Tou Tokoni Ki Niʼihi Ke Nātou ʼIloʼi Te Tagata Lahi
1 Tokolahi neʼe nātou lau te tohi Le plus grand homme de tous les temps neʼe nātou fakahā fakamalotoloto tanatou leleiʼia tona ikuʼaga ʼaē ki tonatou maʼuli. Ko he tahi neʼe ina tohi fēnei: “ ʼI te temi ʼaē neʼe ʼosi fuli ai te tohi ʼi taku lau, neʼe ʼau logoʼi ʼe hage pe neʼe fakaafe ʼau e Sesu ke ʼau fakatahi mo ia, ʼo maʼuli ʼi ʼona tafa, ʼo kau ki ʼona mamahi, ʼana manatu, ʼi te ʼu faʼahi fuli ʼo tona minisitelio. (...) Ko te lau ʼo te tohi ʼe hage pe ko he sioʼi ʼo he ʼata ʼo te maʼuli ʼo Sesu.”
2 Ko te tohi Le plus grand homme ʼe ina tokoniʼi tatou ke mole gata ʼaki pe tatatou ʼiloʼi lelei ia Sesu kae feiā foki mo Sehova (Soane 14:9). Ko he tahi e taʼu 12 neʼe ina ʼui fēnei ʼo ʼuhiga mo te tohi: “Neʼe ina fakafimālieʼi ʼau ʼo lahi age ʼo feala ai taku faikole kia Sehova mo tagi loʼimata ʼi toku fiafia ʼi te temi pe ʼaē neʼe ʼau lau ai. ʼI toku loto, neʼe ʼau fīmālie ʼi taku ʼiloʼi ʼaē ʼe tokakaga ia Sehova pea mo Sesu kia tatou.” Neʼe ʼui e Sesu, ohage ko tona tuʼu ia Soane 17:3, ko te ʼuhiga ʼo te maʼuli heʼegata kia tatou ke tou ʼiloʼi ia Sehova pea mo tona ʼAlo. Ko te ako ʼo te maʼuli ʼo Sesu ʼi te tohi ʼaia ʼe ina foaki mai te mālama makehe ʼo ʼuhiga mo te agaaga ʼo Sehova, koteʼuhi ko Sesu ko “te ʼata totonu ia ʼo tona ʼuhiga ʼatua”. — Hep. 1:3.
3 Ko te ʼu tohi e 19 miliona ʼo te Le plus grand homme neʼe tā ʼi te ʼu lea e 70. ʼE hā mai ai te lelei ʼo te tali ʼo te tohi ʼaia. Tokolahi ʼe nātou lau fuli te tohi ʼi te temi pe ʼaē ʼe nātou maʼu ai. Ko he tagata neʼe fia logo ki te moʼoni neʼe ina lau te tohi ʼi te ʼu vāhaʼa e lua ʼi te temi pe ʼaē neʼe ina maʼu ai. Ko he tagata ʼo te keletiate neʼe ina tali te tohi neʼe ina ʼui fēnei: “ ʼE mole feala ke ʼau mavae mo te tohi. Ko toku ʼohoana pea mo ʼau ʼe mā lau ʼi te po fuli ʼi muʼa ʼo tamā ʼolo ʼo momoe.”
4 Fagonogono faigamālie: Ko he tēhina neʼe ina fakahā te tohi Le plus grand homme ki te hahaʼi ʼi te koga meʼa ʼaē ʼe gāue ai. ʼO fakamatala ai neʼe ia ia te tohi ʼaia, pea neʼe feʼāveʼaki haʼele te ʼu logo ʼo ʼuhiga mo te meʼa ʼe tuʼu ʼi te tohi. Neʼe tohi e tona ʼu kaumeʼa gāue te lisi ʼonatou ʼaē neʼe fia fai ki te tohi. ʼO ina tufa ai te ʼu tohi e 461! Toko nima ia nātou ʼaē neʼe nātou toʼo te tohi ʼe nātou ako ʼi te temi nei. Ko he tuagaʼane, neʼe folau ʼi he vakalele, neʼe ina tuku te tohi Le plus grand homme ki he patele ʼe ʼalu ki te fakanofo ʼo he kaletinale. Neʼe nofo te patele ʼi te Vatikano talu mai te ʼu taʼu e 40. Ko tatou fuli ʼe tonu ke tou fai ia meʼa fuli ʼe ʼaoga moʼo fakahā ʼo te tohi ki niʼihi.
5 ʼE leleiʼia e te kau tūpulaga te tohi ʼaia: Ko te ʼu tūpulaga neʼe nātou fakahā te lahi ʼo tanatou fia fai ki te tohi. Ko he tahi e taʼu hiva neʼe ina tohi fēnei: “Ko te tohi ʼaē ʼe ʼau leleiʼia ʼaupito, ko te Le plus grand homme de tous les temps koteʼuhi e lahi te ʼu meʼa ʼe ʼau ako ai.” Ka ʼe tou felāveʼi mo te kau tūpulaga ʼi te gāue faka mafola, ʼe tonu ke tou toʼo he temi, mokā ʼe lotolelei tanatou ʼu mātuʼa, ʼo fakahā te tohi kia nātou pea mo te ʼu puani maʼuhiga pea mo te ʼu paki. ʼE feala tatatou tuku te ʼu tohi ki te kau tūpulaga ʼaia. Kapau ʼe tou foaki age he fealagia ke nātou ʼiloʼi ia Sesu, ko te kau tūpulaga ʼo te temi nei ʼe feala tanatou felogoi mo ia. Ko Sesu neʼe ko he tahi ʼe fakaōvi gafua. — Mat. 19:14, 15.
6 Ko te lau ʼo te tohi Le plus grand homme ʼe feala ke fetogi ai te maʼuli ʼo te hahaʼi. Koutou faiga ke koutou ʼiloʼi lelei te tohi mo tona ʼu hisitolia. Fakaʼaogaʼi te manatu ʼi te pasina fakaʼosi ʼo te ʼuluaki palalau ʼo te tohi, ʼi te kupu “Apprenons à le connaître, pour notre bien”. Ko te manatu ʼaia ʼe ina tokoniʼi anai te hahaʼi ke nātou fakakaukauʼi peʼe feafeaʼi hanatou maʼu he fua lelei mai te lau ʼo te tohi. Tokolahi ʼi tokotou telituale ʼe feala ke nātou kalaga ohage ko he tahi neʼe ina ʼui fēnei ʼi te ʼosi ʼo tana lau te tohi: “ ʼE mole heʼeki ʼau lau he tohi lelei fēnei! Neʼe ina fetogi toku maʼuli.”