Te ʼu Tagata Taupau ʼe Ko He ʼu Faʼifaʼitaki—Te ʼu Tēhina ʼAē ʼe Nātou Takitaki Te ʼu Ako Tohi ʼo Te Kokelekasio
1 ʼE ko he pilivilesio lahi ki he tagata ʼāfea pe ko he tagata faifekau faka minisitelio, ke ina takitaki te Ako Tohi ʼo te Kokelekasio. Ko tana tokaga ki te ʼu meʼa fakalaumālie ʼaē ʼe ʼaoga kia nātou ʼo te ako tohi ʼe ko he toe maʼua lahi. ʼE ʼi ai te ʼu faʼahi e tolu ʼo te maʼua ʼaia.
2 ʼE Nātou Faiva ʼi Te Faiakonaki: ʼE maʼua ke teuteuʼi lelei e te tēhina takitaki ʼo te ako tohi, ke feala hana fakamahino lelei te ʼu kapite ki te ʼu tēhina mo tuagaʼane ʼi te vāhaʼa fuli. ʼE ina faiga ke tuputupu tatatou leleiʼia te ʼu kapite ʼaē ʼe tou ako. ʼE mole tonu ke lahi fau tana palalau ʼi te lolotoga ʼo te ako, pea mokā ʼe ʼaoga, ʼe ina fai he tahi ʼu fehuʼi ke tou tāʼofi te puani tāfito ʼo te ako. ʼE ina fakatuʼutuʼu ke tou fia logo ki te ako pea mo tou ako ai he ʼu meʼa pea mo tou kau fuli kiai. ʼE ina toe fakatuʼutuʼu ke tou tuputupu ʼi te faʼahi fakalaumālie, pea ke tou sio ki te ʼaoga ʼo te ako, pea ke lave te ako ki totatou ʼatamai pea mo totatou loto.—1 Tes. 2:13.
3 ʼE Nātou Tokoni Ki Te ʼu Ōvi: Ko te tēhina ʼaē ʼe ina takitaki te ako tohi, ʼe hage “ko he nonoʼaga mokā ʼe matagi pea mo he holaʼaga mokā ʼe afā.” (Isaia 32:2) ʼE tokaga moʼoni kia nātou fuli ʼo te ako tohi pea ʼe ina vakaʼi peʼe tonu ke foaki he tokoni fakalaumālie kia nātou ʼaē ʼe vaivai.—Esk. 34:15, 16; 1 Tes. 2:7, 8.
4 ʼE Nātou Faka Mafola Fakamalotoloto: ʼE faiga fakamalotoloto e te tēhina takitaki ʼo te ako tohi ke ina fai he ʼu fakatuʼutuʼu maʼa nātou fuli ʼo te ako tohi ke nātou kau ki te fai faka mafola. ʼE ina tuku he faʼifaʼitaki ʼi te gāue faka mafola, ʼi tana ʼiloʼi ʼaē, ko tana kau tuʼumaʼu ki te gāue, mo tana fai fakamalotoloto, pea mo tana fiafia ʼi te selevisi ʼe malave anai ki te ʼu tēhina mo tuagaʼane. (Kol. 4:17; 2 Tes. 3:9) ʼAki te temi, ʼe ina fakahoko tana fakatuʼutuʼu ʼaē ke fai faka mafola mo nātou fuli ʼo te ako tohi. Kapau ʼe tou fia hikihiki te lelei ʼo tatatou fai faka mafola, pea ʼe feala ke tokoni mai kia tatou te tēhina takitaki ʼo te ako tohi, ke tou fakahoko te fakatuʼutuʼu ʼaia.—1 Tim. 4:16; 2 Tim. 4:5.
5 ʼE ko he tapuakina lahi tatatou maʼu he ʼu tagata feiā neʼe foaki mai e Sehova, pea ʼe nātou lotolelei ke nātou tokoni kia tatou ʼi te faʼahi fakalaumālie pea mo lagolago kia tatou ʼaki te ʼofa. (1 Tes. 5:14) ʼOfa pe ke tou fakahā totatou loto fakafetaʼi ki te fakatuʼutuʼu ʼofa ʼaia mai ia Sehova, ʼo tou kau tuʼumaʼu ki te ako tohi pea mo te fai faka mafola.—Hep. 10:25.