ʼE Koutou Maʼu ʼIfea—Te ʼu Akonaki Faka Lotu Moʼoni?
KO TE tagata ʼi Tibet ʼe ina fuli te maka takafuafua moʼo fai ʼaki tana ʼu faikole. ʼE ina faka tui, ko tana ʼu kole ʼaia, ʼe toe hoko liuliuga mokā ina fuli te maka takafuafua ʼaia. ʼI te foʼi fale lahi ʼi Initia, ʼe ʼi ai te kiʼi kogafale ʼe fakatuʼu kehe maʼa te pûjâ—ʼi te lotu ʼaia ʼe momoli ai te ʼīsēsō, te ʼu fisiʼi teu pea mo ʼihi age meʼa ki te ʼu fakatātā ʼo te ʼu ʼatua kehekehe. ʼI te fenua ʼo Italia, ʼaē ʼe vaha mamaʼo mo Initia ia lauʼi afe kilometa, ʼe ʼi ai te fafine ʼe ʼalu ki te ʼēkelesia matalelei ʼo tuʼutuli ki te fakatātā ʼo Malia, te faʼē ʼa Sesu, pea ʼe faikole mo tana lōsalio.
Lagi kua koutou sio e koutou totonu ki te maʼuli faka lotu ʼa te hahaʼi. ʼE ʼui ʼi te tohi The World’s Religions—Understanding the Living Faiths: “ ʼI te ʼu fenua fuli ʼo te malamanei kātoa, ʼi te temi muʼa pea mo te temi nei, neʼe maʼuhiga ʼaupito ia te lotu ʼi te maʼuli ʼo te hahaʼi.” Neʼe ʼui e John Bowker ʼi te tohi God—A Brief History: “ ʼI te agamāhani, ʼi te ʼu fenua fuli ʼe faka tui te hahaʼi ki te ʼAtua, ʼe nātou faka tui ʼe ina takitaki tatou pea neʼe ina fakatupu ia meʼa fuli. ʼE toe manatu feiā mo te ʼu fenua ʼaē ʼe mole felogoi ai te politike pea mo te lotu.”
ʼE ʼi ai te mālohi ʼa te lotu ki te ʼu lauʼi miliona hahaʼi. ʼE ko he fakamoʼoni mālohi ʼaia, ʼe ʼaoga pea mo fia fai ia te tagata ki te ʼu meʼa fakalaumālie. ʼI tana tohi The Undiscovered Self, ko te tōketā ʼiloa ko Carl G. Jung ʼe talanoa ki te fia tauhi ʼa te hahaʼi ki he mālohi māʼoluga, pea ʼe ina ʼui “ ʼe ʼiloga tanatou fia tauhi ʼaia ʼi te hisitolia kātoa ʼo te tagata.”
Kae tokolahi te hahaʼi ʼe mole nātou tui ki te ʼAtua pea ʼe mole nātou fia tauhi ki he lotu. Pea ko te hahaʼi ʼaē neʼe mole lelei tonatou taupau fakalaumālie e tanatou ʼu lotu, ko nātou tāfito ʼaia kua lotolotolua peʼe mole nātou tui ki te maʼuli moʼoni ʼa te ʼAtua. Neʼe ʼui ko te lotu ʼe “ko he tauhi ki he manatu; ko he agatonu fakavale peʼe ko he pipiki ʼāteaina.” ʼAki te ʼu fakamahino ʼaia, ʼe feala ke tou ʼui ʼe teitei ko te hahaʼi fuli ʼe nātou tauhi faka lotu, māʼiape la mo te hahaʼi ʼaē ʼe nātou ʼui ʼe mole nātou faka tui ki te ʼAtua.
Lolotoga te hisitolia ʼo te tagata, neʼe faʼu e te tagata te ʼu faʼahiga tauhi kehekehe ʼi tana faiga ʼaē ke ina fakafimālieʼi tona maʼuli fakalaumālie. Koia ʼaē kua lahi ai te ʼu lotu kehekehe ʼi te malamanei. Logola ko te ʼu lotu fuli ʼe nātou tui ki te mālohi māʼoluga kae ʼe kehekehe tanatou ʼu manatu ʼo ʼuhiga mo ia ʼaia peʼe koteā te mālohi ʼaia. ʼE teitei pe ki te ʼu lotu fuli ʼe nātou toe faka maʼuhigaʼi te hāofaki peʼe ko te ʼāteaina. Kae ʼe mole tatau tanatou ʼu akonaki ʼaē ʼo ʼuhiga mo te hāofaki pea ʼe maʼu feafeaʼi ia te hāofaki ʼaia. ʼAki te ʼu akonaki kehekehe ʼaia, ʼe tou lava ʼiloʼi feafeaʼi te ʼu akonaki faka lotu moʼoni ʼaē ʼe leleiʼia e te ʼAtua?