Ko Te Ako Tohi ʼo Te Kokelekasio ʼe Ina Foaki Mai He Akonaki Lelei
1 Ko te Ako Tohi ʼo te Kokelekasio ʼe ko he faʼahi maʼuhiga ia ʼi te polokalama fai akonaki ʼo te kautahi ʼa Sehova. Ko te ʼu ako tohi ʼe vaevae ʼi te telituale, ʼo faigafua ai tatatou ʼolo fuli kiai. Ko te hahaʼi ʼaē ʼe fia logo ki te moʼoni e lagi ʼe nātou tali mokā fakaafe ake nātou tāfito mokā ʼe ōvi te ako tohi ki tonatou ʼapi.
2 ʼE fai he fakatuʼutuʼu ke ʼaua naʼa hahaʼi fau te ʼu ako tohi. Ko te faʼahi ʼaenī ʼe faka fealagia ai ki te tēhina ʼaē ʼe ina taki te ako tohi, ke ina foaki he tokoni kia nātou takitokotahi. Ko nātou fuli ʼaē ʼi te ako tohi ʼe mole tatau tanatou mahino. Kapau ʼe faigataʼa ki he tahi tana mahino ki he puani, tatau aipe pe neʼe ina teuteuʼi fakatomuʼa, ʼe feala ke palalau te tēhina ʼaē ʼe ina taki te ako tohi mo ia ʼi te hili ʼo te ako. Koia, ka ʼe mole hahaʼi fau te ako tohi, ʼe lahi ai te ʼu fealagia moʼo fai ʼo hakotou ʼu tali pea mo lau ʼo te ʼu vaega faka Tohi-Tapu. ʼE koutou fai tuʼumaʼu koa hakotou ʼu tali? ʼE koutou tali koa ʼaki ʼakotou ʼu faʼahiga palalau māhani? Ko takotou tali ʼe feala ke fua lelei kia koutou pea mo niʼihi. ʼI takotou teuteu, koutou fakaʼaogaʼi takotou ʼatamai ke koutou mahino ai peʼe feafeaʼi takotou maʼuliʼi takitokotahi ʼihi puani ʼo te ako.—Hep. 5:14.
3 ʼAki tatatou tokagaʼi te ʼu faʼahiga fai akonaki ʼaē ʼa te tēhina ʼaē ʼe ina taki te ako tohi, ʼe feala ai hakotou ako peʼe feafeaʼi te taki ʼo te ʼu ako faka Tohi-Tapu ʼi te ʼu ʼapi ke lelei pea mo ʼaoga. ʼI te ʼosi lau ʼo te ʼu palakalafe e he tēhina ʼe faiva, pea fai leva te ʼu fehuʼi. Ko te tēhina ʼaē ʼe ina taki te ako ʼe ina fakaloto mālohiʼi ia nātou fuli ʼaē ʼi te ako tohi ke nātou palalau leʼolahi. Kapau ʼe fealagia te temi, ʼe ina faigaʼi ke fakamatala te ʼu vaega faka Tohi-Tapu moʼo tokoni kia tatou ke tou mahino peʼe feafeaʼi tona maʼuliʼi. (Vakaʼi ia Nehemia 8:8.) ʼI he tahi temi, ʼe feala ke ina toe fakamālamaʼi he puani peʼe ina fai he ʼu fehuʼi moʼo fakahā ʼo he puani tāfito. Ko he faʼifaʼitaki peʼe ko he paki e lagi tokoni ai kia tatou ke tou fakakaukauʼi peʼe feafeaʼi te ʼalutahi ʼo te talanoa mo totatou maʼuli.
4 ʼI ʼihi ako tohi ʼo te kokelekasio ʼe tokosiʼi ia nātou ʼaē ʼe ʼolo ki te ʼu fono. ʼE koutou ʼolo tuʼumaʼu koa ki te ʼu ako tohi? Kapau ʼe mole koutou fai te faʼahi ʼaia, ʼe mole koutou maʼu te meʼa kai fakalaumālie maʼuhiga ʼaia. Ko te ako tohi ʼe ko he fakatuʼutuʼu ʼe fakahā mai ai e Sehova tana tokaga ʼaē kia tatou. (1 Pe. 5:7) Ko tona loto ke tou tuputupu ʼi te ʼatamai mālama totonu pea mo te poto ʼo feala anai hatatou mālohi ʼi te faʼahi fakalaumālie. Ko te tahi faʼahi, ʼe loto ia Satana ke tuai tatatou tuputupu ʼi te faʼahi fakalaumālie pea ke tou vaivai ke ʼaua naʼa tou ʼaoga kia Sehova pea mo Tana kautahi. Ke ʼaua naʼa koutou faka fealagia ke hoko te faʼahi ʼaia! Ke tou tuku ia te fiafia, te ʼofa ʼaē ʼe maʼu ʼi te kūtuga ʼaia ke lave ʼi tokotou loto pea ke ina uga koutou ke hoholo atu takotou fakavikiviki kia Sehova.—Vakaʼi Pesalemo 111:1.
5 Ko te ʼu fono ki te fai faka mafola ʼe fai ʼi te ʼu faʼahi ʼaē ʼe fai ai te ʼu ako tohi. ʼE feala ke fai ʼi te lolotoga vāhaʼa, ʼi te fakaʼosi vāhaʼa, peʼe ko te afiafi. Ko te tēhina ʼaē ʼe ina taki te ako tohi, ʼe tonu ke ina fakasiosio peʼe feʼauga te telituale pea ke ʼi ai he tahi moʼo fai ʼo te fono ki te fai faka mafola. Ko te ʼu fono ki te fai faka mafola ʼe mole tonu ke fakalaka ʼi te ʼu minuta e 10 ki te 15. Ko te tēhina ʼaē ʼe ina fai te fono ʼaia, e lagi ʼe ina vakaʼi fakanounou te vaega faka Tohi-Tapu ʼo te ʼaho ʼaia mo kapau ʼe ʼalutahi mo te gāue faka mafola pea mo ina foaki he manatu makehe e tahi peʼe lua ʼo ʼuhiga mo te fai faka mafola, peʼe ina fakatuʼutuʼu ke fai he faʼifaʼitaki fakanounou ʼo fakaʼaogaʼi ai te tufa ʼo te māhina.
6 Ko te tēhina ʼaē ʼe ina taki te ako tohi ʼe ina faigaʼi ke feala hana fai faka mafola mo nātou fuli ʼaē ʼi tana ako tohi, ke feala ai hana fakaloto mālohiʼi ia nātou pea mo teuteuʼi nātou ki te gāue.—Vakaʼi Maleko 3:14; Luka 8:1.