“Neʼe Nātou Agatonu ʼi Te ʼu ʼAhiʼahi”

ʼI TE kamata ʼo te māhina ʼo Apelili ʼo te taʼu 1951, ko te puleʼaga mālohi ʼo Lusia neʼe ina ʼohofi fakafokifā te hahaʼi tokalelei, ʼaē ko te kau Kilisitiano Fakamoʼoni ʼa Sehova, ʼi te potu ʼuesite ʼo Lusia. Ko te ʼu lauʼi afe famili​—ko te ʼu fānau, mo te ʼu fafine faitama, pea mo te kau mātutuʼa— neʼe tānaki nātou ki te ʼu saliote ʼafi, ʼo nātou folau lolotoga ʼaho e 20 ki Sipelia. Neʼe fakatūʼā nātou ke nātou mavae ʼi tonatou fenua ʼo talu ai, kae nātou ʼolo ʼo nonofo ʼi he koga meʼa neʼe faigataʼa ʼaupito ai te maʼuli.

ʼI ʼApelili 2001, hili taʼu e 50 neʼe fakamanatu ʼi Moscou te koga maʼuhiga ʼaia ʼo te hisitolia, pea neʼe faka haʼele ai te foʼi fime viteo neʼe fakahāhā ai te gaohi koviʼi fualoa ʼa te kau Fakamoʼoni ʼa Sehova ʼi Lusia. ʼI te ʼata ʼaia, ko te hahaʼi fai hisitolia pea mo nātou ʼaē neʼe nātou sisio ki te ʼu meʼa ʼaia, ʼe nātou fakamatala ai pe neʼe feafeaʼi te hāo ʼa te kau Fakamoʼoni pea mo tanatou tuputupu logola te faigataʼaʼia lahi.

Ko te ʼata ʼaia, Fidèles dans les épreuves — Les Témoins de Jéhovah en Union soviétique, neʼe kua sio ai e te lauʼi miliona hahaʼi ʼi Lusia pea mo te tahi ʼu fenua, pea neʼe vikiʼi lahi e te hahaʼi pea mo te hahaʼi fai hisitolia. Ko te ʼu fakamatala ʼaenī ʼa te ʼu tagata popoto Lusia e toko lua, neʼe nā māʼuʼuli ʼi te temi aē neʼe tokolahi ai te ʼu famili Fakamoʼoni neʼe ʼave ki Sipelia.

“Neʼe au leleiʼia ʼaupito te ʼata ʼaia. Neʼe au fakaʼapaʼapa tuʼumaʼu ki te hahaʼi ʼo tokotou lotu, pea ʼi taku sio ki te ʼata, neʼe toe lahi age taku fakaʼapaʼapa kiā nātou. Neʼe lelei ʼaupito te fai ʼo te ʼata ʼaia. Neʼe au leleiʼia tāfito te fai fakamatala ʼa te ʼu hahaʼi takitokotahi. Logola ʼe au lotu Orthodoxe pea ʼe mole au fetogi anai taku lotu, kae ʼe au leleiʼia te kau Fakamoʼoni. ʼE au fakaʼamu ke taupau e tamatou faleako te foʼi fime viteo ʼaia. Ko taku ʼu kaugā gāue pea mo au neʼe mātou fakatotonu ke mātou fakahā te ʼata ʼaia ki tamatou kau ako pea mo fakaʼaogaʼi ʼi te polokalama ako.” ​—Ko te polofesea ko Sergei Nikolayevich Rubtsov, kua fualoa tana gāue ʼi te faʼahi ʼo te hisitolia, ʼi te Univelesitē Pédagogique, ʼi Irkutsk, ʼi Lusia.

“Neʼe au leleiʼia te ʼata ʼaia. Ka fai e he tahi he ʼata ʼo ʼuhiga mo te puleʼaga fefeka, pea ʼe faigataʼa tuʼumaʼu te fai ʼo he fakamatala ʼe fakaʼaluʼalu lelei. Kae neʼe fakaʼaluʼalu lelei te fakamatala ʼo te ʼata ʼaia. Koutou momoli mai hakotou tahi ʼu foʼi fime viteo.” ​—Ko te polofesea ko Sergei Ilyich Kuznetsov, kua fualoa tana gāue ʼi te faʼahi ʼo te hisitolia ʼi te Univelesitē ʼo te Fenua ʼo Irkutsk, ʼi Lusia.

Neʼe toe leleiʼia ia te ʼata ʼaia e te kau Fakamoʼoni ʼa Sehova ʼaē ʼe māʼuʼuli ʼi Sipelia. Koʼeni ʼihi ʼu fakamatala neʼe nātou fai:

“ ʼI te temi ʼaē neʼe hoko ai te ʼu meʼa ʼaē ʼe hā ʼi te ʼata ʼaia, neʼe tokolahi te kau Lusia neʼe nātou mahino hala ʼo ʼuhiga mo te gāue ʼa te kau Fakamoʼoni ʼa Sehova. Kae ʼi tanatou ʼosi sio ki te ʼata, neʼe nātou mahino ai ko tatatou kautahi ʼe mole ko he magaʼi lotu, ohage ko tanatou manatu ʼaia ʼi te temi muʼa. ʼE ʼui fēnei e nātou ʼaē neʼe mole heʼeki faʼa fualoa tanatou liliu ko he kau Fakamoʼoni: ‘Neʼe mole mātou manatu ʼe mātou māʼuʼuli pea mo gāue fakatahi anai mo te ʼu tēhina ʼaē neʼe nātou kātakiʼi te ʼu ʼaluʼaga faigataʼa ʼaia!’ ʼI tana ʼosi sio ki te ʼata ʼaia, neʼe fakahā e te Fakamoʼoni tana fia liliu ʼo pionie kātoa.” ​—Anna Vovchuk, neʼe ʼave ki Sipelia.

“Neʼe au tete ʼi te temi ʼaē neʼe fakahā ai ʼi te ʼata te fisifisi ʼa te polisi ki te matapā ʼo te ʼapi ʼa te Fakamoʼoni. Neʼe au manatuʼi ai te fisifisi ʼa te kau polisi ki tomatou matapā, pea mo te ʼui fēnei ʼa taku faʼē: ‘Lagi ʼe ʼi ai he vela ʼi he koga meʼa.’ Kae ʼaki te ʼata, neʼe au toe manatuʼi ai neʼe tokolahi te kau Fakamoʼoni neʼe lahi age tonatou mamahi ia au. Ko te ʼu manatu fuli ʼaia neʼe nātou fakaloto mālohi lahi mātou pea mātou fiafia ʼi tamatou haga tauhi kiā Sehova.”​—Stepan Vovchuk, neʼe ʼave ki Sipelia.

“Ko taku ʼu mātuʼa Fakamoʼoni neʼe ʼave ki Sipelia. Pea ʼi taku manatu neʼe kua au ʼiloʼi lelei te ʼu meʼa ʼaē neʼe hoko ʼi te temi ʼaia. Kae ʼi taku ʼosi sio ki te ʼata, neʼe au mahino ai neʼe mole au ʼiloʼi he meʼa. ʼI taku fakalogo ʼaē ki te ʼu fakamatala, neʼe au tagi ai. ʼI te temi nei, kiā au ko te ʼu meʼa ʼaē neʼe hoko ʼe mole ko he ʼu hisitolia pe ia, kae ʼe ko he ʼu meʼa neʼe hoko moʼoni. ʼAki te ʼata ʼaia, neʼe toe mālohi ai taku ʼu felogoi mo te ʼAtua, pea mo tokoni mai ke au lava kātakiʼi te ʼu faigataʼaʼia fuli ʼaē ka hoko mai anai.” ​—Vladimir Kovash, Irkutsk.

“Kiā au, neʼe mālohi age te ʼata ʼaia ʼi he tohi neʼe fakamatala ai te ʼu meʼa ʼaia. ʼI taku sio pea mo logo ki te fakafehuʼi ʼo te ʼu tēhina, neʼe hage kiā au neʼe au fakalaka ʼi tanatou ʼu faigataʼa fuli ʼaia. Ko te faʼifaʼitaki ʼo te tēhina ʼaē neʼe pilisoni, ʼaē neʼe ina momoli te ʼu pāki neʼe ina pena maʼa tona ʼu kiʼi ʼofafine, ʼe ina uga au ke au faiga ke malave te moʼoni ʼo te Tohi-Tapu ki te loto ʼo taku ʼu fānau. ʼE au fakamālo ʼaupito atu! Ko te ʼata ʼaia ʼe ina fakahā lelei ai ki te kau Fakamoʼoni ʼa Sehova ʼi Lusia, ʼe nātou kau ki te kautahi faka malamanei ʼa Sehova.” ​—Tatyana Kalina, Irkutsk.

“Ko te ʼui ʼaē ‘ ʼE lelei age hakita sio ki he meʼa ʼi hakita logo tuʼa teau kiai,’ ʼe mahino ia ʼe moʼoni ʼo ʼuhiga mo te ʼata ʼaia. Neʼe malave mālohi kiā mātou te ʼata ʼaia! ʼI taku ʼosi sio kiai, neʼe au fakakaukau fualoa. ʼAki te ʼata ʼaia neʼe au lava mahino ai ki te maʼuli ʼo te kau Fakamoʼoni ʼaia ʼaē neʼe ʼave ki Sipelia. ʼI te temi nei, ka au fakatatau toku ʼaluʼaga pea mo tonatou maʼuli, kua au lava fetogi ai taku manatu ʼo ʼuhiga mo tamatou ʼu fihifihia ʼi te temi ʼaenī.” ​—Lidia Beda, Irkutsk.

Ko te ʼata ʼaē Fidèles dans les épreuves ʼe kua fakaliliu ia lea e 25 pea neʼe leleiʼia ʼi te malamanei kātoa.a Ko te ʼata ʼaia neʼe fakahā ʼi te ʼu televisio ʼi Saint-Pétersbourg, mo Omsk, pea mo te tahi ʼu kolo ʼi Lusia, pea mo te ʼu kolo ʼi Ukelenia ʼaē ko Vynnytsya, mo Kerch, mo Melitopol pea mo Lʹviv. Neʼe toe fakapale te ʼata ʼaia e te kautahi ʼo te ʼu ʼata ʼi te malamanei kātoa.

ʼE mālohi te logo ʼaē ʼe maʼu ʼi te ʼata, ʼuhi ko te ʼu faʼifaʼitaki ʼa te toko lauʼi afe hahaʼi ʼaē neʼe nātou fakahā he lototoʼa lahi pea mo he mālohi fakalaumālie ʼi te ʼu taʼu ʼaia neʼe fakatagaʼi ai nātou. Ko te kau Fakamoʼoni ʼa Sehova ʼi Lusia neʼe nātou nonofo agatonu moʼoni ʼi te ʼu faigataʼaʼia. Kapau ʼe koutou fia sio ki te ʼata ʼaia, pea ʼe fiafia anai te kau Fakamoʼoni ʼa Sehova ʼi he foaki atu ia te foʼi fime viteo ʼaia. Koutou felogoi mo he tahi iā nātou ʼi takotou telituale.

[Kiʼi nota]

[Haʼuʼaga ʼo te paki pasina 8]

Stalin: U.S. Army photo

[Haʼuʼaga ʼo te paki pasina 9]

Stalin: U.S. Army photo