ʼE Tokaga Totatou Tupuʼaga Lahi Kia Tatou!
1 ʼI tana faiga ʼaē ke fakakaukau ia Iselaele ʼaē neʼe talagataʼa, neʼe fehuʼi fēnei e Sehova: “Neʼe mole ke ʼiloʼi koa la koe pe neʼe mole ke logo koa la koe? Ko Sehova te Tupuʼaga ʼo te ʼu potu taupotu ʼo te kele, ʼe ko he ʼAtua ʼo aʼu ki he ʼu temi ʼe mole ʼiloʼi honatou gataʼaga.” (Isaia 40:28) ʼE tou ʼiloʼi totatou Tupuʼaga Lahi, ʼe tou sio ki tana tokaga kia tatou. Kae ko te lauʼi miliona hahaʼi ʼe nātou lotolotolua ki tona maʼuli moʼoni, peʼe mole tatau tanatou mahino kia te ia mo te meʼa ʼaē ʼe tuʼu ʼi te Tohi-Tapu. ʼE lava feafeaʼi hatatou tokoni kia nātou?
2 Neʼe fai te tohi foʼou Y a-t-il un Dieu qui se soucie de vous ? moʼo tokoni ki te ʼu hahaʼi ʼaia. ʼE fakaafe ai te hahaʼi ke nātou fakakaukauʼi te ʼu meʼa ʼaē kua hoko. Ko te ʼu manatu mo te ʼu fakamoʼoni ʼaē ʼe tuʼu ʼi te tohi ʼaia ʼe ina uga anai nātou ke nātou fia lau.
3 Koutou ʼIloʼi Lelei Te Tohi Créateur: Koutou manatuʼi he puani tāfito ʼo te ʼu meʼa ʼaē ʼe tuʼu ʼi te tohi ʼaia. ʼO kamata mai te kapite 2 ki te 5 ʼe vakaʼi ai pe neʼe fakatupu feafeaʼi te ʼatulaulau, mo te maʼuli, pea mo te tagata pea ko ai ʼaē neʼe ina fakatupu te ʼu meʼa ʼaia. Ko te ʼu kapite 6 ki te 9 ʼe vakavakaʼi ai te Tohi-Tapu pea mo Ia ʼaē neʼe ina tohi, pea tāfito, ʼe vakaʼi ai peʼe feala koa ke tou falala ki te fakamatala ʼo te tohi ʼo Senesi. ʼI te kapite 10 ʼe tali fakalelei ai ki te fehuʼi faigataʼa ʼaenī ʼaē ʼe fai e te tagata: “Kapau ʼe tokaga moʼoni te Tupuʼaga kia tatou, pea he koʼe ʼe lahi ʼaupito te ʼu mamahi?”
4 Koutou Faiga Ke Mahino Te Hahaʼi ʼAē ʼe Lotolotolua: ʼI te ʼu pasina 78 ki te 79 ʼo te tohi Créateur, ʼe fakahā ai te manatu ʼe feala ke koutou fakaʼaogaʼi moʼo tokoni ki te hahaʼi ke nātou maʼu te manatu ʼaē ʼe lelei ʼo ʼuhiga mo te ʼAtua. Koutou fehuʼi age kia nātou: “Neʼe ʼi ai koa he kamataʼaga ʼo te ʼatulaulau?” Tokolahi ʼe nātou ʼio anai kiai. Kapau koia, pea ʼe feala ke koutou fehuʼi age fēnei: “Neʼe fakatupu koa te kamataʼaga ʼaia peʼe kailoa?” Tokolahi ʼe nātou ʼui anai neʼe fakatupu. Pea koutou fai ai leva te fehuʼi fakaʼosi ʼaenī: “Ko te kamataʼaga ʼo te ʼatulaulau neʼe fakatupu koa e he meʼa ʼe heʼegata peʼe ko he Tahi ʼe heʼegata?” Ko te ʼu taʼi fehuʼi ʼaia ʼe feala ke mahino ai ki te tokolahi ʼe ʼi ai te Tupuʼaga.
5 ʼE ʼaoga anai te tohi Créateur ki te tokolahi. Koutou foaki ki ʼokotou ʼu kāiga, mo tokotou ʼu kaugā gāue, mo tokotou ʼu kaugā ako, peʼe ko ʼihi ʼi tokotou ʼu feʼilo. Koutou ʼave mo koutou te tohi ʼaia ʼi te minisitelio ke feala hakotou tufa kia nātou ʼaē ʼe lotolotolua ʼo ʼuhiga mo te maʼuli moʼoni ʼa te ʼAtua. Kapau ʼe tou ʼiloʼi lelei te tohi ʼaia, pea ʼe mālohi anai totatou ʼofa ki totatou Tupuʼaga, ʼo ina uga ai tatou ke hoko atu tatatou mulimuli ki tana ʼu lekula māʼoluga.—Efesi 5:1; Fkhā. 4:11.