‘ ʼE Tuputupu Hakita Fia ʼIloʼi ʼi Tokita Loto Pea Mo Tokita ʼAtamai’

“ ʼE mole he kupu moʼo fakamatala atu te lahi ʼo toku fiafia ʼi taku lau te tohi Y a-t-il un Créateur qui se soucie de vous ? Ka kita lau te tohi ʼaia, pea ʼe toe ʼāsili ai hakita fia ʼiloʼi he tahi ʼu meʼa. Mālo takotou tokoni mai ke tuputupu taku fia ʼiloʼi ʼi toku loto pea mo toku ʼatamai.”

ʼE KO te manatu ʼaia ʼa te tuagaʼane Fakamoʼoni ʼa Sehova ʼe nofo ʼi Caroline du Nord, ʼi Amelika, ʼo ʼuhiga mo te tohi ʼaē neʼe fakahā e te Sosiete Watch Tower ʼi te ʼu Fakatahi Faka Tisitilike “Te Faʼahiga Maʼuli ʼAē ʼe Fakamaʼua Mai e Te ʼAtua,” ʼaē neʼe fai ʼi te ʼu taʼu 1998 mo te 1999. Tatau aipe peʼe mole heʼeki koutou maʼu te tohi ʼaia, kae koutou vakaʼi te ʼu fakamatala ʼaenī.

Hili kiai ni ʼu ʼaho ʼi tana ʼosi toʼo tana tohi ʼi te fakatahi ʼaē neʼe fai ʼi San Diego, ʼi Californie, ʼi Amelika, neʼe faitohi fēnei te tagata: “Kia ʼau, ko te tohi ʼaia ʼe ina fakamālohiʼi taku tui. Kua fonu toku loto ʼi te fakafetaʼi ki te ʼu meʼa ʼaē neʼe fakatupu e Sehova. Kua ʼau kaku nei ki te pasina 98, pea ʼe ʼau lotomālohi ke ʼau kaku ki tona fakaʼosi! ʼE ko he toe meʼa fakafiafia kia ʼau.”

Neʼe tohi fēnei e te fafine Nai: “Neʼe ʼui e te tēhina faiakonaki, ʼe ‘ko he tohi makehe,’ pea ko te ʼu palalau ʼaia ʼe nātou fakahā ai te ʼuhiga moʼoni ʼo te tohi. Ko te meʼa ʼaē ʼe makehe ai te tohi, he mole ina fakakinauʼi te kau lautohi ke nātou tui ki te ʼAtua, kae ʼe ina fakahā fakalelei te ʼu fakamoʼoni ʼo ʼuhiga mo te faʼahi ʼaia.”

Ko te ʼu fakamoʼoni ʼaia ʼe kau kiai te ʼu meʼa fakapoto lalahi ʼaē neʼe hoki maʼu ʼo ʼuhiga mo te ʼatulaulau, mo te maʼuli, pea mo te tagata. Neʼe ōfo te tokolahi ʼi te ʼu meʼa ʼaia. Neʼe tohi fēnei e te fafine mai Californie, “ ʼE mole he palalau moʼo fakahā atu te lave mālohi ʼo te tohi ʼaia kia ʼau. Neʼe mole feala haku tuku taku lau te tohi ʼaia, he neʼe ʼau maʼu ʼi te ʼu pasina fuli he ʼu fakamatala fakaofoofo ʼo ʼuhiga mo te ʼatulaulau pea mo te maʼuli. Neʼe lahi te ʼu meʼa ʼaē neʼe ʼau ako ai! ʼE ʼau leleiʼia te kiʼi tohi ʼaenī pea ʼe ʼau fakahā anai ki ʼihi.”

Ko te agaaga ʼo te tohi ʼaē neʼe leleiʼia e te tokolahi, ʼe ko te fakahā fakanounou ʼo te moʼoni faka Tohi-Tapu, ʼaē ʼe hā ai te ʼulugaaga ʼo te Tupuʼaga. Ko te tokolahi neʼe nātou ʼui fēnei, “Ko te fakamatala fakanounou ʼo ʼuhiga mo te Tohi-Tapu, ʼaē ʼe fakahā ʼi te fakaʼosi ʼo te tohi, ʼe ko te fakamatala lelei tokotahi ʼaē neʼe ʼau lau.” ʼI te hili pe ʼo te fakatahi ʼaē neʼe fai ʼi New York, ʼi Amelika, neʼe tohi fēnei e te fafine: “Ko te tohi foʼou ʼaia ʼe ko te tohi ʼaē neʼe ʼau fia lau tāfito. Neʼe ʼau leleiʼia tāfito te ʼu meʼa fakapoto lalahi ʼaē ʼe nātou fakamoʼoni mai, ʼe ʼi ai he Tupuʼaga. Ko te fakamatala fakanounou ʼo ʼuhiga mo te Tohi-Tapu ʼe ina fakamoʼoni ki te ʼu meʼa fakapoto lalahi ʼaia, pea ʼe tupu ai hakita fia ʼiloʼi he tahi ʼu meʼa.”

Ko He ʼu Meʼa Fakapoto Lalahi ʼe Mahino Lelei

E lagi mata faigataʼa te ʼu fakamatala ʼaē ʼe fai ʼi te ʼu ʼuluaki kapite ʼo te tohi, kae koʼeni te ʼu palalau ʼaē neʼe fai e ʼihi.

Neʼe tohi fēnei e te tagata mai Kanata: “ ʼE kehe ʼaupito te tohi ʼaenī mo te ʼu tohi faigataʼa ʼaē ʼe fia hā ai te hahaʼi popoto ʼaē ʼe nātou fakaʼaogaʼi ai he ʼu kupu faigataʼa. ʼE hā takotou mālama lelei ki te ʼu meʼa fakapoto lalahi ʼi takotou fakahā te ʼu meʼa ʼaia ke faigafua, ohage la ko te physique, mo te chimie, te ADN, te ʼu chromosomes, pea mo te tahi ʼu meʼa feiā. Neʼe lelei kanapaula neʼe ko koutou ʼaē neʼe koutou fai te ʼu tohi ʼaē neʼe ʼau ako ʼi muʼa atu!”

Neʼe tohi fēnei e te polofesea ʼe ina akoʼi te physique ʼi te univelesitē: “ ʼE faigafua te fakahā ʼo te ʼu faʼahi maʼuhiga, pea ʼe mole hilifaki kiai he ʼu fakamatala ʼe mole hona ʼaoga. ʼE tokoni te tohi ʼaia ki te kau lautohi ke feala hanatou fakakaukauʼi, pea ʼe tau fakaʼaogaʼi ai te ʼu palalau ʼaē neʼe fai e te hahaʼi popoto. ʼE ko he tohi lelei maʼa nātou fuli ʼaē ʼe nātou fia ʼiloʼi te haʼuʼaga ʼo te ʼatulaulau, tatau aipe peʼe nātou ako te ʼu meʼa fakapoto lalahi peʼe kailoa.”

Ko te finemui ʼe ako afilimie neʼe ina ʼui fēnei: “Neʼe ʼau punamaʼuli ʼaupito ʼi taku fuli te kapite 4 ʼo te tohi pea mo ʼau lau ai te palalau ʼaē ʼe tuʼu ʼi te tohi ʼaē ʼe mātou fakaʼaogaʼi ʼi te faleako! Neʼe ʼau ʼavage te tohi ʼaia ki taku polofesea pea neʼe ʼau ʼui age ʼe ina leleiʼia anai. Neʼe ʼau fakahā age te pasina 54 ʼaē ʼe talanoa ai ʼo ʼuhiga mo te ʼuto. Neʼe ina lau pea ina ʼui mai, ‘ ʼE lelei te kiʼi tohi ʼaenī! ʼE hoki ʼau lau anai.’ ”

Neʼe tohi fēnei e te tagata ʼe kau ʼi te puleʼaga ʼo Pelesike: “Ko te meʼa ʼaē neʼe ʼau leleiʼia tāfito, ʼe ko te ʼu fakamatala ʼaē ʼe nātou fakahā, ko te ʼu meʼa fakapoto lalahi ʼe mole nātou fakafeagai ki te ʼui ʼa te Tohi-Tapu ʼe ʼi ai te ʼAtua e tahi, kae nātou fakamoʼoni ki te faʼahi ʼaia. ʼE ko he manatu lelei ʼaupito ʼaia.”

Tou ʼIloʼi Lelei Age Te Tupuʼaga

Ko te tohi neʼe tokoni ki te tokolahi ʼi te ʼu fenua kehekehe ke nātou ʼiloʼi lelei age te ʼAtua pea ke nātou fakaōvi kia te ia. Ko te fafine Saponia mai te kolo ʼo Fukuoka, neʼe ina ʼui fēnei: “ ʼE hage neʼe pipiki fuli te ʼu manatu ʼa te tohi ki te ʼuhiga moʼoni ʼo Sehova. Ko te tohi ʼaia ʼe ina fakalotoʼi kita ke kita tui. Neʼe ʼau ako te ʼu meʼa foʼou ʼo ʼuhiga mo Sehova ʼaki he ʼu faʼahiga ʼaluʼaga neʼe mole heʼeki ʼau ʼiloʼi.” Neʼe faitohi fēnei te fafine ʼe nofo ʼi Salvadore: “ ʼE koutou fakamatala lelei mai ai te manavaʼofa, mo te lotoʼofa, mo te loto lolomi, pea mo te agaʼofa ʼa te ʼAtua. ʼE moʼoni, ʼe ko te meʼa ʼaia ʼaē ʼe ʼaoga kia tatou ke feala hatatou fakaōvi kia te ia pea mo tona ʼAlo. ʼE ko te ʼuluaki tohi ʼaia ʼaē ʼe ina fakahā mai te ʼu meʼa ʼaē ʼe logoʼi e Sehova ʼi tona loto, pea mo te ʼu meʼa ʼaē neʼe logoʼi e tona ʼAlo ko Sesu ʼi tana kei maʼuli ʼi te kele.” Koʼeni te palalau ʼaē neʼe fai e te tagata mai Zambie: “Kua fetogi katoa taku mahino ki te ʼuhiga ʼo Sehova.”

ʼE mahino papau ia, ʼe fiafia ʼaupito te kau Fakamoʼoni ʼa Sehova ʼi tanatou tufa ki te hahaʼi te tohi Y a-t-il un Créateur qui se soucie de vous ? Neʼe ʼui fēnei e te fafine: “ ʼI taku ʼosi lau te kapite 10 [“Kapau ʼe tokaga te Tupuʼaga kia tatou, he koʼe ʼe lahi feiā te ʼu mamahi?”], neʼe ʼau kalaga fēnei, ‘ ʼE ko te tohi ʼaia ʼaē neʼe ʼaoga ki te fenua ʼaenī ko Saponia!’ ʼE ʼau faiga ke ʼau maʼu loto te ʼu manatu ʼo te kapite ʼaia pea ke ʼau fakaʼaogaʼi tuʼumaʼu ʼi te fai faka mafola.” Ko te tahi tuagaʼane neʼe ina fai te ako Tohi-Tapu ʼa te finemui neʼe lahilahi ake ʼi he fale lotu neʼe gāue pelepitelo ai tana tāmai. “Neʼe faigataʼa kia ia hana tali ʼe ʼi ai he Tupuʼaga. ʼE mole he meʼa ʼi te tohi ʼaenī ʼe ina fakakinauʼi te hahaʼi, kae ʼe fakahā ai he ʼu fakamoʼoni lelei, pea ʼi taku manatu, māʼia mo te kau Putisi ʼe feala ke nātou lau te tohi ʼaia. Tahi ʼaē, ʼe tokoni mai te tohi ʼaia ke tou logoʼi moʼoni te ʼofa ʼa Sehova kia tatou.”

Neʼe momoli mai Pilitania te tohi ʼaenī: “Neʼe hoki ʼosi age pe taku lau te tohi Créateur, pea ʼe ʼau ʼamanaki nei ke ʼau toe lau. ʼI tohi taulekaleka leva! Kapau ʼe kita lau te tohi ʼaia, pea ʼe kita ʼofa atu aipe kia Sehova. Neʼe ʼau foaki ki toku vāhaʼa fale, pea neʼe ina ʼui mai ʼi tana ʼosi lau ia kapite pe e lua, ‘ ʼE mole feala haku tuku te laulau ʼo te kiʼi tohi ʼaenī, heʼe lelei ʼaupito!’ ʼE ʼau tui papau, ʼe tokoni anai ki te hahaʼi ke nātou ʼiloʼi totatou Tupuʼaga Lahi pea mo nātou ʼofa kia te ia.”

Neʼe ʼui fēnei e te tagata ʼi Maryland, ʼi Amelika: “Neʼe lave mālohi te tohi ʼaia kia ʼau ʼi te faʼahi fakalaumālie! Neʼe ʼau fakatuʼutuʼu ke ʼau tufa te tohi ki te hahaʼi fuli ʼaē ʼe ʼau felāveʼi mo nātou ʼi taku gāue. ʼI ʼihi temi, ʼe faigataʼa haku fai faka mafola ki te hahaʼi popoto ʼaia ʼe maʼumaʼua ʼaupito. ʼAki te tohi ʼaenī, kua ʼau ʼiloʼi te ʼu palalau ʼaē ʼe feala ke ʼau fai kia nātou.”

Ei, ko te tohi Y a-t-il un Créateur qui se soucie de vous ? ʼe tokoni moʼoni anai ki te hahaʼi ʼi te malamanei katoa.

[Haʼuʼaga ʼo te paki pasina 25]

Cover photo above, Eagle Nebula: J. Hester and P. Scowen (AZ State Univ.), NASA