Tou Fakaafe Niʼihi Ke Nātou Mulimuli Ki Te Tagata ʼAē ʼe Lahi Tokotahi
1 Ohage ko tona fakamatala ia Mateo 5:14, neʼe ʼui e Sesu ki tana ʼu tisipulo: “Ko koutou ko te mālama ʼo te malamanei.” Neʼe tonu ke talanoa te kau tisipulo ʼa Sesu ki te hahaʼi ʼi te potu fuli pe ʼo ʼuhiga mo te Puleʼaga ʼo Sehova pea mo Tana fakatuʼutuʼu fonu ʼi te ʼofa ʼo ʼuhiga mo totatou fakamaʼuli ʼaki ia Sesu. ʼAki tatatou manatuʼi te maʼua ʼaia, ʼe tou tufa anai ʼi te māhina ʼo Tesepeli te tohi Te Tagata ʼAē ʼe Lahi Tokotahi ʼo Te ʼu Temi Fuli. Koʼeni he ʼu manatu e lagi koutou fia fakaʼaogaʼi.
2 ʼI te hili ʼo takotou fakamālo, ʼe feala ke koutou ʼui age te manatu ʼaenī ʼaki ʼakotou ʼu palalau māhani:
◼ “Tokolahi ʼe nātou feʼuiʼaki pe ko te tagata feafeaʼi ia Sesu ʼi tana nofo ʼaē ʼi te kele. ʼI te faʼahi ʼaia, ko te ʼu faʼahi fea ʼaē neʼe kehe ai ia? [Tou faka fealagia ke fakahā mai tana manatu.] Ko te tohi fakaloto mālohi ʼaenī, Te Tagata ʼAē ʼe Lahi Tokotahi ʼo Te ʼu Temi Fuli, ʼe talanoa ki te ʼu puani maʼuhiga ʼo tona maʼuli pea mo tona minisitelio, pea ʼe ina fakahā te ʼuhiga ʼo Sesu. ʼI te ʼosi lau ʼo te tohi, neʼe hage ki niʼihi neʼe nātou maʼu te faigamālie ʼaē ko te kaugā gāue totonu mo ia, mo vaevae tona ʼu mamahi, pea mo mamata ki tona minisitelio.” Fakahā age te ʼuluaki paki ʼi te tohi, ʼaē ʼe tuʼu ai te kupu tāfito. ʼOsi ʼaia pea koutou fakahā age te ʼuluaki palalau, pea koutou lau te lua palakalafe ʼi lalo ʼo te kupu tāfito “Tou ako ke tou ʼiloʼi ia ia, ke fua lelei kia tatou.” Koutou fakahā age te tohi ko tona totogi fakaʼofa ko te falā 400.
3 Peʼe feala ke koutou ʼui age fēnei:
◼ “Lolotoga te temi ʼaenī ʼe manatu te hahaʼi kia Sesu. Kae, ʼi te lahi ʼo te ʼu meʼa kovi ʼe hoko ʼi te mālama, e lagi feʼuiʼaki e niʼihi peʼe tokaga moʼoni koa ia Sesu kia tatou. Koteā koa takotou manatu ʼo ʼuhiga mo te faʼahi ʼaia?” Tou faka fealagia ke fai hana tali. Tou fakahā ake te kapite 24 ʼo te tohi Te Tagata ʼAē ʼe Lahi Tokotahi, pea koutou fakamahino fakanounou ki ai te tupuʼaga ʼo te haʼu ʼa Sesu ki te kele. ʼOsi ʼaia pea tou lau ia Soane 15:13, ʼo tou fakamahino te ʼofa fakamalotoloto ʼo Sesu ki niʼihi. Tou manatuʼi te ʼu nusipepa foʼou, he kaupepa, peʼe ko he kiʼi pepa lotu ke tuku mo kapau ʼe mole ina tali te tohi.
4 Koʼeni he tahi manatu:
◼ “Tokolahi te kau tūpulaga ʼe nātou kumi he faʼifaʼitaki lelei ke nātou mulimuli kiai, kae ʼe faigataʼa te maʼu ʼo te ʼu faʼifaʼitaki lelei. Ko Sesu Kilisito neʼe ina tuku mai he faʼifaʼitaki haohaoa kia tatou fuli. [Lau ia 1 Petelo 2:21.] Ko tona maʼuli katoa neʼe fakatafito ki te tauhi ʼaē ki tana Tāmai ʼe ʼi selo. Koteā tau manatu mokā na pau la neʼe lahi te hahaʼi ʼe faiga ke nātou faʼifaʼitaki ki ai?” Faka fealagia ke fai atu hana tali. Fakaʼaogaʼi te palakalafe 11 ʼo te kapite fakaʼosi ʼo te tohi, ʼaē ʼe talanoa ai ki tona ʼu kalitate makehe. Fakamahino ki ai peʼe feafeaʼi te tokoni ʼa te tohi Te Tagata ʼAē ʼe Lahi Tokotahi kia tatou fuli ke tou liliu ko te kau Kilisitiano ʼe lelei age.
5 ʼE koutou fia fakaʼaogaʼi he manatu fēnei:
◼ “Mokā talanoa he tahi kia Sesu Kilisito, tokolahi ʼe nātou manatu ki ai ohage he kiʼi tamasiʼi peʼe ko he tagata ʼe mamahi ʼi tona temi mate. Ko tanatou ʼiloʼi ia Sesu ʼe gata pe ia ʼi tona tupu pea mo tona mate. Ko te ʼu meʼa taulekaleka ʼaē neʼe talanoa ia kiai pea mo fai lolotoga tona maʼuli ʼe mole nātou tokagaʼi. Ko te meʼa ʼaē neʼe ina fakahoko ʼe ʼi ai tona ʼuhiga kia tatou fuli ʼaē ʼe maʼuli ʼi te kele. Koia la ʼaē ʼe maʼuhiga ai tatatou ako ke lahi te ʼu meʼa ʼe tou ʼiloʼi ʼo ʼuhiga mo te ʼu meʼa fakaofoofo neʼe ina fai maʼa tatou.” Lau ia Soane 17:3. Fakahā age te ʼuluaki pasina ʼo te ʼuluaki palalau ʼo te tohi Te Tagata ʼAē ʼe Lahi Tokotahi, pea tou lau te palakalafe fā. Tou fakahā age te tohi pea tou fakamahino age peʼe feafeaʼi tona fakaʼaogaʼi ki te ako takitokotahi.
6 Tou tokaga ʼo tohi fakalelei ia nātou ʼaē ʼe fia logo pea mo te ʼu tohi ʼaē neʼe tou tufa ke feala ai hatatou fai te ʼu ʼaʼahi. Lolotoga te temi faigamālie ʼaenī, tou faiva ʼo kumi te hahaʼi ʼaē ʼe fakamalotoloto, pea mo tokoni kia nātou ke nātou liliu ko he ʼu tisipulo ʼo totatou Fakamaʼuli, ko Sesu Kilisito.—Mat. 16:24.