Koteā ʼAē ʼe Tou Ako Mai Iā Sesu?

ʼO ʼUhiga Mo Te Maʼuli Fakafāmili

Koteā te manatu ʼo ʼuhiga mo te nofo ʼohoana ʼe tupu ai ia te maʼuli fiafia ʼa te ʼu fāmili?

Ko te nofo ʼohoana ʼe ko he noʼo ʼe taputapu. ʼI te fehuʼi age ʼaē kiā Sesu peʼe fakagafua ia te māvete, neʼe ina ʼui fēnei: “Neʼe mole heʼeki kotou lau ko ia ʼaē neʼe ina fakatupu ia nāua, ʼi [te] kamataʼaga neʼe ina fakatupu ia nāua ʼe tagata pea mo fafine, pea neʼe ina ʼui fēnei: ‘Koia ko te tagata ʼe mavae anai mai tana tamai pea mo tana faʼē pea ʼe pipiki anai ki tona ʼohoana, pea ʼe nā liliu anai ko te kakano pē e tahi’? ʼO mole kei nā toko lua ai, kae ko te kakano pē e tahi. Koia, ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata! . . . Ko ʼaē ʼe māvete mo tona ʼohoana, gata pē mokā ʼe tupu mai he folonikāsio, pea toe ʼohoana ia mo he tahi fafine, ʼe tono ia.” (Mateo 19:4-6, 9) Kā mulimuli he taumātuʼa ki te tokoni ʼa Sesu pea mo nā fenofoagatonuʼaki, ʼe logoʼi e te kiʼi fāmili kātoa he fīmālie pea mo loto fiafia.

He koʼē ko te ʼofa ʼaē ki te ʼAtua ʼe tupu ai ia te maʼuli fiafia ʼa te ʼu fāmili?

Neʼe ʼui fēnei e Sesu: “ ‘ ʼE tonu ke ke ʼofa kiā Sehova, tou ʼAtua, ʼaki tou loto kātoa, pea mo tou nefesi kātoa, pea mo tou laumālie kātoa.’ Koʼenā te folafola ʼaē ʼe lahi tokotahi pea mo ʼuluaki.” Koteā ia te lua folafola ʼaē ʼe lahi tokotahi? Neʼe ʼui fēnei e Sesu: “ ʼE tonu ke ke ʼofa ki tou kāiga [te hahaʼi ʼaē ʼe māʼuʼuli mo koutou, tokotou fāmili totonu] ohagē pē kiā koe totonu.” (Mateo 22:37-39) Ko te maʼu ʼo he felōgoi lelei pea mo te ʼAtua ʼe ko te kalavī ʼaia ki te maʼuli fiafia ʼo he kiʼi fāmili ʼuhi ʼaē ko te ʼofa ʼaē kiā te ia ʼe ina uga tātou ke tou feʼofaʼofani.

ʼE lava fakafiafia feafeaʼi e te tagata tona ʼohoana pea mo te fafine ia tona ʼohoana?

ʼE fakafiafia e te ʼu tagata tonatou ʼohoana mokā natou mulimuli ki te faʼifaʼitaki ʼa Sesu. Neʼe fakahā e Sesu he maʼuli fakasākilifisio ʼi tona ʼofa ʼaē ki tona ʼohoana fakatā, ia te kōkelekāsio. (Efesi 5:25) Neʼe ʼui fēnei e Sesu: “Ko te Foha ʼo te tagata, neʼe mole haʼu ke tauhi ia ia, kae ke ina tauhi.” (Mateo 20:28) Neʼe mole mālohi peʼe aga fefeka ia te takitaki ʼa Sesu ki tana kau tisipulo ʼaē neʼe tonu ke tokaga kiā nātou, kae neʼe ina fakalotofīmālieʼi nātou. (Mateo 11:28) Koia, ʼe tonu anai ki te ʼu tagata ʼohoana ke natou fakahoko tonatou ʼuhiga pule ʼaki he agamalū ke fua lelei ki te kiʼi fāmili kātoa.

ʼE feala ke toe fua lelei ki te ʼu fafine ʼohoana ia te faʼifaʼitaki ʼa Sesu. Neʼe ʼui fēnei ʼi te Tohi-Tapu: “Ko te pule ʼo Kilisito, ko te ʼAtua.” Pea ʼe toe ʼui fēnei mai: “Ko te pule ʼo te fafine, ko te tagata.” (1 Kolonito 11:3) Neʼe mole fakaʼuhiga leva e Sesu ko hona fakatō ki lalo ia tana fakalogo ʼaē ki te ʼAtua. Neʼe ina maʼu he aga fakaʼapaʼapa lahi ki tana Tamai. Neʼe ʼui fēnei e Sesu: “[ʼE] au fai tuʼumaʼu te ʼu meʼa ʼaē ʼe ina leleiʼia.” (Soane 8:29) Ko he fafine ʼohoana ʼe fakalogo ki te ʼuhiga pule ʼo tona ʼohoana ʼaki te ʼofa pea mo te aga fakaʼapaʼapa ki te ʼAtua, ʼe tokoni lahi ai ki te maʼuli fiafia ʼo tona kiʼi fāmili.

Koteā ʼaē ʼe lava ako e te ʼu mātuʼa mai te manatu ʼa Sesu ʼo ʼuhiga mo te ʼu fānau?

Ko Sesu neʼe ina fakaʼaogaʼi he temi ke fakatahi ai mo te ʼu kiʼi tamaliki pea neʼe ina tokagaʼi tanatou ʼu manatu pea mo te ʼu meʼa ʼaē neʼe natou loto kiai. ʼE ʼui fēnei ʼi te Tohi-Tapu: “Neʼe pāuiʼi e Sesu te ʼu kihiʼi [tamaliki] kiā te ia, ʼo ʼui māʼana: ‘Kotou tukunoaʼi te ʼu kiʼi tamaliki ke ʼomai kiā te au.’ ” (Luka 18:15, 16) ʼI te tahi lakaga, neʼe fatufatuʼi e te hahaʼi ʼihi tamaliki tagata he neʼe natou palalau ʼo ʼuhiga mo tanatou tui ʼaē kiā Sesu. Kae neʼe vikiʼi e Sesu te kau tūpulaga ʼaia, ʼo ina ʼui fēnei kiā nātou ʼaē neʼe natou valoki: “Neʼe mole heʼeki kotou lau koa lā te meʼa ʼaenī: ‘Mai te gutu ʼo te kihiʼi tamaliki pea mo nātou ʼaē ʼe kei huhu, neʼe ke foaki ia te fakavikiviki’?”—Mateo 21:15, 16.

Koteā ʼaē ʼe lava ako e te ʼu fānau mai iā Sesu?

Neʼe foaki e Sesu he faʼifaʼitaki lelei ki te ʼu fānau ʼi te faʼahi fakalaumālie. ʼI tana taʼu 12, neʼe maʼu atu ia ia “ ʼi te fale lotu, ʼe heka ʼi te lotolotoiga ʼo te kau tagata faiako ʼo fagono kiā nātou pea mo faifehuʼi kiā nātou.” Neʼe koteā tona fua? “Neʼe ōfo ia nātou fuli ʼaē neʼe natou fagono kiā te ia ʼi tona poto pea mo tana ʼu tali.” (Luka 2:42, 46, 47) Tahi ʼaē ko Sesu, ʼi tana maʼu ia te ʼatamai mālama neʼe mole fiatuʼu. Kae neʼe fakaʼapaʼapa ki tana ʼu mātuʼa. ʼE ʼui fēnei ʼi te Tohi-Tapu: “Neʼe fakalogo ia kiā nāua.”—Luka 2:51.

Kapau ʼe kotou fia maʼu he tahi ʼu fakamahino, vakaʼi ʼi te kāpite 14 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu?a

[Nota]