahi ʼalu ai te hahaʼi ʼaē neʼe nā gāue ki ai. Neʼe mole fia ʼolo ʼihi hahaʼi ʼo misa mo kapau ʼe fai misa te pātele ʼaē neʼe nātou fehiʼa ki ai. Neʼe lahi ʼaupito tanatou fefehiʼaʼaki ʼo nātou fetauveleʼaki mokā nātou felāveʼi ʼi te misa. Neʼe toe ʼāsili age te ʼu fihi ʼaia, ʼi te temi ʼaē neʼe toe tukugakoviʼi ai te pātele neʼe ina fai he ʼu felāveʼi fakasino heʼeʼaoga.
Neʼe faitohi ia te ’Ēpikopō ʼo Cantorbéry ki te ʼu pātele ʼaia e lua, ʼo ina higoaʼi tanā fihi ko “he kosea” pea ʼe ko “he meʼa fakaufiufi ʼe ina fakalainoaʼi te huafa ʼo Totatou ʼAliki.” ʼI te taʼu 1997, neʼe mavae leva te tahi ʼi te ʼu pātele ʼaia. Ko te tahi pātele neʼe ina taupau tona tuʼulaga ʼo aʼu ki te temi ʼaē neʼe tonu ai ke letelete. Kae neʼe nofo pe ʼi tona tuʼulaga ʼo aʼu ki te fakaʼosi, ʼi tona taʼu 70, ʼi te ʼaho 7 ʼo ʼAukusitō 2001. Neʼe ʼui e te sulunale The Church of England Newspaper, ko te ʼaho ʼaē neʼe letelete ai neʼe ko te ʼaho ʼo te “Sagato” ko Victrice. Neʼe ko ai ia te “Sagato” ko Victrice. Neʼe ko te ʼēpikopō ʼo te fā sēkulō, ʼe ʼui neʼe huʼipiʼi he neʼe mole fia kau ki te tau. Neʼe fakahā e te nusipepa ʼaia te kehekehe ʼo te ʼu aga ʼa te ʼu tagata ʼaia e lua, ʼo ina ʼui fēnei: “Ko te [pātele ʼaia neʼe letelete] neʼe mole ina maʼu te aga ʼaē ko te mole fia fihi mo tona tēhina pātele.”
Neʼe feala ki te ʼu pātele ʼaia ke mole nā felaukoviʼaki ʼo feiā mo te hahaʼi, mo kanapaula neʼe nātou maʼuliʼi te tokoni ʼaē ia Loma 12:17, 18 (MN ): “ ʼAua naʼa koutou liufaki ki he tahi te kovi ʼaki te kovi. Koutou foaki he ʼu meʼa lelei iā muʼa ʼo te hahaʼi fuli. Kapau ko he meʼa ʼe feala, tāfito mo kapau ko he meʼa ʼe fakalogo kiā koutou, koutou maʼuli ʼi te tokalelei mo te tagata fuape.”
E feafeaʼi ʼo ʼuhiga mo koutou? Kapau ʼe agakovi atu he tahi, pea ʼe koutou ʼiʼita koa ʼo koutou laukovi kiā ia? Peʼe koutou fakafisi koa ki te ʼu palalau kovi kae koutou kumi te tokalelei? Kapau ʼe koutou agakovi ki he tahi, pea ʼe koutou fakamamaʼo koa mai iā ia, ʼo koutou fakaʼamu ʼaki te temi ʼe ina galoʼi anai te faʼahi ʼaia? Peʼe koutou foimo ʼolo koa ʼo faifakalelei? Tatau aipe peʼe koutou ʼolo ʼo faifakalelei ki he tahi peʼe ko koutou ʼaē ʼe fakamolemole ki he tahi, kae ʼe koutou logo fīmālie anai mo kapau ʼe koutou faiga ke koutou fai he fakatokatoka. Ko te tokoni ʼa te Tohi-Tapu ʼe ʼaoga anai moʼo fakatokatoka he ʼu fihifihia kua fualoa, ohage ko tona fakahā anai ʼi te alatike ka hoko mai.