Te Fakaʼaogaʼi ʼo Te Kaupepa Lahi Ko Ai ʼe Ina Fai Te Finegalo ʼo Sehova Iā ʼAho Nei?
ʼE Tokoni Mai Te Kaupepa Lahi Foʼou ʼAeni Ke Tou Taki Mai Ia Te Kau Ako Tohi-Tapu Ki Te Kautahi ʼa Sehova
1. Kotea ia te ʼu fakatuʼutuʼu ʼe tolu ʼo te kaupepa lahi Te Finegalo ʼo Sehova?
1 Neʼe kua kotou fakaʼaogaʼi koa ia te kaupepa lahi foʼou ʼaeni Ko Ai ʼe Ina Fai Te Finegalo ʼo Sehova Iā ʼAho Nei? Ko ʼana fakatuʼutuʼu, (1) ke tou tokoni ki te kau ako Tohi-Tapu ke natou iloʼi tatou, (2) ke natou iloʼi lelei ʼatatou gaue, (3) pea mo tatatou kautahi. ʼE maʼu ʼi te kaupepa lahi Te Finegalo ʼo Sehova ia te ako ʼi te pasina takitahi, ʼe feala ke kita vakaʼi ia minuta ʼe nima pe ʼe hogofulu ʼi te hili ʼo te ako.
2. Kotea ʼae ʼe tou maʼu ʼi te kaupepa lahi ʼaia?
2 Tona Faʼahiga Fakaʼaoga: ʼE koga tolu ia te kaupepa lahi ʼaia, ʼe talanoa ai ki te ʼu puani ʼe tolu ʼo te palakalafe ʼuluaki. ʼI te ʼu puani takitaki ʼe 28, ʼe ko he ʼu fehuʼi pea ʼe tali ia te ʼu kupu taki ʼae ʼe tohi matolu ki te fehuʼi ʼaia. ʼE tou maʼu ai ia te ʼu pakī ʼo te ʼu fenua ʼe 50 tupu, ʼo hā ai ko tatatou gaue ʼe ko he gaue fakamalamanei. ʼE toe maʼu ai mo “Te Tahi ʼu Fakamahino,” ʼe maʼu ai he tahi ʼu manatu moʼo tokoni ki te kau ako.
3. ʼE tou fakaʼaogaʼi feafeaʼi ia te kaupepa lahi Te Finegalo ʼo Sehova?
3 ʼE Tou Fakaʼaogaʼi Feafeaʼi Anai Ia Te Kaupepa Lahi ʼAia?: Kotou kamata faipalalau ki te kupu tafitō ʼo te ako. Pea kotou lau fakatahi mo ia ia te ʼu palakalafe, pea mo kolua fakamaʼuhigaʼi ia te ʼu kupu taki. Kolua vakaʼi ia te ʼu fehuʼi fakamanatu ʼae ʼe tuʼu ʼi te lalo pasina. ʼE feala ke kotou lau ia te ʼu palakalafe fuli pe ʼe kotou lau ia te ʼu palakalafe takitahi pea mo kotou faipalalau ki ai. ʼE fakalogo kia koutou pe ʼe ko te ʼu vaega fea ʼae ʼe kotou fia lau. Kotou manatuʼi o vakaʼi ia te ʼu kiʼi pakī pea mo “Te Tahi ʼu Fakamahino.” ʼI te agamahani, ʼe feala ke kotou fai hoholo ia te ʼu ako. Kaʼe ʼe feala ke kotou vakaʼi he ako ʼe ina leleiʼia. Ohage la, kapau kua ovi mai ia he fakatahi lahi, ʼe feala ke kotou vakaʼi ia te ako 11.
4. He ko ʼe ʼe tou fiafia ʼi tatatou maʼu ia te meʼa gaue foʼou ʼaia?
4 Ka tou fai he ako ʼa he tahi, ʼe tou tokoni ki ai ke ina iloʼi tatatou Tamai ʼae ʼe ʼi selo. Kaʼe ʼe tonu ke tou toe akoʼi age ke ina iloʼi pe ʼe ko ai ia te kautahi ʼa Sehova. (Taag. 6:20) ʼI meʼa fakaloto fiafia ia tatatou maʼu ia te meʼa gaue foʼou ʼaeni moʼo fai ʼaki te gaue!