ʼE Lelei Koa Ia Te ʼu Lotu Fuli?
ʼE TOU māʼuʼuli ʼi he mālama ʼe lahi ai te ʼu lotu kehekehe. ʼI te sivi neʼe fai mole heʼeki faʼa fualoa, neʼe fakafuafua ai ʼi te mālamanei kātoa ko lotu lalahi e 19 pea mo ʼihi age lotu liliki e 10 000. ʼAki te ʼu lotu kehekehe ʼaia ʼe feala ai ki te hahaʼi ke natou filifili ia te lotu ʼaē ʼe natou fia kau kiai. Koia, ʼe maʼuhiga koa te lotu ʼaē ʼe kotou filifili?
Ko ʼihi ʼe natou ʼui ko te ʼu lotu kehekehe ʼe hagē ko he ʼu ala kehekehe ki he moʼuga. Maʼa nātou, ʼe mole maʼuhiga ia te ala ʼaē ʼe natou filifili, koteʼuhi ko te ʼu ala fuli ʼe natou taki ki te meʼa pē e tahi. ʼI tanatou manatu, ko te ʼAtua Māfimāfi pē e tahi, koia ko te ʼu lotu fuli ʼe natou taki kiā te ia.
Ko Te ʼu Ala Fuli ʼe Natou Taki Koa Ki Te ʼAtua?
Koteā ʼaē neʼe ʼui e Sesu Kilisito, te faiako lotu ʼaē neʼe lahi age tona fakaʼapaʼapaʼi ʼi te hisitolia, ʼo ʼuhiga mo te faʼahi ʼaenī? Neʼe ina ʼui fēnei ki tana kau tisipulo: “Kotou hū ʼi te matapā fāveliveli!” Koteā tona tupuʼaga? “Heʼe laulahi ia te matapā, mo faigafua ia te ala ʼaē ʼe fakatau ki te fakaʼauha, pea ʼe tokolahi ia nātou ʼaē ʼe ʼolo ai. Kae fāveliveli ia te matapā, mo faigataʼa ia te ala ʼaē ʼe fakatau ki te maʼuli, pea ʼe tokosiʼi ia nātou ʼe natou maʼu.”—Mateo 7:13, 14, Bible en français courant.
Neʼe ʼui moʼoni koa e Sesu ko ʼihi lotu ʼe natou taki te hahaʼi “ki te fakaʼauha”? Pe neʼe ina ʼui ʼi tana akonaki ʼe ko nātou pē ʼaē ʼe mole tui ki te ʼAtua ʼaē ʼe ʼolo ʼi te ala faigafua, kae ko nātou ʼaē ʼe tui ki te ʼAtua, tatau aipē peʼe koteā tanatou lotu, ʼe natou ʼolo ʼi te ala faigataʼa ʼaē ʼe fakatau ki te maʼuli?
ʼI te hili ʼo tana fakahā ko ala pē e lua, neʼe ʼui fēnei e Sesu: “Kotou nonofo tokaga ki te kau polofetā loi. ʼE ʼomai kiā koutou ohagē ko he ʼu ovi, kae ʼi loto ko te ʼu lupo fekai.” (Mateo 7:15, Bible Segond) Ki muli age neʼe ina ʼui fēnei: “ ʼE mole ko nātou ʼaē ʼe natou ʼui mai kiā te au: ʼAliki, ʼAliki, kā natou hū anai ki te puleʼaga ʼo selō, kae ko ʼaē ʼe ina fai te finegalo ʼo taku Tamai ʼaē ʼe ʼi selō.” (Mateo 7:21, Bible de Crampon) Kapau ʼe ʼui e he tahi ko ia ko he polofetā peʼe ina ʼui ko Sesu ʼe ko tona “ ʼAliki,” pea ʼe tou ʼiloʼi ai ʼe ʼi ai tana lotu, ʼe tui ki te ʼAtua. Koia, ʼe mahino mai, neʼe fakatokaga mai e Sesu ʼe mole ko te ʼu lotu fuli ʼaē ʼe lelei pea ʼe mole tonu ke tou falala ki te kau faiako lotu fuli.
ʼE Feala Koa Ke Tou Maʼu Ia Te Ala Faigataʼa?
Mai tona ʼaluʼaga ʼaē, ko te ʼu lotu fuli ʼe mole natou taki te hahaʼi ki te ʼAtua, ʼe lava feafeaʼi hakotou ʼiloʼi ʼi te ʼu lotu ʼaē e lauʼi afe ia te lotu ʼaē ʼe ina taki ki te maʼuli? Tou toʼo ia te faʼifaʼitaki ʼaenī: Kotou fakakaukauʼi age muʼa, ʼe kotou hehē ʼi he kolo lahi. ʼE kotou fakatuʼutuʼu ke kotou kumi tokoni. ʼE ʼui atu e he tahi ʼe ina ʼiloʼi lelei ia te ala, ke kotou ʼolo fakaʼesitē. Ko he tahi age, ʼe ina ʼui atu ke kotou ʼolo fakaʼuesitē. Pea ko te tahi ʼe ina ʼui atu ke kotou filifili ia te faʼahi ʼaē ʼe kotou fia ʼalu ai. Fakamulimuli age, ʼe toʼo age e he tahi ia he mape ʼe totonu pea ina fakahā atu ia te ala ʼaē ʼe tonu ke kotou ʼolo ai. ʼE ina tuku atu leva ia te mape ke feala hakotou mulimuli kiai ʼi takotou ʼalu ʼaē ʼi te ala. ʼE mole kua lahi age koa lā ia takotou falala ʼaē ʼe kotou aʼu anai ki te potu ʼaē ʼe kotou fia ʼolo kiai?
Koia, ʼe toe fēia pē mokā tou filifili ia te lotu moʼoni, ʼe ʼaoga ke ʼi ai hatatou mape ʼe totonu. ʼE tou lava maʼu koa ia te mape ʼaia? ʼEī. Ko te mape ʼaia ʼe ko te Tohi-Tapu, ʼaē ʼe ʼui fēnei ai: “Ko te Tohi-Tapu kātoa ʼe haʼu mai te ʼAtua pea ʼe ʼaoga moʼo akoʼi, moʼo fakalakatonuʼi, moʼo fakatonutonuʼi pea moʼo akoʼi ʼi te faitotonu.”—2 Timoteo 3:16, TOB.
ʼE lagi ʼe ʼi ai hakotou Tohi-Tapu ʼi takotou lea, ʼe feala hakotou fakaʼaogaʼi ohagē ko he mape fakalaumālie. Ko te kau Fakamoʼoni ʼa Sehova, ʼaē ʼe natou tā ia te nusipepa ʼaenī, ʼe natou toe tā mo te Tohi-Tapu ʼe tuha ke falala kiai, pea ʼe higoa: Les Saintes Écritures — Traduction du monde nouveau. Kae kapau ʼe mole ko koutou ko he Fakamoʼoni ʼa Sehova, ʼe lagi kotou fia fakaʼaogaʼi anai ia he tahi age ʼu Tohi-Tapu mokā kotou vakavakaʼi peʼe feafeaʼi hakotou ʼiloʼi ia te lotu ʼaē ʼe lelei pea mo te lotu ʼaē ʼe kovi. Koia, ʼi te ʼu ʼalatike ʼaenī ʼe fakaʼaogaʼi ai ia te ʼu Tohi-Tapu kehekehe ʼe fakaʼapaʼapaʼi ʼaupitō ʼe ʼihi lotu.
ʼI takotou lau ia te ʼu ʼalatike ʼaē kā hoa mai, kotou fakatatau ia te meʼa ʼaē ʼe kotou ʼiloʼi pea mo te meʼa ʼaē ʼe ʼui ʼi te Tohi-Tapu. Kotou manatuʼi ia te ʼu palalau ʼa Sesu, peʼe lava ʼiloʼi feafeaʼi ia te lotu ʼaē ʼe lelei pea mo te lotu ʼaē ʼe kovi. Neʼe ina ʼui fēnei: “Ko te ʼakau lelei fuli pē ʼe fua ʼaki te ʼu fua matalelei, kae ko te ʼakau kovi ʼe fua ʼaki te ʼu fua ʼe kovi. Ko he ʼakau lelei ʼe mole feala ia ke kovi ʼona fua, pea ko he ʼakau kovi ʼe mole feala ia ke matalelei ʼona fua.” (Mateo 7:17, 18, Bible Segond) Tou vakaʼi he ʼu fua e tolu ʼi te ʼu fua matalelei ʼaē ʼe ʼui ʼi te Tohi-Tapu, ʼe feala ai anai hakotou ʼiloʼi ia te “ ʼakau lelei.”