Ko Te Lotu ʼAē ʼe Lelei ʼe Ina Akoʼi Te ʼOfa Fakatautēhina
ʼE ʼUI fēnei ʼi te Tohi-Tapu: “Ko ʼaē ʼe mole ʼofa neʼe mole ina ʼiloʼi te ʼAtua, koteʼuhi ko te ʼAtua ʼe ʼofa.” (1 Soane 4:8, Bible Crampon) Koia ko te lotu ʼaē ʼe lelei ʼe tonu ke ina akoʼi ki te hahaʼi ia te ʼofa fakatautēhina.
ʼE lahi te ʼu lotu ʼe natou tokoni lahi ki te hahaʼi māhahaki, ki te hahaʼi mātutuʼa, pea mo te kau māsisiva. ʼE natou fakalotomālohi ia tanatou hahaʼi ke natou maʼuliʼi ia te tokoni ʼa te ʼapositolo ko Soane, ʼaē neʼe ina tohi fēnei: “Kapau ko he tagata, ʼe maʼu koloa, ʼe sio ki tona tehina ʼe ʼi te faigataʼaʼia kae ina pupunu ki ai tona loto, ʼe feafeaʼi hana lau ʼe ʼofa ki te ʼAtua ʼi tona loto? ʼAku fānau, ʼe mole tonu ke tou ʼoʼofa ʼaki pē he ʼu akonaki pea mo he ʼu palalau matalelei; ʼe tonu ko he ʼofa moʼoni ʼe hā ʼaki he ʼu gāue.”—1 Soane 3:17, 18, Bible en français courant.
Kae koteā ʼaē ʼe hoko mokā fetauʼaki he ʼu fenua? Ko te fakatotonu ʼaē ʼa te ʼAtua ke “ ʼofa . . . ki tona kāiga ohagē ko koe totonu” ʼe tonu koa ke maʼuliʼi ʼi te temi pē ʼaē ʼe tokalelei ai kae ʼe mole toe maʼuliʼi leva ia mokā fakatuʼutuʼu e he tagata fai politike peʼe ko he hau ke ina tauʼi ia he tahi fenua?—Mateo 22:39, Bible de Jérusalem.
Neʼe ʼui fēnei e Sesu: “ ʼAki te meʼa ʼaenī ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soane 13:35, Bible Segond) ʼI takotou tali ki te ʼu fehuʼi ʼaē kā hoa mai, kotou fai kiā koutou totonu pē ia te fehuʼi ʼaenī: ‘Ko te hahaʼi ʼo te lotu ʼaia ʼe natou ʼoʼofa koa ki te hahaʼi fuli pē ʼi te temi fuli, ʼo mole gata pē ʼi he ʼu palalau kae ʼaki he ʼu gāue?’
KUPU TĀFITO: Te tau.
KOTEĀ ʼAĒ ʼE AKOʼI MAI ʼI TE TOHI-TAPU: Neʼe fakatotonu fēnei e Sesu ki tana ʼu tisipulo: “ ʼE au ʼui atu: Kotou ʼoʼofa ki tokotou ʼu fili, . . . kotou fai te meʼa ʼaē ʼe lelei kiā nātou ʼaē ʼe fēhihiʼa atu kiā koutou.”—Mateo 5:44, Bible Crampon.
ʼI te ʼomai ʼa te kau sōlia ko te puke ʼo Sesu, neʼe toʼo ake e te ʼapositolo ko Petelo ia te heletā moʼo haofaki ʼo ia. Kae neʼe ʼui fēnei age e Sesu: “Toe ʼai tau heletā ki tona ʼaiʼaga, heʼe ko nātou fuli ʼaē ʼe natou toʼo te heletā ʼe natou mamate anai ʼi te heletā.”—Mateo 26:52, TOB.
Neʼe tohi fēnei e te ʼapositolo ko Soane: “ ʼE ʼiloʼi te ʼu fānau ʼa te ʼAtua mo te ʼu fānau ʼa te Tēvolo ʼaki te meʼa ʼaia. Ko ʼaē ʼe mole ina haga fai te faitotonu ʼe mole haʼu ia mai te ʼAtua, ʼo tatau aipē mo ia ʼaē ʼe mole ʼofa ki tona tehina. Heʼe ko te logo ʼaē neʼe kotou logo ki ai ʼi te kamataʼaga, ke tou feʼofaʼofaniʼaki iā tātou; ʼo mole hagē ko Kaino ʼaē neʼe haʼu mai te agakovi pea neʼe ina matehi tona tehina.”—1 Soane 3:10-12, Bible Crampon.
FEHUʼI: ʼE uga koa e te lotu ʼaia tana hahaʼi ke natou kau ki te tau?
KUPU TĀFITO: Te ʼu gaohi meʼa fakapolitike.
KOTEĀ ʼAĒ ʼE AKOʼI MAI ʼI TE TOHI-TAPU: ʼI te ʼosi mamata ʼa te hahaʼi ki te lava fai ʼaē e Sesu ia te ʼu milakulo, neʼe loto ai e ʼihi ke kau ia Sesu ki te ʼu meʼa fakapolitike. Neʼe koteā ʼaē neʼe fai e Sesu? “ ʼI te ʼiloʼi ʼaē e Sesu, ʼe natou ʼamanaki ʼomai ʼo puke ia ia ke natou fakanofo ko he hau, neʼe mavae ia, ʼo toe ʼalu tokotahi ki te moʼuga.”—Soane 6:15, Bible Segond.
ʼI te temi ʼaē neʼe puke ai Sesu pea mo lau ʼe ina fakanekeneke ia te hahaʼi ke natou fakafeagai ki te puleʼaga, neʼe ina tali fēnei: “Ko toku puleʼaga ʼe mole kau ia ʼi te mālama ʼaenī. Kanapaulā neʼe kau toku puleʼaga ʼi te mālama ʼaenī, kanaʼaualā neʼe tau taku hahaʼi ke ʼaua naʼa ʼave au ki te kau Sutea. Kae ko toku puleʼaga ʼe mole tuʼu ia ʼi henī.”—Soane 18:36, Bible de Jérusalem.
ʼI tana faikole ki te ʼAtua ʼo ʼuhiga mo te ʼu tisipulo, neʼe ʼui fēnei e Sesu: “Neʼe au foaki age tau folafola kiā nātou, pea neʼe fehiʼa te mālamanei kiā nātou koteʼuhi ʼe mole natou kau ʼi te mālamanei, ohagē pē ko au ʼe mole au kau ʼi te mālamanei.”—Soane 17:14, Bible en français courant.
FEHUʼI: Ko te lotu ʼaia ʼe mulimuli koa ia ki te faʼifaʼitaki ʼa Sesu ʼo mole kau ki te ʼu gaohi meʼa fakapolitike, tatau aipē peʼe fehiʼaʼinaʼi anai tana hahaʼi e ʼihi kau fai politike?
KUPU TĀFITO: Te fakapalatahi.
KOTEĀ ʼAĒ ʼE AKOʼI MAI ʼI TE TOHI-TAPU: ʼI te kua ʼosi tafoki ki te lotu Kilisitiano ia te ʼu ʼuluaki hahaʼi ʼaē neʼe mole ko he kau Sutea pea neʼe mole silikosisioʼi, neʼe ʼui fēnei e te ʼapositolo ko Petelo: “ ʼE mole fakakehekehe e te ʼAtua ia te hahaʼi: ko he tagata pē, mai te fenua fuli pē, ʼaē ʼe fakaʼapaʼapa kiā te ia pea mo ina fai te meʼa ʼaē ʼe faitotonu ʼe ina tali leleiʼi ia ia.”—Gāue 10:34, 35, Bible en français courant.
ʼI tana tohi ʼaē ki te ʼu Kilisitiano ʼo te ʼuluaki sēkulō, neʼe ʼui fēnei e Sake: “ ʼE mole kotou maʼu te tui ki totatou ʼAliki ko Sesu Kilisito, totatou kolōlia, ʼuhi ko takotou ʼu gāue fakapalatahi? Heʼe kapau ʼe hū mai ki takotou fakatahi he tagata mo ni ʼu mama ʼaulo ʼi tona ʼu kauʼi tuhi pea mo he teu matalelei, pea hū mai mo he tagata masiva mo he teu ʼuli, kae kotou fakamaʼuhigaʼi age koutou ia ia ʼaē ʼe teu matalelei pea mo ʼui maʼa koutou: ‘Nofo koe ʼi te hekaʼaga lelei ʼaenī,’ pea ʼui maʼa koutou ki te tagata masiva: ‘Tuʼu koe,’ peʼe kotou ʼui age: ‘Nofo age koe ki lalo ʼi toku meʼa hilihiliʼaga vaʼe,’ ʼe maʼu iā koutou te ʼu faʼahiga kalasi pea kua kotou liliu ko te ʼu tuʼi fakamāu ʼe foaki tūʼā kovi, kaeā koa lā?”—Sake 2:1-4.
FEHUʼI: ʼE akoʼi koa e te lotu ʼaenī ko te hahaʼi ʼe natou tatau fuli kiā mata ʼo te ʼAtua pea ko tana hahaʼi ʼe mole tonu ke natou laukovi ki he tahi ʼuhi ko tona lanu peʼe ko tona tuʼulaga fakasōsiale?
[Fakamatala ʼo te pasina 6]
Ko te lotu fea ʼaē ʼe ina akoʼi ki tana hahaʼi ke natou tekeʼi ia te ʼu fihifihia fakapolitike, fakalanu, pea mo ekonomika ʼaē ʼe fakatupu maveuveu ai ia te hahaʼi?