ʼE Fia ʼIloʼi e Te Kau Lautohi . . .
Neʼe ʼi Ai Koa He Kamataʼaga ʼo Te ʼAtua?
▪ ʼE ʼui ʼi te Tohi-Tapu ko te ʼAtua ʼe mole hona kamataʼaga. Neʼe maʼuli tuʼumaʼu pē ia te ʼAtua. ʼE faigataʼa ia te mahino ʼaē ko te ʼAtua ʼe heʼegata. Kae mole tou fakafisi anai ki te manatu ʼaia ʼuhi pē heʼe mole tou mahino kātoa kiai.
ʼE fakapotopoto koa hatatou ʼamanaki ʼe tou mahino anai ki te ʼu ala fuli ʼo te ʼAtua? Neʼe ʼui fēnei e te ʼapositolo ko Paulo: “Siʼi loloto ʼo te koloaʼia pea mo te poto pea mo te ʼatamai mālama ʼo te ʼAtua! Ko ʼana fakamāu ʼe mole feala hona sivisivi pea mole feala ke maʼu tona ʼu ala!” (Loma 11:33) Ko totatou ʼatamai ʼe mole feala hana mahino kātoa ki te loloto ʼo te poto pea mo te ʼatamai mālama ʼo te ʼAtua ohagē pē ko he tamasiʼi ʼe mole feala hana mahino ki te ʼu agaaga fuli ʼo tana ʼu matuʼa. Ko te ʼu palalau ʼaia ʼa Paulo, ʼaē ʼe fakaʼuhiga tāfito ki te poto pea mo te manavaʼofa ʼo te ʼAtua, ʼe hā ʼaki mai ai ʼe ʼi ai te ʼu faʼahi ʼo ʼuhiga mo Sehova ʼAtua pea mo tana ʼu gāue ʼe loloto ʼaupitō ke mahino kiai totatou ʼatamai. Ko te manatu ʼaē ko te ʼAtua ʼe mole hona kamataʼaga ʼe kau ki te ʼu manatu loloto ʼaia. Kae ʼe feala ke tou falala kātoa ki te ako ʼaē ʼe haʼu mai te Tohi-Tapu ʼo ʼuhiga mo te ʼAtua. Neʼe ʼui fēnei e Sesu Kilisito ʼo ʼuhiga mo te ʼu tohi taputapu: “Ko tau folafola ʼe moʼoni.”—Soane 17:17.
Neʼe ʼui fēnei e Moisese ʼi tana faikole kiā Sehova: “Neʼe ke tuʼumaʼu pē pea mo tuʼumaʼu anai.” (Pesalemo 90:2, Osty) ʼE fakahā ʼi te vaega ʼaenī e Moisese, ia te maʼuli moʼoni ʼa te ʼAtua ʼi te ʼu ʼaluʼaga e lua. ʼUluaki ʼo ʼuhiga mo te kā haʼu. Ko Sehova ia “Ia ʼaē ʼe maʼuli ʼo talu ai.” (Fakahā 4:10) Koia, ko te maʼuli moʼoni ʼo te ʼAtua ʼe fakaʼuhiga ki te kā haʼu heʼegata pea mo te temi ʼaē kua ʼosi. ʼI tona fakahagatonu, neʼe mole fakatupu ia te ʼAtua pea neʼe mole ʼi ai hona kamataʼaga. Kae ko te ʼAtua neʼe maʼuli ia talu mai fualoa.
Ko he ʼu manatu ʼe faigataʼa ke tou mahino kiai. Kae ʼi ʼihi temi ʼe tonu pē ke tou tali ia te ʼu manatu ʼe faigataʼa hatatou mahino kiai. Ohagē ko te lau ʼo te ʼu nūmelo ʼe mole i ai hona gataʼaga. ʼE mole feala koa lā ʼaki te faʼifaʼitaki ʼaenī ke tou fakapipiki ki te ʼu taʼu maʼuli ʼo te Tupuʼaga?
ʼE tāu pea mo feʼauga ke maʼu e te ʼAtua tokotahi pē ia te tuʼulaga ʼaē ko te “Hau ʼo te heʼegata.” (1 Timoteo 1:17) Kotou fakakaukauʼi age muʼa: Ko Sesu Kilisito mo te ʼu lauʼi miliate kau ʼāselo ʼi selō pea mo te mālama nei, ko nātou fuli ʼaia neʼe i ai tonatou kamataʼaga he neʼe fakatupu nātou. (Kolose 1:15, 16) Kae ki te ʼAtua ia, kailoa. Ko te faiga ʼaē ke tui te hahaʼi neʼe lagi ʼi ai he kamata ʼo te ʼAtua, ʼe fakatupu ʼaki ai te manatu hala pea mo vale ʼaē, peʼe ko ai ʼaē neʼe ina fakatupu te Tupuʼaga. Kae gata pē kiā Sehova tokotahi ʼe maʼuli ‘talu mai he ʼu temi ʼe mole ʼiloʼi hona gataʼaga.’ (Pesalemo 90:2) ʼI tona fakahagatonu, neʼe maʼuli ia Sehova, ‘ ʼi te ʼu temi heʼegata kātoa.’—Suta 25.
Pea ʼaua naʼa galo iā koutou, ko te akonaki ʼo ʼuhiga mo te heʼegata ʼo te maʼuli ʼo te ʼAtua, ʼe ko he faʼahi ʼe moʼoni. Ko he vakaʼi fakaloloto ia te faikole ʼaē ʼa Moisese, ʼe tou mahino ai ko te heʼegata ʼo te ʼAtua ʼe ina fakamoʼoni mai kiā tātou ia te fakapapau ʼofa ʼo he maʼuli heʼegata maʼa tātou. ʼO kehekehe ia mo tātou ʼaē ʼe nounou totatou temi maʼuli, ʼe fakahā mai ʼe hagē te ʼAtua “ko he nofoʼaga moʼoni maʼa tātou lolotoga he ʼu taʼiake ki he ʼu taʼiake.” Ohagē ko he Tamai ʼofa, ko Sehova neʼe tokoni ki tana hahaʼi ʼi te temi muʼa, mo te temi nei pea mo nofo tuʼumaʼu aipē mo nātou ʼi te kā haʼu. ʼOfa pē ke fakafīmālieʼi koutou ʼaki te moʼoni taulekaleka ʼaia!—Pesalemo 90:1.