ʼE Feafeaʼi Te Akoʼi ʼo Te Fānau ʼo ʼUhiga Mo Te ʼAtua?—Koteā Te ʼu Faʼahiga Faiako ʼAē ʼe Fua Lelei Age?

“Ko te ʼu folafola ʼaenī ʼaē ʼe au fakatotonu atu kiā te koe ʼi te ʼaho nei, ʼe tonu anai ke nofo ʼi tou loto; pea ʼe tonu anai ke ke akoʼi ki tou foha pea mo ke talanoa kiai mokā ke heka anai ʼi tou loto fale, mokā ke haʼele anai ʼi te ala, mokā ke takoto anai, pea mokā ke tuʼu ake anai.”—TEUTALONOME 6:6, 7.

ʼI ʼIHI temi, ʼe feala ki te ʼu mātuʼa ke mole natou faʼa ʼiloʼi peʼe feafeaʼi te fakahoko ʼo tonatou maʼua ʼaē ko te akoʼi ʼo tanatou fānau. Kae kā natou kumi tokoni, ʼe mole kei natou ʼiloʼi nātou pe ko te tokoni fea ʼaē kā natou fakaʼaogaʼi, heʼe lahi fau te ʼu tokoni ʼaē ʼe fai age. ʼI te agamāhani ko tonatou fāmili pea mo tonatou ʼu kaumeʼa ʼe natou foimo fakahā age ia tanatou ʼu manatu. ʼI te ʼu tohi, mo te ʼu ʼalatike ʼi te ʼu nusipepa, pea ʼi te Neti, ʼe foaki ai e ni ʼu hahaʼi he tuʼuga tokoni ki te ʼu mātuʼa, pea ʼi ʼihi temi ʼe mole natou felōgoi tahi.

ʼI te tahi faʼahi, ʼe mole foaki pē ʼi te Tohi-Tapu ki te ʼu mātuʼa he ʼu tokoni ʼe tuha mo te falala ʼo ʼuhiga mo te ʼu faʼahi ʼaē ʼe tonu ke natou akoʼi ki tanatou fānau, kae ʼe ina toe foaki mo he takitaki ʼaoga ki tanatou faʼahiga akoʼi ʼo nātou. Ohagē ko tona fakahā ʼi te ʼu vaega ʼi te kamata ʼo te ʼalatike ʼaenī, ʼe ʼaoga ke maʼu e te ʼu mātuʼa he ʼu lakaga ʼi te ʼaho fuli ke natou palalau ai ki tanatou fānau ʼo ʼuhiga mo te ʼAtua. Ko manatu Fakatohi-tapu pē e fā kā tou vakaʼi anai, neʼe tokoni ki te toko lauʼi afe ʼu mātuʼa ke natou akoʼi tanatou fānau ʼo ʼuhiga mo te ʼAtua.

1. Kotou tāʼofi he ʼu ako mai te ʼu meʼa neʼe fakatupu. Neʼe tohi fēnei e te ʼapositolo ko Paulo: “Ko [te] ʼu kalitātē fakapulipuli [ʼo te ʼAtua] ʼe ʼiloga lelei ia talu mai te fakatupu ʼo te mālamanei, koteʼuhi ʼe mahino kiai ʼaki te ʼu meʼa ʼaē kua faʼu, ʼio, tona mālohi heʼegata pea mo tona ʼuhiga ʼAtua.” (Loma 1:20) ʼE feala ke tokoni lahi te ʼu mātuʼa ki tanatou fānau ke natou mahino ʼe feala ke natou felōgoi moʼoni mo te ʼAtua, ʼaki hanatou fakatokagaʼi age te ʼu meʼa ʼaē neʼe fakatupu e te ʼAtua, pea mo natou tokoni ki tanatou fānau ke natou mahino ki te ʼu kalitātē ʼo te ʼAtua ʼaē ʼe hā ʼi tana fakatupu.

Neʼe fakaʼaogaʼi e Sesu te faʼahiga fai ʼaia ʼi tana akoʼi tana ʼu tisipulo. Ohagē lā neʼe ina ʼui fēnei: “Kotou vakavakaʼi lelei te ʼu manulele ʼo te lagi, heʼe mole natou tō magisi, pea ʼe mole natou utu magisi, pea ʼe mole natou tānaki ki he ʼu faleoko; kae fafaga nātou e takotou Tamai ʼaē ʼe ʼi selō. ʼE mole koa lā maʼuhiga age koutou iā nātou?” (Mateo 6:26) ʼI henī neʼe fakamaʼuhigaʼi e Sesu te ʼu kalitātē ʼo Sehova ʼaē ko te ʼofa pea mo te manavaʼofa. Kae neʼe mole gata ai. Neʼe ina tokoni ki tana ʼu tisipulo ke natou fakakaukauʼi pe neʼe fakahā feafeaʼi e te ʼAtua te ʼu kalitātē ʼaia ki tana fānau.

Neʼe palalau te Hau poto ko Salomone ki te poto ʼaē neʼe foaki age e te ʼAtua ki te ʼu foʼi lō, pea neʼe ina fakaʼaogaʼi te ʼu kiʼi manu liliki ʼaia moʼo fakahā lelei te ako maʼuhiga. Neʼe ina tohi fēnei: “ ʼAlu ki te foʼi lō, tagata piko; fakatokagaʼi tona ʼu ala pea ke ke liliu ʼo poto. Logopē lā ʼe mole hona kamutoa, hona ofisie, peʼe ko hona pule, ʼe ina teuteuʼi tana meʼa kai ʼi te temi vela; neʼe ina tānaki tana ʼu meʼa kai ʼi te temi taʼukai.” (Tāʼaga Lea 6:6-8) ʼE ko he faʼahiga fai ʼaia ʼe lelei ʼaupitō moʼo akoʼi te maʼuhiga ʼaē ʼo te fai he ʼu fakatuʼutuʼu lelei, pea mo tou fakaʼaogaʼi te mālohi ʼaē ʼe foaki mai e te ʼAtua moʼona fakahoko!

ʼE feala ke faʼifaʼitakiʼi e te ʼu mātuʼa te faʼahiga faiako lelei ʼaē ʼa Sesu pea mo Salomone ʼi tanatou fai te ʼu faʼahi ʼaenī: (1) Ke natou fehuʼi age ki tanatou fānau pe ko te ʼu fuʼu ʼakau fea pea mo te ʼu manu fea ʼaē ʼe natou leleiʼia. (2) Ke natou fai fakatahi he ʼu kumi ʼo ʼuhiga mo te ʼu fuʼu ʼakau pea mo te ʼu manu ʼaia. (3) Ke natou tāʼofi he ʼu ako ʼo ʼuhiga mo te ʼAtua mai te ʼu meʼa ʼaia neʼe fakatupu.

2. Kotou faʼifaʼitakiʼi te faʼahiga faiako ʼa Sesu. ʼI te hahaʼi fuli pē, neʼe maʼuhiga age te ʼu faʼahi ʼaē neʼe tonu ke palalau kiai Sesu. Kae neʼe lahi age te temi ʼaē neʼe ina fai fehuʼi ai. Neʼe ina fia ʼiloʼi moʼoni te ʼu manatu pea mo te ʼu meʼa ʼi te loto ʼo nātou ʼaē neʼe ina akoʼi. (Mateo 17:24, 25; Maleko 8:27-29) ʼO toe fēia pē, ʼe lahi te ʼu ako maʼuhiga ʼe tonu ke akoʼi e te ʼu mātuʼa ki tanatou fānau. Kae ke ʼi ai hona fua lelei, ʼe ʼaoga ke natou faʼifaʼitakiʼi ia Sesu pea mo natou fakalotomālohiʼi tanatou fānau ke natou fakahā faʼifaʼitaliha te ʼu meʼa ʼaē ʼi tonatou loto.

ʼE feafeaʼi mokā fakahā e te fānau he aga ʼe mole faʼa lelei peʼe mole natou mahino vave ki ʼihi ako maʼuhiga? Kotou fakatokagaʼi pe neʼe feafeaʼi te akoʼi e Sesu tana ʼu ʼapositolo. ʼI ʼihi temi neʼe natou fetalanoaʼaki pea neʼe mole natou mahino vave ki te fua lelei ʼaē ke natou agavaivai. Kae, neʼe faʼa kātaki aipē Sesu pea neʼe liuliuga ia tana palalau ʼaē ki te maʼuhiga ʼo te agavaivai. (Maleko 9:33, 34; Luka 9:46-48; 22:24, 25) Ko te ʼu mātuʼa ʼaē ʼe natou faʼifaʼitakiʼi ia Sesu, ʼe natou fakatonutonuʼi anai tanatou fānau ʼaki te faʼa kātaki, pea mokā ʼe ʼaoga, pea ʼe natou palalau liuliuga anai ki he faʼahi e tahi ʼo aʼu ki tanatou kua mahino kātoa ki tona maʼuhiga.a

3. Kotou akoʼi takotou fānau ʼaki takotou faʼifaʼitaki. ʼE lelei ke fakalogo te ʼu mātuʼa ki te tokoni ʼaē neʼe foaki e te ʼapositolo ko Paulo ki te kau Kilisitiano ʼo Loma. Neʼe ina tohi fēnei kiā nātou: “Kae ko koe ʼaē ʼe ke akonakiʼi te hahaʼi kehe, ʼe mole ke akonakiʼi koe ia koe totonu? Ia koe ʼaē ʼe ke fakamafola ‘ ʼAua naʼa ke kaihaʼa,’ ʼe ke kaihaʼa koe?”—Loma 2:21.

ʼE ʼaoga te tokoni ʼaia heʼe malave lahi age ki te fānau te ʼu meʼa ʼaē ʼe fai e tanatou ʼu mātuʼa ʼi te ʼu meʼa ʼaē ʼe natou ʼui. ʼI tona fakahagatonu, ko te ʼu mātuʼa ʼaē ʼe natou maʼuliʼi te ʼu faʼahi ʼaē ʼe natou akoʼi, ʼe hā mai ai ʼe fakalogo lahi age tanatou fānau ki te ʼu faʼahi ʼaē ʼe akoʼi age e tanatou ʼu mātuʼa.

4. Kotou kamata akoʼi te tamasiʼi ʼi tana kei veliveli. Ko Timoteo, ʼaē neʼe kaugā gāue misionea mo Paulo, neʼe lau tona lelei ʼi tona kolo. (Gāue 16:1, 2) Neʼe tupu he neʼe akoʼi age ki ai ‘talu mai tana kei veliveli te ʼu tohi taputapu.’ Ko te faʼē pea mo te kui ʼa Timoteo neʼe mole nā lau pē ki ai te Tohi-Tapu, kae neʼe nā toe tokoni ki ai ke ina fakakaukauʼi te ʼu moʼoni ʼaē neʼe tuʼu ʼi te ʼu tohi ʼaia.—2 Timoteo 1:5; 3:14, 15.

ʼE Kotou Lava Maʼu Tokoni Mai Fea?

ʼE tā e te kau Fakamoʼoni ʼa Sehova he ʼu tuʼuga tohi neʼe fai tāfito moʼo tokoni ki te ʼu mātuʼa, ke natou akoʼi ki tanatou fānau te moʼoni ʼo ʼuhiga mo te ʼAtua. Ko ʼihi ʼi te ʼu tohi ʼaia neʼe tohi tāfito moʼo tokoni ki te fānau ʼaē ʼe kei liliki. Pea ko ʼihi tohi ʼe feala ke tokoni ki te ʼu mātuʼa pea mo tanatou fānau tūpulaga, ke natou haga fefelogoiʼaki faʼifaʼitaliha.b

ʼE moʼoni, ʼi muʼa ʼo te lava akoʼi e te ʼu mātuʼa tanatou fānau ʼo ʼuhiga mo te ʼAtua, ʼe ʼaoga ke natou ʼiloʼi te ʼu tali ki te ʼu fehuʼi faigataʼa ʼaē ʼe feala ke lagaʼi e tanatou fānau. Ohagē lā, koteā anai takotou tali ki te ʼu taʼi fehuʼi ʼaenī: He koʼē koa ʼe fakagafua e te ʼAtua te ʼu mamahi? Koteā te fakatuʼutuʼu ʼa te ʼAtua ʼo ʼuhiga mo te kele? ʼE ʼifea koa te kau mate? ʼE fiafia anai te kau Fakamoʼoni ʼa Sehova ʼi te tokoni atu ke kotou ʼiloʼi te ʼu tali ki te ʼu fehuʼi ʼaia, pea mo ʼihi atu ʼu fehuʼi, ke feala ai kiā koutou mo tokotou fāmili ke kotou fakaovi ki te ʼAtua.—Sake 4:8.

[ʼU nota]