“E Mole Alunoa Anai Takotou Gaue”
1 ʼE ko he manatu fakalotomalohi! ʼE mole alu noa takotou gaue kinakina ʼi te tauhi ʼae kia Sehova. (1 Ko. 15:58) ʼE mole tatau ia mo te gaue loaloaga pea mo kinakina ʼa te hahaʼi ʼae ʼe natou faiga ke lelei tonatou aluʼaga fakasosiale peʼe fakapaʼaga. ʼE lagi natou fai he ʼu ako faigataʼa lolotoga ni taʼu, peʼe natou gaue kinakina ke maʼu ʼonatou koloa. Kaʼe mai tona ʼuhiga ʼae “e fakalogo te u mea fuli ki te temi pea mo tona u maliuliu,” ʼe mole lagi feala ke natou fakahoko te meʼa ʼae neʼe natou loto ki ai, peʼe lagi tonu anai ke natou fakafeauga ki te ʼu koloa ʼae kua natou maʼu. ʼEi, ʼe alu noa ʼanatou faiga, ohage “ko te tuli o te matagi.” (Ekl. 1:14; 9:11) Koia ʼe maʼuhiga ʼaupito ai ke tou gaue katoa ʼi te gaue pe ʼae ʼe mole alu noa, heʼe tologa ʼona lelei.
2 Te Gaue ʼAe ʼe Maʼuhiga Tafitō: Ko te gaue ʼae ʼe maʼuhiga tafitō, ʼe ko te fakamafola ʼo te logo lelei ʼo te Puleʼaga ʼo te ʼAtua. ʼE tonu ke tou fai te gaue ʼaia tatau aipe pe ʼe fakalogo te hahaʼi ki ai peʼe kailoa. ʼE tonu anai ke tou lava ui ohage ko Paulo: “E au maa mai te toto o koutou fuli, koteuhi nee au fakaha atu kia koutou te finegalo katoa o te Atua.”—Gaue 20:26, 27.
3 ʼI meʼa fakafiafia foki moka fakalogo te hahaʼi pea mo natou tali te logo ʼo te Puleʼaga. Ko te fafine kei finemui neʼe mate tona mahikitaga. Pea neʼe ina fia iloʼi pe ʼe kua alu tona mahikitaga ki selo peʼe ki ʼifeli. Neʼe faikole ki te ʼAtua ke tokoni age, ʼo ina fakaʼaogaʼi te huafa ʼo Sehova, ohage ko tona akoʼi age e tona tehina. Mole tuai pea neʼe ina ako te Tohi-Tapu pea mo kau ki te ʼu fono. ʼI te temi ʼaia neʼe mole kei tatau ai leva tana mahino ki te maʼuli, pea neʼe ina liakī tana fakakauga mo te hahaʼi mamiō kovi. Neʼe ina tuku tana suluka, mo tana toloke, pea mo tana kaihaʼa. ʼE ina ui fenei: “Ko toku ʼofa kia Sehova neʼe tokoni mai ke au liakī toku maʼuli kovi ʼaia. ʼAki te manavaʼofa lahi ʼo Sehova, neʼe au maʼu ai te ʼamanaki ki te maʼuli heʼe gata.” ʼI te temi nei, ʼe mole kei ina fakaalu noa tona maʼuli.
4 Tatau aipe pe ʼe mole fia logo te hahaʼi, kaʼe kotou haga hoko atu te gaue heʼe ʼi ai tona ʼaoga moʼoni. ʼE natou iloʼi kua ʼaʼahi natou e te kau Fakamoʼoni ʼa Sehova. Kua kotou fakaha takotou agatonu pea mo tokotou ʼofa. Koia, ʼaua naʼa kotou manatu ʼe alu noa takotou gaue kinakina ʼi te ʼAliki!