Kotou Taupau Iā Koutou Ia Te Faʼahiga Manatu ʼa Kilisito

“Ke kotou femaʼuʼaki te faʼahiga manatu ʼaē neʼe maʼu e Kilisito Sesu.”—LOMA 15:5.

1. He koʼē ʼe tonu ke tou faiga ke tou maʼu ia te faʼahiga manatu ʼa Kilisito?

NEʼE ʼui fēnei e Sesu Kilisito: “Kotou ʼomai kiā te au. . . . Ke kotou ako iā te au, heʼe au agamalū pea mo . . . agavaivai, pea ʼe kotou maʼu anai he fīmālie ki ʼokotou nefesi.” (Mat. 11:28, 29) Ko te fakaafe ʼofa ʼaia neʼe fakahā lelei ai ia te faʼahiga manatu ʼofa ʼa Sesu. ʼE mole he tahi age tagata neʼe ko he faʼifaʼitaki lelei tokotahi ke tou muliʼi. Logolā neʼe ko te ʼAlo ʼo te ʼAtua pea neʼe ina maʼu ia te toe mālohi, kae neʼe fakahā e Sesu ia te lotomahino pea mo te agalelei, tāfito ki te hahaʼi ʼaē neʼe maʼuli mamahi.

2. Ko te ʼu faʼahi fea ʼo te manatu ʼa Sesu ʼaē kā tou ako anai?

² ʼI te ʼalatike ʼaenī pea mo te ʼu ʼalatike e lua ʼaē kā hoa mai, ʼe tou vakaʼi ai anai peʼe lava feafeaʼi hatatou fakatuputupu pea mo taupau ia te faʼahiga manatu ʼaē neʼe maʼu e Sesu, pea mo faʼifaʼitakiʼi ia “te manatu ʼa Kilisito” ʼi totatou maʼuli. (1 Ko. 2:16) ʼE tou ako anai ia faʼahi e nima: te agamalū pea mo te agavaivai ʼa Sesu, tana agaʼofa, tana fakalogo ki te ʼAtua, tana lototoʼa, pea mo tona ʼofa tuʼumaʼu.

Tou Ako Mai Te Agamalū ʼa Kilisito

3. (a) Koteā te ako ʼo ʼuhiga mo te agavaivai neʼe akoʼi age e Sesu ki tana ʼu tisipulo? (b) Neʼe feafeaʼi ia Sesu ʼo ʼuhiga mo te ʼu vaivaiʼaga ʼo tana ʼu tisipulo?

³ Ko Sesu, te ʼAlo haohaoa ʼo te ʼAtua, neʼe lotolelei ke haʼu ki te kele ʼo gāue ʼi te lotolotoiga ʼo te hahaʼi agahala. Ki muli age, ko ʼihi anai iā nātou ʼaia ʼe natou matehi anai ia ia. Kae neʼe taupau tuʼumaʼu aipē e Sesu ia tana fiafia pea mo tana loto lolomi. (1 Pet. 2:21-23) Kapau ʼe tou “sioʼi tuʼumaʼu” ia te faʼifaʼitaki ʼa Sesu, pea mo tātou foki ʼe tou lava taupau anai ia tatatou fiafia pea mo tatatou loto lolomi mokā ʼe malave mai kiā tātou ia he ʼu hala pea mo he ʼu vaivaiʼaga ʼa niʼihi. (Hep. 12:2) Neʼe fakaafe e Sesu ia tana ʼu tisipulo ke natou ‘fua mo ia ia tana ʼakau ʼamo’ pea mo natou ako mai iā ia. (Mat. 11:29) Koteā ʼaē neʼe feala ke natou ako? Neʼe feala ke natou ako ko Sesu neʼe agamalū, pea neʼe ina kātakiʼi ia tana ʼu tisipulo logolā tanatou ʼu hala. ʼI te pō ʼaē ʼi muʼa ʼo tana mate, neʼe fufulu e Sesu ʼonatou vaʼe, ʼo ina akoʼi ai kiā nātou ke natou “agavaivai,” pea ko he ako ʼe mole natou galoʼi anai ʼi he temi. (Lau ia Soane 13:14-17.) Ki muli age, ʼi te temi ʼaē neʼe mole lava “nonofo fakaonoono” ai ia Petelo, mo Sake pea mo Soane, neʼe lotomahino Sesu ʼo ʼuhiga mo tonatou ʼu vaivaiʼaga. Neʼe ina fehuʼi fēnei age: “Simone, ʼe ke moe koe? . . . Kotou nonofo fakaonoono pea mo faikole, ke ʼaua naʼa kotou tō ki he fakahala. Ko te laumālie, ʼe moʼoni, ʼe mālohi ia, kae ko te kakano ʼe vaivai.”—Mko. 14:32-38.

4, 5. ʼE lava tokoni feafeaʼi mai kiā tātou ia te faʼifaʼitaki ʼa Sesu mokā tou sio ki he ʼu vaivaiʼaga ʼa niʼihi?

⁴ ʼE tou feafeaʼi mo kapau ko he tehina peʼe ko he tuagaʼane ʼe fia fakataupiepie, peʼe ʼita vave, peʼe mole ina muliʼi ia he tokoni mai te kau tagata ʼāfea peʼe ko “te tagata kaugana agatonu mo poto”? (Mat. 24:45-47) Logolā ʼe tou lava tali ia te ʼu aga ʼaē ʼe kovi mai te hahaʼi ʼo te mālama ʼa Satana, kae ʼe lagi feala ke faigataʼa ʼaupitō hatatou tali ia te ʼu vaivaiʼaga ʼaē ʼo totatou ʼu tehina. Kapau ʼe tou hoko ʼita ki he ʼu hala ʼa niʼihi, ʼe tonu ke tou fai kiā kita totonu ia te fehuʼi ʼaenī: ‘ ʼE lava feafeaʼi ke lelei age haku fakahā ia “te manatu ʼa Kilisito”?’ Kotou manatuʼi tuʼumaʼu ko Sesu neʼe mole ʼita ki tana ʼu tisipulo, māʼiapē lā mo te ʼu temi ʼaē neʼe natou vaivai fakalaumālie ai.

⁵ Tou vakaʼi age muʼa ia te faʼifaʼitaki ʼa Petelo. ʼI te temi ʼaē neʼe fakaafe ai e Sesu ia Petelo ke hifo ʼi te vaka pea mo haʼele age kiā te Ia ʼi te fuga vai, neʼe fai e Petelo ia te faʼahi ʼaia, kae neʼe mole fualoa, koteʼuhi ʼi tana sio ʼaē ki te tuʼani matagi pea neʼe kamata mou ai. Neʼe ʼita lahi ai koa Sesu ʼo ina ʼui age: “Moitoʼa! Kua ke tau lā kiai”? Kailoa ia, neʼe mole palalau fēia age Sesu ia! “Neʼe [ina] faoʼi atu aipē [ia] tona nima ʼo ina puke pea mo ʼui māʼana kiā te ia: ‘Tagata tui vaivai, koteā ʼaē neʼe ke lotolotolua ai?’ ” (Mat. 14:28-31) Kapau ʼe tou sio ki he aga ʼa he tehina ʼe hagē mai kiā tātou ʼe vaivai ia tana tui, ʼe feala koa, ʼi hona ʼaluʼaga fakatātā, ke tou faoʼi atu totatou nima pea mo tokoni ki ai ke ina toe maʼu he tui ʼe lahi age? ʼE mahino ia ʼe koʼenā lā ia te ako ʼaē ʼe tou lava tāʼofi mai te agamalū ʼaē neʼe fakahā e Sesu kiā Petelo.

6. Koteā ʼaē neʼe akoʼi age e Sesu ki tana ʼu ʼapositolo ʼo ʼuhiga mo te fia maʼu tuʼulaga?

⁶ Neʼe toe kau pē foki ia Petelo ʼi te fihi ʼaē neʼe fai hoholo ʼi te kau ʼapositolo, peʼe ko ai ʼaē ʼe lahi age iā nātou. Ko Sake pea mo Soane neʼe nā fia nonofo iā tafa ʼo Sesu ʼi tona Puleʼaga, ko te tahi ʼi tona faʼahi mataʼu pea ko te tahi ʼi tona faʼahi hema. ʼI te logo ʼa Petelo pea mo te tahi ʼu ʼapositolo ki te faʼahi ʼaia, neʼe natou ʼiʼita. Neʼe mahino kiā Sesu neʼe natou maʼu ia te taʼi manatu ʼaia ʼuhi ko te faʼahiga maʼuli ʼaē neʼe natou lalahi ake ai. ʼI tana pāuiʼi nātou ke natou ʼolo age kiā te ia, neʼe ina ʼui fēnei age: “ ʼE kotou ʼiloʼi ko te ʼu pule ʼo te ʼu puleʼaga ʼe natou pule fakahau kiā nātou pea ko te kau lalahi ʼe natou fai kiā nātou te pule mālohi. Kae mole fēia ʼi te lotolotoiga ʼo koutou; kae ko ʼaē ʼe loto ke liliu ʼo lahi iā koutou, ʼe tonu ia ke liliu ko takotou tagata faifekau, pea ko ʼaē ʼe loto ke ʼuluaki iā koutou ʼe tonu ia ke liliu ko takotou kaugana.” Pea neʼe talanoa leva Sesu ki tana faʼifaʼitaki ʼo ia totonu, ʼo ina ʼui fēnei: “Ohagē pē ko te Foha ʼo te tagata, neʼe mole haʼu ke tauhi ia ia, kae ke ina tauhi pea mo ina foaki tona nefesi moʼo totogi ʼaki ʼo te tokolahi.”—Mat. 20:20-28.

7. ʼE feafeaʼi kiā tātou takitokotahi hatatou lagolago ki te logotahi ʼi te kōkelekāsio?

⁷ Ko tatatou fakakaukauʼi ia te agamalū ʼa Sesu, ʼe lava tokoni mai kiā tātou ke ‘tou fai ia tatatou aga ohagē ko he tahi ʼe veliveli’ ʼi te lotolotoiga ʼo totatou ʼu tehina. (Luka 9:46-48) Kapau ʼe tou fakahā te aga ʼaia, pea ʼe tou lagolago ai ki te logotahi. Ko Sehova, ohagē ko he tamai ʼo he foʼi fāmili, ʼe loto ke “fakatahi ʼi te logotahi” ia tana ʼu fānau, ke natou faifaitahi. (Pes. 133:1) Neʼe faikole Sesu ki tana Tamai ke logotahi ia te kau Kilisitiano moʼoni fuli, “ke ʼiloʼi ai e te mālamanei neʼe ke fekauʼi mai au, pea neʼe ke ʼofa kiā nātou ohagē pē ko tau ʼofa ʼaē kiā te au.” (Soa. 17:23) Koia, ʼaki tatatou logotahi ʼe ʼiloʼi ai ko tātou ko te ʼu tisipulo ʼa Kilisito. Ke tou maʼu te logotahi ʼaia, ʼe tonu ke tou manatu ohagē ko Kilisito ʼo ʼuhiga mo te ʼu vaivaiʼaga ʼa niʼihi. Neʼe loto fakamolemole ia Sesu, pea neʼe ina akoʼi mai ʼe hoki feala anai ke fakamolemole mai tatatou ʼu hala mo kapau pē ʼe tou loto fakamolemole.—Lau ia Mateo 6:14, 15.

8. Koteā ʼaē ʼe feala ke tou ako mai te faʼifaʼitaki ʼa te ʼu kaugana ʼa te ʼAtua ʼaē kua natou fualoa ʼi te kōkelekāsio?

⁸ ʼE lahi ia te ʼu faʼahi ʼe tou lava ako mai hatatou faʼifaʼitakiʼi ia te tui ʼo nātou ʼaē kua fualoa ia tanatou faʼifaʼitakiʼi ia Kilisito. Ohagē ko Sesu, ko te ʼu kaugana ʼaia ʼa te ʼAtua neʼe natou lotomahino tuʼumaʼu pē ki te ʼu vaivaiʼaga ʼo ʼihi. Neʼe natou ʼiloʼi ai ko tanatou fakahā ia te manavaʼofa ʼaē neʼe maʼu e Kilisito, ʼe mole tokoni mai pē ke tou ‘kātakiʼi te ʼu vaivaiʼaga ʼo nātou ʼaē ʼe mole mālolohi,’ kae ko te kalitātē ʼaia ʼe toe lagolago aipē ki te logotahi ʼa te kōkelekāsio. Tahi ʼaē meʼa, ʼe ina fakalotomālohiʼi ai ia te kōkelekāsio kātoa ke natou fakahā ia te faʼahiga manatu ʼaē neʼe maʼu e Kilisito. ʼE natou loto ke toe maʼu e tonatou ʼu tehina ia te manatu ʼaia, ohagē pē ko te ʼapositolo ko Paulo ʼaē neʼe loto mo ia ke maʼu e te kau Kilisitiano ʼo Loma ia te manatu ʼaia, ʼi tana ʼui ʼaenī: “ ʼOfa pē ke tuku atu kiā koutou e te ʼAtua ʼaē ʼe ina foaki ia te faʼa kātaki pea mo te fakalotofīmālie, ke kotou femaʼuʼaki te faʼahiga manatu ʼaē neʼe maʼu e Kilisito Sesu, ke feala ʼaki he loto e tahi, ke kotou fakakolōlia ʼaki he gutu e tahi ia te ʼAtua pea mo Tamai ʼo totatou ʼAliki ko Sesu Kilisito.” (Loma 15:1, 5, 6) ʼEī, ko tatatou tauhi ʼi te logotahi ʼe fakavikiviki ai ia Sehova.

9. He koʼē ʼe ʼaoga kiā tātou ia te laumālie māʼoniʼoni moʼo muliʼi ia te faʼifaʼitaki ʼa Sesu?

⁹ Neʼe fakapipiki tahi e Sesu ia te “agavaivai” pea mo te agamalū, ʼaē ʼe kau ki te fua ʼo te laumālie māʼoniʼoni ʼo te ʼAtua. Koia, ʼo hilifaki ki tatatou ako ia te faʼifaʼitaki ʼa Sesu, ʼe ʼaoga kiā tātou ia te laumālie māʼoniʼoni ʼo Sehova, ke feala ai hatatou faʼifaʼitakiʼi lelei ia Sesu. ʼE tonu ke tou kole ia te laumālie māʼoniʼoni ʼo te ʼAtua pea mo tou faigaʼi ke tou maʼu ia tona fua, ʼaē ko “te ʼofa, te fiafia, te tokalelei, te kātaki fualoa, te agaʼofa, te agalelei, te tui, te agamalū, te loto lolomi.” (Kal. 5:22, 23) ʼI tatatou muliʼi ia te faʼifaʼitaki ʼo te agavaivai pea mo te agamalū ʼaē neʼe tuku mai e Sesu, ʼe tou fakafiafia ai anai ia tatatou Tamai ʼaē ʼe ʼi selō, ko Sehova.

Neʼe Agaʼofa Sesu Ki Te Hahaʼi

10. Neʼe fakahā feafeaʼi e Sesu ia te agaʼofa?

¹⁰ ʼE toe kau mo te agaʼofa ki te fua ʼaē ʼo te laumālie māʼoniʼoni. Neʼe agaʼofa tuʼumaʼu pē ia Sesu ki te hahaʼi. Ko nātou fuli ʼaē neʼe natou kumi fakamālotoloto ia Sesu neʼe natou sio ki tana “tali fakaleleiʼi [ʼaē] ia nātou.” (Lau ia Luka 9:11.) Koteā te ako ʼe tou lava tāʼofi mai te agaʼofa ʼa Sesu? Ko he tahi ʼe agaʼofa ʼe agalelei, mo agamalū, mo manavaʼofa pea mo fakaʼapaʼapa. Neʼe fēia ia te ʼulugaaga ʼo Sesu. Neʼe ʼofa mamahi ki te hahaʼi “he neʼe natou ʼāhua pea mo mavetevete, ohagē ko he faga ovi ʼe mole honatou tagata tauhi.”—Mat. 9:35, 36.

11, 12. (a) Kotou fakamatala ia he gāue manavaʼofa neʼe fai e Sesu ki he tahi. (b) Koteā te ako ʼe kotou lava tāʼofi mai te faʼifaʼitaki ʼaia?

¹¹ ʼI te ʼu gāue ʼaē neʼe fai e Sesu maʼa te hahaʼi, neʼe ina fakahā ai foki tona ʼofa mamahi pea mo tona manavaʼofa ʼaē kiā nātou. Tou vakaʼi age muʼa ia te faʼifaʼitaki ʼaenī. Ko te fafine, talu mai taʼu e 12, neʼe tau mo te mahaki, neʼe ʼalu te toto iā ia. Neʼe mahino ki te fafine ʼaia, ʼi te Lao ʼa Moisese ʼe heʼemaʼa ia ʼuhi ko tona mahaki pea ʼe feala pē ki he tahi ʼe fāfā age ki ai ke toe heʼemaʼa mo ia. (Lev. 15:25-27) Kae ko te ʼu logo lelei ʼaē neʼe ʼave haʼele ʼo ʼuhiga mo Sesu pea mo tana aga ʼaē ki te hahaʼi, neʼe lagi tupu ai ia te tui papau ʼa te fafine, ko Sesu ʼe ina maʼu ia te mālohi pea ʼe ina loto ke ina fakamālōlō ia ia. Neʼe ʼui fēnei e te fafine ʼi tona loto: “Kapau ʼe au fāfā ki tona kofu tuʼa, pea ʼe au toe lelei ai anai.” ʼAki he lototoʼa, neʼe ina fai ia te faʼahi ʼaia pea neʼe lelei atu aipē tona mahaki ʼi te moʼi temi pē ʼaia.

¹² Neʼe logoʼi e Sesu neʼe ʼi ai te tahi neʼe fāfā age kiā ia, pea neʼe ina kumi pe ko ai. Ko te fafine, ʼi tana lagi mataku ʼaē naʼa munaʼi ia ia he neʼe ina maumauʼi ia te Lao, neʼe tulolo ifo ki ʼona vaʼe ʼi tona mataku pea mo tetetete, ʼo ina vevete kātoa age ia te moʼoni. Neʼe munaʼi koa e Sesu ia te fafine fakaʼofaʼofa ʼaia pea mo lotomamahi? Kailoa ia! “ ʼOfafine, kua fakamālōlō koe e tau tui. ʼAlu ʼi te fīmālie.” (Mko. 5:25-34) ʼE mahino ia neʼe lotofīmālie ʼaupitō ia te fafine ʼi tana logo ʼaē ki te ʼu palalau agalelei ʼaia!

13. (a) Koteā ʼaē neʼe kehekehe ai ia te aga ʼa Sesu pea mo te aga ʼa te kau Faliseo? (b) Neʼe feafeaʼi ia te aga ʼaē ʼa Sesu ki te tamaliki?

¹³ ʼO mole hagē ko te kau Faliseo loto fefeka, neʼe mole ʼi ai he temi neʼe fakaʼaogaʼi ai e Sesu ia tana pule moʼo fakamāfasia ia te hahaʼi. (Mat. 23:4) Kae neʼe agaʼofa pea mo faʼa kātaki, ʼo akoʼi ki ʼihi ia te ʼu ala ʼo Sehova. Ko Sesu neʼe ko he kaumeʼa ʼofaina maʼa tana ʼu tisipulo, neʼe ʼofa pea mo agaʼofa tuʼumaʼu, neʼe ko he kaumeʼa moʼoni. (Taag. 17:17; Soa. 15:11-15) Māʼia mo te tamaliki liliki neʼe mole natou mātataku ʼi te nonofo mo Sesu, pea ʼe mahino ia neʼe fia nofo Sesu mo nātou. Logolā ia tona maʼumaʼua kae neʼe maʼu pē ia tona temi ke nofo ai mo nātou liliki. ʼI te tahi lakaga, ko tana ʼu tisipulo, ʼaē neʼe kei natou maʼu ia te manatu fia maʼuhiga ohagē pē ko te kau takitaki lotu ʼo tonatou ʼu tafa, neʼe natou faiga ke natou tāʼofi ia te hahaʼi ʼaē neʼe natou ʼaumai ia tanatou ʼu tamaliki kiā Sesu, ke fāfā kiā nātou. Neʼe mole leleiʼia e Sesu ia te aga ʼaia neʼe fai e tana ʼu tisipulo. Neʼe ina ʼui fēnei age kiā nātou: “Kotou tukunoaʼi te ʼu kiʼi tamaliki ke ʼomai kiā te au; pea ʼaua naʼa kotou faigaʼi ke kotou tāʼofi ia nātou, heʼe ko te puleʼaga ʼo te ʼAtua ʼe ʼa nātou ʼaē ʼe tatau mo nātou.” Pea moʼo fakahā ia te ako maʼuhiga ki tana ʼu tisipulo, neʼe ina toʼo ia te faʼifaʼitakiʼi ʼa te tamaliki liliki, ʼo ina ʼui fēnei age: “ ʼE au tala moʼoni atu kiā koutou, ko ʼaē ʼe mole ina tali te puleʼaga ʼo te ʼAtua ohagē ko he kiʼi tamasiʼi, ʼe mole hū anai ia kiai.”—Mko. 10:13-15.

14. Koteā te ʼu fua lelei ʼe maʼu e te tamaliki liliki mai he tokaga ʼofa kiā nātou?

¹⁴ Kotou fakakaukauʼi age muʼa peʼe feafeaʼi anai ia te ʼu tamaliki ʼaia hili ni ʼu taʼu kiai, ʼi tanatou kua lalahi leva, mokā natou toe manatuʼi te haga ʼaē ʼa Sesu Kilisito ʼo ‘toʼo nātou ʼi ʼona nima pea mo ina tapuakina nātou.’ (Mko. 10:16) Mo te ʼu tamaliki pē lā ʼo te temi ʼaenī, ʼe natou toe manatuʼi anai ia te tokaga ʼofa ʼaē neʼe fakahā age kiā nātou e te kau tagata ʼāfea pea mo ʼihi. Ko te meʼa ʼaē ʼe maʼuhiga age, talu mai tanatou kei liliki, ʼe akoʼi e te ʼu tamaliki ʼaē neʼe natou maʼu ia te taʼi tokaga ʼofa ʼaia ʼi te kōkelekāsio, ko te laumālie ʼo Sehova ʼe nofo mo tana hahaʼi.

Tou Agaʼofa ʼi He Mālama ʼe Mole Agaʼofa

15. He koʼē ʼe mole tonu ke tou punamaʼuli ʼi te mole agaʼofa ʼa te hahaʼi iā ʼaho nei?

¹⁵ Tokolahi te hahaʼi iā ʼaho nei ʼi te lahi fau ʼo tonatou ʼu maʼumaʼua ʼe mole kei natou fakahā ia te agaʼofa ki te hahaʼi. Koia, ʼi te ʼaho fuli, ʼi te faleako, ʼi te fale gāue, mokā natou fai folau, ʼi te minisitelio, ʼe felāveʼi te ʼu kaugana ʼa Sehova mo te manatu ʼo te mālamanei. ʼE feala ke tou lotomamahi ʼi te mole agaʼofa ʼa te hahaʼi, kae ʼe mole tonu ke tou punamaʼuli. Neʼe takitaki e Sehova ia Paulo ke ina fakatokaga mai ʼi “te ʼu ʼaho fakamuli” mo faigataʼa ʼaenī, ʼe felāveʼi anai ia te kau Kilisitiano moʼoni mo te hahaʼi ʼe “kaumeʼa pē anai mo nātou totonu, . . . heʼeʼofa.”—2 Tim. 3:1-3.

16. ʼE feafeaʼi hatatou fakatuputupu ʼi te kōkelekāsio ia te agaʼofa ʼaē neʼe maʼu e Kilisito?

¹⁶ Kae ʼi te ʼu kōkelekāsio Fakakilisitiano moʼoni ʼe maʼu ai e te hahaʼi ia te fīmālie ʼaē ʼe mole maʼu ʼi te mālama heʼeʼofa ʼaenī. Kā tou faʼifaʼitakiʼi ia Sesu, pea ko tātou fuli ʼe tou lava lagolago ki te maʼu ʼaē ʼo te ʼaluʼaga fīmālie ʼaia ʼi te kōkelekāsio. Koteā ʼaē ʼe tou lava fai? ʼUluaki, tokolahi ʼi te kōkelekāsio ʼe ʼaoga kiā nātou tatatou tokoni pea mo tou fakalotomālohiʼi nātou heʼe natou tau mo he mahaki peʼe ko he ʼu faigataʼaʼia. ʼI “te ʼu ʼaho fakamuli” ʼaenī, ʼe feala ke tuputupu ia te ʼu ʼaluʼaga ʼaia, kae ʼe mole ko he ʼu ʼaluʼaga foʼou. ʼI te temi muʼa, neʼe tauʼi e te kau Kilisitiano ia te ʼu faigataʼaʼia ʼaia. Koia, ko te ʼu gāue ʼaē ʼe tou fai moʼo tokoni kiā nātou ʼe ʼaoga ohagē ko tona ʼaoga ki te kau Kilisitiano ʼaē neʼe māʼuʼuli ʼi te temi ʼaia. Ohagē lā ko Paulo, neʼe ina fakalotomālohiʼi ia te kau Kilisitiano ke natou “palalau fakafīmālie ki te kau nefesi lotovaivai, mo . . . lagolago kiā nātou ʼe vaivavai, pea mo . . . kātaki fualoa ki te hahaʼi fuapē.” (1 Tes. 5:14) Ko tona fakaʼuhiga ke tou fai he ʼu gāue moʼo fakahā ia te agaʼofa ʼaē neʼe maʼu e Kilisito.

17, 18. ʼE tou lava faʼifaʼitakiʼi feafeaʼi ia te agaʼofa ʼa Sesu?

¹⁷ ʼE ko te maʼua ʼo te kau Kilisitiano ke natou ‘tali te ʼu tehina ʼaki he agaʼofa,’ ke natou gaohi fakalelei ia nātou ʼaia ohagē ko Sesu, ʼo fakahā ia he loto tokaga moʼoni kiā nātou ʼaē kua tou feʼiloʼiʼaki mo nātou talu mai fualoa pea mo nātou ʼaē ʼe mole tou ʼiloʼi. (3 Soa. 5-8) Ohagē ko Sesu ʼaē neʼe ko ia ʼuluaki ʼaē neʼe manavaʼofa ki te hahaʼi, ʼe tonu mo tātou ke tou fakalotomālohiʼi tuʼumaʼu ʼihi.—Isa. 32:2; Mat. 11:28-30.

¹⁸ Ko tātou takitokotahi ʼe tou lava fakahā ia te agaʼofa ki niʼihi ʼaki hatatou tōkakaga kiā nātou pea mo lotomahino ki ʼonatou fihifihia. Tou kumi ia te ʼu faigamālie ʼaē ke tou tokoni ai kiā nātou. ʼE tonu ke tou faiga mālohi ʼo fai ia te faʼahi ʼaia! Neʼe uga fēnei e Paulo: “ ʼI te ʼofa fakatautēhina, ke kotou feʼofamamahiʼaki.” Pea neʼe ina toe ʼui fēnei: “Ke kotou ʼuluaki tuʼumaʼu ʼi te fefakamaʼuhigaʼaki.” (Loma 12:10) Ko tona fakaʼuhiga ke tou muliʼi ia te faʼifaʼitaki ʼo Kilisito, ʼo tou ʼoʼofa pea mo agaʼofa ki te hahaʼi, ʼo tou ako ke tou fakahā ia “te ʼofa ʼaē ʼe mole mālualoi.” (2 Ko. 6:6) Neʼe fakamatala fēnei e Paulo ia te taʼi ʼofa ʼaē neʼe maʼu e Kilisito: “Ko te ʼofa ʼe kātaki fualoa pea mo agaʼofa. Ko te ʼofa ʼe mole maheka, ʼe mole laupisi, ʼe mole fialahi.” (1 Ko. 13:4) ʼE mole tou lotokovi anai ki totatou ʼu tehina mo tuagaʼane, kae tou manatuʼi ia te tokoni ʼaenī: “Ke kotou liliu ʼo feagaleleiʼaki, fonu ʼi te manavaʼofa, ʼo kotou fefakamolemoleʼaki, ohagē ko te fakamolemole ʼa te ʼAtua kiā koutou ʼaki ia Kilisito.”—Efe. 4:32.

19. Koteā ia te ʼu fua lelei ʼe tou maʼu mokā tou fakahā ia te agaʼofa ʼaē neʼe maʼu e Kilisito?

¹⁹ ʼE tou maʼu he ʼu tapuakina lahi ʼi tatatou kumi ke tou maʼu pea mo fakahā ia te agaʼofa ʼaē neʼe maʼu e Kilisito ʼi te temi fuli pē pea ʼi te ʼu ʼaluʼaga fuli pē. Ko te laumālie ʼo Sehova ʼe feala anai ke gāue lahi ʼi te kōkelekāsio, ʼo tokoni kiā nātou fuli ʼaē ʼi ai ke natou fakatuputupu ia te ʼu kalitātē ʼo te fua ʼo te laumālie māʼoniʼoni. Tahi ʼaē meʼa, kā tou muliʼi ia te faʼifaʼitaki ʼa Sesu pea mo tokoni ki te hahaʼi ke natou muliʼi mo nātou ia tana faʼifaʼitaki, ko tatatou tauhi fakafiafia ʼi te logotahi, ʼe fakafiafia ai anai ia te ʼAtua. Koia, tou faiga tuʼumaʼu ke tou fakahā ʼi tatatou ʼu felōgoi ʼaē mo te hahaʼi ia te agamalū pea mo te agaʼofa ʼaē neʼe maʼu e Sesu.

ʼE Feala Koa Hakotou Fakamahino?

• Neʼe fakahā feafeaʼi e Sesu neʼe “agamalū pea mo agavaivai”?

• Neʼe fakahā feafeaʼi e Sesu ia te agaʼofa?

• ʼE feafeaʼi hatatou lava fakahā ia te agamalū pea mo te agaʼofa ʼaē neʼe maʼu e Kilisito, ʼi te mālama heʼe haohaoa ʼaenī?

[Paki ʼo te pasina 10]

Kā tou fakatokagaʼi ʼi he tehina ʼe vaivai ia tana tui, ohagē ko Petelo, pea ʼe tou tokoni anai koa ki ai?

[Paki ʼo te pasina 12]

Koteā ʼaē ʼe kotou lava fai ke liliu ai ia te kōkelekāsio ko he ʼaluʼaga ʼe maʼu ai ia te agaʼofa?