Te Tali Ki ʼAkotou ʼu Fehuʼi
◼ Ko te temi fea ʼaē ʼe lelei ai ke fakatuʼu he tahi Ako Tohi ʼo te Kokelekasio?
ʼE hoki fakatuʼu he ako tohi foʼou mo kapau ʼe ʼaoga te faʼahi ʼaia, ke feala he kau kiai ʼa he toko 15 peʼe siʼisiʼi age ʼi te ʼu koga meʼa fuli ʼaē ʼe fai ai te ʼu ako tohi ʼaia, ʼo feiā mo te Fale ʼo te Puleʼaga. He koʼe ʼe tonu ke fai te faʼahi ʼaia?
Ka tokosiʼi te Ako Tohi, pea ʼe faigafua ki te tēhina takitaki ke tokaga kia nātou takitokotahi ʼo tana ako. Tahi ʼaē meʼa, ʼe maʼu e nātou fuli ʼo te ako tohi ʼaia, te fealagia ʼaē ke nātou fai hanatou ʼu tali, moʼo fakahā ki ʼihi tanatou tui. (Hep. 10:23; 13:15) Kapau ʼe fai he ʼu kiʼi ako tohi e tokosiʼi ʼi he ʼu koga meʼa kehekehe ʼo tokotou telituale, pea ʼe faigafua age anai te ʼōmai ki te ako ʼaia pea ʼe lelei age anai ki te ʼu fono fai faka mafola. Ko nātou ʼaē neʼe nātou fakatuʼu he tahi ʼu ako tohi, neʼe nātou fakatokagaʼi neʼe toe tuputupu mo te kaugamālie ʼo nātou ʼaē ʼe ʼōmai ki te ako tohi.
ʼE lagi ʼi ai he ʼu ʼaluʼaga makehe ʼaē ʼe lelei ai ke fakatuʼu he tahi ako tohi, tatau aipe peʼe tokosiʼi. ʼE lagi moʼoni te faʼahi ʼaia ʼi te ʼu koga meʼa ʼaē ʼe tuʼu mamaʼo, peʼe ʼi te ʼu ako tohi ʼaē ʼe hahaʼi fau ai, peʼe mole feʼauga ai te ʼu hekaʼaga. Kapau ʼe ʼaoga, pea ʼe feala ke fai he kiʼi ako tohi ʼi te uhu, heʼe lelei kia nātou matutuʼa, kia nātou ʼaē ʼe gāue pōʼuli, peʼe ko te ʼu tuagaʼane ʼaē ʼe mole kau tonatou ʼu ʼohoana ʼi te moʼoni.
ʼE tonu ki te ʼu kiʼi ako tohi ʼaia, ke maʼu ai he tokolahi ʼo te ʼu kaugā faka mafola ʼaē ʼe mālolohi ʼi te faʼahi fakalaumālie pea mo nātou faka mafola tuʼumaʼu, pea ke hinoʼi he tēhina ʼe faiva ʼi tona takitaki pea mo he tēhina ʼe lautohi lelei. ʼE tonu ke faiga te ʼu tēhina ke nātou mulimuli ki te ʼu faʼahi ʼaia ʼo ʼuhiga mo te ʼu ako tohi ʼi te kokelekasio.
ʼE feala ki te ʼu tagata ʼāfea ke nātou lagolago ki te tuputupu ʼo te kokelekasio, mo kapau ʼe nātou tokakaga ke fakafuafua lelei te kaugamālie ʼo te ʼu ako tohi, pea ke tokaga fakalelei kiai ʼi te faʼahi fakalaumālie pea mo lelei te ʼu koga meʼa ʼaē ʼe fai ai te ako. ʼI te ʼu koga meʼa ʼaē ʼe ʼaoga ai te faʼahi ʼaia, ʼe fakatuʼu anai he ʼu ako tohi foʼou ke feala kia tatou fuli ke tou maʼu te ʼu tapuakina ʼo te fakatuʼutuʼu fakalaumālie makehe ʼaia. ʼE feala koa ke fai he ako tohi ʼi tokotou ʼapi? Ko te tokolahi ʼaē neʼe nātou fai te faʼahi ʼaia, neʼe nātou maʼu ai te ʼu tapuakina fakalaumālie.