Ko ai ʼae neʼe ina fakatupu te ʼAtua?

Kotou fakakaukauʼi te tamai ʼe palalau ki tona foha ʼe taʼu 7. ʼE ina ui fenei: “Neʼe fakatupu e te ʼAtua ia te kele, pea mo meʼa fuli ʼe maʼu ai. Neʼe ina fakatupu te laʼa, mo te mahina pea mo te ʼu fetuʼu.” ʼE fakakaukau ia te fanau pea ina fai ia te fehuʼi ʼaeni: “Papa, ko ai ʼae neʼe ina fakatupu ia te ʼAtua?”

ʼE tali fenei te tamai: “Neʼe mole he tahi neʼe ina fakatupu ia te ʼAtua. Neʼe maʼuli tuʼumaʼu pe ia.” ʼE manatu tahi ia te fanau pea mo te fakamahino ʼaia. Kaʼe ʼi tana lahilahi ake, ʼe hoko atu pe ia tana fai ia te fehuʼi ʼaia. Kia ia, ʼe faigataʼa tana mahino ʼe ʼi ai he tahi neʼe mole hona kamataʼaga. Kotea tona tupuʼaga? Koteʼuhi, maʼia pe la mo te ʼatulaulau, ʼe ʼi ai tona kamataʼaga. ʼE ina feʼuiʼaki fenei: “ʼE haʼu maifea te ʼAtua?”

Kotea te tali ʼe tou maʼu ʼi te Tohi-Tapu? ʼE ina fakaha ia te manatu ʼae neʼe talanoa ki ai te tamai ʼi te faʼifaʼitaki. Neʼe tohi fenei e Moisese: “E Sehova, . . . ʼI muʼa ʼo te tupu ʼo te ʼu moʼuga, peʼe ohage ko tau fanauʼi ʼi te mamahi ia te kele pea mo te kele maʼuli, ʼio ʼe ke ʼAtua talu mai te ʼu temi ʼe mole iloʼi hona gataʼaga ʼo aʼu ki he ʼu temi ʼe mole iloʼi hona gataʼaga.” (Pesalemo 90:1, 2, MN) Koia, neʼe ui fenei e te polofeta ko Esaia: “Neʼe mole ke iloʼi pea mo logoʼi koa la koe? Ko Sehova te Tupuʼaga ʼo te ʼu potu taupotu ʼo te kele, ʼe ko he ʼAtua ʼo aʼu ki he ʼu temi ʼe mole iloʼi hona gataʼaga.” (Esaia 40:28, MN) ʼO toe feia aipe, ʼe toe ui ʼi te tohi ʼo Suta, ʼe maʼuli ia te ʼAtua mai ‘te ʼu temi heʼe gata ʼae kua fakalaka.ʼ—Suta 25.

ʼE fakaha mai ʼi te ʼu vaega ʼaeni, ko te ʼAtua ʼe ko te “Hau ʼo te heʼe gata,” ohage ko tona fakaha e te apositolo ko Paulo. (1 Timoteo 1:17, MN) Ko tona fakaʼuhiga neʼe maʼuli tuʼumaʼu pe ia te ʼAtua. Pea ʼe ina hoko atu pe anai ia tana maʼuli ʼi te ka haʼu. (Apokalipisi 1:8) Koia, ko tana maʼuli ʼo heʼe gata ʼe fakamoʼoni ai ki tona ʼuhiga Mafimafi.

He ko ʼe ʼe faigataʼa tatatou mahino ki te manatu ʼaia? Koteʼuhi ʼi te nounou ʼo totatou temi maʼuli, ʼe mole tatau tatatou faʼahiga fakafuafua ia te temi pea mo Sehova. ʼE heʼe gata ia te ʼAtua. Ko te tupuʼaga la ʼaia, kia ia, ko taʼu ʼe afe, ʼe ko he ʼaho pe ʼe tahi. (2 Petelo 3:8) Tou toʼo he faʼifaʼitaki: ʼE maʼuli ia te foʼi heʼe lolotoga ʼaho ʼe 50. ʼE feala koa ke ina fakafuafua ia totatou temi maʼuli ʼae ʼe lau pe ki te taʼu 70 peʼe 80? Kailoa ia. Kaʼe ʼi te Tohi-Tapu, ʼe fakatatau tatou ki te ʼu heʼe ia muʼa ʼo totatou Tupuʼaga Lahi. Maʼia mo ʼotatou fealagia fakakaukau ʼe fakatuʼakoi age ʼi te Tupuʼaga. (Esaia 40:22; 55:8, 9) Ko te tupuʼaga la ʼaia, ʼe ʼi ai te ʼu faʼahi ʼo te natula ʼo Sehova ʼe mole feala ke mahino ki ai te tagata.

Logo la ʼe faigataʼa tatatou mahino ʼe heʼe gata ia te ʼAtua, kaʼe ʼe feala ke tou fakamoʼoni ki te faʼahi ʼaia. Kapau neʼe fakatupu e he tahi ia te ʼAtua, ʼe mahino ia, ko ia te Tupuʼaga. Kaʼe ʼe fakamahino ʼi te Tohi-Tapu, neʼe ko Sehova ʼae neʼe ina “fakatupu te u mea fuli.” (Apokalipisi 4:11) Pea tahi, ʼe tou iloʼi ʼe ʼi ai te kamataʼaga ʼo te ʼatulaulau. (Senesi 1:1, 2) ʼE haʼu maifea te ʼatulaulau? Neʼe fakatupu e te ʼAtua ia te ʼatulaulau. Neʼe kua maʼuli ʼi muʼa ʼo te fakatupu ʼo te ʼu meʼa maʼuli ʼi te lagi, ohage ko tona Alo ʼulutokotahi pea mo te kau ʼaselo. (Sopo 38:4, 7; Kolose 1:15) ʼE mahino ia, neʼe maʼuli tokotahi ki muʼa atu. Neʼe mole feala ke fakatupu ia ia, koteʼuhi neʼe mole he meʼa maʼuli ʼi muʼa atu.

Ko totatou maʼuli pea mo te ʼatulaulau katoa ʼe natou fakamoʼoni ʼe ʼi ai te ʼAtua heʼe gata. ʼE ko Ia ʼae neʼe ina fakatupu te ʼatulaulau, pea neʼe ina fakatuʼutuʼu te ʼu lao ʼo ʼuhiga mo tana fakatupu, pea neʼe maʼuli tuʼumaʼu pe ia. Neʼe ina foaki ia te maʼuli ki te ʼu meʼa maʼuli fuli.—Sopo 33:4.