Ka Hoko He ʼAluʼaga Fakaʼofaʼofa

KO OWEN, ko te kiʼi toe tagata neʼe taʼu lua vaelua, pea neʼe lolotoga gaoʼi ʼi te fale maʼanu ʼo tona ʼapi. Neʼe kake ki te puha ʼaē neʼe tānaki ai te ʼu meʼa faitoʼo, kae neʼe manatu e tana ʼu mātuʼa ʼe mole aʼu anai kiai he neʼe kei veliveli fau. ʼI te ʼu faitoʼo ʼaē neʼe ina maʼu ai, neʼe ina tokagaʼi te kiʼi foʼi hina. Neʼe ina avahi pea neʼe ina ʼinu. Pea neʼe hoko kiā ia te meʼa fakaʼofaʼofa.

Ko te vai ʼaē neʼe ʼi te hina neʼe ina kai tona ʼu toʼotoʼoga, pea neʼe mate fakaʼofaʼofa ai te kiʼi tamasiʼi ko Owen. Neʼe lotomamahi ʼaupito ai tana ʼu mātuʼa. Ko tana tāmai, ia Percy, neʼe ina kumi he fakaloto fīmālie ʼi tana lotu. Neʼe ina fehuʼi fēnei: “He koʼe neʼe hoko te meʼa ʼaenī?” Neʼe tali fēnei age e te tagata lotu: “Neʼe loto e te ʼAtua ki hana tahi kiʼi ʼāselo ʼi selo.” ʼI te lahi ʼaupito ʼo tonā lotomamahi, ko te taumatuʼa ʼaia ʼaē neʼe putu neʼe nā manatu neʼe ko he agakovi ʼaupito ʼaē neʼe hoko kiā nāua. Neʼe ko te ʼAtua moʼoni koa ʼaē neʼe tupu ai te tuʼutāmaki ʼaia? ʼI te mole maʼu e Percy he loto fīmālie, neʼe mole kei fia kau ki tana lotu.

ʼI tana fakakaukauʼi te meʼa ʼaē neʼe hoko, neʼe feʼekeʼaki fēnei e Percy: ‘ ʼE maʼuli mamahi koa taku kiʼi tamasiʼi? ʼE au toe sio anai koa kiā ia ʼi he ʼaho?’

Neʼe lagi koutou feʼekeʼaki mo koutou peʼe koteā ʼaē ʼe hoko kia ia ʼaē kua mate pea ʼe feala anai koa ʼi he ʼaho ke tou toe fakatahi mo nātou ʼaē kua mamate kae neʼe tou ʼoʼofa ai. Ko te Folafola ʼa te ʼAtua, te Tohi-Tapu, ʼe ina tali ki te ʼu fehuʼi ʼaia. ʼE feala ke tou maʼu ʼi tana ʼu pasina te ʼu tali ʼe mahino lelei pea mo fakaloto fīmālie kiā nātou fuli ʼaē neʼe hoko kiā nātou he ʼu ʼaluʼaga fakaʼofaʼofa feiā. Pea tahi ʼaē meʼa, ʼe fakahā ai he ʼamanaki taulekaleka neʼe fakapapauʼi mai e te ʼAtua​—ko te fakatuʼuake.

Koutou lau te alatike ʼaē ka hoko mai ke koutou maʼu ai he tahi ʼu manatu ʼo ʼuhiga mo te ʼamanaki taulekaleka ʼaia.