Te ʼu Fehuʼi ʼa Te Kau Lautohi

He Koʼē ʼe Fakagafua e Te ʼAtua Ia Te ʼu Mamahi?

ʼE mole fakamamahiʼi e te ʼAtua ia te tagata. ʼE ʼui fēnei ʼi te Tohi-Tapu: “ ʼE mamaʼo ʼi te ʼAtua moʼoni ia te agakovi!” (Sopo 34:10) Kae ko ai tāfito ʼaē ʼe tupu mai ai ia te ʼu mamahi?

Neʼe fakahigoaʼi e Sesu ia Satana ko “te pule ʼo te mālamanei.” (Soane 14:30) ʼE moʼoni ko Sehova ia te Tuʼi ʼo Te ʼAtulaulau. ʼE mole ina liʼaki anai ʼi he temi tona tuʼulaga ʼaia. Kae neʼe tuku e te ʼAtua he temi, ke puleʼi e Satana te hahaʼi tokolahi ʼi te mālamanei.—1 Soane 5:19.

Neʼe feafeaʼi ia te pule ʼa Satana? Talu mai tana ʼuluaki felōgoi ʼaē mo te tagata, ko Satana neʼe ko he tahi ʼe fai fakapō pea mo kākā. ʼE loloto te ʼu maumau ʼaē ʼe fakahoko e Satana ki te hahaʼi. Neʼe tala fēnei e Sesu ʼo ʼuhiga mo ia: “Neʼe ko he fakapō ia ʼi tana kamata pea neʼe mole haga nofo ia ʼi te moʼoni, heʼe mole iā te ia te moʼoni. Kā ina tala te loi, pea ʼe palalau ia ʼo mulimuli pē ki te ʼu ʼulugaaga ʼo ia totonu, heʼe gutuloi, pea ʼe ko te tamai ʼo te loi.” (Soane 8:44) Neʼe toe ʼui e Sesu ko te ʼu tagata ʼaē neʼe natou kumi ke natou matehi ia ia neʼe ko te ʼu fānau ʼa Satana, te ʼuluaki fai fakapō. Neʼe natou liliu ko tana fānau he neʼe natou hagē pē ko ia. Ohagē ko tona ʼui e te tākuga lea: ʼE hoko pē te foha ki tana tamai.

ʼE kei fakaneke pē e Satana ʼi te ʼu loto ʼo te hahaʼi ia te ʼu holi ki te fai fakapō. Ohagē lā, ko te polofesea kua letelete ko R. J. Rummel, ʼi te Univelesitē ʼo Hawaï, ʼi Amelika, ʼe ina fakafuafua mai te taʼu 1900 ki te taʼu 1987, ko te ʼu puleʼaga kehekehe neʼe natou matehi te toko 169 198 000 hahaʼi ʼi te ʼu faiga ʼaē ke molehi he faʼahi fakapolitike ʼi he fenua pea mo he lanu, pea mo te tāmateʼi ʼo te hahaʼi kae mole hona tupuʼaga. Ko te ʼu mātea ʼaia ʼe hilifaki ki te ʼu toko lauʼi hogofulu miliona hahaʼi ʼaē neʼe mamate ʼi te tau lolotoga te temi ʼaia.

Kapau ʼe mole ko te ʼAtua ʼaē ʼe ina fakamamahiʼi ia te tagata, he koʼē ʼe ina fakagafua? ʼUhi ko te ʼu fehuʼi maʼuhiga ʼaupitō, ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi, ʼaē neʼe lagaʼi kua fualoa ki muʼa atu, pea ʼe tonu ke tali kiai. Tou vakaʼi te fehuʼi e tahi ʼi te ʼu fehuʼi ʼaia neʼe lagaʼi.

ʼI te kamataʼaga ʼo te hisitolia ʼo te tagata, neʼe lagolago Atama mo Eva kiā Satana. Neʼe nā liʼaki ia te pule ʼa te ʼAtua pea mo nā filifili ke nā pule faʼitaliha kiā nāua totonu, kae ʼi tona fakahagatonu neʼe ko te Tēvolo ʼaē kua ina puleʼi leva ia nāua.—Senesi 3:1-6; Fakahā 12:9.

ʼUhi ko Sehova ʼe faitotonu, neʼe maʼua ai ke tuku he temi moʼo maʼu ʼo he ʼu fakamoʼoni ki te ʼu lau ʼaia. Koteā ʼaē neʼe hoko ki muli age? Ko te pule ʼa te tagata ʼaē neʼe takitaki e Satana, neʼe iku pē ia ki te mamahi. Pea ʼaki te temi loaloaga ʼaē neʼe tuku e te ʼAtua ke takitaki fakatemi e te tagata tona maʼuli, neʼe ʼi ai pē tona ʼaoga ki te tagata. ʼO feafeaʼi? Ko nātou ʼaē ʼe natou ako te meʼa ʼaē neʼe hoko moʼoni pea mo tui kiai, ʼe natou maʼu ia te fealagia ʼaē ke natou fakahā ia tanatou loto ʼaē ke puleʼi nātou e te ʼAtua. Ko nātou ʼaē ʼe natou ako ia te ʼu lēkula ʼa te ʼAtua pea mo maʼuliʼi, ʼe natou maʼu ia te ʼamanaki ʼaē ke natou māʼuʼuli ʼo heʼegata.—Soane 17:3; 1 Soane 2:17.

ʼE moʼoni, ʼo aʼu mai ki te temi nei, ʼe puleʼi e Satana ia te mālamanei ʼaki te agakovi. Kae mole hoko atu anai ʼo toe fualoa. Kua vave pē, pea ʼe fakaʼaogaʼi anai e Sehova tona ʼAlo ke ina “maumauʼi te ʼu gāue ʼa te Tēvolo.” (1 Soane 3:8) ʼI te takitaki ʼa te ʼAtua, ʼe fakamālōlō anai e Sesu te hahaʼi ʼaē neʼe lotomamahi pea mo ina pulihi ia te ʼu ʼaluʼaga fakatupu mamahi ʼi tonatou maʼuli. ʼE ina fakatuʼuake anai ki te kele ia te ʼu toko lauʼi miliale hahaʼi ʼaē neʼe māʼuʼuli mamahi pea kua mamate talu mai fualoa.—Soane 11:25.

Ko te fakatuʼuake ʼo Sesu ʼe ko he faʼahiga fakahā ʼaia ʼo te mālo ʼa te ʼAtua ʼi te ʼu gāue ʼa te Tēvolo, ko he fakatātā ʼaia ʼo te meʼa ʼaē kā hoko ki te hahaʼi ʼaē ʼe natou filifili ia te pule ʼa te ʼAtua. (Gāue 17:31) ʼE tokoni mai ʼi te Tohi-Tapu ke tou mahino ki te temi ʼaia kā haʼu, ʼaki te ʼu palalau fakalotofīmālie ʼaenī: “Ko te ʼAtua totonu ʼe nofo anai mo [te hahaʼi]. Pea ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.”—Fakahā 21:3, 4.