Tou Ako Te Tohi ʼo Te Tagata ʼAē ʼe Lahi Tokotahi ʼo Te ʼu Temi Fuli
1 Lolotoga te vāhaʼa ʼo te ʼaho 9 ʼo Sepetepeli, ʼe tou kamata ako anai te tohi Te tagata ʼaē ʼe lahi tokotahi ʼo te ʼu temi fuli, ʼi te ʼu Ako Tohi ʼo totatou ʼu Kokelekasio. ʼE ko he meʼa fakafiafia anai tatatou vakaʼi te maʼuli pea mo te minisitelio ʼo Sesu Kilisito! Mai tona ʼaluʼaga ʼaē ʼe ʼi ai te kehekehe ʼo te tohi ʼaia mo ʼihi ʼu tohi kua tou akoʼi, koʼeni te ʼu kiʼi tokoni ʼe tonu ke tou mulimuli kiai.
2 ʼE mole ʼi ai he ʼu numelo ʼi te ʼu pasina ʼo te tohi, koia ko te polokalama ʼaē neʼe fai ʼi Te Minisitelio ʼo Te Puleʼaga ʼe fakatuʼu ai anai he lisi ʼo te ʼu kapite ʼaē ʼe feala anai ke tou ako, pea ʼi te agamāhani ʼe ako anai he ʼu kapite e tolu peʼe fā ʼi te vāhaʼa. Ko te kapite 35, 111, mo te 116 ʼe loaloaga age ia pea ʼe tonu anai ke vaheʼi lua te fai ʼo te ʼu kapite ʼaia. ʼI te ʼosi lau e te tēhina te kapite katoa (peʼe ko te ʼu palakalafe ʼaē ʼe hoa atu ki te ʼu kupu tāfito, ohage la ko te kapite 35, 111, mo te 116), ʼe fai anai e te tēhina ʼaē ʼe ina fai te ako tohi, te ʼu fehuʼi ʼaē ʼi te fakaʼosi ʼo te kapite, ʼaē ʼe ʼalutahi mo te kapite peʼe ko te koga ʼaē neʼe hoki lau. Ko te ʼu tali ʼe mole fai tuʼumaʼu ʼo mulimuli ki te fefakahoahoaʼaki ʼo te ʼu palakalafe ʼo te kapite. ʼE tonu anai ke koutou fai he ʼu tali ʼe nounou pea mo totonu ʼo mulimuli ki te kapite ʼaē ʼe vakaʼi.
3 ʼOsi ʼaia, mokā ʼe feʼauga te temi, pea ʼe tonu anai ke lau te ʼu vaega fuli ʼaē ʼe tuʼu ʼi te fakaʼosi ʼo te kapite. Ko te ʼu vaega ʼaē ʼe loaloaga, ʼe tonu anai ke vaevae tona lau, ke feala tona lau ʼe nātou fuli ʼaē ʼe ʼi te ako tohi, pea ʼosi ʼaia pea fai he ʼu fakamatala ʼo ʼuhiga mo te ʼu vaega ʼaē neʼe lau. Ko te ʼu fehuʼi ʼaē neʼe teuteuʼi e te tēhina ʼaē ʼe ina fai te ako tohi, ʼe tokoni anai ki te faka maʼuhigaʼi ʼo te ʼu puani tāfito, pea mo fakahā ai te pikipikiga ʼo te ʼu vaega ʼaē neʼe lau pea mo te ʼu puani ʼaē ʼe talanoa kiai te tohi. Ko te ʼu fehuʼi fuli ʼaē ka fai pea mo te ʼu tali, ʼe tonu anai ke tokoni kia nātou ʼaē ʼi te ako tohi, ke nātou tokagaʼi tāfito ia Sesu Kilisito, tona maʼuli, pea mo tana ʼu fai akonaki.
4 Ko te tohi ʼo Te tagata ʼaē ʼe lahi tokotahi, ʼe ina fakahā mai te ʼu koga kehekehe ʼo te maʼuli ʼo Sesu, mai te kamata ʼo aʼu ki te fakaʼosi. Kapau ʼe tou sio fakaʼatamai ki te ʼu meʼa ʼaē neʼe hoko, pea mo fakamaʼumaʼu te ʼu potu ʼaē neʼe hoko ai, pea ʼe tokoni anai te ʼu faʼahi ʼaia kia tatou ke tou manatuʼi te ʼu meʼa ʼaia. Koia, ke tou vakaʼi fakalelei te ʼu paki pea mo tou fakaʼaogaʼi tuʼumaʼu te mape ʼaē ʼe tuʼu ʼi te kamataʼaga ʼo te tohi, ʼaē ʼe hoa atu ki te ʼu ʼuluaki palalau.
5 Ko te ʼu ʼuluaki palalau ʼo te tohi ʼe tou vakaʼi anai ʼi te ʼuluaki vāhaʼa. ʼI te ʼosi lau ʼo te ʼu palakalafe fuli ʼaē ʼe hoa ki te ʼu kupu tāfito, ʼe fai anai e te tēhina ʼaē ʼe ina fai te ako tohi te ʼu fehuʼi ʼaē neʼe ina teuteuʼi, ʼe ʼalutahi mo te ʼu palakalafe. Ko te ʼuluaki vakaʼi ʼaia ʼo te tohi, ʼe ina teuteuʼi anai tatou ki te ʼu kapite ʼaē ka tou vakaʼi anai lolotoga te taʼu ka haʼu. ʼE tou maʼu anai he ʼu fua lelei ʼi te ako ʼo te tohi mo kapau ʼe tou teuteuʼi lelei fuli. Ko te tēhina ʼaē ʼe ina fai te ako tohi, ʼe tonu anai ke ina teuteuʼi lelei te tohi ʼaia ʼi te ʼu vāhaʼa fuli, ke feala ai hana tokoni kia nātou ʼaē ʼe kau ki te ako tohi, ke nātou mahino lelei ki te tagata ʼaē ʼe lahi tokotahi ʼo te ʼu temi fuli, totatou ʼAliki pea mo totatou Fakamaʼuli, ko Sesu Kilisito.