Ko Te Lotu ʼAē ʼe Lelei ʼe Ina Akoʼi Te ʼu Lēkula Māʼoluga ʼo ʼUhiga Mo Te Aga ʼAē ʼe Tonu Ke Fai
KO TE lotu ʼaē ʼe lelei ʼe ina akoʼi tātou ke tou manatu ki te ʼu meʼa ʼaē ʼe lelei pea mo fakahā mai kiā tātou peʼe feafeaʼi hatatou hikihiki ʼo tatatou aga ke lelei age. ʼE tokoni mai ʼi tatatou faiga mālohi ʼaē ke tou fai ia te meʼa ʼaē ʼe totonu pea mo ina fakaliliu tātou ko he tahi ʼe lelei. ʼE tou ʼiloʼi feafeaʼi ʼe fai e te lotu ʼaē ʼe lelei ia te faʼahi ʼaia?
Kotou tokagaʼi age muʼa ia te meʼa ʼaē neʼe tohi e te ʼapositolo ko Paulo ki te kau Kilisitiano ʼo te ʼuluaki sēkulō ʼaē neʼe māʼuʼuli ʼi Kolonito, ʼi Keleka. Neʼe logona ia te kolo ʼāfea ʼaia ʼo ʼuhiga mo tona faʼahiga maʼuli heʼeʼaoga. Neʼe fakatokaga fēnei e Paulo: “ ʼE mole he tagata fai folonikāsio, he tagata tauhi tamapua, he tagata fai feʼauʼaki, he ʼu tagata ʼe taupau ke fai kiā nātou he ʼu holi ʼe mole tonu ke fai, he ʼu tagata ʼe momoe mo he tahi ʼu tagata, he kau kaihaʼa, he hahaʼi mānumānu, he kau konahia, he kau leakovi, he ʼu hahaʼi ʼe natou faʼao he ʼu meʼa ka mole ʼanatou, ʼe natou maʼu anai te puleʼaga ʼo te ʼAtua.” Pea neʼe toe ʼui fēnei e Paulo: “Pea neʼe ko te ʼuhiga ʼaia ʼo niʼihi iā koutou. Kae kua fakamaʼa koutou, kua fakamāʼoniʼoni koutou pea kua tala ʼe kotou faitotonu ʼi te huafa ʼo totatou ʼAliki ko Sesu Kilisito pea ʼaki te laumālie ʼo te ʼAtua.” (1 Kolonito 6:9-11) Kotou fakakaukauʼi age muʼa—ko te lotu ʼaē ʼe lelei neʼe tokoni ki ʼihi ʼaē neʼe mole natou ʼiloʼi ki muʼa atu ia te ʼu lēkula ʼo ʼuhiga mo te aga ʼaē ʼe tonu ke fai, ke natou liliu ʼo maʼa pea mo liliu ko he ʼu kaugana faitotonu ʼa te ʼAtua!
ʼI te tahi age faʼahi, ʼe fakahā mai ʼi te Tohi-Tapu ia te fakatokaga ʼaenī: “ ʼE hoko mai anai he temi, ʼe mole fia logo anai te hahaʼi ki te akonaki moʼoni, kae ʼe natou mulimuli anai ki tanatou ʼu holi ʼo nātou totonu pea mo natou tānaki maʼa nātou he ʼu tuʼuga hahaʼi pule kā natou ʼui age anai te ʼu meʼa ʼaē ʼe natou fia logo kiai.”—2 Timoteo 4:3, Bible en français courant.
ʼO ʼuhiga mo te faʼahi ʼaia, koteā ʼaē ʼe fai e te ʼu lotu ʼaē ʼe kotou ʼiloʼi? ʼE natou lagolago koa ki te ʼu pelesepeto Fakatohi-tapu ʼo ʼuhiga mo te aga ʼaē ʼe lelei pea mo te aga ʼaē ʼe kovi? Peʼe natou tuku keheʼi koa ia te tokoni ʼaē ʼe fakatafito ki te Folafola ʼa te ʼAtua, ʼo natou akoʼi pē ki te hahaʼi ia ‘te ʼu meʼa ʼaē ʼe fia logo kiai te hahaʼi’?
Moʼo tokoni atu ke kotou ʼiloʼi peʼe fakatuputupu e he lotu ia he ʼu fua ʼe lelei, ʼe lagi lelei anai ke kotou tali muʼa ki te ʼu fehuʼi ʼaenī kā hoa mai.
KUPU TĀFITO: Te nofo ʼohoana.
KOTEĀ ʼAĒ ʼE AKOʼI MAI ʼI TE TOHI-TAPU: “Ke fakamaʼuhigaʼi e te hahaʼi fuli te nofo ʼohoana, pea ke ʼaua naʼa ʼulihi te moeʼaga fakataumātuʼa, heʼe fakamāuʼi anai e te ʼAtua te kau fai folonikāsio pea mo te kau tono.”—Hepeleo 13:4, Bible Crampon.
FEHUʼI: Ko te lotu ʼaia ʼe ina fakamaʼua koa kiā nātou ʼaē ʼe kau ai ke ʼohoana ki te lao ia te ʼu taumātuʼa ʼaē ʼe māʼuʼuli fakatahi?
KUPU TĀFITO: Te māvete ʼohoana.
KOTEĀ ʼAĒ ʼE AKOʼI MAI ʼI TE TOHI-TAPU: ʼI te fehuʼi age ʼaē peʼe ʼi ai he tupuʼaga ke māvete ai he toko lua, neʼe ʼui fēnei e Sesu: “ ʼE au tala atu kiā koutou: Ko ʼaē ʼe māvete mo tona ʼohoana, gata pē mokā neʼe hala ki tuʼa, pea mo toe ʼohoana mo he tahi fafine, ʼe tono ia.”—Mateo 19:9, Bible Segond Révisée.
FEHUʼI: Ko te lotu ʼaia ʼe fakaʼapaʼapa koa ki te takitaki ʼa Sesu pea mo fakagafua ia te māvete ʼohoana pea mo te toe ʼohoana, gata pē mokā neʼe hoko he aga heʼeʼaoga?
KUPU TĀFITO: Te ʼu felāveʼi fakasino.
KOTEĀ ʼAĒ ʼE AKOʼI MAI ʼI TE TOHI-TAPU: “Kotou hola mai te fai folonikāsio. Ko te ʼu agahala fuli ʼaē ʼe lava fai e te tagata ʼe ina fai ʼi tuʼa atu ʼo tona sino; ko ʼaē ʼe fai folonikāsio, ʼe agahala ia ki tona sino totonu.”—1 Kolonito 6:18, Bible de Jérusalem.
“ ʼE moʼoni, ko tanatou hahaʼi fafine neʼe natou fetogi te ʼu felāveʼi fakasino māhani ke liliu ko he ʼu felāveʼi fakasino heʼeʼaoga, pea toe fēia mo te hahaʼi tagata, neʼe natou liʼaki tanatou ʼu felāveʼi fakasino māhani mo te ʼu fafine, ʼo natou vela ʼi tanatou feholiʼaki iā nātou tagata pē, ʼo natou fai he ʼu felāveʼi fakalialia mo te hahaʼi tagata, pea mo natou maʼu ʼi ʼonatou sino pē ia te totogi ʼaē ʼe tuha mo nātou ʼuhi ko tanatou hēʼia.”—Loma 1:26, 27, Osty.
FEHUʼI: Ko te lotu ʼaia ʼe ina akoʼi koa ki tana hahaʼi ʼe ko he agahala ia te ʼu felāveʼi fakasino heʼeʼaoga ʼa he tagata pea mo he fafine peʼe ko he tagata mo he tagata pē, mo he fafine mo he fafine pē?
KUPU TĀFITO: Ko te hahaʼi ʼo te lotu ʼaia, ʼe natou lagolago ʼaki he lototoʼa ki te ʼu lēkula ʼo te Tohi-Tapu.
KOTEĀ ʼAĒ ʼE AKOʼI MAI ʼI TE TOHI-TAPU: “ ʼAua naʼa kotou fakatahi mo he tagata ʼe fakahigoaʼi ko he tehina, kae ʼe ko he tagata aga heʼeʼaoga, mānumānu, tauhi tamapua, fasituʼu, ʼinu fakavale, peʼe agakākā. ʼE mole tonu pē lā ke kotou kakai mo te taʼi tagata ʼaia.” (1 Kolonito 5:11, TOB) Koteā ʼaē ʼe tonu ke fai kiā nātou ʼaē ʼe natou lau ko he kau Kilisitiano kae ʼe mole natou fakahemala mai tanatou ʼu agahala? ʼE ʼui fēnei ʼi te Folafola ʼa te ʼAtua: “Kotou kapu te tagata agakovi ʼi te lotolotoiga ʼo koutou.”—1 Kolonito 5:13, Bible en français courant.
FEHUʼI: Ko te lotu ʼaia ʼe ina fakamavae koa ʼi tana hahaʼi ia ia ʼaē ʼe mole fia mulimuli ki te ʼu lēkula ʼo te Tohi-Tapu?
[Fakamatala ʼo te pasina 4]
Ko te lotu fea ʼaē ʼe ʼiloa ʼi tana lagolago ki te ʼu lēkula Fakatohi-tapu māʼoluga ʼo ʼuhiga mo te aga ʼaē ʼe tonu ke fai?