Tou Uga Te Hahaʼi Ke Nātou Liliu Ko Tana ʼu Tisipulo
1 Ia 1 Kolonito 3:6, neʼe tohi fēnei e Paulo: “Ko ʼau neʼe ʼau to, ko Apolosi neʼe ina fakavai, kae ko te ʼAtua ʼaē neʼe ina fakatuputupu.” Neʼe fakaʼaogaʼi e Paulo te manatu ʼaenī moʼo tokoniʼi ʼo tona ʼu tēhina ke nātou ʼiloʼi te maʼuhiga ʼo tanatou gāue ʼi te logo tahi ʼo mulimuli ki te pule ʼa Kilisito. ʼI te faʼahi ʼaia neʼe ina tokoniʼi nātou ke nātou leleiʼia te gāue maʼuhiga ʼaē ʼe nātou fai ʼi te gāue to ʼakau pea mo tona fakavai.
2 Ko te gāue hāofaki ʼaia ʼe tonu ke fakaʼosi ʼi te temi ʼaenī. ʼUhi ko tatatou liliu ko te kau Kilisitiano, ʼe tou maʼu te maʼua ʼaē ko te tokoni ki niʼihi ke nātou liliu ko te ʼu tisipulo ʼa Sesu. (Gāue 13:48) E feafeaʼi takotou muliʼi te fia logo ʼa te hahaʼi ʼo uga ia nātou ʼaki te tohi Te Tagata ʼAē ʼe Lahi Tokotahi ʼo Te ʼu Temi Fuli?
3 Kapau ʼe koutou ʼaʼahi he tahi neʼe ina tali te tohi, ʼe feala ke koutou ʼui age:
◼ “ ʼI tatā felogoi talu mai, neʼe tā palalau pe neʼe feafeaʼi te ʼuhiga ʼo Sesu Kilisito. Neʼe ʼau fiafia ʼi te tuku atu ʼo te tohi Te Tagata ʼAē ʼe Lahi Tokotahi ʼo Te ʼu Temi Fuli. Koteā takotou manatu ʼo ʼuhiga mo te fai akonaki ʼa Sesu pea mo tona ʼuhiga tagata?” Tuku ke fai atu hana tali. Fakahā age te kapite 113, pea koutou palalau ki te faʼifaʼitaki taulekaleka ʼo Sesu ʼo ʼuhiga mo te agavaivai. Koutou lau ia Filipe 2:8 ʼo fakahā pe neʼe feafeaʼi te muliʼi e te ʼapositolo ko Paulo ia te agavaivai ʼa Sesu. ʼOsi ʼaia pea koutou fakamahino age ʼe lahi te meʼa ʼe feala ke ina ʼiloʼi ʼaki te ako tuʼumaʼu ʼo te Tohi-Tapu.
4 E lagi ʼe koutou leleiʼia te ʼuluaki palalau ʼaenī:
◼ “Neʼe tā palalau ʼo ʼuhiga mo te ʼu meʼa neʼe fai e Sesu ʼi tana nofo ʼaē ʼi te kele, ʼo hā ʼaki ai tana tokaga moʼoni kia tatou. ʼI takotou manatu koteā te meʼa ka ina fai anai moʼo fakaloto fīmālie ʼo nātou ʼaē ʼe lahi ʼaupito tonatou mamahi?” Tuku ke fai atu hana tali. Koutou fakahā age te kapite 133, pea koutou toe vakaʼi te ʼu manatu ʼo te palakalafe nima. Koutou fakahā ake te paki ʼi te pasina lua, pea koutou fakamahino age ko te meʼa ʼaia ka hoko anai mokā fakahoko te finegalo ʼo te ʼAtua ʼi te kele ohage pe ko tona hoko ʼaē ʼi selo. Koutou fakahā te ʼu fua lelei ʼe tou maʼu mokā lahi tatatou ako.
5 Kapau ko he tahi neʼe mole ina tali te tohi ʼi takotou ʼuluaki palalau, e lagi lelei ke kamata fēnei takotou palalau:
◼ “ ʼE ke loto tahi mo ʼau ʼo ʼuhiga mo te manatu ʼaē ʼe tokolahi te hahaʼi ia ʼaho nei ʼe nātou muliʼi he tahi ʼe ʼui maʼa nātou ko he faʼifaʼitakiʼaga lelei. Ko Sesu Kilisito ʼe ko he faʼifaʼitakiʼaga lelei ki he tahi. ʼE ʼau fia fakahā atu he ako maʼuhiga neʼe ʼau maʼu ʼi taku ako te faʼifaʼitaki neʼe tuku mai e Sesu. [Koutou fakahā te kapite 40 ʼi te tohi Te Tagata ʼAē ʼe Lahi Tokotahi, pea koutou fakatokagaʼi ia ia ki te ako ʼo ʼuhiga mo te manavaʼofa ʼo Sesu.] Ko te manatu ʼaenī neʼe ina fakahā fakamālohi mai, ʼe maʼuhiga ke ʼau fakahā te kalitate ʼaia ki niʼihi.” Lau ia Mateo 5:7. Koutou fakahā te tohi peʼe ko te kaupepa ʼE Tokaga Moʼoni Koa Te ʼAtua Kia Tatou?
6 Peʼe koutou fia fakaʼaogaʼi anai te palalau ʼaenī:
◼ “ ʼI taku haʼu talu mai, neʼe tā palalau ki te maʼuhiga ʼo te ako ʼo ʼuhiga mo Sesu. ʼE ʼui fēnei e Soane 17:3 ko te ‘faka ʼuhiga ʼo te maʼuli heʼegata’ ko te maʼu ʼo te taʼi mālama ʼaia. ʼE lava feafeaʼi hatatou fai te faʼahi ʼaia?” Tuku muʼa ke fai atu hana tali. Ke hoko atu takotou palalau ʼo koutou fakamahino te fakatuʼutuʼu ʼo ʼuhiga mo te ako faka Tohi-Tapu pea e feafeaʼi tona fua lelei kia tatou.
7 ʼE ʼui e Paulo ko he tagata tānaki taʼukai “ ʼe ina maʼu anai tona fakapale ʼo mulimuli pe ki tana gāue.” (1 Ko. 3:8) Kapau ʼe tou faiga mālohi ʼo tokoni ki niʼihi ke nātou liliu ko te ʼu tisipulo ʼa Sesu, ʼe lahi moʼoni anai totatou fakapale.